Dual Panel1Gij mona juens rusnok ongga ruhoturu pajak jera rusnok rineya ongga rusnok Yahudi rusujohu bera ongga rirek oska tein rumohoturuma jera Yesus jeskaseda rig rot efen oga.
2Tina rusnok ongga ebic Farisi jera rineya ongga Guru-Guru agama ruga erahah rot rusnok insa koma. Jefeda rua ragot rot Yesus oida, "Wah! Ofa kef oroun rusnok insa koma ongga rerin mar ongga oska ofoukou fogora et maat morototuma jera rua tein ojgomu!"
3Erek koma beda Yesus efesij mar orocunc egens gu rua erek kef oida,
4"Osnok egens jeska iwa efen domba efaga wuntin egens, tina domba orins ejeseiseifa ojgomu. Beda osnok egens koma emeja jeska efen domba-domba efaga setka cinja tohkuru noba cinja tohkuru, noba ofa ojohca domba orins koma ongga enseiseifa. Ofa omohca domba orins koma ojgomuja onjoros ofa ek domba egens koma sons.
5Noba gij mona ongga ofa enja ek efen domba orins koma sons fob, beda ofa emaha domba koma esij efembra,
6noba orka sons rot odou efaga ouka eteb. Beda ofa omohoturu efen mohujir jera rusnok enjgineg tein, noba agot gu rua oida, 'Mimif nomnaga mifaga ouka eteb morototuma ojgomu, jeska dedin domba orins ongga enseiseifa sis fob bera dita sons fob.'
7Erek koma tein, rua ongga ringker gu mebaga bera rudou efaga ouka ekirsa rot osnok egens ongga emeesa joug efen mar ongga oska fob jeska rusnok setka cinja tohkuru noba cinja tohkuru ongga rusujohu oida rinemeesa joug rerin mar ongga oska guru."
8Beda Yesus agot deika oida, "Didif difesij rot mar orocunc erek kef tein oida, ojaga egens efen fifi perak setka, beda egens eseiseifa. Jefeda ofa es mah gij efen lampu fogora ohca fifi insa koma. Beda ofa tein omog mar ofora ejeres jeska mersa tein jeskaseda ohca fifi insa koma.
9Nou ongga ofa ek fifi insa koma sons fob, beda ofa omois gu efen mohujir nomnaga fogora agot gu rua oida, 'Iwa idou efaga ouka morototuma jera didif, jeska dik dedin fifi ongga enseiseifa insa koma fob!'
10Erek koma tein, Allah efen malaikat-malaikat rudou efaga ouka eteb rot osnok egens ongga emeesa joug efen mar ongga oska fob."
11Beda Yesus agot orocunc egens erek kef oida, "Osnok egens efen efeserga gorna gegeka.
12Efesa ongga osuira agot gu efen meka oida, 'Akeina, bua bikeba bebin mareibra oknama gu didif gij mona ebeibeyaif ojgomu.' Jefeda meka koma ekeba efen mareibra oknama gu efen efeserga gegeka tein.
13Gij mona egema deika, beda efesa ongga osuira insa koma ohu efen mareibra insa koma nomnaga jeska fob. Beda ofa ecira jah monuh ongga angh Yes. Beda ofa era efen fifi erengk mar ongga oska ofoukou ojgomu.
14Gij mona ongga ofa efen fifi nomnaga oisa fob, beda mosona eteb ongk rusnok rufoukou ongga ringker gij monuh insa koma. Beda mosona ongk ofa tein.
15Jefeda ofa eja noba efarur nou osnok egens ongga engker gij monuh insa koma. Osnok egens koma obk ofa jeskaseda ot joug efen mek gu mektah ojgomu.
16Erek koma beda ofa ocosu rot et maat ofora ejeres ongga mek et, jeska rusnok rineya rineita maat egema gu ofa guru.
17Erek koma beda ofa osujohu gij odou efesi oida, 'Rusnok ongga rumfij akeina bera rita maat ofoukou, noba mosona ongk didif jah sif ojgomuja.
18Jefeda didif dumoksons skoita akeina noba dagot gu ofa oida didif bera duntunggom mar ongga oska gu Allah jera ofa tein.
19Jefeda enadaij nou ofa ejeka didif erek efen efesa deika guru, tina ofa ejeka didif erek efen osnok egens ongga ofij ojgomu.'
20Ofa osujohu rot mar insa koma, beda ofa ecira sons skoita efen meka. Nou ongga ofa enesaga doida meka efen mod ai erek yes ros, beda efen meka koma ek ofa enen. Jefeda ofa ofof skoita efen efesa egens insa koma rot odou ongga erirei eteb. Beda ofa oijugeij efen efesa noba onsa ofa efen omnu tein.
21Beda efesa egens koma agot gu efen meka oida, 'Akeina, didif bera dita mar ongga oska gu Allah jera bua tein. Jefeda enadaij nou bua bijeka didif erek bebin ebesa deika guru. Tina bua bijeka didif erek bebin osnok egens ongga ofij bua ojgomu.'
22Tina meka koma ois gu efen rusnok ongga rumfij ofa noba agot gu rua oida, 'Iwa ifof ebeirens noba ijeita meisoufa ongga ongkoskamoka eteb nou dedin edesa egens kef. Beda bita mas nou ofa rot efen etma otufou jera sepatu nou efen aki tein.
23Beda iris sapi efer egens ongga efes ebriyi fogora yuina maat. Jeska didif dudou efaga ouka rot dedin edesa kef ongga duroun fob!
24Jeska sis fob bera dedin edesa egens kef erek anggos fob, tina ebeibeyaif erek ofa efena ebah sons. Sis fob ofa ejeseiseifa, tina ebeibeyaif dik ofa sons fob.' Jefeda rua insa koma nomnaga rit maat noba rudou efaga ouka rot.
25Ainsa koma tein bera efesa ongga osumbohka emfarur gu mektah ros. Nou ongga ofa oksons noba esaga doida mod, beda ofa eg rusnok ridi moubseja noba ruka tein.
26Beda ofa ejeka gu osnok egens ongga ofij efen meka oida, 'Ruga ofoukou jah akeina efen mod bera rot meidu?'
27Beda osnok egens koma oroun oida, 'Tuan, bebin obkosa ongksons en fob! Noba mekeb obk rusnok jeskaseda riris sapi efer ongga efes ebriyi, jeska ofa oroun efen efesa sons rot odou ongga eskeiramera eteb fob!'
28Erek koma beda efesa ongga osumbohka insa koma otkonu oska eteb rot. Jefeda ofa odobu joug omoira gij mod efesi koma. Beda meka orogna jeska mod koma noba agot gu ofa oida, 'Edesa, bua buira gu mod ojgomu.'
29Tina efesa koma oroun gu efen meka oida, 'Akeina, gij tahun ofoukou fob bera didif dif mar rot ahais nou bua fob! Noba didif dunokoja mar egema tein ongga bua banggot rot gu didif jinaga guru. Tina bua bineita mar ongga efera ojuj erek kambing efaga egens tein gu didif jeskaseda duina maat keingg dedin edohujir guri.
30Tina bebin ebesa egens kef era bebin mareibra erahaisomu tumu rujager ongga ebireira ojgomu. Erek koma tina ofa ongksons, beda bua biris sapi efer ongga efes ebriyi eteb nou ofa ojgomo!'
31Beda meka koma oroun gu ofa oida, 'Edesa. Bua bingker desi didif ojgomuja. Noba dedin mareibra nomnaga bera ah gu bua tein ojgomu.
32Tina mimif muina maat noba mifaga oka rot ojgomu. Jeska obkosa koma erek anggos fob, tina ebeibeyaif efena ebah sons. Ofa erek enseiseifa, tina ebeibeyaif bera dik ofa sons fob.' "