Dual Panel1Rusnok rufoukou doska rimeradgoduma jeskaseda riajga Yesus. Beda Yesus agot gu efen ruforoker oida, "Iwa yut joug idou rot rua ongga Farisi, jeska rua rineita mar jeni ongga rua risinsa ruftuftu rot gu rua enjgineg tein jinaga guru. Koma bera erek roti efed ongga orok mokcin roti nomnaga.
2Jeska mar ongga oska ongga rusnok ridemdemi ebeibeyaif bera emah rot tomnomna gu rusnok nomnaga gij mona kahma si.
3Noba mar ongga iwa yanggot erek wuswus nou motu bera rusnok nomnaga rimeg rot gij mona ongga efeinah deika si. Noba mar ongga iwa yanggot ohuhunu gu rusnok gij rusu efesi bera rimagot rot tomnomna gu rusnok nomnaga gij mona kahma si."
4Beda Yesus agot deika oida, "Iwa inemeesa rot rusnok ongga rerin owesa efek jeskaseda ragob iwa guru. Jeska enadaij nou rua rutunggom mar ongga ekirsa jeska koma gu iwa deika guru.
5Tina ongga tenten bera, iwa imeesa rot Allah ojgomu. Jeska gij mona ongga rusnok ranggos fob, beda Ofa efen owesa efek adaij jeskaseda eij rerin rifena gij mahmei meren ojgomuja. Jefeda iwa imeesa rot Allah ojgomu.
6Rusnok ruhu mem cucurwahi efaga cinja fogora rirengk rot fifi ongga oskiyai. Erek koma, tina Allah ejginaga rot mem ofokai insa koma nomnaga erek jeni fob.
7Noba Ofa tein ejginaga rot yeyin ibir efeji nomnaga ongga angh tumu iwa. Jefeda iwa inemeesa guru, jeska ahah Allah eiteij bera iwa erek ofoufem ekirsa jeska mem cucurwahi insa koma ojgomu!"
8Beda Yesus agot deika oida, "Erek osnok egens agot jah rusnok rudou oida ofa bera erek dedin osnok egens, beda Didif, Rusnok Efesa tein, dimagot jah Allah efen malaikat-malaikat rufoukou rudou rot oida ofa bera erek dedin osnok egens si.
9Tina, erek osnok egens orot keingging gu rusnok rudou rot oida ofa enerek dedin osnok egens guru, beda Didif tein dumorot keingging gu Allah efen malaikat-malaikat rudou rot oida ofa enerek dedin osnok egens jinaga guru.
10Noba erek rusnok ragot mar ongga oska rot Didif, Rusnok Efesa, beda adaij nou Allah osuna rot rerin mar ongga oska koma jeska rudou efesi ojgomu. Tina erek rusnok ragot mar ongga oska rot Efena Ebsi Allah, beda Allah onosuna rot rerin mar ongga egens insa koma jeska rudou efesi jinaga guru.
11Noba gij mona ongga rusnok rikris iwa skoita ebirfaga monuh, era skoita ebirfaga mod ongga rusnok rum riteij gu Allah gij, era skoita ebirfager enjgineg tein jeska iwa iroru Didif fob, beda iwa inejeka idou efesi rot mar ongga iwa imagot rot isinsa gu rua guru.
12Jeska gij mona insa koma bera Efena Ebsi omoftuftu iwa gij idou efesi rot mar ongga imagot gu rua si."
13Osnok egens ongga ot gu rusnok insa koma rifekesa ois gu Yesus oida, "Akeina Guru, bubk dedin edkora jeskaseda ofa ekeba mareibra ongga maka anggos jeska egema gu didif ojgomu foga."
14Beda Yesus oroun gu ofa oida, "Edohuj, rusnok egema tein bera runocunc Didif jeskaseda dut deismos gu gefekesa rot gegan mareibra koma guru."
15Beda Yesus agot gu rusnok rufoukou jah suma oida, "Iwa yut joug idou efesi jeskaseda idou enesma keingg mareibra ofoukou guru. Jeska osnok egens enesma eiteij ah ongga oufamofa oisouska efen mareibra ofoukou ongga ofa ohoturu fob guru."
16Beda Yesus efesij rot mar ongga orocunc erek kef oida, "Orna mei ahtah egens efen mekeni egens ongga eteb doska noba ofa esma maat efek ofoukou jeska mekeni egens koma.
17Beda ofa osujohu gij odou efesi rot oida, 'Maat ofoukou dedin kef bera dimesah sinefo?'
18Ofa osujohu rot mar insa koma fogora oga eris rot mar erek kef oida, 'Didif dumohoda dedin mod egens ongga dinsah dedin maat gij fob ojgomu. Beda didif dimei mod egens ongga eteb ekirsa fogora disah dedin maat jera mareibra ofoukou gij ojgomu.'
19Beda ofa osujohu gij efen odou efesi deika oida, 'Ebeibeyaif dedin maat jera mareibra ongga erek adaij nou fogora diker rot ongkoskamoka gij tahun ofoukou deika si.'
20Tina Allah agot gu ofa oida, 'Bua budou osumsumu eteb rot ros! Jeska gij motu insa kef bera bua bimagos ojgomu. Jefeda mar ofoukou ongga bua buhoturu nou bisinsa fob bera emah gu rusnok enjgineg ojgomu.'
21Jefeda rusnok nomnaga ongga ruhoturu mar ofoukou nou risinsiyai ojgomu bera rimek mar erek osnok egens koma ojgomu si. Jeska ahah Allah eiteij bera rerin mar ofoukou insa koma onofij rua jinaga guru."
22Beda Yesus agot deika oida, "Erek koma jefeda, Didif dudou os dagot gu iwa oida enadaij nou iwa ijekjeka idou efesi rot maat ongga imet era mei ongga imej jeskaseda ifena ebah ojgomuja guru. Noba iwa inejekjeka idou efesi rot meisoufa ongga imergi tein guru.
23Jeska mar enjgineg gij yeyin iteij ah kef bera ofoufem ekirsa jeska maat ongga imet. Noba mar enjgineg nou yeyin ifaga bera ofoufem ekirsa jeska meisoufa ongga imergi tein.
24Iwa isujohu rot mem ongga ofu gu mebaga esda. Mem insa koma rinerefa maat gij mekeni guru. Noba mem runohoturu maat gij rerin mod tein guru. Tina yeyin Ika ongga eker gu mebaga bera ot joug rua ojgomuja. Jefeda mem koma rit maat orofosut mona. Noba ahah Allah eiteij bera iwa erek ofoufem ekirsa jeska mem insa koma ojgomu.
25Noba erek iwa ijekjeka idou efesi rot mar insa koma ojgomuja, beda koma onofij iwa jeskaseda ifena ebah rot mona ongga ekirsa jinaga guru.
26Enadaij nou iwa itunggom mar erek insa koma jinaga guru. Jefeda iwa inejekjeka idou efesi rot mar egema tein guru.
27Iwa isujohu rot marfok ongga ah gu mektah. Marfok insa koma enefarur gij mar guru. Noba marfok koma eneb meisoufa nou esinsa guru. Raja Salomo bera efen mareibra ofoukou doska. Noba ofa efen meisoufa ongga erek ongkoska eteb tein. Tina marfok insa koma bera erek ongkoska eteb ekirsa jeska raja Salomo efen meisoufa insa koma ojgomu.
28Allah bera ongga ot joug mosodum ongga ah gu mektah tein. Noba mosodum insa koma bera ah gij mona ongga estir ojgomu. Beda ris mah gij mosodum koma fogora eribseb noba eseiseifa ojgomu. Jefeda Ofa omot joug iwa erek ahais ekirsa ojgomu. Tina iwa idou onororu mar insa koma rot tenten enesi.
29Jefeda iwa inejekjeka idou efesi rot mar ongga imet era mar ongga iwa imej guru. Iwa idou enefeneinei rot mar egema tein guru.
30Jeska rusnok ongga runororu Allah guru bera ruhca mar erek koma ojgomuja. Tina yeyin ika Allah bera ejginaga rot oida iwa icosu rot mar insa koma fob ojgomu.
