Alkitab Mobile SABDA
[VER] : [MEYAH]     [PL]  [PB] 
 <<  Roma 2 >> 

1Erek koma jefeda, enadaij nou mimif magot oida minejginaga rot oida Allah omofra mar okum eteb keingg rusnok ongga rutunggom mar ongga oska erek insa koma jinaga guru. Noba erek rineya jeska iwa rucunc rusnok enjgineg erek oska rot mar insa koma ongga rua runtunggom fob, beda koma erek rua rucunc risinsa tein erek ruska. Jeska iwa nomnaga bera ita mar egema tein ongga oska morototuma erek rusnok insa koma fob.

2Mimif mijginaga rot oida gij mona ongga Allah ofra mar okum keingg rusnok rot rerin mar ongga oska, beda mar ongga Allah ontunggom insa koma bera erek tenten ojgomu.

3Iwa bera erek rusnok giskini ongga rutunggom mar erek insa koma tein. Jefeda gij mona ongga iwa icunc rusnok enjgineg erek oska rot rerin rita mar ongga oska, beda enadaij nou iwa isujohu rot oida iwa imosuwa isinsa jeska Allah efen mar okum insa koma tein guru.

4Askesi iwa iroru mar ongga oska ros, beda Allah oin keingg odou efesi rot iwa noba Ofa ocunc odou ongga oufamofa skoita iwa ros. Tina enadaij nou iwa isujohu rot oida mar ongga Allah ontunggom insa koma bera onofoufem nou iwa guru, erek koma guru. Jeska Ofa ocunc odou ongga oufamofa erek insa koma jeskaseda iwa imeesa joug rot yeyin mar ongga oska.

5Erek koma tina iwa ifos ombrera ojgomu jeska iwa inemeesa joug rot yeyin mar ongga oska guri. Jefeda koma erek iwa imesma mar okum eteb ekirsa gij mona ongga Allah ocunc odou ongga otkonu oska eteb skoita rusnok ongga ruroru mar ongga oska ros. Gij mona insa koma bera rusnok rimek Ofa ofra mar okum eteb keingg rusnok nomnaga ongga rita mar ongga oska erek insa koma si. Noba mar ongga Ofa omotunggom koma bera erek tenten ojgomu.

6Jeska Ofa emeita mar gu rusnok nomnaga jeni rerin rita mar.

7Erek rusnok ruh rudou efesi jeskaseda ruroru mar ongga oufamofa ojgomuja jeskaseda Allah omofra rerin rufoka aksa ni, noba ocunc rua erek rusnok ongga rudou oufamofa ni, erek rua rusujohu rot eiteij ah ongga ah aibin ni, beda Allah bera emeita eiteij ah ongga aibin ojgomuja gu rua si.

8Tina erek rusnok rudou efeneinei rot risinsa ojgomu noba runofij rusnok enjgineg guru ni, rua rukoja Allah oga ongga tenten ni, rudou os ruroru mar ofogog ni, beda Allah omocunc efen odou ongga otkonu oska eteb skoita rua fogora omofra mar okum keingg rua rot si.

9Rusnok nomnaga ongga rita mar ongga ofogog bera rimesma okum eteb noba rumofogu okora eteb rot si. Koma tenten rot rusnok ongga Yahudi jera rusnok ongga Yahudi guru tein.

10Erek koma tina rusnok nomnaga ongga rita mar ongga oufamofa bera rimesma rufoka aksa jera riteij ah ongga eskeiramera jeska Allah. Noba Allah omocunc rua erek rusnok ongga oufamofa tein. Koma tenten rot rusnok ongga Yahudi jera rusnok ongga erek Yahudi guru tein.

11Mar insa koma nomnaga bera erek tenten ojgomu. Jeska Allah oga ojga rot rusnok ebic nomnaga erek edamokuma rot rerin rita mar fob.

12Oisouska hukum Musa bera erek rusnok rinejginaga rot hukum Musa enesi, tina rua ruroru mar ongga oska ojgomu, beda rua tein bera rimesma okum eteb jeska Allah rot si. Noba rusnok nomnaga ongga rijginaga rot hukum Musa fob, tina rua ruroru mar ongga oska ros, beda Allah omofra mar okum eteb keingg rua rot tein si.

13Erek rusnok rudou ebriyi gij hukum Musa fob, tina rua runororu jeni hukum insa koma nomnaga guru, beda Allah onocunc rua erek rusnok ongga rudou ebsi komowa guru. Tina rusnok ongga rudou ebriyi gij hukum Tuhan fob noba ruroru jeni hukum insa koma nomnaga, rua bera ongga Allah omocunc erek rusnok ongga rudou ebsi komowa.

14Rusnok ongga Yahudi guru rinejginaga rot hukum Musa enesi. Tina gij mona ongga rua risinsa ruroru mar ongga oufamofa ongga morototuma erek hukum Musa anggot rot, beda koma orocunc rot oida hukum egens bera enah gij rudou efesi fob.

15Oisouska mar oufamofa ongga rua runtunggom insa koma bera rua rurocunc rot oida mar ongga morototuma erek hukum Musa bera enah gij rusnok nomnaga rudou efesi fob. Koma tenten ojgomu, jeska rusnok nomnaga rijginaga gij rudou efesi rot fob oida mar ongga rua rutunggom bera erek tenten era erek oska.

