Dual Panel1Nou ongga Yesus otunggom mar insa koma oisa fob, beda Ofa jera efen ruforoker rija jeska monuh insa koma beda ricira jah kota Nazaret ongga Yesus efen ojga.
2Gij mona ongga Sabat beda Yesus oira gij mod ongga rusnok rum riteij gu Allah gij noba oftuftu rusnok jah suma. Beda rusnok rufoukou rudou oubsaha rot mar ongga Ofa omftuftu gu rua. Jefeda rua ragot moguma oida, "Teinefa fogora Ofa odou efesis rot mar erek komo? Idu bera oftuftu Ofa fogora otunggom mar ongga onswos teino?
3Jeska Ofa kef bera osnok egens giskini erek mimif ojgomu. Ofa efen efarur erek rua ongga rutunggom kursi jera meja, erek koma ojgomu. Ofa bera Maria efen efesa. Noba Ofa tein, Yakobus ni, Yoses ni, Yudas jera Simon ni rerin rukora. Ofa efen meyeser tein riker morototuma jera mimif jah sif!" Erek koma jefeda rua rudou oska rot Ofa.
4Beda Yesus agot gu rua oida, "Rusnok gij kota-kota ofoukou bera rugif gu nabi-nabi ongga runjogog rua. Tina gij kota ongga nabi-nabi risinsa rerin bera rusnok runougif gu rua guri. Erek koma rot Didif tein. Jeska Didif, ongga erek nabi egens tein, bera din jah dedin kota kef, tina iwa inougif gu Didif guri."
5Ofa aha etma esij rusnok rigekeka ojgomu ongga marenir fogora eita eskeira gu rua. Tina Ofa onotunggom mar onswos ofoukou gij kota insa koma guru, jeska rusnok rudou onororu Ofa guru.
6Noba Ofa odou oubsaha rot rusnok ongga ringker gij kota egens insa koma, jeska rudou onororu Ofa jinaga guru. Yesus eja jah kota-kota ongga angh gij monuh insa koma noba oftuftu mar gu rusnok.
7Beda Ofa ois gu efen ruforoker rufok setka kungkob erfeka jeskaseda rumohoturuma jera Ofa. Beda Ofa eita owesa efek gu rua nomnaga jeskaseda rikemeji efena ofogog jeska rusnok rudou efesi. Beda Ofa obk rua erek gosnok gegeka gegeka jah kota-kota ongga angh gij monuh insa koma.
8Nou ongga rua rinja beda Ofa agot gu rua tein oida, "Iwa inesah mar egema tein guru. Iwa yurka moskur joug itma ojgomu. Tina inorka mar erek maat ni, era mesina nou isah mar gij ni, era fifi egema tein guru.
9Iwa irgi sandal joug yukoda jera meisoufa egensmes tumu ifaga ojgomu, tina inorka meisoufa egema tein guru.
10Beda gij mona ongga iwa yuira gij kota egens fob, noba rusnok ruroun iwa gij rerin mod, beda iwa yahca gij mod egens insa koma ojgomu onjoros iwa inja jeska kota insa koma jeskaseda rudou onoska rot iwa guru.
11Tina erek iwa insaga gu kota egens, noba rusnok ongga ringker jah suma runoroun iwa guru, noba rua tein rineg rot mar ongga iwa yuftuftu rot gu rua guru, beda ija jeska kota insa koma ojgomu. Noba nou ongga iwa inja jeska kota insa koma, beda yubsa ikoda rot mebi ofou sismeni fog. Iwa itunggom mar koma jeskaseda irocunc rot oida mebi ofou ongga angh gu rua bera erek rerin mar ongga oska ongga angh gu rua ojgomuja."
12Jefeda Yesus efen ruforoker rufok setka kungkob erfeka rija jah kota-kota fob. Rua ruftuftu gu rusnok jeskaseda rimeesa joug rot rerin mar ongga oska.
13Noba rua tein rikemeji efena ofogog ofoukou jeska rusnok rudou efesi. Noba rua rira miniyi rurohur gij rusnok ongga marenir ritofu fogora rita eskeira gu rua.
14Rusnok rufoukou rifesij moguma rot mar nomnaga ongga Yesus ontunggom fob onjoros raja Herodes tein engg rot fob. Rusnok rineya ragot oida, "Yesus koma bera Yohanes Pembaptis ongga efena ebah sons. Jeska Ofa efen owesa efek eteb fogora ontunggom mar onswos ofoukou fob."
15Tina rusnok enjgineg ragot osok gij Yesus oida, "Ofa koma bera nabi Elia ongga emfena ebah sons fob." Noba rusnok egema tein ragot oida, "Ofa bera nabi enjgineg jeska nabi-nabi ongga ringker sis eteb fob ongga rifena ebah sons jeska ranggos fob."
16Tina nou ongga raja Herodes engg rot mar onswos ongga Yesus otunggom fob, beda ofa agot oida, "Yesus koma bera Yohanes Pembaptis ongga didif dumbk rusnok sis fob jeskaseda riris efen ebirfaga. Noba ebeibeyaif bera ofa emfena ebah sons fob."
17Raja Herodes agot mar erek koma jeska sis fob, gij mona ongga ofa eneg rot Yesus enesi, beda ofa ofra mokosa Filipus efen mohona ongga ofoka Herodias. Jefeda Yohanes Pembaptis oftuftu rot ahais skoita raja Herodes oida, "Bua bumfra obkosa efen mohona jeska fob, tina ororu mifmin agama erebent bera koma erek mar ongga oska eteb!" Jefeda raja Herodes obk efen tentarer jeskaseda rikris Yohanes jah mod oskusk rot.
18(6:17)
19Yohanes anggot mar insa koma jefeda Herodias endemdemi odou ongga ofogog rot ofa noba ofa odou os agob Yohanes rot ojgomu. Tina gij mona insa koma bera ofa enagob Yohanes enesi, jeska ofa efen mahina raja Herodes onoitij rot erek koma enesi.
20Jefeda raja Herodes obk efen rusnok jeskaseda riker joug Yohanes rot iskusk askesi ofa angh gij mod oskusk efesi ros. Ofa otunggom mar erek koma jeska ofa emeesa rot Yohanes. Ofa osujohu rot oida Yohanes bera erek osnok egens ongga eneita mar ongga oska guru, noba efen odou ongga ebsi komowa ojgomu. Noba gij mona ongga Yohanes emfesij rot Allah oga gu ofa, beda ofa efen odou eineina gij rot, tina ofa odou os eg rot mar insa koma ojgomuja.
21Tina gij mona ongga rusnok ruina maat keingg Herodes rot efen mona ongga mosu onjuj rot ofa, beda efen mohona Herodias osujohu gij odou efesi rot oida gij mona insa koma bera ofa ereni jeskaseda agob Yohanes ojgomu. Gij mona insa koma tein raja Herodes oroun ebirfager monuh Galilea jera efen ebirfager tentara jera rua ongga rufoka aksa eteb gij monuh insa koma jeskaseda rit maat morototuma jera ofa.
22Askesi rua nomnaga rint maat morototuma ros, beda Herodias efen efesa ojaga ouka jah raja Herodes jera ebirfager insa koma nomnaga rudou. Ofa ouka erek ongkoska yahi jefeda raja Herodes jera ebirfager insa koma rudou eskeira eteb rot ofa. Beda raja Herodes agot gu ojaga egens insa koma oida, "Budou os meidu tein, beda bagot gu didif ojgomu fogora didif dimeita mar koma gu bua si."
23Beda raja Herodes agen rot gu ojaga egens insa koma oida, "Meidu ongga budou os nomnaga tein bera dimeita gu bua si. Erek dedin mareibra nomnaga jera mar nomnaga ongga dufoka ereij keingg bera dimeita oknama gu bua tein si!"
24Erek koma beda ojaga egens insa koma eja skoita efen mosu Herodias noba ejeka gu ofa oida, "Ameina, didif dijeka gu raja Herodes nou meidu ongga erek oufa etebo?" Beda Herodias oroun gu ofa oida, "Buis gu raja Herodes oida, 'Biris Yohanes ebirfaga jeska noba bita gu didif.' "
25Beda ofa oksons ebeirens skoita raja Herodes noba agot gu ofa oida, "Raja Herodes, bua biris Yohanes Pembaptis ebirfaga jeska noba baha esij bokor beda bita gu didif."
26Nou ongga raja Herodes engg mar erek koma fob, beda ofa odou okum eteb rot. Tina ofa onokoja rot mar ongga ojaga egens insa koma ois rot guru, jeska ofa anggen rot gu ofa fob. Noba ebirfager insa koma nomnaga rijginaga rot mar koma fob.
27Erek koma jefeda raja Herodes obk efen tentara egens ebeirens jah mod oskusk jeskaseda eris Yohanes ebirfaga noba orka ebirfaga koma skoita ofa. Jefeda tentara egens insa koma eja jah mod oskusk noba eris Yohanes ebirfaga.
28Beda ofa oksons noba eita Yohanes ebirfaga ongga ah esij bokor gu ojaga egens insa koma. Beda ojaga egens insa koma orka bokor rot Yohanes ebirfaga gu efen mosu Herodias.
29Nou ongga Yohanes efen ruforoker ringg oida rusnok ranggob ofa fob, beda rua rinjeita Yohanes efaga noba risah gij moksu.
30Yesus efen ruforoker rufok setka kungkob erfeka ongga Ofa ombk gij mona ongga sis fob bera ruksons noba rumohoturuma jera Ofa. Beda rua rifesij gu Ofa rot mar nomnaga ongga rua runtunggom noba rumftuftu gu rusnok fob.
31Beda Yesus agot gu rua oida, "Mimif mija jah monuh egens ongga owowa jeskaseda miker keingg mufons ai juens fog." Yesus agot mar erek koma jeska gij mona insa koma bera rusnok rufoukou rin odudu deika skoita Ofa jera efen ruforoker ojgomuja onjoros erek rinet maat oskiyai tein jinaga guru.
32Jefeda rua rifef meg egens noba rija jah monuh egens ongga owowa.
33Tina rusnok rufoukou bera rik rua rinja jeska monuh insa koma. Noba rusnok rijginaga rot oida Ofa bera Yesus jera efen ruforoker. Jefeda rusnok rufoukou rurogna jeska kota-kota ongga angh gij monuh koma noba rua rija rukag rot Yesus jera efen ruforoker jah monuh ongga Ofa enja gij.
34Nou ongga Yesus jera efen ruforoker runsoka jeska meg jah mog, beda Ofa ek, tina rusnok rufoukou doska runowa jah suma fob. Beda Yesus ek erek koma, jefeda Ofa odou okora eteb rot rua, jeska rua erek domba-domba ongga efen gembala egema onot joug rua guru. Jefeda Ofa oftuftu mar ofoukou gu rua tein.
35Nou ongga mowa enjesiri gij, beda Yesus efen ruforoker ragot gu Ofa oida, "Akeina, monjomjom fob, noba monuh kef ah yesmes jeska kota,
36jefeda ongga oufa bera Akeina bubk rusnok kef jeskaseda rijengk maat nou risinsa gij kota-kota ofokai ongga angh rejrej monuhif foga."
37Tina Yesus oroun gu rua oida, "Iwa ita maat egema gu rua ojgomu." Beda rua ragot gu Ofa oida, "Akeina, memef mejengk maat nou rusnok riskembemba doska kef erek teinefa! Jeska erek osnok egens efarur rot mesta cinja orfomu, tina efen ofons insa koma tein bera enadaij nou emengk maat nou rusnok rufoukou insa kef jinaga guru!"
38Jefeda Yesus ejeka gu rua oida, "Iwa isah maat erek egaho bera enah gij yeyin mesina? Iwa ijek yeyin mesina sismeni foga." Nou ongga rua rik fob, beda rua ruksons noba ragot gu Ofa oida, "Roti ofog cinja jera mos orijka ojgomu bera enahif."
39Erek koma beda Yesus obk efen ruforoker jeskaseda ragot gu rusnok insa koma nomnaga oida riker erek ebic egens egens gu meskeingg efen jah suma.
40Jefeda rusnok insa koma riker gij ebic egens egens erek rufok wuntin egens, noba ebic egema erek rufok setka cinja.
41Beda Yesus eita roti ofog cinja jera mos orijka insa koma noba Ofa eyajga jah mebaga. Beda Ofa ois oufamofa gu Allah rot fog. Beda Ofa etka roti insa koma dogdog, noba eita gu efen ruforoker jeskaseda rikeba gu rusnok rufoukou insa koma nomnaga. Noba Yesus eyah mos orijka insa koma tein dogdog gu ruforoker jeskaseda rikeba rot rusnok insa koma tein.
42Rusnok nomnaga rint maat insa koma onjoros maat ereya rua nomnaga fob.
43Beda Yesus efen ruforoker ruhoturu maat ofod sons deika ongga ok morungga eteb setka kungkob erfeka.
44Runa ongga rint maat gij mona insa koma bera erek rufok ribu cinja.
45Nou ongga mar insa koma oisa fob, beda ainsa koma tein Yesus obk efen ruforoker jeskaseda rifef meg noba rija rukag rot Ofa jah kota Betania ongga angh jah meren enama. Beda Ofa obk rusnok rufoukou insa koma jeskaseda ruksons jah rerin monuh tein.
46Nou ongga Ofa ombk rusnok rufoukou insa koma jeska fob, beda Ofa eja jah memaga ofos egens jeskaseda om eiteij gu Allah jah suma.
47Nou ongga motu fob, beda Yesus efen ruforoker runjowa gu meren deismos fob. Tina Yesus eker gu mog ros.
48Beda Yesus ek, tina efen ruforoker ruku meg doska jeska mof en jeska meg osum noba ereteitei rot rua. Noba erek aras orgomu motu deis ros, beda Ofa oira esij mei odog beda ecira aki skoita rua. Nou ongga Ofa ensaga doida meg egens insa koma, beda Ofa erek erabj meg rot rua.
49Nou ongga ruforoker insa koma rik Ofa ecira aki esij mei odog erek koma, beda rua rusujohu rot oida koma bera meranghi mei.
50Jefeda rua nomnaga ragerir jeska erek rimeesa eteb. Tina Yesus ois gu rua oida, "Ei, iwa inemeesa noba inejekjeka idou efesi rot guru, jeska Didif bera Yesus!"
51Beda Ofa eifef meg jera rua, noba ainsa koma tein mof ongga eteb insa koma aha toumou. Erek koma jefeda rudou oubsaha eteb rot mar ongga rua rik insa koma fob.
52Rua ringk mar onswos ongga Yesus ontunggom rot roti jera mos gij mona insa koma tein fob. Tina rudou enebriyi gij rot mar insa koma guru, jeska rudou osumsumu rot teinefa Yesus efen owesa efek.
53Yesus jera efen ruforoker rinsaga jah meren enama, beda meg eibibi rot rua jah kota Genesaret.
54Nou ongga rua runjuj jeska meg fob, beda rusnok jah suma rik rua noba rijginaga rot oida Ofa bera Yesus jera efen ruforoker.
55Jefeda rua rufof rejrej monuh insa koma jeskaseda rijagot gu rusnok enjgineg tein oida Yesus esinsa bera ensaga jah suma fob. Jefeda rusnok rufoukou rumorka rua ongga marenir esij mofka jah gu monuh ongga Yesus engker gij jeskaseda Ofa eita eskeira gu rua.
56Gij monuh era gij kota ongga Yesus omoira, beda rusnok rurka rua ongga marenir jeskaseda raha rua gu moroju esta ongga rusnok rumorodosuma gij. Beda rua ongga marenir ruis gu Yesus jeskaseda erek Ofa oitij rot, beda rua rahtec efen meisoufa tumu Ofa efaga ojgomu. Noba rua ongga rahtec efen meisoufa insa koma fob bera rita eskeira tein.