Alkitab Mobile SABDA
[VER] : [MONGONDOW]     [PL]  [PB] 
 <<  1 Petrus 2 >> 

1Manangka intua, ḷumbuídon im bayongan inta mora'at ko'i monimu, bo dona'aidon umuran monguboḷ, momunapik, dikadon mo'intoi, bo dikadon mohojat kon intau ibanea.

2Mo'ikow musti mobaliídon naonda bo adií mo'intok inta bagu pinononggadií inta umuran moyogang in susu inta nongkon soroga. Aka natua yo mobiagbií bo posaḷamatonbií im mo'ikow.

3Sing kom Buk Mosuci aim pinais nana'a: "Kopopia i Tuhan kinorasa'an bidon monimu."

4Tuamai, angoidon ko'i Tuhan. Sia naonda bo batu inta nobiag, batu inta iḷumbuí in intau mita sin inanggap monia diaí baraguna; ta'e piniliídon i Allah nobalií batu inta totok im moponting.

5Mo'ikow nion batu mita inta nobiag. Tuamai mo'ikow musti mo'ibog pakeíon pobaḷoi kom baḷoi i Allah inta kon soroga. Takin natua mo'ikow mobalií imang mita inta nobiag tongaídon ko'i Allah, bo inta pinongin i Yesus Kristus noposumbah ko'i Allah ing kurban inta mokosanang kong gina-Nya.

6Sing kom bonu im Buk Mosuci aim pinais nana'a: "Aku'oi ain nomilií kon tobatuí batu inta totok koboli, inta sinampat-Ku kon Sion bo binalií-Kudon batu inta totok im moponting; bo intau inta mopirisaya ko'i-Nia, diaíbií pokopo'oyaíanmai."

7Moḷoben totok mangale im batu tatua ko'i monimu inta mopirisaya. Ta'e aka ko'i monia inta diaí mopirisaya, mobaliíbií onu inta aim pinais kom Buk Mosuci nana'a, "Batu inta diaí pinakeí in intau mita inta mogogaid kom bangunan tua ternyata nobaliídon batu inta totok im moponting,"

8bo "Tuata im batu inta nobalií kopopintudan in intau, batu inta mokopopisií ko'i monia moḷabuí." Mosia mo'ipintud sim mosia diaí mopirisaya kon singog i Allah. Natuabií in sinantuí i Allah ko'i monia.

9Ta'e mo'ikow nion im bangusa inta kinopiliían, imang mita inta mobantung kon raja, bangusa inta mokudus, umat inta kapunya'an i Allah. Aim pinilií bo inoinií i Allah im mo'ikow iḷumuai nongkon sindip bo mayak tumu'ot kom bayag-Nya inta momulia, takin makusud baí mo'ikow mopota'a-ta'au makow in habar soaáḷ bayongan inta pinomia i Allah inta diaí im poliuan.

10Kolipod mo'ikow de'emanbií umat i Allah, ta'e masai in na'a mo'ikow nobaliídon umat i Allah. Kolipod mo'ikow diaí kinotabi i Allah, ta'e masai na'a mo'ikow ain notarima kon totabi-Nya.

11Utat mita inta kinotabiku! Mo'ikow nion intaubií mokokiaíngoi bo momomaḷancong kon dunia na'a. Aku'oi mononggina ko'inimu, dona'ai tongaí umuran dumudui kon ibog in awak na'a inta umuran mobobayowan moḷawang kon jiwa.

12Kopia'an in oaíidmu kon sigad in intau mita inta diaípa nonota'au ko'i Tuhan, sahingga aka singogon monia kon ikow intau mora'at, yo ko'ontongandon monia in oaíidmu inta mopia, daí modayowdon im mosia ko'i Allah kon singgai koaíngoian-Nya.

13Lantaran mopirisaya ko'i Tuhan, daí mo'ikow musti mokopotoindudui kom pomarentah, pinomayak ko'i Kaisar inta nokadai kong kakuasa'an inta totok moponting,

14ande ko'i gubernur inta ain sinunduí i Kaisar mohukum kon intau mita inta momia kom mora'at bo mohormat kon intau inta mogaid kom mopia.

15Sin ibogon i Allah baí oaíid monimu inta mopia tua momompon kom bibig in intau inta tongaí kinosingo-singognya.

16Bo kobiagdon i mo'ikow saḷaku intau inta mobebas, ta'e dona'ai pakeíon ing kabebasan tatua sim momompon kon aid mita monimu inta mora'at, ta'e kobiagbií saḷaku intau mita inta nogaid kon oaíidan i Allah.

17Hormatbií im bayongan intau, kotabibií ing ki utatmu mita inta tumpaḷa Keresten. Ko'ondok ko'i Allah bo hormatbií ing ki Kaisar.

18Utatku mita inta nobalií bobantung, kotoinduduibií ko'i tuangmu bo totu-totu'udon hormat im mosia; de'emanbií tongaí ko'i monia inta mopia ing gina bo mobahasa, ta'e ko'i moniabií doman inta morogi.

19Sim barakatanbií i Allah im mo'ikow inta nonota'au kon inta kino ibog i Allah, sahingga in nosabar doman notarima kon roriga inta sabanarnya in diaíbií patus tarima'an monimu.

20Sin onubií in istimewanya aka mo'ikow motarima kon hukuman inta patus tarima'an monimu lantaran mo'ikow nogaid kon inta no'itaḷaí? Ta'e aka mo'ikow bo nogaid kon inta mopia ta'e sinambok doman, yo barakatanbií i Allah im mo'ikow.

21Sin tuabií i mangale pinogoiniían i Allah ko'i monimu. Sing ki Kristus tontanií ain notarima kon roriga lantaran mo'ikow, bo tua in toḷadanbií ko'i monimu simbaí duduian monimu onu inta pinomia-Nya tatua.

22Sia diaíbií dodai onda nogaid kon dosa, bo diaíbií doman tobatuímai intau nokodongog ko'i-Nia nonguboḷ.

23Wakutu in Sia sinibaían, Sia diaíbií nonulií nonibaí. Wakutu in Sia iroriga, diaíbií in Sia nodandi motulií; tua komintan tongaíbií pinosarakan-Nya ko'i Allah, Hakim inta totok i moaídil tua.

24Ki Kristusbií tontanií in notanggung kon dosa mita naton. Tua mita sinanggung-Nya kon tudu ing Kayu pinoyotalempang, simbaí kita mo'ipilatdon kom bonu ing kakuasa'an dosa, bo mobiagdon podudui in ibog i Allah. Kekeb-Nyabií mita tatua inta mokopia ko'i monimu.

25Kolipod mo'ikow naonda bo domba inta no'iḷale, ta'e tana'a mo'ikow diniadon bui simbaí dumuduidon kong Gombala bo ko'i Inta Moḷoḷukad kon jiwamu.


  Share Facebook  |  Share Twitter

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel