Alkitab Mobile SABDA
[VER] : [MEYAH]     [PL]  [PB] 
 <<  Matius 14 >> 

1Gij mona insa koma bera raja Herodes ongga ofoka ereij keingg rusnok Yahudi gij monuh Galilea eg mar osok gij Yesus fob.

2Ofa agot gu rusnok ebirfager ongga rufij ofa oida, "Yohanes Pembaptis anggos fob, tina Yesus koma bera erek Yohanes ongga efena ebah sons fob ojgomu. Jeska Ofa efen owesa efek eteb fogora ontunggom mar ongga onswos ofoukou fob."

3Raja Herodes agot mar erek koma jeska gij mona ongga sis fob bera ofa ofra mokosa Filipus efen mohona ongga ofoka Herodias. Jefeda Yohanes oftuftu rot ahais skoita raja Herodes rot oida, "Bua bufra obkosa efen mohona jeska fob, tina mifmin agama erebent agot rot oida koma bera oska eteb!"

4(14:3)

5Jefeda raja Herodes odou os agob Yohanes rot ojgomu, tina ofa emeesa rot jeska rusnok Yahudi rufoukou rusujohu oida Yohanes bera erek Allah efen nabi egens. Jefeda tentarer raha Yohanes gij mod oskusk ojgomu.

6Beda gij mona ongga rusnok ruina maat keingg Herodes nou efen mona ongga mosu engker rot ofa, beda ofa efen mohona Herodias efen efesa ojaga ouka jah raja Herodes jera ebirfager nomnaga rudou. Ofa ouka erek ongkoska yahi jefeda raja Herodes odou eskeira eteb rot ofa.

7Jefeda ofa agen gu ojaga egens insa koma oida, "Budou os meidu tein, beda bagot gu didif ojgomu fogora dimeita gu bua si."

8Erek koma beda ojaga egens insa koma ejeka gu efen mosu Herodias rot mar meidu ongga ofa erejgei jeska raja Herodes. Beda Herodias oroun gu ofa oida, "Buis gu ofa oida, 'Biris Yohanes ebirfaga jeska noba bita gu didif gij mona deisef.' "

9Nou ongga raja Herodes eg rot mar insa koma ongga ojaga egens koma erejgei rot fob, beda ofa odou okum eteb rot. Tina ofa onokoja rot mar ongga ojaga insa koma ois rot guru, jeska ofa anggen rot jah rusnok rufoukou rudou fob.

10Jefeda raja Herodes obk efen tentara egens jeskaseda eja noba eris Yohanes ebirfaga jeska, noba orka skoita ojaga egens koma.

11Beda tentara egens koma oksons noba eita Yohanes ebirfaga ongga ah esij bokor gu ojaga egens insa koma. Beda ojaga egens insa koma orka bokor rot Yohanes ebirfaga gu efen mosu Herodias.

12Nou ongga Yohanes efen ruforoker ringg rot oida rusnok riris ofa ogoj fob, beda rua rinjeita Yohanes efaga noba rijesah gij moksu. Beda rua rija noba ragot gu Yesus rot oida rusnok ragob Yohanes fob.

13Nou ongga Yesus engg rot oida rusnok ranggob Yohanes fob, beda Ofa eifef meg egens noba ejeker gu monuh ongga owowa. Rusnok rig rot oida Yesus eja fob jefeda rua rurogna jeska rerin kota noba rija rutoij Ofa. Tina rua ricira gu moroju jah monuh owowa insa koma.

14Nou ongga Yesus ojuj jeska meg koma, beda Ofa ek rusnok rufoukou insa koma ongga ruroru Ofa jah suma. Jefeda Ofa odou okora rot rua fogora Ofa eita eskeira gu rua ongga marenir.

15Gij motu insa koma bera Yesus efen ruforoker rin skoita Ofa noba ragot oida, "Erek moworu fob, noba mimif miker gij monuh owowa. Jefeda bubk rusnok jah kota-kota jeskaseda rimengk maat nou rimet."

16Beda Yesus agot oida, "Enadaij nou rua rija jeskaseda ringk maat guru. Iwa ita maat gu rua jeskaseda rit ojgomu."

17Tina rua ragot oida, "Akeina, mefmen roti ofog cinja jera mos orijka ojgomu."

18Beda Yesus agot oida, "Beda bita maat koma gu Didif."

19Beda Ofa obk rusnok jeskaseda riker gu meskeingg efen. Beda Ofa eita roti ofog cinja jera mos orijka, noba Ofa eyajga gu mebaga. Beda Ofa ois oufamofa gu Allah rot maat insa koma. Beda Ofa ekeba maat insa koma dogdog gu efen ruforoker. Beda ruforoker rikeba maat insa koma gu rusnok rufoukou jah suma.

20Rusnok koma rint maat onjoros ereya rua fob. Beda Yesus efen ruforoker ruhoturu maat ofod sons deika ongga ok morungga eteb setka kungkob erfeka.

21Noba runer ongga rint maat gij mona insa koma bera erek rufok ribu cinja. Koma erek runofosut rujaga jera riser ongga rit mar gij mona insa koma tein guru.

22Nou ongga koma oisa fob beda Yesus obk efen ruforoker jeskaseda rifef meg beda rukag rot Ofa jah meren enama. Beda Ofa obk rusnok rufoukou insa koma jah rerin monuh.

23Nou ongga Ofa obk rusnok insa koma fob, beda Ofa eja jah memaga ofog oduma jeskaseda om eiteij gu Allah jah suma. Nou motu fob beda Yesus eker gu esinsa jah suma.

24Beda gij aras insa koma bera Yesus efen ruforoker ricira yes gij meg fob. Mof eteb edi rua doska, noba meren ofog omotoijma erek aksa tein.

25Erek mona efen en beda Yesus ecira aki esij mei odog skoita efen ruforoker.

26Nou ongga rua rik Ofa ecira esij mei odog erek koma beda rua ragerir mar rot rudou ongga rimeesa eteb, jeska rua rusujohu rot oida Yesus bera efena ofogog ongga enen skoita rua.

27Beda Yesus ois gu rua oida, "Iwa inemeesa guru, jeska Didif Yesus bera kef."

28Beda Petrus agot oida, "Tuhan, erek Bua bera Yesus rot tenten, beda buis gu didif jeskaseda din skoita Bua esij mei odog kef tein."

29Beda Yesus ois gu ofa oida, "Bua bin." Jefeda Petrus ojuj jeska meg noba ecira esij mei odog skoita Yesus.

30Tina nou ongga ofa ek rot oida mof eteb ros, beda ofa odou emeesa deika fogora ojuj gij mei. Beda ofa agerir skoita Yesus, "Tuhan, buskotu didif jeska mei ebeirens!"

31Beda ainsa koma tein, Yesus agei Petrus jeskaseda ofa onojuj gij mei guru. Beda Ofa agot, "Teinefa fogora bua bimeesa erek komo. Erek budou onororu Didif rot ahais enesei."

32Beda goga goira gij meg insa koma, noba ainsa koma tein mof aha toumou.

33Beda Yesus efen ruforoker rugif gu Ofa gij meg koma. Rua ragot oida, "Bua bera Allah efen efesa rot tenten."

34Erek koma beda Yesus jera efen ruforoker rifef meg egens insa koma onjoros rinsaga gu monuh Genesaret.

35Rusnok jah suma rijginaga rot oida Ofa bera Yesus ongga en fob. Jefeda rua ruis gu rusnok rejrej monuh insa koma jeskaseda rumorka rerin rusnok ongga marenir skoita Yesus.

36Noba rua ongga marenir rineya ruis gu Yesus jeskaseda rua rahtec Ofa efen meisoufa ojgomu. Beda rua ongga rita mar erek koma bera risma eskeira tein fob.


  Share Facebook  |  Share Twitter

 <<  Matius 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel