Alkitab Mobile SABDA
[VER] : [MONGONDOW]     [PL]  [PB] 
 <<  Galatia 3 >> 

1Utat mita intau ing Galatia! Mo'ikow nion totu'udon mobodok! Ki ine degaí in nopongaruh ko'i monimu? Eta kinoliongandon monimu inta pinogumanku kon tayowonmai monimu. Aku'oi noguman kong ki Kristus aindon pinopopakuí kong kayu pinoyotalempang!

2Oyuíonpa in liboíonku ko'i monimu: Degaí mo'ikow nion notarima kon Roho i Allah sin dinumudui kon hukum i Musa? andeka nokodongogdon im mo'ikow kon Habar Mopia nongkon i Allah bodongka nopirisayadon ko'i Kristus?

3Nongonu sin nobodokbií natua im mo'ikow? Kobobiag monimu aim pinagkoi monimu kom bonu in Roho i Allah, yo nongonu sim mo'ikow mo'ibogpabií mopongata ing kakuatan monimu tontanií im motayak kong kobiagan mopia?

4Degaí iraimai monimu yo diaíbií im mangale im bayongan inta ain kinorasa'an monimu tua? Diaíbií kuma'an kon akaḷ aka diaí im baragunanya!

5Ki Allah ain nobogoi in Roho-Nya ko'i monimu bo ain nogaid kon soaáḷ mita inta mokoherang kon sigad monimu. Yo degaí inaidan i Allah intua sim mo'ikow dinumudui kon hukum i Musa? Andeka mo'ikow nongindongog kon Habar Mopia tatua bo nopirisaya ko'i Kristus?

6Natua doman in oaíid i Abraham -- wakutu in "sia nopirisaya ko'i Allah. Lantaran pirisayanya tatua sahingga sinarima i Allah in sia nobalií intau inta mokosanang kong gina-Nya."

7Daí baí kota'auan monimu kon intau inta totu-totu'u mopirisaya ko'i Allah, yo mosia tua ing ki adií i Abraham.

8Bo kom Buk Mosuci aindon pinais muna kong ki Allah im moposaḷamatbií kon intau mita inta de'eman Yahudi, sim pirisaya monia ko'i-Nia. Habar Mopia tatua aindon pinota'au muna ko'i Abraham, tua inta mangale in singog tana'a, "Barakat i Allah kom bayongan intau kon dunia na'a moponag mongin inimu."

9Daí mosia inta mopirisaya, barakatan moyotakin i Abraham, intau inta totok mopirisaya tua.

10Sin intau inta nobiag bo tantuí dinumudui kon hukum i Musa, komintanbií nobiag kom bonu ing kutukan. Sing kom im Buk Mosuci aim pinais, "Intau inta diaí mosatia dumudui kom bayongan inta aim pinais kom buk in hukum i Musa, yo kutukon i Allah!"

11Bo baí kota'auandon monimu in na'a, diaíbií tobatuímai intau posaḷamaton sin sia ain dinumudui kon hukum i Musa. Tana'a mita aim pinais kom Buk Mosuci, "Tongaíbií intau inta mopirisaya ko'i Allah im mota'au moyodame i Allah!"

12Ta'e hukum i Musa diaíbií pinodoyon kom pirisaya. Sing kom Buk Mosuci aim pinais, intau inta dinumudui kon hukum i Musa, mobiag sin hukum tatua.

13Ta'e ki Kristus ain nomilat ko'i naton nongkon kutukan in hukum i Musa tatua. Sia nopomayakdon makow in awak-Nya tontanií kinutuk simbaí kita im mopilat kong kutukkan. Sing kom Buk Mosuci aim pinais, "Kinutukdon in intau inta minatoi binambeí kong kayu pinoyotalempang."

14Tua komintan inaidan i Kristus Yesus simbaí barakat inta pinodandi i Allah ko'i Abraham ogoi doman kon intau mita inta de'eman Yahudi. Natua im pinogogaid-Nya, sahingga kita inta mopirisaya ko'i Allah, mota'au motarima kon Roho inta pinodandi i Allah.

15Utat mita! Tana'a aku'oi momakeí in contoh, inta nobaliímai ko'i naton pomuḷoi makow. Aka intau bo ain nogaid kon dodandian bo dondandian tatua aindon nosah, daí diaí bidon tobatuímai kon sigad monia tua im mota'au monginggamaí andeka modugang kon dodandian tatua.

16Ki Allah ain nobogoi in dandi-Nya mita ko'i Abraham bo kong katurunannya mita. Kon dodandian tatua diaíbií pinoguman nana'a, "bo kon intau mita inta katurunan i Abaraham", inta aka tomangalean yo moaíntoí intau. Nana'abií im pinais, "bo kon intau inta katurunan i Abaraham", mangalenya in tongaíbií tobatuí in intau, tuata ing ki Kristus.

17Makusudku nana'a: Dandi i Allah aindon inaidan bo aindon muna pinosah. Tuamai hukum i Musa inta inogoi kon taong 430 no'iduduimai, diaíbií mota'au monginggamaí kon tua andeka momopot kon dandi i Allah tatua.

18Sin aka onu inta ain sinantuí i Allah ginamaí nongkon hukum i Musa daí tua in de'emanbií pinogintompod kon onu inta aim pinodandi. Tongaí lantaran ki Allah ain nodandi ko'i Abraham daí inogoi-Nyabií intua komintan ko'inia.

19Daí aka natua yo onu im mangale pinobogoian kon hukum i Musa? Nana'abií, hukum tatua pinodugang simbaí kota'auan oaíid inta no'i taḷaí, nodapot kong katurunan inta pinodandi mo'iangoidon. Hukum i Musa tatua pinogumanbií im malaekat mita kon intau mita.

20Tuamai mustibií oyuíon im posibotak bain tua bo baraguna in intau mononigad. Ta'e ki Allah in diaíbií nomakeí im mononigad, Siabií tontanií in namangoi.

21Aka natua yo noyoposi degaí in hukum i Musa bo dandi i Allah? Tantuí diaíbií! Sin aka kuma hukum i Musa mobogoi ing kobiagan kon intau, daí intau mota'aubií moyodame i Allah bo inta dumodudui kon hukum i Musa tatua.

22Tongaí kom bonu im Buk Mosuci pinaisdon kom bayongan intau kinawasa'andon in aid diaí mopia. Tuamai totabi inta pinodandi bo inta pinodoyon kom pirisaya ko'i Yesus Kristus inogoi ko'i monia inta mopirisaya.

23Wakutu ing kita diaípa mopirisaya ko'i Kristus kita umuranpabií nokadai kon hukum i Musa; kita naonda bo kinurung modapot im pirisaya naton tatua pinonyata.

24Daí hukum i Musa nobalií moḷoḷukad ko'i naton modapot ing ki Kristus namangoi, simbaí kita im posaḷamaton i Allah sing kita nopirisaya ko'i Kristus.

25Tana'a makow wakutunyadon intau mopirisaya ko'i Kristus, daí kita in diaí bidon iḷukadan makow in hukum i Musa.

26Mo'ikow bo ain nopirisaya ko'i Yesus Kristus, daí mo'ikow ain notobatuí takin-Nya; sahingga im mo'ikow nobaliídon ki adií mita i Allah.

27Mo'ikow komintan aindon binaptis pinodoyon kon tangoi i Kristus, daí sipat mita i Kristus oyuíon bidon ko'i monimu.

28Tuamai intau in Yahudi andeka intau in Yunani, diaí bidon in yoposinya bo diaíbií domandon in sinangoian ata andeka intau nobebas, ḷoḷaki andeka bobay. Mo'ikow komintan aim bidon notobatuí takin i Kristus Yesus.

29Bo aka mo'ikow bo ain nobalií kapunya'an i Kristus, daí mo'ikow ing katurunanbií i Abraham, tuamai mo'ikow im motarima kon onu inta pinodandi i Allah.


  Share Facebook  |  Share Twitter

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel