Dual Panel1Gij mona ongga cinja erfens deika beda Yesus oroun Petrus jera Yakobus jera efen mokosa Yohanes jah memaga ofos. Beda rua riker gu risinsa jah suma.
2Yesus efen ruforoker insa koma rik Ofa tina efen efaga eja erek toga. Ofa efen osum eisa eteb erek mowa. Noba efen meisoufa eja erek ebsi komowa ongga eisa eteb tein.
3Beda rua rik nabi Musa jera nabi Elia jeska mona ongga ensis gefesij mar jera Yesus.
4Jefeda Petrus agot gu Yesus oida, "Tuhan, ongkoska eteb nou mimif miker jah sif. Erek Bua budou os rot beda didif dumotunggom modwok orgomu. Egens nou Bua, egens nou Musa, noba egens nou Elia tein."
5Askesi Petrus agot mar insa koma ros, beda mocgoj ofog egens ongga eisa eteb en noba ocohun rua. Beda rua rig oga egens jeska mocgoj koma ongga agot oida, "Ofa kef bera dedin edesa ongga dudou okora eteb rot. Noba Didif dudou eskeira eteb rot Ofa tein. Iwa ig mar ongga Ofa agot rot ojgomu."
6Nou ongga Yesus efen ruforoker rig oga egens insa koma, beda rua rimeesa eteb rot. Jefeda rua rugif fogora rudou rurohu mebi morototuma ojgomu.
7Beda Yesus en skoita rua noba ahtec rua. Beda Ofa agot oida, "Iwa idebecki ojgomu. Iwa inemeesa rot guru."
8Jefeda rua rik, tina Yesus esinsiyai bera ot jah suma. Rua rinek rusnok egema jah suma deika guru.
9Nou ongga rua runjuj jeska memaga fob, beda Yesus eyahehir joug rua oida, "Iwa inagot rot mar ongga iwa ingk insa koma gu rusnok enjgineg enesi. Tina gij mona ongga iwa ik Didif, Rusnok Efesa, dindebecki jeska dagos fob, beda iwa ifesij rot mar insa koma gu rusnok ojgomu."
10Erek koma beda Yesus efen ruforoker rijeka gu Ofa oida, "Akeina, rua ongga Guru-Guru agama ruftuftu rot oida nabi Elia jeska mona ongga ensis bera emen sismeni, beda Kristus egens koma ongga Allah omobk bera emen tein. Rua ruftuftu mar insa koma rot meidu?"
11Beda Yesus oroun oida, "Ofa ongga erek nabi Elia bera enen rot sismeni ojgomu. Beda ofa omoftuftu rusnok jeskaseda ruroun Kristus egens koma.
12Tina ongga tenten bera, osnok egens koma ongga erek Elia bera en fob, noba rusnok runororu ofa guru. Rua rita mar ongga oska skoita ofa ojgomu. Jefeda erek koma tein, rua rimeita mar ongga oska skoita Didif ongga Rusnok Efesa tein si."
13Erek koma beda Yesus efen ruforoker rudou ebriyi gij rot oida mar ongga Ofa emfesij insa koma bera osok gij Yohanes Pembaptis ongga en rot owesa efek erek nabi Elia efen sis fob.
14Nou ongga Yesus jera efen ruforoker insa koma ruksons skoita rusnok gij monuh insa koma, beda osnok orna egens en skoita Yesus noba es okeibi gu mebi.
15Beda ofa agot gu Yesus oida, "Tuan, bucunc budou ongga okora rot dedin edesa. Jeska ofa efen efaga oskukwok, beda ofa esiri gij mah era gij mei tein ojgomuja.
16Didif duroun ofa skoita bebin ruforoker jeskaseda rua rita eskeira gu ofa. Noba rua rireni, tina guru. Ofa erek oskukwok ojgomu ros."
17Beda Yesus agot oida, "Didif dingker jera iwa erek dektek fob, tina iwa idou onororu Didif rot tenten enesei. Iwa ineita mar rot tenten enesei. Iwa iroun oforoka orna egens koma skoita Didif ojgomu."
18Beda Yesus agot joug efena ofogog ongga engker gij oforokai egens koma odou efesi, beda ainsa koma tein efen ofogog orogna jeska ofa beda ofa, beda oforoka egens koma eita eskeira fob.
19Nou ongga rusnok enjgineg rinja fob, beda Yesus efen ruforoker rin skoita Ofa. Beda rua rijeka gu Ofa oida, "Akeina, memef magot joug efena ofogog insa koma tein fob, tina ofa onougif gu mefmen moga guru. Koma rot meidu?"
20Beda Yesus agot oida, "Efena ofogog insa koma onougif gu yeyin yuga guru jeska idou onororu mar ongga Didif dumftuftu gu iwa rot tenten enesi. Jeska erek osnok egens ororu mar insa koma rot tenten erek ai ojgomai tein, beda koma omofij ofa fogora adaij nou ofa otunggom mar meidu ongga ofa odou os rot owesa efek eteb doska si."
21(17:20)
22Gij mona ongga Yesus jera efen ruforoker rumohoturuma gu monuh Galilea fob, beda Yesus agot gu rua oida, "Gij mona ongga ai juens emen beda rusnok rimaha Didif, Rusnok Efesa skoita rusnok enjgineg.
23Beda rua rimagob Didif. Tina gij mona orgomu deika, beda Didif dimedebecki fogora difena ebah sons si." Nou ongga Yesus efen ruforoker ringg mar insa koma beda rudou okum noba okora rot ojgomu.
24Gij mona ongga Yesus jera efen ruforoker rinsaga gu kota Kapernaum, beda rusnok ongga ruhoturu pajak jeska rusnok Yahudi nou nou Mod Allah bera rin skoita Petrus. Beda rua rijeka gu ofa oida, "Bebin Guru Yesus koma bera oh pajak nou Mod Allah tein ei era gurei?"
25Beda Petrus oroun gu rua oida, "Yo, Ofa tein oh pajak ojgomu." Nou ongga Petrus oira gij mod efesi jah suma, beda Yesus ejeka gu ofa oida, "Simon Petrus, idu bera ongga oh pajak skoita raja-raja ongga mebif efen? Rua ongga ringker gij raja efen monuh bera ruh pajak gu rua ei, era rusnok rusodosa ongga ringker gij raja-raja rineya rerin monuh bera ruh pajak gu raja-raja ojgomu ei?"
26Beda Petrus oroun oida, "Rua ongga rusodosa bera ruh pajak ojgomu." Beda Yesus agot oida, "Erek koma jefeda rusnok ongga ringker gij monuh insa koma bera runoh pajak guru.
27Tina erek mimif munoh pajak skoita rusnok insa koma guru, beda rudou okum skoita mimif ojgomu. Jefeda bua bija jah meren noba buhca mos jah suma. Beda mos ongga bua bagei rot sismeni bera buhoda efen awesi. Beda bua bimek fifi gij mos koma awesi si. Beda bua burka fifi koma gu Mod Allah, beda buh pajak skoita rua ojgomu."