Dual Panel1Hukum in agama Yahudi tongaíbií nobogoi ing gambaran inta diaí nosilang kon soaáḷ mita mopia inta kon singgai mo'iduduimai, de'emanbií gambaran inta totokea nongkon soaáḷ mita tatua. Sin hukum mita tatua diaíbií mokosompurna kon intau inta mamangoi mosumbah ko'i Allah takin kodia-dia im barang inta posumbah. Umpakahbií pomuḷoi in taong umuran moposumbah ing kurban mita natua.
2Sin aka kuma intau mita inta nosumbah ko'i Allah tua bo totu-totu'udon dinaritan nongkon dosa, yo diaí bidon im porasa'an monia kon dinosapa, bo diaí bidon moposumbah bui ing kurban.
3Ta'e nonyata magií, yo kurban mita inta pinosumbah pomuḷoi in taong tua justru moponoropbií bui kon intau mita kom bayongan dosa monia.
4Sin diaíbií doman duguí in sapi bo duguí im bembeí mokopopat kon dosa.
5Tuamai naonda ing ki Kristus namangoi in dunia na'a, Sia noguman ko'i Allah nana'a: "Ikow in doií bidon ing kurban bo sosumbah; ta'e sinadia-Mudon in awak ko'i-Nakoí.
6Ikow doiídon ing kurban tubaían andeka kurban potobus kon dosa.
7Bo Aku'oi noguman nana'a, 'Na'adon in Aku'oi, o Allah! Aku'oi namangoi sim mogaid kon onu inta kino ibog-Mu, naí inta pinais kom Buk Mosuci soaáḷ Aku'oi.'"
8Dungkuḷ ki Kristus noguman nana'a, "Ikow doiídon ing kurban bo sosumbah; bo doií bidon Ikow ing kurban mahaḷuk inta sinubaí saḷaku sosumbah bo kurban inta potobus kon dosa. Ki Kristus nosingog natua, umpakah bayongan kurban tatua pinosumbah pinodudui kon hukum agama Yahudi."
9Nopaḷut makow kon tua ki Kristus noguman, "Na'adon in Aku'oi, o.. Allah! Aku'oi namangoi sim mogaid kon onu inta kino ibog-Mu." Daí bayongan kurban inta muna tua komintandon pinopatan i Allah bo binaḷuian ing kurban i Kristus.
10Inaidandon i Yesus Kristus onu inta kino ibog i Allah. Pinosumbah-Nyadon in awak-Nya tontanií saḷaku kurban. Sia noposumbah in awak-Nya tatua tongaíbií komintan dapot ing kopaḷutan dunia na'a, ta'e onu in inaidan-Nya tatua, nondaritbií ko'i naton nongkon bayongan dosa.
11Pomuḷoi in singgai imang intau Yahudi umuran mogaid kon oaíidan monia saḷaku imang bo umuran doman mopobui-buimai moposumbah ing kurban mita naí inta biasamai pinosumbah monia. Ta'e totu'ubií kong kurban mita tatua in diaíbií mokopopat kon dosa.
12Ta'e ki Kristus in tongaíbií komintan noposumbah ing kurban potobus kon dosa, bo kurban tatua umuranbií pakeíon nodapotkabií ing kopaḷutan dunia na'a. Naonda in nopaḷut makow noposumbah ing kurban tatua, ki Kristus ilimituí kon dotaí ing koḷanan i Allah bo nomarentah noyotakin-Nya.
13Bo tana'a makow, ki Kristus mogoḷat makow modapot im bayongan saturu-Nya potungkudon i Allah kon tayowon-Nya.
14Daí kurban tobatuí tatua inta inaidan i Kristus noposompurnadon kon intau mita inta ain dinaritan nongkon dosa.
15Kon soaáḷ mita tatua Roho i Allah aim bidon doman noguman ko'i naton nana'a,
16"'Na'adon in dodandian inta inaidan-Ku takin i monia kon singgai mita mo'iduduimai,' ki Tuhan noguman doman nana'a, 'Hukum-Ku mita potonop-Kudon kom bonu ing gina monia, bo popopais-Kudon kom bonu in raian monia.'"
17Ki Allah noguman doman nana'a, "liongon-Ku bidon im bayongan dosa monia bo aid mita monia inta mongora'at."
18Aka, dosa mita bo aid mita mongora'at aindon inampungan, daí diaí bidon paraḷu moposumbah ing kurban sim potobus kon dosa.
19Yo ule utat mita, duguí i Yesus tua nobogoidon ing kabaranian ko'i naton in tana'a tumu'ot kon Ruangan Totok Mosuci.
20Binukatandon i Yesus in daḷan mobagu bayaían naton, daḷan inta mobogoi ing kobiagan. Daḷan tatua mongin gorden inta awak i Yesus tontanií.
21Bo tana'a oyuíondon in Imang momulia naton inta nobalií itoi kom Baḷoi Allah.
22Tuamai, koligai dimiugdon ing kita ko'i Allah takin gina motulid bo totu-totu'udon mopirisaya sing gina naton dinaritandon nongkon pikiran mita inta mongora'at bo awak naton dinaritan domandon in tubig inta modarit totok.
23Koligai ing kita mokopotantuí kom pirisaya bo umuran kumadai kon onu inta inakudon naton bo inta i harap makow naton, sin Sia inta nodandi tantuíbií mobogoi in onu inta aim pinodandi-Nya tatua.
24Bo kita im mustibií mosi'indoian, simbaí umuran mota'au mosiponoropan kom baí motabi kon tumpaḷa intau bo momia doman kon soaáḷ mita inta mopia.
25Kita musti umuran moyosipun moyotakin bo umuran mosambayang. Dona'ai mokopomaḷas naí intau ibanea. Mustibií doman umuran kita mositonggina'an, sing kinota'auan bidon naton kon diaí bidon mo'onggot bo mamangoi bui ing ki Tuhan.
26Sin aka habar inta mobanar nongkon i Allah aim pinota'au ko'i naton, ta'e umuranpa doman tumu'od ing kita mogaid kon dosa, daí diaí bidon ing kurban inta pomopat kon dosa naton.
27Dongka bidon tobatuí in sinadia ko'i naton, tuata in tumayow kom pongadilan i Allah bo tuḷu in toruí-Nya inta momokak kon intau mita inta moḷawang ko'i-Nia!
28Intau inta doií dumudui kon hukum inta inogoi Musa, hukumon matoi bo diaíbií ampungannya, aka doyowa andeka toḷu intau nobogoi ing kosaksian, bo oyuíon im bukti kon sia ing kotaḷaí.
29Ta'e umpakah natua, hukumanbií kon intau inta moritak ko'i Adií i Allah im moboga-bogat, bo ko'i monia doman inta nonganggap nohina in duguí dodandian i Allah, duguí inta pinodoyon kong kinopatoian i Kristus sin nondarit ko'inia nongkon dosanya mita. Sia in nohojat doman kon Roho inta mobogoi in totabi.
30Sing kinota'auan bidon naton ki ine in Sia inta noguman, "Aku'oi im motuliíbií! Akuoi im mohukumbií!" Bo inta noguman doman nana'a, "Hakimonbií i Tuhan in umat-Nya."
31Totokdon moko'ondok aka kom bonudon ing kawasa i Allah inta nobiag!
32Toropkah ing ka'ada'an monimu kolipod. Ko wakutu im mo'ikow notarima kom bayag inta pinonindar i Allah, mo'ikow tantuí nokorasa kon yoyiga, ta'e umuran nobakuat totok i mo'ikow.
33Mokakit in singkuleon mo'ikow bo baliíon monia yambaí kon tayowon intau mobayong. Oyuíon doman mo'itakin im mo'ikow mororiga takin intau mita inta iroriga doman natua.
34Bo mo'ikow no'itakin doman nokorasa kon ko'oajar ing gina monia inta kinurung kom ponjara. Bo wakutu ing kapunya'an monimu nodait inagow, diaí noya'at ing gina monimu, sing kinota'auandon monimu kon oyuíonpabií im mopia-pia nongkon tua bo inta mononoi totok.
35Manangka intua, dikabií ukatan monimu onu inta aim pinirisaya monimu sin aka mo'ikow umuran mopirisaya, daí moḷobenbií mangale inaidanmu tua!
36Mokoposabarbií im mo'ikow, simbaí mota'aupa mogaid kon onu inta kino ibog i Allah, sahingga tarima'anbií monimu onu inta pinodandi i Allah tua.
37Sing kom Buk Mosuci aim pinais nana'a: "Nodiugdon totok in wakutunya, daí Sia inta sinango-tangoi mo'iangoi tua, in ḷagidon mo'iangoi; Diaí bidon baḷu-baḷuian-Nya in wakutu koangoian-Nya.
38Bo umat-Ku inta mobanar im mopirisayabií bo mobiag; ta'e aka oyuíon ing kon sigad monia tua in nobaḷui im pirisaya, daí diaíbií mosanang ing gina-Ku ko'inia tua."
39Kita na'a in de'emanbií umat inta mobaḷu-baḷui im pirisaya bo inta diaí koharapan. Ta'e umatbií inta mopirisaya ko'i Allah bo inta posaḷamaton.