Alkitab Mobile SABDA
[VER] : [MEYAH]     [PL]  [PB] 
 <<  Roma 12 >> 

1Edohuji, Allah oncunc efen odou ongga oufamofa skoita mimif fob, jefeda didif duis gu iwa nomnaga jeskaseda iwa yuh idou efesi rot ongkasmos skoita Allah ojgomuja. Iwa ita iteij ah ongga ongkoska noba ongga erek mar ongga irougif gu Allah ojgomu. Jeska Ofa bera oncunc efen odou ongga eskeiramera eteb skoita iwa fob. Mar insa koma nomnaga bera erek tenten noba orocunc rot teinefa iwa yugif gu Ofa ojgomu fob.

2Iwa ineita mar morototuma erek rusnok mebif ongga rinejginaga rot Allah enesi guru. Tina yuhoda idou efesi skoita Allah jeskaseda Ofa ocunc gu iwa rot teinefa iwa isujohu rot mar ongga erek efeinah deika. Beda iwa imejginaga jeni rot mar meidu ongga Allah ondou os rot si. Iwa imejginaga rot mar ongga erek ongkoska noba rot mar ongga ereita Ofa odou efesi eskeiramera rot tein.

3Allah oncunc efen odou ongga eskeiramera skoita Didif fob. Jefeda oisouska mar insa koma bera didif dagot deika gu iwa rot oida enadaij nou iwa yufra isinsa ifoka erek aksa eteb guru. Noba inoin keingg ifoka degini tein guru. Tina iwa ita idou efesi ongga osujohu rot mar erek edeider ojgomu. Noba iwa ita mar insa koma jeni erek yeyin idou ongga ororu Allah rot tenten fob ojgomu.

4Iwa isujohu rot osnok egens efen efaga. Efaga efen efetma koma bera erek mar ongga ofoukou. Noba mimif mira efetma insa koma jeskaseda murotunggom mar ongga erek toga toga.

5Erek koma tein mimif nomnaga bera erek rusnok rufoukou. Tina oisouska mudou ongga ororu Yesus Kristus bera mimif minja erek efaga egens ojgomu. Noba mimif ongga erek egens egens bera erek efaga efen efetma ongga egens egens tein. Noba mimif mita mar moguma erek mumofijma.

6Allah eita owesa efek gu mimif jeskaseda mutunggom mar ongga erek toga toga. Noba mimif misma owesa efek insa koma jeni Allah odou ongga oufamofa rot mimif. Jefeda erek osnok egens esma owesa efek jeskaseda eg mar gij odou efesi jeska Allah fogora agot rot mar insa koma gu rusnok enjgineg tein, beda ofa agot rot mar insa koma jeni erek odou ororu Allah rot ojgomu.

7Noba erek osnok egens esma owesa efek jeskaseda ofij efen mohujir, beda ofa eita mar insa koma ojgomu. Noba erek osnok egens esma owesa efek jeskaseda oftuftu rot Allah oga gu rusnok enjgineg, beda ofa eita mar insa koma ojgomu.

8Noba erek osnok egens esma owesa efek jeskaseda eisisi joug rusnok enjgineg, beda ofa eita mar insa koma ojgomu. Noba erek osnok egens esma owesa efek jeskaseda ofij rusnok enjgineg rot efen mareibra ofoukou, beda ofa eita mar insa koma oisouska efen odou ongga erirei eteb ojgomu. Noba erek osnok egens esma owesa efek jeskaseda eja okag nou rusnok erek rerin ebirfaga, beda ofa eita mar insa koma oisouska efen odou ongga ocosu efei ahtah ojgomu. Noba erek osnok egens esma owesa efek jeskaseda ocunc odou efesi ongga eskeira skoita rusnok enjgineg, beda ofa eita mar insa koma oisouska efen oga ongga enerahah rot guru.

9Iwa tein ita idou ongga okora rot rusnok enjgineg erek tenten ojgomu. Noba ibes ifaga jeska mar nomnaga ongga erek ofogog ojgomuja. Noba idou osos rot mar ongga erek ongkoskamoka ojgomu.

10Yuh idou efesi moguma erek rusnok ongga rudou omokorema ojgomuja. Noba yufra ihujir rerin rufoka erek ekirsa jeska iwa isinsa yeyin ifoka.

11Inorons rot idou ongga eskes osok gij mar ongga Allah ondou os rot guru. Tina ita idou ongga ahais askesi iwa yufij Tuhan ojgomuja.

12Iwa ita idou ongga erirei askesi iwa yuisum gij Allah rot mar ongga Ofa emeita gu iwa. Noba yuin keingg idou efesi rot mar okum ongga askesi ereneni iwa ojgomuja. Noba iwa tein yum iteij gu Allah ojgomuja.

13Noba iwa ikeba yeyin mareibra eneya rot Allah efen rusnok ongga rufojingki tein. Noba iroun rusnok enjgineg gij yeyin mod efesi rot idou ongga oufamofa ojgomu.

14Noba gij mona ongga rusnok rutunggom mar ongga ofogog skoita iwa, beda iwa inois gu Allah jeskaseda Ofa ofra mar okum keingg rua rot guru. Tina yum iteij gu Allah jeskaseda Ofa ocunc odou ongga oufamofa skoita rua ojgomu.

15Gij mona ongga yeyin ihujir rudou efaga ouka rot mar, beda iwa tein ita idou ongga efaga oka rot morototuma jera rua. Noba gij mona ongga rua rudou okumkum rot mar egema, beda iwa tein ita idou ongga okumkum rot morototuma jera rua ojgomu.

16Noba iwa ita idou ongga eskeiramera morototuma tein ojgomuja. Noba inofra ifoka erek aksa eteb ojgomuja guru, tina icunc idou ongga oufamofa skoita rusnok ongga runok rufoka gij guru tein ojgomu. Iwa inesitit isinsa efaga rot mar insa koma tein guru.

17Gij mona ongga rusnok rutunggom mar ongga ofogog skoita iwa, beda iwa inesesa mar ongga ofogog sons skoita rua guru. Iwa ireneni rot ahais jeskaseda mar ongga iwa itunggom bera erek oufamofa ahah rusnok nomnaga riteij ojgomu.

18Noba iwa ireneni rot ahais tein jeskaseda iker rot idou ongga eskeiramera morototuma jera rusnok enjgineg.

19Edohuji, gij mona ongga rusnok rutunggom mar ongga oska skoita iwa, beda iwa inofra mar okum keingg rua rot ebeirens guru. Tina iwa yuin keingg idou efesi fogora iker rot mona ongga Allah omofra mar okum keingg rua rot efen odou ongga okumkum eteb skoita rua si. Jeska runggu gij Mar Efeyi Ebsi rot mar ongga Allah anggot erek kef oida, "Didif dimesesa mar okum sons skoita rusnok ongga rutunggom mar ongga oska si. Didif dumofra mar okum keingg rua rot si."

20Erek koma tina ongga oufa bera, iwa ita mar ongga runggu gij Mar Efeyi Ebsi erek kef oida, "Erek mesa ongga ofogog mosona ongk rua, beda iwa ita maat gu rua ojgomu. Noba erek magon enir tein, beda iwa ita mei gu rua ojgomu. Jeska erek iwa ita mar insa koma gu mesa ongga oska skoita iwa, beda mojen en rua rot mar ongga oska ongga runtunggom skoita iwa sis fob si."

21Erek iwa itunggom mar ongga ofogog sons skoita rusnok enjgineg, beda koma erek iwa insiri gu rua fob. Tina ongga oufa bera, iwa icunc idou ongga oufamofa sons skoita rusnok ongga rutunggom mar ongga ofogog skoita iwa, beda rua bera ongga rimesiri gu iwa si.


  Share Facebook  |  Share Twitter

 <<  Roma 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel