Dual Panel1Onda intua ki Paulus nonaḷaímaidon kon Atena bo minayak ing Korintus.
2Kon Korintus sia noyodungkuḷ in tobatuí intau Yahudi inta ki Akwila in tangoinya, intau inta nongkon butaí im Pontus. Ki Akwila na'a bagu namangoi nongkon Italia takin ki buḷoinya ki Priskila. Sim bayongan intau Yahudi inta nogutun kon Rum nodaitdon sinoko untun i Kaisar Klaudius. Daí ki Paulus minayak noyodungkuḷ nayadua,
3bo nogutun takin monia poḷat nogaid noyotakin monia sin totayak monia notongkai doman in totayak i Paulus, momomia kong kemah.
4Ta'e aka kon singgai in Sabat yo tantuíbií ing ki Paulus mayak im baḷoi pososambayangan bo moyoyosingoganmai im bayongan intau Yahudi andeka intau mita in Yunani simbaí mopirisaya im mosia ko'i Yesus.
5Naonda in no'iangoidon nongkon Makedonia ing ki Silas bo ki Tomotius, diaídon mogoga-gogai ki Paulus mopoyaput in Habar Mopia inta nongkon i Allah kom bayongan intau Yahudi. Sia nopoyaput in habar kong ki Yesusbií tuata in Raja Mopoposaḷamat inta pinodandi i Allah.
6Ta'e barang intau mita kon tua umuran moḷawang poḷat moningkulemai ko'inia, daí sinoko topirannyadon in ḷobud kon ḷambungea mita, saḷaku tanda mobogoi im poringatan kon taḷaí mita monia. Bo sia noguman, "Aka mobodito im mo'ikow, yo dongka bidon taḷaí monimu tontanií! Pomayakku bidon makow! Tana'a makow aku'oi in mayakdon kon intau mita inta de'eman Yahudi."
7Bo sinaḷaíanmaidon i Paulus im mosia bo minayakdon nogutun kom baḷoi inta kon diug im baḷoi pososambayangan tatua. Baḷoi tatua im baḷoi intau inta de'eman Yahudi ta'e mopirisaya ko'i Allah. Ki Titius Yustus in tangoi intau tatua.
8Ta'e ki Krispus, itoi im baḷoi pososambayangan bo takin bayongan ginaḷumnya mita, komintan nopirisaya ko'i Tuhan Yesus. Bo nabayong doman intau mita ing Korintus ibanea in nokodongog kon habar inta pinota'au i Paulus nobalií nopirisaya ko'i Yesus poḷat binaptis.
9Kon doḷom tobatuí ki Paulus noko'ontong kon tobatuí o'ontongon, ki Tuhan namangoi ko'inia bo noguman nana'a, "Dikabií mo'ondok! Umuran popota'au in Habar Mopia, dika tongaí kibio-bioímai.
10Sin Aku'oi in umuranbií kotaki-takinmu. Bo diaíbií tobatuímai im mota'au momogutuí ko'inimu, sin noaíntoí bidon intau kon na'a im mopirisaya ko'i-Nakoí."
11Tuamai ki Paulus nogutundon totaong bo onom nobuḷan kong Korintus bo umuran doman nopota'au im pirman i Allah ko'i monia.
12Naonda ing ki Galio nobalií gubernur kon Akhaya, intau mita in Yahudi, notobatuí kong gina bo nomayow ko'i Paulus poḷat dinia monia pinobayak im pongadilan.
13Mosia nopongadu nana'a, "Intau tana'a monongganut totok kon intau moaíntoí simbaí mosumbah ko'i Allah ta'e diaíbií notongkai in hukum i Musa!"
14Bagu ing ki Paulus motubag, indoianmai ki Galio munadon nosingog kon intau mita in Yahudi tatua, kainia, "Hei intau mita in Yahudi, aka inta pinongadu monimu na'a bo totu-totu'u taḷaí andeka oaíid inta diaí mopia, yo tantuí indongogankubií.
15Ta'e na'a bo tongaíbií bobayowan kon soaáḷ onu in sinunduí andeka hukum agama inta pinakeí kon sigad monimu, daí tua in urusanbií monimu tontanií, aku'oi in doiíbií mobalií hakim kon soaáḷ mita natua!"
16Bo nodait inuntun i Galio im mosia pinoḷuai.
17Daí dinomok monia ing ki Sostenes, itoi im baḷoi pososambayangan tatua bo iḷuntaí monia kon tayowon im meja pongongadilan tatua. Ta'e diaíbií ihiraumai i Galio in soaáḷ tatua.
18Onda intua ki Paulus nogutunpa kon Korintus tongonumai nosinggai. Diaí no'onggot kon tua sia nogumandon kon intau mita inta mopirisaya kon tua kom mayakdon takin i Priskila bo i Akwila kon Siria in sia. Kon Kengkrea, ki Paulus noki bangkuḷugdon im bu'oknya sim mongintompod kon dandinya ko'i Tuhan.
19Naonda in no'iyaputdon kon Epesus, sinaḷaíanmaidon i Paulus ing ki Priskila bo ki Akwila, bo sinumu'ot im baḷoi pososambayangan mososiritaanmai in intau mita Yahudi kon tua.
20Poḷatpa sinahang monia kon tua in sia, ta'e doií in sia.
21Ta'e umpakah natua, wakutu im mobuatdon, sia noguman ko'i monia, "Aka umuranpa totabion i Allah daí mo'iangoibií bui kon na'a in aku'oi." Naonda in noguman makow kon natua, minayakdon sia nongkon Epesus.
22Naonda in noponag kong Kaisarea, sia minayak in Yerusalem nopoyaput in salam kom bayongan jama'at kon tua bo sinumurus kon Antiokhia.
23Naonda in nogutun tongonumai nosinggai kon tua, sia minayak doman im bayongan lipuí kong Galatia bo Prigia noginrigon kom pirisaya in intau mita inta mopirisaya ko'i Tuhan kon tua.
24Wakutu intua, no'iangoi domandon kon Epesus in tobatuí intau Yahudi inta nongkon Aleksandria, ki Apolos in tangoinya. Sia na'a intau inta totok mopandoi mosingog bo totok in nonota'au kom bonu im Buk Mosuci,
25bo nonota'au domandon kon soaáḷ totunduí i Yesus, umpakah bagu binaptis i Yohanes. Ta'e moḷoben domandon totok in ibognya nopota'au in Habar Mopia soaáḷ ki Yesus.
26Takin kabaranian moḷoben ki Apolos nopota'au in Habar Mopia kom bonu im baḷoi pososambayangan. Naonda in dinongog i Priskila bo i Akwila in totunduínya mita tatua, dinia nayadua kom baḷoi monia ing ki Apolos. Bo nodait monia sinarangkan kinopira ko'inia im bayongan roncana i Allah moposaḷamat kom bayongan intau pinodoyon ko'i Yesus.
27Onda intua ki Apolos noroncanadon mayak in Akhaya. Daí intau mita mopirisaya ko'i Yesus kon Epesus noromais kon surat kom bayongan utat inta nopirisayadon ko'i Yesus kon Akhaya simbaí tarima'an monia kon tua ing ki Apolos. Bo naonda in no'iyaputdon kon Akhaya in sia, totuḷungnya totokbií in nokobaraguna kom bayongan intau inta nopirisaya ko'i Yesus sin lantaran totabi i Allah.
28Sin takin totunduí inta mokobangkaḷ tatua, ki Apolos nokobayow kon intau mita in Yahudi kon tayowon intau moaíntoí. Nodaitnya pino'ontong in ayat mita inta pinais kom Buk Mosuci kon ki Yesus tua in totu'u-bií Raja Mopoposaḷamat inta pinodandi i Allah.