Alkitab Mobile SABDA
[VER] : [MONGONDOW]     [PL]  [PB] 
 <<  Kisah Para Rasul 27 >> 

1Naonda in notantuí kon tumakoidon kong kapaḷ ing kami sim mayak in Italia, ki Paulus takin tahanan mita ibanea pinosarahkandon ko'i Yulius, tobatuí porwira tontara in Rum inta tangoionmai "Totabaí i Kaisar."

2Kami sinumakoi kong kapaḷ inta nongkon Adramitium. Kapaḷ tatua nogandu-ngandupa doman makow kom bayongan polabuhan kom propinsi Asia. Ki Aristarkhus, tobatuí intau im Makedonia inta namangoi nongkon Tesalonika, kotaki-takin doman nami.

3Naonda in nopo'ikoḷomaidon kon singgai, no'iyaputdon ing kami kon Sidon. Mopiabií totok ing ki Yulius ko'i Paulus. Inogoinyabií in sia minaya-mayak makow mokipodungkuḷ kon yobayatnya mita simbaí ogoian monia onu ing kaparaḷuannya.

4Nongkon tua, buidon ing kami sinumakoi kong kapaḷ bo nongingguput kom bobayaían. Tongaí tompot totok im mogirup daí kapaḷ inta sinakoian nami tua in tongaí umuran mongin bingkií in dagat kon lipuí in Siprus sin tua in no'i olingoi topi kon tompot.

5Bo naonda ing kami iḷumopotdon kon dagat inta noyogintayow in lipuí Kilikia bo Pampilia, no'iyaputdon ing kami kom Mira, butaí in Likia.

6Kon tua porwira tatua noko'ulií kong kapaḷ nongkon Aleksandria inta mopobayak in Italia. Daí pinokipomampingannyadon ing kami kong kapaḷ tatua.

7Ain tongonumai nosinggai ing kapaḷ inta sinakoian nami im minayak ta'e totok i mo'oḷoi. Totokdon iyumoyiga ing kami sahingga pangabisannya kami kodiug-kodiugdon kong kotaí ing Knidius. Ta'e tompot umuran diaí mopia, daí kami nongin bingkií im pulau Kreta sinumalib kon tanjung Salome.

8Totokdon iyumoyiga ing kami nongin bingkií im pulau tatua daí pangabisannya kami no'iyaput in tobatuí tampat Totubuan ing kapaḷ. Tangoinya Polabuhan Indah, inta diaí noyayuk kong kotaí Lasea.

9Wakutu intua Singgai Moḷoben Poyodamean ain no'italib. Nobayongdon in wakutu pinakeí kon tua, tongaí moko'ondokdon totok aka momakisa mayak turus ing kapaḷ. Tuamai ki Paulus nononggina ko'i monia, kai-nia,

10"Utatku mita, indoiankumai totokbií im mokobahaya aka kapaḷ inta sinakoian naton na'a mayak turus. Sin aka mayak turus yo moḷoben ing karugian naton, de'emanbií tongaí barang naton bo datog ing kapal tana'a ta'e kitabií doman.

11Ta'e porwira tatua mopiri-pirisayabií kom mododia kong kapaḷ tatua bo kaptennya daripada kon onu inta pinoguman i Paulus."

12Totubuan kapaḷ tatua diaí doman mopia pongandupan kon sempo in tumping. Tuamai moaíntoí intau kong kapaḷ tatua in noguman kai monia im manikah bo diaí mongandup bo momakisadon mayak modapot im Peniks bo kon tuapa in solama sempo in tumping na'a. Peniks tua in totubuan kapaḷ kong Kreta inta no'itayow in Toyopan Barat daya bo Barat laut.

13Wakutu intua tompot nongkon Toḷatan mogirup ta'e monyangkoípabií, daí kai monia kamai mota'au bidon mayak ing kapaḷ. Daí binuatdon monia in jangkar bodongka pinobayak ing kapaḷ ta'e nongin bingkií totok im pintad im pulau Kreta.

14Ta'e diaí no'onggot kon tua tompot nogirup noropot -- tuata in tompot inta sinangoian tompot Timur Laut -- nogirup nongkon toba,

15bo nondangat kong kapaḷ nami tatua. Tuamai diaídon mota'au ing kapaḷ mayak turus moyogintayow in tompot moropot. Daí nopasrahdon ing kami bo pinomayakdon makow nami ing kapaḷ tatua diaan magií makow in tompot.

16Kami dinia in tompot no'idapot in tobatuí pulau mo'intok, pulau Kauda in tangoinya. Kon tua iyoyiga'anmai nami daí kinokuasaan nami sikoci ing kapaḷ nami tua.

17Naonda im pinoponikdon in sikoci kong kapaḷ, kapaḷ inta sinakoian nami tua ilibu sinogotan in tali sim mo'ondok dika bo mo'idumpak kom batu karang Sirtis sin nobabow ing kon tua. Layar im pinoponagdon bo pinomayakdon makow im podia'an tompot mamagií mamakow.

18Ta'e lantaran tompot umuran mogirup moropot, sahingga in nopo'ikoḷomai kon singgai datog ing kapaḷ gina'atandon monia iḷumbuí kon dagat.

19Bo kon singgai intoḷunya, takin lima monia tontanií, mosia nomangkoidon noḷumbuí kom pakakas mita ing kapaḷ tatua.

20Tongonumaidon nosinggai kami diaídon moko'ontong kom mata in singgai, bo tundi sin tompot umuran doman mogirup moropot. Pangabisannya diaídon harapan nami kom mosaḷamatpa.

21Aindon tongonumai nosinggai mosia diaí nonga'a-nga'an, daí ki Paulus sinimindog kon yuaí-yuaík monia bo nosingog, "Utat mita, aka kuma bo dinuduian monimu in tongginaku kon dona'aipa tumurus ing kita kong Kreta, yo tantuí diaíbií ing kita nokorasa kon roriga bo karugian nana'a.

22Ta'e umpakah nobaliídon nana'a, ta'e aku'oi im mononggina bui ko'i monimu kong koropoton ing gina bo dona'ai mo'ondok. Sin diaíbií tobatuímai ing kon sigad naton matoi, tongaíbií kapaḷ tana'a in diaídon mota'au pakeíon.

23Sing kogobi'i malaekat i Allah inta sinumbahku, ki Allah inta ki togi ko'inakoí in namangoi ko'inakoí

24bo noguman, 'Dika mo'ondok, Paulus! Sim moyotayowbií i Kaisar in ikow. Bo totu'ubií kon lantaran totabi i Allah ko'inimu daí bayongan intau kong kapaḷ tana'a inta noyotakinmu mosaḷamatbií komintan.

25Tuamai utatku mita, umuran korigonon ing gina! Sin aku'oi im mopirisayabií totok ko'i Allah kom bayongan tua im mobaliíbií naí inta pinoguman-Nyadon ko'inakoí.

26Ta'e kita im mo'itubudon kom pintad in tobatuí pulau."

27Doḷomdon ko impuḷuh bo'opat, kami umuranpabií no'iḷantak makow bo poyamba'an domanmai in tompot kon dagat in Andria. Ta'e degaí no'onggotdon kon doḷom intau mita kom bonu ing kapaḷ nokorasa kong kapaḷ ain kodiug-kodiug kon toba.

28Daí mosia nopoḷabuídon in tali sim pogukur kon kolinow in tubig. Inukurmai monia daí dongkadon doyowa nopuḷuh noyopa ing kolinowea. Naonda in no'i'unadon topilik ing kapaḷ daí buidon inukur monia, bo indoianmai dongkadon mopuḷuh bolima noyopa ing kolinowea.

29Bo lantaran mo'ondok mosia kapaḷ mo'itomponik kom batu karang daí mosia noḷabuí kon jangkar kon dampig tumi ing kapaḷ bo igumon makow nami ḷagidon mobayag.

30Ta'e intau mita inta norogaid kom bonu ing kapaḷ tatua moramiji moḷagui nongkon kapaḷ tatua. Mosia nopoponag in sekoci inta kong kapaḷ tatua bo ki aka-akaḷmai mopoḷabuí in jangkar kon dotaí im muna ing kapaḷ tatua.

31Tuamai ki Paulus noguman kom porwira tatua takin tontaranya mita, kai-nia, "Aka intau mita inta norogaid kom bonu ing kapaḷ tatua bo diaí tantuí kong kapaḷ, yo mo'ikow komintan in diaíbií mosaḷamat."

32Daí tuamai binontat in tontara mita tatua in tali kon uangga tatua, sahingga uangga tatua diniadon in tompot.

33Naonda im motoyongdon momukaí mata in singgai, ki Paulus nonongganut kom bayongan intau kon tua simbaí monga'anpa. Sia noguman nana'a, "Aindon mopuḷuh bo opat nosinggai ing ko'onggotea mo'ikow dongkadon mogoḷat makow bo monahang doman makow ing gogoy.

34Tuamai aku'oi moguman ko'i monimu, monga'anpa biar tongaí tumongopilik. Simbaí mosehat im mo'ikow bo moropotpa. Sim mosaḷamatbií komintan mo'ikow bo diaíbií im moga'at kon sigad monimu nion."

35Nopaḷut makow nosingog kon natua ki Paulus nogamaí kon roti bo nosukur ko'i Allah kon tayowon monia komintan. Onda intua sinila-silainyadon makow in roti bodongka nonga'an.

36Daí noropotdon bui ing gina monia bo no'ibogdon nonga'an komintan.

37Kami kong kapaḷ tatua doyowa nogatut bo pitu nopuḷuh boonom.

38Naonda in nopaḷutdon makow nonga'an im mosia, iḷumbuídon monia ing gandum kon dagat simbaí moga'andon ing kapaḷ tatua.

39Bo naonda nobayagdon, inontongdon monia in toba ta'e diaíbií kinota'auan monia mongo onu in tangoi in tampat tatua. Mosia moramiji mopotubuí ing kapaḷ tatua kon tua.

40Binukaí monia tali mita in jangkar bo sinaḷaíandon monia kon yuaík in dagat. Ta'e layar kon dotaí im muna pinoponik monia simbaí irupon in tompot pobayak naí pintad.

41Ta'e kapaḷ tatua no'idumpak kon dasar im bungaion. Dotaí im munanya no'itomponik daí diaídon noliai, bo dotaí in tuminya nogoguya'at sin dinangatan im bokoḷ noropot.

42Wakutu intua tontara mita inta nodia kon intau mita i hukum moroncanadon molimod kon intau mita inta i hukum tatua, sim mosia mo'ondok dika bo oyuíon in ḷumanguy mayak in toba bo moḷagui.

43Ta'e inimaḷowan im porwira tatua simbaí ki Palus in diaí doman ḷutamon monia. Bo pinotabaínya intau mita inta mota'au ḷumanguy, bo ḷumangui muna mayak in toba,

44bo ibanea in dumudui takin momakeí in dopií andeka bonsi-bonsig ing kapaḷ. Daí nosaḷamat komintan im mosia nodapot in toba.


  Share Facebook  |  Share Twitter

 <<  Kisah Para Rasul 27 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran