Dual Panel1Didif Paulus, bera ongga dunogu surat egens kef. Noba mifmin muhuj Timotius bera ongga ofij didif jah sif. Noba didif bera dinja erek Yesus Kristus efen rasul egens oisouska Allah odou ejginaga rot. Noba didif disa surat egens kef skoita iwa ongga irek dedin edohujir gij kota Kolose. Iwa bera irek rusnok ongga rerin rudou efesi ongga ebsi komowa noba ongga ruroru Yesus Kristus rot tenten ojgomuja. Memef mom meiteij gu mifmin mika Allah jeskaseda Ofa eita oufamofa eteb gu iwa noba eita eiteij ah ongga eskeiramera tein gu iwa.
2(1:1)
3Gij orofosut mona ongga memef mom meiteij nou iwa bera memef mois oufamofa eteb gu mifmin mika Allah ongga Yesus Kristus efen meka.
4Erek koma jeska memef meg rot oida iwa iroru Tuhan Yesus Kristus rot tenten fob, noba oida iwa idou okora rot Allah efen rusnok enjgineg tein ojgomuja.
5Iwa intunggom mar erek koma jeska iwa insejah idou efesi rot yeyin ifons ongga Allah ensejah nou iwa jah gu mebaga fob. Iwa ingg mar osok gij ifons insa koma gij mona ongga iwa inroru Yesus efen oga ongga oufamofa fob.
6Jeska sis fob rusnok rin skoita iwa noba rimfesij rot Yesus oga ongga oufamofa gu iwa, erek rusnok rimfesij rot Yesus oga ongga oufamofa gij monuh enjgineg tein. Jefeda ebeibeyaif rusnok rufoukou gij monuh insa koma nomnaga bera ruroru mar ongga oufamofa ojgomu. Mar koma bera erek iwa tein intunggom gij mona ongga iwa ingg rot Allah efen oga ongga tenten osok gij Yesus Kristus fob. Gij mona insa koma bera iwa tein ita idou ongga ebriyi gij rot teinefa Allah oncunc efen odou ongga oufamofa skoita rusnok ongga rutunggom mar ongga oska fob.
7Iwa ingg rot Yesus oga ongga oufamofa insa koma jeska mifmin muhuj Epafras sismeni fob. Ofa tein bera erek osnok egens ongga efarur nou Yesus Kristus morototuma jera memef jeskaseda ofij iwa. Noba ofa bera ongga mimif nomnaga mudou okora rot tein.
8Ofa emfesij gu memef fob oida idou omokorema oisouska Efena Ebsi ongga engker gij idou efesi ojgomuja.
9Erek koma jefeda askesi mona ongga memef mengg rot mar insa koma onjoros mona deisef tein bera memef mom meiteij gu Allah nou iwa ojgomuja. Memef mom meiteij gu Ofa jeskaseda Ofa ofij iwa fogora idou emebriyi gij rot mar ongga Ofa odou os rot. Beda oisouska Efena Ebsi bera iwa idou os rot mar insa koma nomnaga tein.
10Noba memef mom meiteij erek koma jeskaseda iwa tein ita mar ongga oufamofa erek rusnok ongga ruroru Tuhan efen oga rot tenten ni, noba jeskaseda Ofa emeita odou ongga eskeiramera eteb rot iwa ni, noba jeskaseda iwa ita mar ongga oufamofa ni, noba jeskaseda idou ejginaga rot mar ongga Allah ondou os rot erek ogun odudu deika ni,
11noba jeskaseda iwa isma owesa efek eteb oisouska Ofa efen owesa efek eteb ni, noba jeskaseda iwa yuin keingg idou efesi noba yut rot ahais tein gij mar nomnaga ni, noba jeskaseda yeyin idou efesi tein bera emefaga ouka rot mifmin Tuhan ojgomuja ni.
12Beda iwa imois oufamofa eteb gu Allah jeska Ofa oncunc iwa jeskaseda isma ifons ongga Ofa ensejah nou efen rusnok nomnaga gu mebaga ojgomu fob. Ofa Ofoka ereij keingg mar nomnaga jah suma rot odou ongga efesis eteb tein.
13Erek koma jeska Allah onskotu mimif jeska Bilis ongga ofoka ereij keingg rusnok nomnaga ongga ringker gij motkobah ros. Beda Ofa oroun mimif skoita efen efesa Yesus Kristus ongga Ofa odou okora eteb rot. Jefeda ebeibeyaif Yesus bera ongga ofoka ereij keingg mimif fob.
14Noba oisouska Yesus ongga agos tumu mega salib nou mimif fob, bera Allah onsuwa mimif jeska mifmin mar ongga oska fogora osuna rot mar insa koma jeska mudou efesi tein fob.
15Rusnok rinek Allah gu riteij jinaga guru. Tina Yesus Kristus bera erek orocunc jeni rot Allah nou rusnok nomnaga. Noba Yesus bera eker morototuma jera Allah gij mona ongga sismeni fob.
16Jeska oisouska Ofa bera Allah ontunggom mar nomnaga ongga angh gu mebaga jera mar nomnaga ongga angh gu mebif tein. Ofa ontunggom mar nomnaga ongga mimif minek gu miteij guru jera mar nomnaga ongga mimif mik gu miteij tein ni. Ofa bera ongga ontunggom rifena ongga efen owesa efek ni, ongga rufoka ereij keingg mar ni, noba ongga rerin rufoka aksa tein ni. Ofa ontunggom mar insa koma nomnaga oisouska Yesus jeskaseda Yesus bera esma ofoka ongga aksa ekirsa jeska mar nomnaga.
17Erek koma jeska Yesus bera engker rot sismeni jeska mar insa koma nomnaga. Noba mar insa koma nomnaga ein tumu efen owesa efek jeskaseda riker tein.
18Noba Ofa bera erek ebirfaga ongga ofoka ereij keingg rusnok Mod Ari nomnaga. Jeska oisouska Ofa bera rusnok Mod Ari nomnaga risma eiteij ah ongga efeinah. Erek koma jeska Ofa bera ongga endebecki rot sismeni jeska rusnok nomnaga ongga ranggos fob. Ofa endebecki rot sismeni erek koma jeskaseda Ofa esinsiyai emeita ofoka ongga aksa ekirsa jeska mar nomnaga.
19Ofa bera ongga ocunc rot Allah erek jeni tein. Noba Allah odou os rot oida mar nomnaga ongga Ofa odou ejginaga rot bera ah gij Yesus efen odou efesi tein.
20Noba Allah oga ojga rot oida oisouska Yesus bera Ofa omoroun mar nomnaga ongga angh gu mebaga jera mebif tein sons skoita Ofa. Noba oisouska Yesus efen ogufu ongga eyah tumu mega salib bera Allah eita odou efesi ongga eskeiramera rot sons skoita mar nomnaga ongga angh gu mebaga jera mebif tein.
21Sis fob bera iwa iker erek yesmes jeska Allah. Noba mar ofogog ongga angh gij idou efesi bera ongga orotunggom iwa erek ofogog ahah Allah eiteij tein.
22Erek koma tina, oisouska Allah efen efesa ongga agos tumu mega salib fob bera Ofa oroun mimif nomnaga sons skoita Ofa fob. Ofa otunggom erek koma jeskaseda oroun iwa skoita Ofa rot idou ongga ebsi komowa, noba jeskaseda enadaij nou rusnok enjgineg rucunc iwa erek rusnok ongga rerin mar ongga oska ros jinaga guru.
23Jefeda iwa iroru Yesus Kristus efen oga rot ahais ojgomu. Noba erek idou eneineina gij rot tein guru, tina iwa yuisum gij oga ongga oufamofa insa koma ojgomuja, beda iwa imesma idou ongga ebsi komowa si. Oga ongga oufamofa insa kef bera ongga iwa ingg rot sis fob. Noba oga ongga oufamofa insa kef bera ongga rusnok runjoftuftu gu rusnok ongga ringker gij monuh ofoukou fob. Noba didif bera direk osnok egens ongga ofij Yesus Kristus rot oga ongga oufamofa insa koma tein.
24Ebeibeyaif didif dudou erirei eteb ojgomu jeska didif difera okora nou iwa ongga rusnok Mod Ari. Noba oisouska koma bera didif dita difera okora gij mar ongga Yesus Kristus tein eita efera okora gij nou efen rusnok Mod Ari sis fob. Noba rusnok Mod Ari insa koma bera erek Ofa esinsa efen efaga tein. Noba mar ongga didif duntunggom ongga ereita difera okora rot bera doida omoisa fob.
25Sis fob bera Allah oncunc didif jeskaseda dufij efen rusnok Mod Ari nomnaga fogora duftuftu mar osok gij efen oga ongga oufamofa rot ongkas gu iwa tein ongga irek Yahudi guru.
26Noba sis dojunmeni fob onjoros deisef tein bera oga ongga oufamofa insa koma ah jejema jeska rusnok nomnaga. Tina ebeibeyaif Allah oncunc rot efen oga insa koma gu efen rusnok fob.
27Allah oga ojga rot oida Ofa omocunc rot efen oga insa koma ongga angh jejema sis fob skoita rusnok erek iwa tein ongga Yahudi guru. Noba oga insa koma bera agot rot oida rusnok ongga Yahudi guru tein rimesma oufamofa eteb jeska Allah si. Iwa ongga Yahudi guru tein imeja erek egens morototuma jera Yesus Kristus tein. Noba oisouska idou ongga egens jera Yesus Kristus fob bera iwa yuisum gij mar ongga oufamofa eteb ongga Allah emeita gu iwa tein.
28Memef moftuftu mar osok gij Yesus Kristus gu rusnok ebic nomnaga tein. Memef moftuftu jera meisisi joug rua oisouska modou ongga efesis rot jeskaseda moroun rua skoita Allah fogora rua tein rita rudou ongga ebriyi gij fob. Beda rua tein rija erek egens jera Ofa tein.
29Noba didif duh dudou efesi rot ahais beda dug dijmeg gij ojgomuja oisouska Yesus Kristus efen owesa efek ongga angh gu dudou efesi.