Dual Panel1Nou mona ongga Sabat oisa fob, beda Maria jeska kota Magdalena jera Maria ongga enjgineg geja jah mansu mamu ongga Yesus efaga angh gij.
2Ainsa koma tein mebi icusur doska, beda malaikat egens ojuj jeska mebaga. Beda Ofa eskiski mamu eteb jeska moksu efesi. Beda ofa eker esij mamu egens insa koma.
3Ofa efen efaga efesa eteb erek mocgoj efesa, noba efen meisoufa erek ebsi komowa eteb doska.
4Tentarer ongga runt joug moksu insa koma rimeesa eteb jefeda rua risiri gu mebif erek rusnok ongga ranggos risiri gu mebif.
5Beda malaikat egens koma agot gu gojaga jah suma oida, "Goga genemeesa guru. Didif dijginaga rot oida iwa yuhca Yesus, ongga rusnok runtob tumu mega salib fob.
6Tina Ofa eneker jah sif deika guru. Ofa endebecki jeska anggos fob jeni erek Ofa anggot rot sis fob. Goga gek mebera ongga risah efen efaga esij sis fob.
7Jefeda goga geja ebeirens beda bagot rot mar insa kef skoita Ofa efen ruforoker. Goga gagot gu rua oida Yesus endebecki jeska anggos fob. Noba Ofa eja okag rua jah monuh Galilea fob. Rua rimek Ofa jah suma si. Rudou ah keingg rot mar ongga Yesus anggot gu rua rot sis fob ojgomu."
8Jefeda goga geja ebeirens jeska moksu insa koma. Goga godou efesi erek emeesa noba erirei eteb tein. Beda goga gofof skoita Yesus efen ruforoker.
9Ainsa koma tein Yesus orogna keingg goga. Beda Ofa agot gu goga oida, "Eskeiramera eteb rot goga." Beda goga gen skoita Ofa, noba gougif gu Ofa aki. Beda goga gesitit gu Ofa tein.
10Beda Yesus agot gu goga oida, "Goga genemeesa guru. Goga geja noba gagot gu dedin edohujir jeskaseda rua rija jah monuh Galilea ojgomu. Beda rua rimek Didif jah suma si."
11Askesi gojaga insa koma gecira skoita Yesus efen ruforoker ros, beda tentarer insa koma ongga runt joug moksu rot Yesus efaga eja skoita ebirfager imam-imam gij kota Yerusalem. Beda rua rifesij rot mar insa koma ongga rua rik gu Yesus odog fob.
12Beda ebirfager imam-imam koma rumorodosuma jera ebirfager Yahudi rineya jeskaseda rifesij rot mar ongga rua rumotunggom rot ojgomu. Jefeda rua rita fifi ofoukou doska gu tentarer insa koma.
13Beda rua ragot gu tentarer insa koma oida, "Iwa yagot oida Yesus efen ruforoker rin gij motu deis beda rurka efen efaga askesi iwa yahca jeska ros ojgomu fob.
14Noba erek Gubernur eg rot oida efen efaga enah gij moksu insa koma deika guru, beda memef momot deismos rot iwa gu Gubernur. Beda memef memagot oida iwa ineita mar ongga oska guru. Jefeda iwa inemeesa rot guru."
15Jefeda tentarer insa koma rita fifi koma, beda rua ruroru jeni mar ongga ebirfager imam-imam ranggot rot ojgomu. Jefeda mar ongga ebirfager imam-imam insa koma rucuwei mar rot bera eberbera rejrej monuh Yahudi ojgomu. Noba onjoros mona deisef tein rusnok ruroru mar insa koma ojgomuja ros.
16Yesus efen ruforoker rufok setka kungkob erfens rija jah memaga ofog oduma gij monuh Galilea ongga Yesus anggot rot gu rua sis fob.
17Nou ongga rua rik Ofa jah suma beda rua rugif gu Ofa. Tina erek rineya jeska rua rijekjeka rudou rot oida koma bera Yesus rot tenten ei era gurei?
18Beda Yesus en doida rua beda agot gu rua oida, "Allah eita owesa efek eteb gu Didif jeskaseda dufoka ereij keingg mar nomnaga gu mebif jera mebaga tein fob.
19Jefeda iwa ija skoita rusnok gu monuh nomnaga. Beda iwa yuftuftu rua rot dedin duga jeskaseda rua tein rumororu Didif dedin duga. Beda iwa ita baptis gu rua oisouska Akeina ofoka ni, Allah efen efesa ofoka ni, jera Efena Ebsi ofoka ni.
20Beda yuftuftu gu rua jeskaseda rua ruroru jeni mar nomnaga ongga Didif danggot rot gu iwa fob. Beda Didif dimeker jera iwa ojgomuja onjoros mona ongga enja ejgwaga ensaga tein si." Ainsoma.