Dual Panel1Nou ongga Yesus eja jeska momas ongga angh rejrej Mod Allah insa koma, beda efen oforoka egens agot gu Ofa oida, "Akeina Guru, bua bik mamu eteb kef ongga rusnok rira jeskaseda rii mod Allah ongga aksa kef. Jeska mamu kef jera mod ongga aksa kef tein bera erek ongkoska eteb."
2Beda Yesus agot gu ofa oida, "Gij mona kahma beda mamu eteb kef jera mod eteb kef tein bera rumohoda nomnaga fogora mamu egens enah esij egema tein deika jinaga guru."
3Erek koma beda Yesus ejeker gu memaga ofos Zaitun Efeda ongga angh gu meindoks enama jeska Mod Allah. Jah suma bera Petrus ni, Yakobus ni, Yohanes ni jera Andreas tein rin skoita Yesus noba riker morototuma jera Ofa jah suma.
4Beda rua rijeka gu Ofa oida, "Tuhan, gij mona juaho fogora mar ongga Bua banggot rot osok gij mamu eteb insa koma bera emesaga fob? Noba mar meidu omorocunc rot oida mona ongga Allah omotunggom mar koma bera en doida fob?"
5Beda Yesus agot gu rua oida, "Iwa yut joug idou efesi rot ahais ojgomu jeskaseda rusnok runocuwei mar gu iwa osok gij mar insa koma guru.
6Jeska rusnok rufoukou rumorogna noba rurokrusa rusnok enjgineg. Rua rimagot oida, 'Didif bera Kristus egens koma ongga Allah omobk jeskaseda osuwa rusnok jeska rerin mar ongga okum.' Rua rimagot erek koma fogora rumorokrusa rusnok rufoukou.
7Noba gij mona ongga iwa ig rot oida rusnok gij monuh egens ongga angh doida bera rimagobuma, era rusnok rimfesij oida rusnok gij monuh enjgineg tein bera rimagobuma, beda idou enefeneinei rot koma guru. Mar insa koma bera emen ojgomu, tina koma onorocunc rot oida mar ongga Allah ensejah nou otunggom bera ah gij efera fob guru.
8Rusnok monuh egens rimagobuma jera rusnok monuh ongga enjgineg. Noba ebirfager monuh egens rimagobuma jera ebirfager monuh enjgineg. Icusur agoska mebi doska gij monuh suma suma. Noba gij mona egema deika beda mosona eteb omok rusnok rufoukou doska. Tina mar insa koma bera erek orocunc rot mar ongga sismeni ongga emen kahma ojgomu. Mar koma bera erek ojaga egens ongga otkonu okora rot efen efesa fob. Koma erek orocunc rot oida dektek guru, beda ofa emeker rot efen efesa.
9Erek koma tein, iwa yut joug idou efesi rot mar ongga rusnok rumotunggom skoita iwa gij mona insa koma. Jeska rua rimekris iwa skoita ebirfager agama jeskaseda ruga ojga rot iwa. Noba rusnok egema rumobu iwa gu mod ongga iwa imohoturuma gij jeskaseda yum iteij gu Allah tein. Noba rusnok rimekris iwa skoita ebirfager monuh noba skoita raja eneya tein jeskaseda ruga ojga rot iwa, jeska iwa iroru Didif fob. Tina Allah omoitij rot mar koma jeskaseda iwa ifesij rot Ofa efen oga ongga oufamofa gu rua.
10Noba rusnok rimefesij rot Allah oga ongga oufamofa gu rusnok mebif nomnaga fog, fogora mar okum insa koma ongga Allah ensejah rot bera emesaga si.
11Noba rua rimagei iwa fogora ruga ojga rot iwa jeska iwa iroru Didif fob. Jefeda gij mona insa koma bera iwa inejekjeka idou efesi rot mar ongga iwa imagot gu rua guru. Tina iwa yagot rot mar ongga angh gij idou efesi ojgomu. Jeska mar ongga iwa inagot insa koma bera erek mar ongga Efena Ebsi Allah oncunc gij idou efesi rot sismeni fob.
12Noba gij mona insa koma tein bera runa rimekikif jeska rerin rukoser era rukorer noba rimaha rua gu rerin mesa fogora rukoser insa koma rimagos ojgomu. Beda riker tein rimekikif jeska rerin riser fogora rimaha rua gu rerin mesa. Noba riser tein rudou emekirsa rot rerin riker. Jefeda rusnok rimagob rerin riker insa koma ojgomu.
13Rusnok rufoukou doska bera rimeita rudou ongga ofogog rot iwa jeska iwa iroru Didif fob. Jefeda iwa ita idou ahais onjoros mona ongga Allah ontunggom mar insa koma ongga Ofa ensejah rot fob. Ita idou ahais erek koma ojgomuja jeskaseda iwa isma eiteij ah ongga efeinah noba ongga ah aibin."
14Erek koma beda Yesus agot deika oida, "Gij mona kahma beda iwa imek osnok egens ongga ofogog doska otunggom mar ongga oska eteb gij Mod Allah efesi. Fogora Mod efesi insa koma bera emeja erek oska efekeifa eteb ojgomu. Jefeda idu ongga ek gij Mar Efeyi Ebsi, beda ofa eisisi keingg odou efesi osok gij mar ongga Didif dimfesij rot insa koma ojgomu. Jeska gij mona insa koma bera rusnok ongga ringker gij monuh Yudea rumoku gu memaga ofos.
15Noba rusnok ongga riker skida rerin mod ongga erek edeider bera runojuj sons jeskaseda rita mar jeska mod efesi insa koma sismeni fog guru. Tina rua rumoku ebeirens ojgomu.
16Noba rusnok ongga rif mar gu mekeni bera runoksons gu rerin mod jeskaseda rita meisoufa egema sismeni fog guru. Tina rumoku ebeirens ojgomu.
17Okum eteb rot rujager ongga rifaga okum rot riser era rot rujager ongga rungh mengk gu rerin riser gij mona insa koma tein. Jeska rua runoku ebeirens jinaga guru.
18Noba iwa yum iteij gu Allah jeskaseda mar okum insa kef enesaga gij mona ongga meifina eteb guru. Jeska gij mona ongga meifina eteb ensaga bera okumkum eteb nou rusnok ongga rungku jeska mar okum insa koma.
19Erek koma jeska gij mona insa koma ongga emen bera rusnok rimeita rifera okora eteb. Rua rimeita rifera okora ekirsa jeska rusnok nomnaga ongga rita rifera okora sis mona ongga Allah ontunggom mebif nomnaga onjoros deisef tein. Noba mimif minek rusnok ongga rita rifera okora ekirsa jeska rua ongga rimeita rifera okora gij mona insa koma deika guru.
20Noba Allah anggen rot oida Ofa omotunggom mona insa koma erek estir ojgomu. Jeska erek Ofa onotunggom mona insa koma erek estir guru, beda rusnok nomnaga rimagos rot ojgomu. Ofa omotunggom mar erek koma jeskaseda rusnok nomnaga rinagos rot mar okum ongga emah keingg rua gij mona insa koma guru. Tina Ofa omotunggom mar erek koma jeska Ofa odou efeneinei rot efen rusnok ongga Ofa oncunc fob.
21Erek rusnok ragot gij mona insa koma oida, 'Iwa ik osnok egens kef fog, jeska ofa bera Kristus egens koma ongga Allah omobk.' Era rusnok rimagot oida, 'Kristus egens koma ongga Allah omobk bera en jah suma fob.' Beda idou onororu mar ongga rua ranggot insa koma jinaga guru.
22Jeska rusnok rufoukou ongga ruh risinsa rourou erek Mesias ongga Allah omobk, era ongga rijeka risinsa rourou erek nabi-nabi ongga Allah omobk bera rimen si. Beda rua rumotunggom mar onswos eteb jeskaseda rurokrusa rusnok ongga Allah oncunc fob. Rua rimereneni rot mar erek koma, tina rineita guru.
23Jefeda iwa yut joug isinsa idou efesi rot ahais ojgomu. Jeska mar ongga Didif dimfesij gu iwa ebeibeyaif bera ah gu mona kahma ros."
24Beda Yesus agot deika oida, "Gij mona insa koma ongga rusnok rita rifera okora eteb oisa fob, beda mowa emeja erek motkobah, noba mesta tein eneisa deika guru. Motur tein emesiri jeska mebaga, beda mebaga emeja erek toga.
25(13:24)
26Beda gij mona insa koma bera rusnok rimek Didif, Rusnok Efesa, din gij mocgoj ofog rot owesa efek eteb jera eisa ongga efesa eteb tein.
27Beda Didif dumobk malaikat-malaikat rejrej mebif nomnaga jeskaseda ruhoturu rusnok nomnaga ongga Allah oncunc fob jeska monuh ongga angh doida jera monuh ongga angh yes tein.
28Iwa isujohu rot mega ara egens. Gij mona ongga mega koma efen efeyi ofoukouku ros beda koma erek orocunc rot oida mona dektek guru, beda emefek si.
29Erek koma tein, gij mona ongga iwa ik mar insa koma ongga Didif dimfesij rot gu iwa fob, beda iwa imejginaga rot oida mona ongga enja ejgwaga bera enesaga doida fob.
30Ongga tenten bera, mar insa koma nomnaga omorogna gij mona ongga rusnok rifena ebah ros erek ebeibeyaif tein.
31Noba mebaga jera mebi kef ongga iwa isujohu emah rot mona ongga ah aibin bera emejeseiseifa si. Tina dedin duga bera eneseiseifa guru. Dedin duga bera emah gij mona ongga ah aibin ojgomuja."
32Beda Yesus agot deika oida, "Erek koma jefeda rusnok egema tein rinejginaga rot mona juaho fogora mar insa koma nomnaga omorogna guru. Noba malaikat-malaikat gu mebaga era Didif tein, ongga Allah efen efesa, memef tein bera menejginaga rot mona juaho fogora mar insa koma omorogna guru. Dedin Akeina Allah esinsiyai bera ejginaga rot mona insa koma ojgomu fob.
33Jefeda iwa yut joug idou efesi rot iskusk, jeska iwa inejginaga rot mona juaho fogora mona insa koma omorogna guru."
34Beda Yesus agot mar ongga orocunc rot mona insa koma oida, "Koma erek ebirfaga egens ongga emecira jah monuh enjgineg. Sismeni bera ofa aha efen mod gu rusnok ongga rumfij ofa. Beda ofa agot rot mar ongga orofosutut osnok egens egens ongga rumfij bera rumotunggom nou ofa ojgomu. Noba ofa agot gu osnok egens ongga ont joug montoj mod koma oida ofa ot joug rot iskusk ojgomu. Beda ebirfaga egens insa koma eja jeska fob.
35Erek koma jefeda, iwa tein yut joug idou efesi rot iskusk. Jeska Didif, ongga erek ebirfaga mod egens insa koma, bera dumoksons gij mona ongga rusnok rinejginaga rot guru. Erek Didif dimen gij moworu, era motu deis, era gij mona efenen, era gij rahah tentena tein, iwa inejginaga rot guru.
36Noba gij mona ongga Didif durogna keingg iwa, tina gij mona insa koma bera inot joug idou efesi rot ahais ros guru, beda mona insa koma bera onoufa nou iwa guru.
37Mar ongga Didif danggot gu iwa bera nou rusnok nomnaga tein ongga ruroru Didif. Koma bera: Yut joug idou efesi rot iskusk ojgomu."