Dual Panel1Orna egens ongga ofoka Ananias jera efen mohona Safira gohu gegan mebi.
2Noba fifi ongga goga gesma jeska mebi insa koma bera goga gedemi oknama noba Ananias orka oknama skoita Yesus efen ruforoker noba eita gu rua. Beda ofa agot gu rua oida, "Kef bera fifi ongga mebi efen ofou nomnaga."
3Beda Petrus agot gu Ananias oida, "Teinefo fogora bua buh budou efesi gu Bilis fogora bucuwei mar gu Efena Ebsi Allah erek komo? Bua banggot oida bua bita mebi efen ofou nomnaga fob, tina ongga tenten bera bua bindemi fifi oknama nou bisinsa fob!
4Gij mona ongga bua bunohu bebin mebi enesi, bera mebi koma ah gu bua ros. Noba gij mona ongga bua buhu mebi insa koma fob, beda fifi ongga rirengk mebi koma tein bua bebin ros. Tina teinefo fogora bua busujohu gij budou efesi rot oida bumorokrusa memef erek komo? Bua busujohu oida bucuwei mar gu rusnok ojgomu! Tina ongga tenten bera bua bucuwei mar gu Allah fob!"
5Nou ongga Ananias eg mar ongga Petrus enagot insa koma fob, beda ainsa koma tein ofa agos noba esma gu mebi. Beda ruforoka rifes rin noba rira meifeti ruround Ananias efaga noba rurka ofa jah moksu. Beda gij mona ongga rusnok enjgineg ringg osok gij mar insa koma fob beda rua rimeesa rot Allah efen owesa efek.
6(5:5)
7Erek aras orgomu deika, beda Ananias efen mohona oira jah suma tein. Ofa enejginaga rot oida efen mahina agos fob enesi.
8Beda Petrus ejeka gu ofa oida, "Fifi kef ongga bua jera bebin ahwina gesma jeska mebi ongga gonghu fob bera nomnaga insa kef ei?" Beda ofa oroun oida, "Tenten, fifi koma bera nomnaga insa koma."
9Beda Petrus agot gu ofa oida, "Teinefo fogora bua jera ahwina godou egens nou gocuwei mar gu Efena Ebsi Tuhan erek komo. Koma erek goga gereneni Tuhan ojgomu. Bua big rusnok ruga koma ongga rimen ei? Koma bera ruforoka rifes ongga rurka bebin ahwina jah mebah noba risah ofa gij moksu fob. Rua ruksons noba ebeibeyaif rua rumorka bua tein jah moksu si!"
10Nou ongga Safira eg mar ongga Petrus enagot insa koma ros, beda ainsa koma tein ofa agos noba esma gu mebi jah Petrus odou. Nou ongga ruforoka rifes insa koma rinsaga fob beda rua rik, tina Ananias efen mohona Safira tein agos fob. Jefeda rua rurka ofa efen efaga jah odog noba risah ofa desi mahina efaga tein.
11Erek koma jefeda rusnok nomnaga ongga ruroru Yesus jera rusnok enjgineg tein ringg osok gij mar insa koma. Beda rua rudou oubsaha noba rimeesa eteb rot Allah efen owesa efek tein.
12Yesus efen ruforoker insa koma runtunggom mar onswos ofoukou jah gu rusnok rifekesa. Jefeda rusnok rudou oubsaha eteb rot. Noba rusnok nomnaga ongga ruroru Yesus fob rumohoturuma jera rudou egens gij momas ongga angh rejrej Mod Allah. Rusnok Yahudi rijeka momas koma efen ofoka Salomo.
13Noba rusnok enjgineg ongga runororu Yesus enesi bera rimeesa rumoira jera rua. Tina rusnok rudou oufamofa skoita rua insa koma ongga ruroru Yesus fob.
14Noba orofosut mona bera rusnok rufoukou ruroru Yesus oga fogora ruira jera rusnok ongga Yesus efen erek rugun odudu dokun deika.
15Yesus efen ruforoker runtunggom mar onswos ofoukou fob, jefeda rusnok enjgineg rurka mofka rot rua ongga marenir jah moroju efembra. Rua rutunggom erek koma jeska rua rusujohu oida erek Petrus omoira jah suma, noba ofa efena orka rusnok ongga marenir insa koma, beda rua rimeita eskeira si.
16Rusnok rin jeska monuh ofoukou ongga angh rejrej Yerusalem odudu dokun deika. Rua rurka rusnok ongga marenir jera rusnok ongga efena ofogog oira gij rudou efesi. Beda rua insa koma nomnaga rita eskeira fob.
17Ruforoker rita mar onswos erek insa koma ojgomuja onjoros ebirfaga imam-imam ongga ofoka aksa jera j jera efen rusnok jeska ebic Saduki rudou ejisei rot ruforoker koma fogora rudou ofogog skoita rua tein.
18Jefeda rua ragei ruforoker noba raha rua gij mod oskusk.
19Tina nou motu, beda malaikat egens jeska Allah ohoda montoj mod oskusk insa koma noba oroun Yesus efen ruforoker jah mebah. Beda malaikat egens koma agot gu rua oida,
20"Iwa ija jah momas ongga angh rejrej Mod Allah noba ifesij gu rusnok nomnaga osok gij Allah oga ongga eita eiteij ah ongga efeinah gu rusnok."
21Beda ruforoker koma ruroru erek malaikat egens koma agot gu rua. Nou rahah tenten beda rua ruira momas insa koma noba rua ruftuftu rusnok jah suma. Gij mona insa koma ebirfaga imam egens insa koma jera efen rusnok rinsaga jah suma, beda rumohoturuma jera ebirfager Yahudi nomnaga. Beda rua rubk rusnok jah mod oskusk jeskaseda ruroun ruforoker skoita rua.
22Jefeda rusnok koma rija jah mod oskusk. Nou ongga rua runjowa jah suma, beda rua rik, tina ruforoker rineker jah suma deika guri. Jefeda rua ruksons noba rifesij rot mar insa koma gu ebirfager insa koma nomnaga.
23Rua ragot gu ebirfager koma oida, "Memef mensaga gu mod oskusk fob, noba memef mek oida montoj mod oskusk of joug ahais ros. Noba tentarer ongga runt joug mod oskusk bera runot joug montoj insa koma ros. Noba memef mohoda montoj koma, tina rusnok egens ai tein eneker gij mer efesi koma deika guru!"
24Nou ongga ebirfaga tentarer jera ebirfager imam-imam ringg mar insa koma fob, beda rua rudou eineina gij. Noba rua rijekjeka rudou rot mar okum ongga emen skoita rua rot.
25Ainsa koma beda orna egens esaga jah suma noba agot gu ebirfager koma nomnaga oida, "Akeineri, iwa ig, jeska rusnok ongga iwa yangha gij mod oskusk neeka fob bera ebeibeyaif riker gu momas ongga angh rejrej Mod Allah. Noba rua ruftuftu rusnok riskembemba gij suma tein!"
26Jefeda ebirfager tentarer eja jera efen rusnok jah suma noba ruroun Yesus efen ruforoker sons. Tina rua rinagot mar rot ruga ahais skoita ruforoker koma guru, jeska rua rimeesa rot oida rusnok riskemba jah suma rumotkonu oska fogora rimera mamu rimeredi rua.
27Rua rurka Yesus efen ruforoker skoita ebirfager insa koma. Beda ebirfaga imam-imam egens ongga ofoka aksa ejeka joug rua.
28Ofa agot gu rua oida, "Memef meyahehir joug iwa rot oida iwa inefesij mar osok gij osnok egens ongga ofoka Yesus deika guru. Tina ebeibeyaif iwa inororu mefmen moga guri! Noba iwa imfesij mar osok gij Yesus koma rejrej kota Yerusalem nomnaga fobo! Noba iwa tein yucuwei mar gij memef oida memef bera ongga manggob osnok egens koma ongga injeka ofoka Yesus fogora Ofa agos."
29Beda Petrus jera efen mohujir enjgineg tein ragot oida, "Memef mororu mar ongga Allah anggot rot gu memef fob ojgomu. Memef monororu mar ongga oska ongga iwa yanggot rot guru.
30Yesus, ongga iwa intob tumu mega salib erek osnok egens ongga ofogog, Ofa bera endebecki jeska agos fob. Noba mar ongga Ofa ontunggom koma oisouska owesa efek jeska Allah ongga mifmin mimower runggif gu sis fob.
31Beda Allah eita owesa efek eteb gu Ofa jera ofoka ongga aksa tein. Ofa esma mar insa koma jeskaseda ofoka ereij keingg rusnok noba eita eiteij ah ongga efeinah gu rusnok tein. Ofa ontunggom erek koma jeskaseda erek mimif ongga Israel mimeesa joug mifmin mar ongga oska, beda Ofa omosuna rot mifmin mar ongga oska insa koma jeska mudou efesi tein.
32Memef mefesij rot mar ongga memef mengk gu mesinsa meiteij fob. Noba Efena Ebsi Allah oncunc rot mar insa koma gij rusnok rudou efesi ongga ruroru Yesus efen oga fob. Noba Allah tein omobk Efena Ebsi gu rusnok ongga ruroru efen Oga rot tenten."
33Nou ongga ebirfager insa koma nomnaga ringg mar koma fob, beda rua rutkonu oska eteb skoita Yesus efen ruforoker. Jefeda rua rudou egens nou ranggob ruforoker koma ojgomu.
34Tina osnok egens ongga ofoka Gamaliel bera eker gu ebirfager koma rifekesa tein. Ofa bera erek Guru agama egens jeska ebic Farisi noba rusnok nomnaga rugif gu ofa erek eteb. Ofa ot noba obk rusnok jeskaseda ruroun ruforoker insa koma jah mebah.
35Beda ofa agot gu ebirfager insa koma nomnaga oida, "Akeineri ongga Israel! Iwa isujohu rot iskusk osok gij mar meidu ongga iwa idou os itunggom skoita ruforoker koma.
36Jeska sis fob osnok egens ongga ofoka Teudas ofra esinsa ofoka erek eteb. Noba rusnok rufok wuntin tohkuru ruroru ofa erek rerin ebirfaga. Noba ofa ois mosuruk skoita raja Kaisar, tina Kaisar efen tentarer ragob ofa ojgomu. Noba efen rusnok ruksons jah rerin monuh egens egens. Noba mar ongga rumois mosuruk rot insa koma bera ejeseiseifa ojgomu.
37Gij mona ongga Gubernur ofosuit rusnok rufoka nomnaga ongga ofa ofoka ereij keingg, beda osnok egens ongga ofoka Yudas jeska monuh Galilea ofra esinsa ofoka erek aksa. Noba ofa efen rusnok riskemba ongga ororu ofa gij mona insa koma. Ofa tein ois mosuruk skoita raja Kaisar, tina ofa tein agos noba efen rusnok ruksons gu rerin monuh egens egens.
38Jefeda didif disisi joug iwa jeskaseda iwa inotunggom mar egema tein skoita ruforoker insa koma guru. Iwa iajga joug rua ojgomu. Jeska erek mar kef ongga rua rutunggom noba ruftuftu rot bera en jeska rusnok ojgomu, beda mar koma emeja eseiseifa si.
39Tina erek mar ongga rua ruftuftu rot bera en jeska Allah, beda enadaij nou mimif mukoja mar ongga Allah ocosu rot guru. Jeska koma erek mimif miretei rot Allah!"
40Ebirfager enjgineg insa koma ruitij rot mar ongga Gamaliel anggot gu rua, jefeda rua ruitij oida rinagob Yesus efen ruforoker guru. Beda rua ruroun ruforoker insa koma sons, noba rangha rua rot ahais. Beda rua ragot joug oida, "Iwa inefesij mar osok gij Yesus ofoka deika guru!" Beda rua rubk ruforoker koma jeska.
41Yesus efen Ruforoker insa koma rija rot rudou ongga efaga ouka eteb, jeska Allah oncunc rua erek rusnok ongga rita efera okora morototuma erek Yesus eita efera okora sis fob.
42Noba gij orofosut mona bera rua rija jah momas ongga angh rejrej Mod Allah jera mod enjgineg ongga rusnok rerin jeskaseda ruftuftu noba rifesij mar osok gij Allah oga ongga oufamofa. Rua ragot oida, "Yesus bera Kristus egens koma ongga Allah anggot eimofoj rot emen nou eita eiteij ah ongga efeinah gu rusnok."