Dual Panel1Erek koma beda, nou ongga Yesus onjuj jeska memaga ofog oduma insa koma, beda rusnok rufoukou ruroru Ofa tein.
2Beda orna egens ongga maira et ofos erek eteb fob en skoita Yesus. Beda ofa es okeibi gu mebif noba agot gu Yesus oida, "Tuhan, didif dijginaga rot tenten oida erek Bua buitij rot, beda bebin owesa efek adaij nou bita eskeira gu didif."
3Erek koma beda Yesus osk etma beda ahtec ofa. Noba Ofa agot oida, "Didif duitij rot, jefeda bita eskeira ojgomu." Ainsa koma tein orna egens koma efen ofos eskeira nomnaga fob.
4Beda Yesus agot gu ofa oida, "Bua big duga fog. Bua binagot rot mar kef skoita rusnok enjgineg jinaga guru. Tina bua bija teisis skoita imam egens ojgomu. Beda buis gu ofa jeskaseda ofa eyajga joug bebin bufos fog. Beda bua tein bita mar ongga erek burougif gu Allah rot jeni erek Musa oftuftu gu rusnok sis fob. Bita mar insa koma nomnaga jeskaseda burocunc gu rusnok oida bebin bufos eskeira rot tenten fob."
5Nou ongga Yesus oira gij kota Kapernaum, beda tentarer jah suma rerin ebirfaga egens ongga en skoita Yesus.
6Beda ofa erejgejgei gu Yesus oida, "Tuan, didif dedin oforoka egens ongga emfarur nou didif. Tina ofa ahca gij mod efesi ojgomuja jeska ofa maren eteb. Noba ofa ofogu okora eteb rot tein."
7Beda Yesus agot oida, "Didif dimeja jah suma beda dita eskeira gu ofa."
8Tina ebirfaga egens koma agot oida, "Tuan, enadaij nou Bua bin jah dedin mod guru. Jeska Bua bebin bufoka ongga erek aksa eteb ekirsa jeska didif. Tina erek Bua bagot jah sif oida ofa emeita eskeira ojgomu, beda didif dudou ororu rot oida ofa emeskeira si.
9Jeska didif bera erek osnok egens ongga ougif gu dedin ebirfaga oga. Noba didif dufoka ereij keingg tentarer enjgineg tein. Erek didif dagot gu tentara egens oida, 'Bua bija' beda ofa eja ojgomu. Noba erek didif dagot gu egema oida, 'Bua bin,' beda ofa en ojgomu. Noba erek didif dagot gu dedin oforoka egens ongga emfarur nou didif oida, 'Bua butunggom mar kef,' beda ofa otunggom mar koma ojgomu. Jefeda erek koma tein, didif dudou ororu mar ongga Bua bagot rot ojgomu, fogora ofa emeita eskeira si."
10Nou ongga Yesus eg rot mar ongga ebirfaga tentarer egens insa koma anggot fob, beda Ofa odou oubsaha eteb rot. Beda Ofa agot gu rusnok ongga ruroru Ofa jah suma oida, "Kef erek tenten oida, gij monuh Israel kef nomnaga bera Didif dinek rusnok egema tein ongga rudou ororu Didif rot tenten morototuma erek osnok egens kef odou ororu Didif rot tentenmen enesi.
11Gij mona ongga Allah ofoka ereij keingg efen rusnok, beda rusnok rufoukou ongga ruroru Didif rot tenten erek osnok egens kef bera emen jeska monuh ofoukou tein. Beda rua nomnaga rumohoturuma jera mifmin mimowa Abraham, Ishak, Yakub gu mebaga. Beda rua nomnaga rumoina maat keingg rot rudou efaga ouka eteb morototuma.
12Tina rusnok rineya ongga sis fob rusujohu rot oida rumoira gu mebaga si, bera Allah omokoja rua jeska mebaga ojgomu. Allah emeij rua gij monuh ongga motkobah eteb. Beda rua rimeita rifera okora eteb jah suma si."
13Erek koma beda Yesus agot gu tentarer rerin ebirfaga egens insa koma oida, "Bua buksons jah bebin mod. Jeska bebin oforoka egens koma emeita eskeira jeni erek budou ororu rot erek insa koma si." Nou ongga Yesus anggot mar koma fob, beda ainsa koma tein oforoka egens koma eita eskeira fob.
14Erek koma beda, nou ongga Yesus en jah Petrus efen mod, beda Ofa ek Petrus efen mefina ongga ahca ojgomuja jeska ofos ofoufem eteb.
15Beda Yesus ahtec ofa fogora eita eskeira gu ofa. Beda ofa edebecki noba oina maat nou Yesus.
16Nou ongga motu fob, beda rusnok ruroun rerin rusnok enjgineg rufoukou ongga efena ofogog oira gij rudou efesi skoita Yesus. Beda Ofa ekemeji efena ofogog insa koma nomnaga oisouska efen oga fogora eita eskeira gu rua insa koma ongga marenir.
17Noba mar ongga Ofa ontunggom insa koma bera angh gij efera jeni erek mar ongga nabi Yesaya anggot rot sis fob. Ofa agot oida, "Ofa onsuwa mimif jeska mar ongga orotunggom mimif erek marenmi jera mar ongga ereita mifera okora rot tein fob."
18Nou ongga Yesus ek rot oida rusnok rufoukou rin noba riker rejrej Ofa, beda Ofa obk efen ruforoker jeskaseda rija jah meren enama.
19Beda Guru agama egens en skoita Yesus noba agot gu Ofa oida, "Akeina Guru, Didif dumororu Bua gij monuh nomnaga ongga Bua bimeja gij si."
20Beda Yesus oroun gu ofa oida, "Mes merenrah rerin mansu ongga ringker gij. Noba mem rerin efefa ongga ringker gij. Tina Didif, ongga Rusnok Efesa, bera dedin monuh egema tein nou diker keingg dufons gij guru."
21Beda orna egens ongga ororu Yesus fob agot gu Ofa oida, "Tuhan, didif dudou os duksons jah dedin monuh beda disah dedin Akeina gij moksu fog. Beda didif dumororu Bua si."
22Tina Yesus oroun gu ofa oida, "Rusnok ongga rukoja mar ongga Didif dumftuftu rot bera rimeseiseifa si. Jefeda adaij nou rua risah mar agos gij moksu ojgomu. Tina bua buroru Didif ojgomu."
23Erek koma beda Yesus oira gij meg egens morototuma jera efen ruforoker.
24Askesi rua rincira gu meren deismos ros, beda mof edebecki noba okuj rot owesa efek eteb. Rerin meg doida onjuj gu mei. Tina ainsa koma tein Yesus ah ahaingkongka gij meg efesi.
25Beda Yesus efen ruforoker rin skoita Ofa noba ribs Ofa jeskaseda edebecki. Beda rua ruis gu Ofa rot rudou ongga emeesa eteb oida, "Tuhan, bufij memef jeska ai juens bera mimif magebin gij mei kefi!"
26Beda Yesus agot gu rua oida, "Teinefa fogora iwa imeesa eteb erek komo. Erek idou onororu Didif rot tenten enesei." Beda Yesus edebecki noba ois mar fogora mof esiri noba meren erek edeider sons ojgomu fob.
27Beda ruforoker koma nomnaga rudou oubsaha eteb rot. Rua ragot moguma oida, "Ofa kef bera erek idu! Jeska mof jera mei ofog tein ororu jeni efen oga!"
28Gij mona ongga Yesus ensaga gu monuh Gadara, beda Ofa orodosu gosnok gegeka ongga gengker gij monuh ongga mansu ofoukou. Rusnok risah mar agos gij monuh insa koma. Efena ofogog ongga erek rufoukou bera ruira gij goga godou efesi fob fogora rutunggom goga erek ofogog doska tein. Rusnok enjgineg rimeesa eteb rot goga, jefeda rua rinecira gu moroju gij monuh insa koma guru.
29Nou ongga goga gek Yesus, beda goga gagot gu Ofa oida, "Bua ongga Allah efen efesa, enadaij nou Bua bin jah sif guru. Jeska mona ongga Bua bumofra mar okum eteb keingg magef bera enesaga enesi. Bua bija jeska magef!"
30Doida monuh koma bera mek ofoukou enet mebi jah suma.
31Jefeda efena ofogog insa koma ruis gu Yesus oida, "Erek Bua bikemeji memef jeska gosnok gegeka kef, beda bubk memef jeskaseda moira gij mek ofoukou jah suma ojgomu."
32Beda Yesus agot oida, "Iwa ija." Jefeda efena ofogog insa koma nomnaga rurogna jeska gosnok gegeka insa koma godou efesi noba rujoira gij mek ofoukou jah suma. Beda ainsa koma tein mek ofoukou koma ruku jah momfaga ongga aksa beda risiri gij mei fogora mek nomnaga ragos fob.
33Rusnok ongga rut joug mek ofoukou koma rik mar insa koma nomnaga, jefeda rua ruku jah kota. Beda rua rifesij gu rusnok jah suma osok gij gosnok gegeka insa koma jera osok gij mek ofoukou ongga ranggos fob.
34Jefeda rusnok rufoukou rurogna jeska kota koma beda rija skoita Yesus. Nou ongga rua rik Ofa, beda rua rirejgejgei gu Ofa jeskaseda Ofa eja jeska rerin monuh ojgomu.