31Jefeda ongga oufamofa eteb bera, iwa iroru mar ongga Allah odou os rot ojgomu, beda Ofa emeita mar insa koma nomnaga gu iwa si."
32Erek koma beda Yesus agot deika oida, "Iwa bera irek domba-domba ongga Allah ot joug. Jefeda iwa inemeesa rot mar egema tein guru. Jeska oisouska efen odou ongga eskeiramera rot iwa bera Ofa odou os eita eiteij ah ongga efeinah gu iwa gu mebaga.
33Jefeda iwa yuhu yeyin mareibra ojgomu. Noba fifi ongga imesma jeska mar insa koma bera ikeba gu rusnok ongga rufojingki tein. Beda iwa imesah mareibra ofoukou gu mebaga. Jah suma bera mareibra ah aibin rot ojgomuja. Jeska mareibra ongga angh gu mebif bera rusnok rukoreka ojgomu noba magjir tein et fogora eseiseifa.
34Jeska rusnok ongga ruhoturu mareibra ofoukou gu mebif bera rusujohu rot mar ongga mebif efen ojgomuja. Tina rusnok ongga ruhoturu mareibra gu mebaga, beda rua rusujohu rot mar ongga mebaga efen ojgomuja."
35Beda Yesus agot deika oida, "Iwa yut joug rot iskusk jeskaseda iwa insejah nou yufij yeyin ebirfaga gij mona ongga ofa ensaga keingg iwa fob. Iwa isejah yeyin meisoufa ongga imergi, noba ris mah gij yeyin lampu jeskaseda eisa ojgomuja.
36Koma erek rusnok ongga rufij rerin ebirfaga egens. Rua rut joug rot mona ongga ofa oksons en jeska monuh egema ongga rusnok ruina maat keingg gosnok ongga gomoskotuma. Nou ongga ofa ensaga gu efen mod noba engkik montoj, beda rua ongga rufij ebirfaga egens koma ruhoda montoj jeska ofa rot ebeirens.
37Erek ofa ek, tina rua rut joug noba rinsejah nou rufij ofa ojgomu. Jefeda ongga tenten bera, ebirfaga egens koma emergi meisoufa erek rua ongga rufij fogora omobk efen ruforoker insa koma jeskaseda riker gu meja. Beda ofa emecka maat gu rua tein si.
38Jefeda oufamofa eteb rot rusnok ongga rumfij rerin ebirfaga egens insa koma. Jeska erek ofa en gu motu fob, era gu motu deis fob, tina rua riker joug rot ofa ros, beda rua rimesma oufamofa eteb jeska ofa si.
39Tina ongga tenten bera, erek osnok egens ejginaga rot mona ongga rusnok ongga rukoreka mar rimen skoita efen mod, beda ofa omot joug rot iskusk jeskaseda rua runoira gij efen mod guru.
40Erek koma jefeda iwa tein yut joug idou efesi rot iskusk, jeska iwa inejginaga rot mona ongga Didif, Rusnok Efesa, bera dumoksons en guru."
41Beda Petrus ejeka gu Yesus oida, "Tuhan, bebin buga koma bera buncunc rot memef ongga bebin ruforoker ei, era gu rusnok nomnaga ei?"
42Beda Yesus oroun oida, "Erek osnok egens omfij efen ebirfaga rot iskusk, beda efen ebirfaga koma emeita owesa efek gu ofa jeskaseda ekeba maat gu ruforoker enjgineg ongga rimfarur nou ebirfaga egens koma.
43Noba erek osnok egens koma eita mar insa koma rot iskusk gij mona ongga ebirfaga egens koma ongksons en fob, beda ofa odou efaga ouka eteb rot si.
44Jeska efen ebirfaga koma emeita owesa efek ekirsa gu ofa rot fogora ofa emagei ebirfaga egens koma efen mareibra nomnaga nou ofa.
45Tina erek ofa agot oida, 'Dedin ebirfaga bera enen ebeirens guru. Ofa eker dektek ros ojgomu.' Jefeda ofa obu ebirfaga egens koma efen rusnok enjgineg ongga rufij ofa, noba osnok egens koma et maat ofoukou noba ej mofut efeyi fogora ebirfaga erebibei rot mofut efeyi ojgomuja.
46Beda ebirfaga egens insa koma emen gij mona egens ongga ofa enejginaga rot guru. Beda ebirfaga egens koma emaha mar okum eteb keingg ofa noba obk ofa jeskaseda riker jera rusnok enjgineg ongga runororu Allah oga guru.
47Noba erek osnok egens ongga ejginaga rot efen ebirfaga odou os rot fob, tina ofa enesejah nou ofij efen ebirfaga guru, era ofa onotunggom mar ongga ebirfaga egens koma odou os rot guru, beda ofa emesma okum eteb jeska efen ebirfaga egens tein si.
48Tina erek osnok egens enejginaga rot mar ongga efen ebirfaga odou os rot enesi, beda mar okum ongga ofa esma jeska efen ebirfaga koma bera erek oskiyai ojgomu. Jeska erek rusnok risma mar ofoukou fob, beda rerin ebirfaga omois gu rua jeskaseda rufij erek ofoukou ojgomu. Noba erek rusok ongga risma owesa efek eteb jeska rerin ebirfaga, beda ebirfaga koma omobk rua jeskaseda rutunggom mar ongga erek ofoufem ekirsa nou ofa ojgomu."
49Beda Yesus agot deika oida, "Didif din jeskaseda dis mah eisa egigir eteb gu mebif. Noba Didif dudou os oida mah eisa egigir eteb insa koma et mebif nomnaga fob!
50Tina Didif dijginaga rot oida mar okum eteb emeita efera okora eteb gu Didif si. Noba dudou okum eteb rot mar koma ojgomuja onjoros mona ongga Didif dincira gij mar koma fob ojgomu.
51Enadaij nou iwa isujohu rot oida Didif din gu mebif jeskaseda dufij rusnok fogora riker rot rudou ongga eskeiramera moguma guru. Jeska Didif din jeskaseda oisouska mar ongga Didif duftuftu bera rusnok rudou emekebema rot ojgomu.
52Ebeibeyaif rusnok rufok cinja riker erek egens. Tina gij mona kahma beda rudou emekebema rot dedin duga. Noba rusnok rugomu rumok eretei skoita gosnok gegeka, era gosnok gegeka gomok eretei skoita rusnok rugomu.
53Meka emekeba jeska efen efesa orna ni, efesa orna emekeba jeska efen meka ni, mosu emekeba jeska efen efesa ojaga ni, efesa ojaga emekeba jeska efen mosu ni, mogona emekeba jeska efen mogona ni, mefina emekeba jeska efen mefina ni."
54Beda Yesus agot gu rusnok rufoukou insa koma deika oida, "Gij mona ongga iwa ik mocgoj ofog ongga ontumbah orogna, beda iwa yagot oida ai juens mos es. Beda tenten, mos ens ojgomu.
55Beda gij mona ongga mof enen jeska monuh yes, beda iwa yagot oida mosua omowa. Beda tenten, mosua fob.
56Tina iwa irek rusnok ongga ruhurmei mar ojgomu. Jeska iwa ik mar insa koma beda idou ejginaga rot mona ongga nou mos ens jera mona ongga mosua. Erek koma tina, teinefa fogora iwa idou inebriyi gij mar ongga orocunc jeni rot mar ongga emecira gij mona deisef guri?"
57Beda Yesus agot deika oida, "Teinefa fogora iwa isinsa inoga ojga rot mar moguma rot tenten gurei?
58Erek osnok egens odou os ekris iwa skoita hakim egens jeskaseda ofa oga ojga rot efen mar oga, beda iwa ireni rot ahais jeskaseda idou emeskeira moguma sons ojgomu. Erek iwa ineita mar insa koma guru, beda ofa omoroun iwa skoita hakim. Beda hakim omobk iwa skoita polisi. Beda polisi rimaha iwa gij mod oskusk.
59Beda iwa imah gij mod oskusk ojgomuja onjoros imoh osnok egens insa koma efen mar okowu nomnaga sons fog."