16Allah omofra mar okum eteb rot mar nomnaga ongga rusnok rindemdemi gij rudou efesi oisouska mar ongga Yesus Kristus anggot fob si. Mar insa koma nomnaga bera ongga didif dimfesij rot gu rusnok gij mona ongga didif duftuftu rot Allah oga ongga oufamofa.

17Erek koma noba, teinefa rot iwa ongga erek Yahudi. Iwa idou eredi rot oida Allah omoskotu iwa, jeska iwa iroru hukum Musa ni. Iwa isitit isinsa ifaga jeska iwa bera erek Allah efen rusnok ojgomu ni.

18Iwa isujohu rot oida idou ejginaga rot mar ongga Allah ondou os rot ni. Iwa yagot rot oida idou ebriyi osok gij mar meidu ongga erek oufamofa, jeska rusnok rumftuftu iwa gij hukum Musa sis fob ni.

19Iwa yagot rot oida iwa iroun rusnok ongga rinejginaga rot Allah enesi skoita Ofa erek osnok egens ongga oroun rua ongga riteij ofou skoita moroju ni. Iwa isujohu rot oida mar ongga iwa yuftuftu gu rua ongga Yahudi guru osok gij Allah oga bera orofij rua erek lampu eisa orofij rusnok gij motkobah ni.

20Iwa yagot oida iwa yuftuftu rusnok ongga rudou osumsumu rot hukum Musa jera rusnok ongga rudou ebriyi gij mar erek ruforoker rudou ebriyi gij mar ni. Erek koma jeska iwa isujohu rot oida, oisouska hukum Musa bera iwa idou ebriyi gij mar ongga erek tenten fob.

21Erek yeyin ita mar insa koma nomnaga ongga ongkoska, jeska iwa bera rusnok ongga Yahudi. Jefeda teinefa fogora iwa inoftuftu isinsa rot mar insa koma tein guri. Iwa yuftuftu gu rusnok enjgineg oida runokoreka mar guru, tina teinefa fogora iwa isinsa yukoreka mar erek komo.

22Noba erek iwa iyahehir joug rusnok jeskaseda rinesiri morototuma jera egema efen mohona guru, tina teinefa fogora iwa isinsa isiri morototuma jera egema efen mohona erek komo. Iwa yagot oida enadaij nou rusnok rugif gu mar ongga erek tenten guru. Tina teinefa fogora iwa yukoreka mar ongga tenten guru ongga rua rugif gu jeskaseda iwa yugif gu mar insa koma erek wuswus teino.

23Iwa idou os isitit isinsa ifaga rot oida iwa ijginaga rot hukum Allah fob. Tina teinefa fogora iwa inororu jeni hukum insa koma guri. Koma erek iwa ihurmei mar skoita Allah ojgomu.

24Jeska iwa ihurmei mar skoita Allah erek koma, jefeda mar ongga runggu gij Mar Efeyi Ebsi osok gij iwa sis fob bera erek tenten ojgomu. Mar koma agot rot oida, "Rusnok ongga Yahudi guru rukoja Allah oga jeska rua rik mar ongga Yahudi runtunggom insa koma ongga erek oska ojgomu."

25Iwa iris ifom mareij ofos jeska jeskaseda irocunc rot oida iwa bera erek Allah efen rusnok. Noba erek iwa iroru Ofa rot tenten fob, beda mar koma bera oufa. Tina iwa inororu hukum Musa rot tenten guri. Jefeda mar ongga iwa intunggom gu yeyin ifom mareij ofos insa koma bera onofij iwa oskiyai tein jinaga guru.

26Rua ongga Yahudi guru rineris rufom mareij ofos jeska guru. Tina erek rua ruroru hukum Allah rot tenten fob, beda Allah omoroun rua tein morototuma erek Ofa oroun rusnok Yahudi ongga riris rufom mareij ofos jeska fob.

27Iwa ongga Yahudi bera yeyin hukum Musa fob. Noba iwa bera ongga iris ifom mareij ofos jeska fob. Tina iwa inororu hukum insa koma rot tenten guru. Rua ongga Yahudi guru bera rineris rufom mareij ofos jeska guru. Tina rineya jeska rua bera ruroru mar ongga morototuma erek hukum Musa anggot rot fob. Jefeda mar ongga rua runtunggom insa koma orocunc rot oida iwa ongga Yahudi bera erek rusnok ongga oska ojgomu.

28Erek rusnok ruroru jeni erebent hukum Musa, beda koma onorocunc rot tenten oida rua bera erek Allah efen rusnok guru. Noba erek rusnok riris rufom mareij ofos jeska, beda koma onorocunc rot tenten oida rua bera erek Allah efen rusnok tein guru.

29Tina mar ongga oufamofa ongga ah gij rusnok rudou efesi bera ongga orocunc rot oida rua rirek Allah efen rusnok ongga tentenmen ojgomu. Noba mar ongga oufamofa insa koma bera en oisouska Efena Ebsi Allah ojgomu. Mar koma enen jeska mar ongga runggu gij hukum Musa jinaga guru. Osnok egens ongga otunggom mar ongga oufa bera odou os jeskaseda Allah esitit mar rot ofa. Ofa onohca rusnok jeskaseda rua risitit mar rot ofa guru.


  Share Facebook  |  Share Twitter

 <<  Roma 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel