Dual Panel1Gij mona insa koma bera Yesus efen ruforoker rijeka gu Ofa oida, "Idu jeska memef bera ongga emesma ofoka ongga aksa ekirsa jeska rineya gij mona ongga Allah ofoka ereij keingg rusnok fob?"
2Nou ongga Yesus eg mar insa koma beda Ofa oroun oforokai egens jeskaseda ot desi Ofa jah rua rudou.
3Beda Ofa agot gu rua oida, "Ongga tenten bera erek iwa ineita mar rot idou efesi ongga erek ruforokai rerin rudou efesi guru, beda iwa inoira jera rusnok ongga Allah ofoka ereij keingg jinaga guru.
4Jeska rusnok ongga ruin keingg rudou efesi erek eriaga morototuma erek ruforokai rerin rudou ongga eriagamaga, rua bera ongga rimesma rufoka ongga aksa eteb gu mebaga.
5Noba osnok egens ongga oroun rusnok ongga rita mar rot rudou ongga eriaga erek ruforokai rerin rudou ongga eriaga, beda koma erek rua ruroun Didif tein."
6Beda Yesus agot deika oida, "Erek koma tein, erek osnok egens otunggom mar skoita rusnok ongga ruroru Didif erek oforokai egens kef, fogora rua runororu Didif deika guru, beda Allah omofra okum mar eteb doska keingg osnok egens koma rot si. Mar egema tein ongga rusnok rita gu ofa rot bera enerek mar okum ongga Allah emeita gu ofa rot guru.
7Okum rot rusnok mebif, jeska mar ongga oroku rusnok rudou efesi fogora runororu Allah oga deika guru bera enahuma ojgomuja. Tina osnok egens ongga otunggom mar insa koma fogora rusnok enjgineg runororu Allah efen oga deika guru, beda Allah omofra okum mar eteb doska keingg ofa insa koma si.
8Noba erek mar ongga angh gij idou efesi oroku iwa jeskaseda ira yeyin itma irotunggom mar ongga oska, beda isuna rot mar insa koma jeska idou efesi sismeni fog ojgomu. Koma erek osnok egens ongga eris efen etma jeskaseda eneita mar ongga oska insa koma guru. Erek koma tein, erek mar ongga angh gij idou efesi oroku iwa jeskaseda icira yaki jah monuh enjgineg fogora itunggom mar ongga oska, beda iwa isuna rot mar insa koma jeska idou efesi sismeni fog ojgomu. Koma erek osnok egens ongga eris efen aki jeskaseda onotunggom mar ongga oska insa koma guru. Oufamofa ekirsa rot rua insa koma ongga riris ritma era raki egens jeskaseda rineita mar ongga oska guru. Jeska rua bera ongga rimesma eiteij ah ongga efeinah ojgomu. Jeska rusnok ongga runosuna rot mar ongga oska insa koma jeska rudou efesi rot sismeni fog guru, tina rua ruroru mar koma ojgomu, beda Allah emeij rua gij mahmei meren rot si.
9Noba erek mar ongga angh gij idou efesi oroku iwa jeskaseda ita mar ongga oska ongga iwa ik gu iteij, beda iwa isuna rot mar insa koma jeska idou efesi sismeni fog ojgomu. Koma erek osnok egens ongga oku efen eiteij egens jeskaseda eneita mar ongga oska ongga ofa ek guru. Iwa itunggom mar erek koma tein jeskaseda imesma eiteij ah efeinah ojgomu. Beda Allah eneij iwa gij jah mahmei meren guru."
10Beda Yesus agot deika oida, "Jefeda iwa inocunc idou ongga oska skoita rusnok ongga rita mar rot rudou ongga eriagamaga erek oforokai egens kef guru. Jeska malaikat-malaikat ongga runt joug rusnok insa koma bera rerin owesa efek jeskaseda rifesij rot mar teisis skoita Allah gu mebaga osok gij mar insa koma."
11(18:10)
12Beda Yesus agot rot mar orocunc erek kef oida, "Osnok egens ont joug efen domba-domba ongga erek wuntin egens. Tina ofa efen domba egens ongga eja eseiseifa jeska ofa. Beda ofa odou okora eteb rot domba egens koma jefeda ofa eja jeska domba-domba setka cinja tohkuru noba cinja tohkuru insa koma, beda ofa ohca domba egens ongga eseiseifa.
13Gij mona ongga ofa ek efen domba egens koma, beda ofa odou efaga ouka eteb rot domba egens ongga ofa ensma sons fob.
14Erek koma tein, dedin Akeina ongga eker gu mebaga bera odou os rot oida efen rusnok erek ai egens tein, ongga rudou eriaga erek ruforokai rerin, jeskaseda rineja eseiseifa guru."
15Beda Yesus agot deika oida, "Erek yeyin ihuj egens ongga eita mar ongga oska skoita iwa, beda iwa ija skoita ofa noba yagot gu ofa rot mar insa koma ojgomu. Noba erek ofa oitij rot mar ongga iwa yanggot rot, beda koma erek imohujma sons deika fob.
16Tina erek ofa okoja rot mar ongga iwa yanggot gu ofa rot ojgomu, beda iwa ija sons skoita ofa morototuma jera osnok egens era egeka deika jeskaseda ifesij mar jera ofa rot ojgomu. Ita mar erek koma jeskaseda goga ongga insa koma tein goftuftu gu osnok egens koma rot efen mar ongga oska tein. Jeska koma ororu jeni erek runggu gij Mar Efeyi Ebsi rot fob.
17Noba erek ofa onoitij rot mar ongga goga goftuftu rot gu ofa guru, beda iwa ifesij rot ofa efen mar ongga oska insa koma skoita rusnok nomnaga gij Mod Ari. Noba erek ofa onoitij rot mar ongga rusnok Mod Ari ruftuftu gu ofa rot efen mar ongga oska guru, beda iwa ibes ifaga jeska ofa morototuma erek iwa ibes ifaga jeska rusnok ongga rinejginaga rot Allah guru, era erek iwa ebes ifaga jeska rusnok ongga ruhoturu pajak nou raja Kaisar tein ojgomu."
18Beda Yesus agot gu efen ruforoka deika oida, "Didif dita owesa efek gu iwa jeskaseda mar ongga iwa iyahehir joug rot gu mebif bera angh erek koma gu mebaga tein. Noba mar ongga iwa yuitij rot gu mebif bera angh erek koma gu mebaga tein.
19Noba ongga tenten bera, gij mona ongga gosnok gegeka jeska iwa gom geiteij morototuma rot mar egens gu Allah, beda dedin Akeina ongga engker gu mebaga bera emeita mar insa koma nou goga si.
20Jeska gij mona ongga gosnok gegeka era rusnok rugomu rum riteij morototuma rot mar egens gu Allah, beda Didif diker gu rua rifekesa gij mona insa koma tein."
21Nou ongga koma oisa fob beda Petrus en skoita Yesus noba ejeka gu Ofa oida, "Tuhan, erek dedin edohuj egens ongga otunggom mar ongga oska skoita didif fob, noba ofa eita mar koma ofosma ofoukou deika, beda didif dusuna rot ofa efen mar ongga oska insa koma erek ofosma egaho fogora dunosuna rot deika guru. Didif dusuna rot mar insa koma erek ofosma cinja erfeka ei?"
22Beda Yesus oroun gu ofa oida, "Erek bua busuna rot ofa efen mar ongga oska erek ofosma cinja erfeka ojgomu, beda koma tein enadaij enesi. Bua bunofosut rot ofosma egaho erek koma guru. Tina busuna rot efen mar ongga oska koma ojgomuja ojgomu.
23Jeska Allah ofoka ereij keingg rusnok erek kef: Gij mona juens bera raja egens ejeka joug efen ruforoker ongga rira ofa efen fifi sis fob jeskaseda rita sons gu ofa.
24Rusnok ruroun oforoka egens jeska rua insa koma skoita raja egens koma. Oforoka egens koma era raja efen fifi erek juta ofoukou.
25Tina oforoka egens koma efen fifi enadaij nou oh sons skoita raja egens koma jinaga guru. Jefeda raja egens koma oga ojga rot oida omohu ofa jera efen mohona jera efeser jera efen mareibra nomnaga tein skoita rusnok enjgineg jeskaseda esma efen fifi insa koma sons.
26Erek koma beda oforoka egens koma es okeibi gu mebi beda erejgei gu raja egens koma oida, 'Tuan, bucunc budou efesi ongga okora rot didif fogora biker joug gu mona egema deika, beda didif dimedaga bebin fifi nomnaga sons gu bua si.'
27Beda raja egens koma odou okora rot ofa jefeda ofa osuna rot mar okowu insa koma ongga ah gu oforoka egens koma. Jefeda ofa enedaga fifi insa koma sons deika guru. Beda ofa obk oforoka egens koma sons jah efen mod ojgomu.
28Erek koma beda oforoka egens koma eja noba orodosu efen mohuj egens ongga era ofa efen fifi erek oskiyai sis fob. Beda ofa agei efen mohuj egens insa koma rot ahais beda ois gu ofa oida, 'Bua bidaga dedin fifi sons ebeibeyaif ojgomu!'
29Beda mohuj egens koma esiri gu mebi beda erejgei gu oforoka egens koma oida, 'Edohuj, bucunc budou ongga okora rot didif ai juens deika, beda didif dimedaga bebin fifi sons gu bua si.'
30Beda oforoka egens koma okoja rot mar ongga efen mohuj erejgei insa koma ojgomu. Tina ofa ois gu tentara egens jeskaseda ekris efen mohuj egens koma jah mod oskusk ojgomu. Beda ofa ah gij mod oskusk onjoros ofa oh oforoka egens efen fifi sons fob.
31Nou ongga ruforoker enjgineg rig rot mar ongga ofa otunggom skoita efen mohuj egens insa koma fob, beda rua rudou okum eteb rot ofa. Jefeda rua rija skoita raja egens insa koma noba rifesij rot mar ongga oforoka egens koma ontunggom fob.
32Jefeda raja egens koma ois gu oforoka egens koma jeskaseda oksons skoita ofa. Beda raja koma etaha joug ofa oida,' Bua bera erek dedin oforoka egens ongga oska ojgomu! Neeka bera didif dusuna rot mar okowu ongga angh gu bua, jeska bua birejgei gu didif rot ojgomu.
33Didif duncunc dudou ongga okora rot bua fob, tina bua bunocunc budou ongga okora rot bebin obohuj egens koma guri!'
34Raja egens koma otkonu oska eteb skoita efen oforoka egens insa koma. Jefeda ofa obk ofa jah mod oskusk jeskaseda ofa eker jah suma onjoros ofa oh raja efen fifi insa koma nomnaga sons fob ojgomu."
35Beda Yesus agot deika oida, "Erek koma jefeda, erek iwa inosuna rot mar ongga oska ongga yeyin ihujir runtunggom skoita iwa fob guru, beda dedin Akeina ongga engker gu mebaga bera onosuna rot iwa yeyin mar ongga oska jinaga tein guru."