Dual Panel1Naonda in nogumandon makow ko'i monia komintan, kami sinumakoidon kong kapaḷ nopobayak im puḷau Kos. Nopo'ikoḷomai kon singgai kami nodapotdon im pulau Rados. Nongkon tua kami minayak im pelabuhan Patara.
2Kom Patara noko'ulií ing kami kong kapaḷ inta mayak im Penisia, daí kami sinumakoidon kong kapaḷ tatua bo minayak.
3Kami iḷumeag bo inontongdon in Siprus kon dotaí ing koḷoigi, ta'e kami sinumalib bo nopobayak in Siria. Ta'e kapaḷ inta sinakoian nami sinumububií kon Tirus, sim mopoponag in datog ing kapaḷ kong kotaí tatua.
4Kon tua kami minayak nokipodungkuḷ kon intau mita inta mopirisaya ko'i Yesus bo poḷatpa nogutun kon tua pitu nosinggai. Roho i Allah ain noguman kon intau mita inta mopirisaya ko'i Yesus simbaí moguman ko'i Paulus kon dona'aidon mayak in Yerusalem.
5Ta'e naonda in nodaitdon in wakutu nami kon tua, minayakdon ing kami nongkon tua bo nongingguputdon kom bobayaían nami. Intau mita inta mopirisaya takin buḷoi bo adií monia nogatod ko'inami nodapot kon ḷuai ing kotaí. No'idapotmai kom bingkií im pintad, kami sinumungkud bo nosambayang.
6Bo noguman makow kon mayakdon, kami sinumakoidon kong kapaḷ bo mosia in nobuidon kom baḷoi monia.
7Nongkon Tirus kami minayak im Ptolemais. Dapotdon intua ing kapaḷ inta sinakoian nami. Kon tua kami minayak nokipodungkuḷ kon intau mita inta mopirisaya ko'i Yesus kon lipuí tatua, sin nopoyaput in salam ko'i monia. Kami nogogaipa tosinggai kon sigad monia kon tua.
8Nopo'ikoḷomai kon singgai kami nobuat nongkon tua bo minayak ing Kaisarea. Kami minayak im baḷoi i Pilipus. Ki Pilipus na'a in intau inta mopopoyaput doman in Habar Mopia. Sia in no'idugang kon dumodudui pitu inta pinilií kon Yerusalem. Kami nogutunpa kom baḷoinya.
9Ki Pilipus kogadií kom mongodeaga opat. Ki adiínya mita tatua ain inogoian i Allah ing komampuan mopota'au in Habar Mopia nongkon i Allah.
10Naonda in tongonumaidon nosinggai kon tua ing kami, ki Agabus namangoi. Sia tua in tobatuí nabi nongkon Yudea.
11Sia namangoi ko'inami bo nogamaí kon togot in ogotan i Paulus. Togot in ogotan tatua pinakeínya pinotokig kon sioḷ bo limanya tontanií bo nosingog, "Na'adon inta pinoguman in Roho i Allah: Ki togi togot in ogotan tana'a in togoton nana'a i intau mita Yahudi kon Yerusalem bo posarahkan kon intau mita inta de'eman Yahudi."
12Naonda in nokodongogmai kon natua, daí kami bo bayongan utat inta nogutun kong Kaisarea ko omba-ombaḷ nongampag ko'inia simbaí diaídon in sia mayak kon Yerusalem.
13Ta'e ki Paulus noguman ko'i monia, "Nongonu sim mongombaḷbií mo'ikow naniíon, baí kota'auan monimu kon ombaḷ monimu nion totokbií im mokororiga kong ginaku! Aku'oi in diaí bidon mo'ondok, de'emanbií tongaí togoton, umpakahbií modapot im matoi kon Yerusalem sim mopota'au in Habar Mopia nongkon i Tuhan."
14Tongaí sia bo doiíbií nokidongog kon tonggina nami, daí dinududuiandon nami in ibognya tatua takin noguman: "Kobaliídon onu inta kino ibog Tuhan."
15Naonda in tongonumaidon nosinggai kong Kaisarea, kami nobasadiadon sim mayak in Yerusalem.
16Bo tongonumai intau mopirisaya ko'i Yesus nongkon Kaisarea dinumudui ko'inami nogatod minayak im baḷoi i Manason. Ki Manason na'a nongkon Siprus ta'e sia ain no'onggot in nopirisaya ko'i Yesus.
17Naonda ing kami no'iyaputdon kon Yerusalem. Kami sinomu takin pia ing gina i intau mita inta mopirisaya kon tua.
18Bo nopo'ikoḷomai kon singgai ki Paulus bo kami minayak nokipodungkuḷ ko'i Yakobus; bayongan intau inta aim binalií itoi kon jama'at ain noyosipun kon tua.
19Naonda in noyaput, ki Paulus nohormat ko'i monia, onda intua ki Paulus nongonguman kom bayongan inta ain inaidan i Allah pinongin inia kon sigad in intau mita inta de'eman Yahudi.
20Nokodongogmai kon o'uman i Paulus tatua, mosia nodayow ko'i Allah. Bo mosia noguman ko'i Paulus nana'a, "Utat, indoiaikah daí aindon kon ribuannya intau Yahudi in nopirisaya ko'i Yesus. Mosia tua intaubií mita inta totok im motoindudui kon hukum i Musa.
21Mosia ain nokodongog kong ki utat aindon notunduí kom bayongan intau in Yahudi inta nogutun kon lipuí intau ibanea bo ki utat mo'ibog doman monginggamaí kon hukum i Musa. Bo ikow ain nongampag ko'i monia simbaí mosia in diaídon mokisunat ko'i adií mita monia bo baí diaídon mobiag podudui in adat naton.
22Bo tana'a makow intau mita in Yahudi inta ain nopirisaya ko'i Yesus tantuí nokodongog bidon kon ikow ain namangoi in na'a, daí naonda degaí?
23Manikah ule duduiaipa in singog nami na'a. Opatdon in intau kon na'a ain nomia kon dandi ko'i Tuhan.
24Daí, bayakdon ing ki utat poyotakin monia mayak mogaid kon upacara pondaritan kon awak, bo uboliaidon im ponggonsingan kom bu'ok monia tua, simbaí mosia mota'audon gonsingan. Sahingga ing kota'auandon im bayongan intau kon habar inta dinongogdon monia tua in diaíbií totu'u, sing ki utat tontanií in dinumudui doman kon hukum i Musa.
25Ta'e aka intau mita de'eman Yahudi inta ain nopirisaya ko'i Yesus, aindon kiniriman nami in surat mosia, aim pinais nami kon tua im bayongan inta diaí mota'au aidan monia. Mosia diaíbií mota'au moka'an kong ka'anon inta aim pinosumbah kom berhala mita, diaí doman mota'au moka'an kon duguí andeka mahaḷuk inta minatoi sinagangan; bo diaí doman mota'au mogaid kon inta mokotor."
26Daí kon singgai no'iduduimai, ki Paulus noyotakin naya opat bo minayak nondarit kon awak takin i monia. Nopaḷut makow kon tua sia sinumu'ot kom Baḷoi Tuhan moguman kon tongonupamai nosinggai bo upacara pondaritan kon awak monia im mopaḷutdon bo mahaḷuk inta posumbah monia in ogoi monia tontanií.
27Naonda im wakutu pitu nosinggai inta ain sinantuí monia motoyongdon mopaḷut, intau mita in Yahudi inta namangoi nongkon Asia noko'ontong ko'i Paulus kom bonu im Baḷoi Tuhan, daí mosia nonongganut kom bayongan intau kon tua bo minayak nodomok ko'inia.
28Mosia sindaḷan doman momaḷuí nana'a, "Hei intau mita in Israel tuḷungaipa! Sin na'adon in intau inta maya-mayak makow bo motunduí kom bayongan intau simbaí diaídon mokidongog ko'i naton bo doií doman dumudui kon hukum i Musa bo momayow kom Baḷoi Tuhan. Bo tana'a sia nodia domandon kon intau mita inta de'eman Yahudi bo mongotor kon tampat mosuci tana'a!"
29Mosia nosingog natua sim mosia ain noko'ontong ko'i Tropimus intau in Epesus tatua kong kotaí noyotakin i Paulus, bo kai monia kamai diniabií i Paulus in intau tatua sinumu'ot kom Baḷoi Tuhan tatua.
30Daí notomba'ukdon im bayongan intau kong kotaí tatua, bo bayongan intau namangoi noyosipun. Mosia nodomok ko'i Paulus bo pinoḷuai monia nongkon Baḷoi Tuhan bo kon dodaipa doman tatua bayongan ngara im Baḷoi Tuhan sinokolingkopan.
31Naonda im mosia moroncana molimod ko'i Paulus, intau mita minayak nopoyaput in habar kon itoi in tontara Rum, kon Yerusalem nokacau.
32Daí itoi in tontara tatua ḷagi nosipun bo nodia kon anggotanya mita pinangkoipamai kom pangkat inta no'ompaí modapot im pangkat inta noḷantud. Mosia ḷagi minayak in tampat inta pinoropatoian tatua. Naonda intau moaíntoí kon tua noko'ontong kon itoi in tontara Rum tua takin anggotanya mita, nogogaidon mosia in nomongkug ko'i Paulus.
33Itoi in tontara tatua dinimiug ko'i Paulus bo nodomok poḷat pinoki tokig in rante. Onda intua itoi in tontara tatua noliboí ko'i monia mongo onu inaidannya.
34Ta'e diaíbií motampuimai in tubag monia tua, sin oyuíon in nopomaḷuí nana'a, oyuíon doman in nopomaḷuí natua. Tuamai in diaíbií kinota'auannya mongo onu in nobalií. Daí pinokidianyadon ing ki Paulus pinobayak in tampat monia.
35Naonda in nodapotdon in tukad daí intau mita moaíntoí inta dinumudui ko'i monia tua sinumoruídon totok sahingga ing ki Paulus pinakisadon pinota'an in tontara mita.
36Intau mita inta mongongacau tua dumuduianmai kon tumi monia bo momaḷuí, "limodon in sia!"
37Naonda ing ki Paulus diaandon kom bonu in tampat monia tatua, sia noliboí kon itoi in tontara tatua, "Mota'au degaí in aku'oi moyosingog motoyong takin i Tuang?" Daí itoi in tontara tatua noliboí, "Eta mota'au tumon bahasa Yunani ikow?"
38Aka natua de'emanbií na'anta intau im Mesir ikow inta nobagumai na'a nogaid kong kakacauan bodongka nodia noḷagui kon intau opat noribu takin sonjata monia bo minayak im padang gurun?
39Ki Paulus notubag, "Aku'oi na'a intaubi' in Yahudi inta nongkon kotaí in Tarsus, tobatuí kotaí inta moponting totok kon Kilikia. Aku'oi im mopo'igum ko'i Tuang simbaí ogoipa in aku'oi mosingog kon tayowon intau moaíntoí tatua."
40Daí naonda ing ki Paulus inogoian kasampatan nosingog, sia sinimindog kon tukad bo nonuḷadaí sia noguman baí intau mita kon tua kibio-biopamai. Daí intau mita kibio-biomaidon. Onda intua ki Paulus nosingog ko'i monia takin bahasa Ibrani, kainia,