Alkitab Mobile SABDA
[VER] : [MONGONDOW]     [PL]  [PB] 
 <<  Lukas 2 >> 

1Kon wakutu intua ki Kaisar Agustus nomarentah noki'pais in tangoi im bayongan intau kong karaja'an Rum.

2Na'a im pinomangkoian pinogiapan kon intau mita, wakutu ing ki Kirenius nobalií gubernur kom butaí in Siria.

3Intau mita minayak noki'pais in tangoi monia kon lipuí monia tontanií.

4Naí doman tua ing ki Yusup. Sia nobuat nongkon lipuí in Nazaret kong Galilea bo minayak im Betlehem butaí in Yudea, lipuí inta kinolahiran i Daud, sin sia katurunan i Daud.

5Sia takin ki Maria ki kantangnya inta sidiadon tua, nokipais doman in tangoi monia.

6Naonda im mosia kom Betlehem notompoddon in wakutu i Maria mononggadií.

7Sia nopolahir in adií ḷoḷaki, ki adiínya guya-guyang. Adií tatua binakutnya in yumbit in daing bodongka pino'ulid kom bonu in duḷang sim mosia diaí noko'ulií kom baḷoi pinongandupan.

8Doḷom tua in kon lipuí tatua, oyuíon ing gombala mita inta yogot moḷukad kon domba mita monia.

9Indoianmai sinimindogbií magií im malaekat i Tuhan bo nokipogontong ko'i monia. Sindar i Tuhan nonimbayang ko'i monia, daí totok inangoian ondok i mosia.

10Ta'e malaekat tatua noguman, "Dika mo'ondok! Sin aku'oi im mamangoi moguman kon habar mopia ko'i monimu habar inta totok im mokosanang kong gina im bayongan intau.

11Singga in na'a kon lipuí i Daud, no'ilahirdon in Raja inta mopoposaḷamat ko'i monimu, tuata ing ki Kristus, ki Tuhan naton.

12Yo baí kota'auan monimu, yo na'aia in tandanya: Mo'ikow mokodungkuḷ kon adií mo'intok inta binakut in yumbit in daing bo pino'ulid kom bonu in duḷang."

13Bo daliídon malaekat tatua sinakinan im malaekat inta nobarong ibanea, inta nodayow ko'i Allah, kai monia,

14"Dinayo-dayowdon ing ki Allah kon tampat inta Totok im Moḷantud! Bo dodamean umuran kotaki-takin monimu, intau inta umuran mogaid kom mokosanang kong gina i Tuhan!"

15Naonda im malaekat mita tatua nonaḷaímai ko'i monia sin nobuidon kon soroga, gombala mita tatua noyosingog. Nana'a in yosingog monia tua, "Koligai baí mayak im Betlehem kita bo mo'indoi kon onu inta ain nobalií kon tua, naí inta aim pinoguman i Tuhan ko'i naton."

16Dodaipa doman tatua mosia minayak noki'podungkuḷ ko'i Maria bo ko'i Yusup takin adií mo'intok inta pino'ulid makow kom bonu in duḷang.

17Bo naonda inontong monia in adií mo'intok tatua, ino'uman ing gombala mita tatua onu inta aim pinoguman im malaekat i Tuhan ko'i monia soaáḷ adií tatua.

18Bo intau mita inta nokodongog kon o'uman ing gombala mita tatua nongoherang.

19Ta'e o'uman tatua sinaguí makow i Maria kom bonu ing ginanya bo umuran kom bonu in raiannya.

20Onda intua nobuidon ing gombala mita tatua sindaḷan modayow bo moduií ko'i Allah sin onu inta ain inontong bo dinongog monia tua notongkai inta aim pinoguman im malaekat ko'i monia.

21Naonda in umurdon waḷu nosinggai, Adií tatua sinunat. Bo sinontangoian monia ki Yesus, tangoi inta pinokiponangoi im malaekat ko'i-Nia wakutu in diaípa kom bonu in sian i inaí-Nya.

22Bo naonda in notompodon wakutunya pondaritan podudui in hukum i Musa, ki Yesus dinia monia kon Yerusalem sim posarahkan ko'i Tuhan,

23sin oyuíon pinais kom bonu in hukum i Tuhan, nana'a, "Komintan adií ḷoḷaki guya-guyang mustibií posarahkan ko'i Tuhan."

24Mosia komakusud doman mobogoi in ḷagapan tarangkuku to par andeka paḷoma doyowa inta nongo'gu'odpa saḷaku kurban naí inta ain sinantuí kon hukum i Tuhan.

25Ko wakutu intua, kon Yerusalem oyuíon intau tangoinya ki Simeon. Sia na'a intau mopia bo inta umuran dinumudui kom parentah i Tuhan, bo sia im mogoḷat doman makow kong koaíngoian im mopoposaḷamat kon Israel. Sia na'a umuran kinawasa in Roho i Allah.

26Roho i Allah ain noguman muna ko'inia kon sia in diaípabií matoi aka diaípa moko'ontong kon Raja Mopoposaḷamat inta pinodandi i Tuhan.

27Singgai tua sia dinia in Roho i Allah minayak sinumu'ot kom Baḷoi Tuhan. Naonda ing ki Yusup bo ki Maria nodia ko'i Yesus inta mo'intokpa tua kom Baḷoi Tuhan sim pogaidan kon onu inta ain sinantuí in hukum agama,

28indaianmai ginamaínyabií ing ki Yesus bo kinoyotan poḷat nodayow ko'i Allah, kai-nia,

29"Tana'a makow Tuhan, aindon inaidan-Mu onu inta pinodandi-Mu. Tuamain pomayakdon makow im bobantung-Mu na'a matoi takin pia ing gina.

30Sim mataku tontanií inta ain noko'ontong kom mopoposaḷamat inta nongkon i-Nimu.

31Sia in sinadia-Mu kom bayongan intau.

32Sia naíonda bo bayag inta nonimbayag kon daḷan in intau mita ibanea, simbaí mosia mamangoi ko'i-Nimu; tuata im bayag inta mobalií dodoyonan poduiían kon umat-Mu Israel."

33Ki inaí bo ki amaí-Nya noherang totok nokodongog kon onu in siningog i Simeon kon Adií tatua.

34Ki Simeon nomarakat ko'i monia bo noguman ko'i Maria ki inaí in Adií tatua, "Adií tana'a aindon pinilií i Allah sim momutuí bo moposaḷamat kom moaíntoí intau Israel. Sia mobalií tanda nongkon i Allah, inta bayowan im moaíntoí intau.

35Bo ikow Maria im mokorasa náonda bo tura-turakkon im pitow, ta'e Adií tana'a im mobukaí kon onu inta no'ibuni kong gina in intau moaíntoí."

36Kon tua oyuíon doman nabi bobay inta ain nogoguyang totok. Ki Hana in tangoinya, ki adií i Panuel, nongkon suku Asyer. Pitu notaong sia nobiag noyotakin i buḷoinya,

37ta'e tana'a sia dongkadon boba-bobay, bo umurnya aindon waḷu nopuḷuh boopat notaong. Sia umuranbií mamangoi im Baḷoi Tuhan. Doḷom bo singgai sia mogaid kon onu inta kino'ibog i Tuhan, sia mosambayang bo mopuasa.

38Bo kon dodai intua sia namangoi doman, bo nodayow ko'i Allah bo noginsilang kon intau mita inta mogoḷat makow ko wakutu koaíngoian i Tuhan moposaḷamat kon Yerusalem.Pinogumannya mongo ki ine in Adií tatua.

39Naonda in nodait inaidan i Yusup bo i Maria onu inta pinarentah kon hukum i Tuhan, mosia nobuidon kon Nazaret kong Galilea.

40Adií tatua nodugangdon ing koḷoben bo koropot-Nya. Sia mobijaksana totok bo totok doman kinotabi i Allah.

41Pomuḷoi in taong guyanga i Yesus mayakmai in Yerusalem sim porayaían kon singgai moḷoben Paskah.

42Bo naonda ing ki Yesus umurdon mopuḷuh bodoyowaí notaong, mosia minayak in Yerusalem moraya kon singgai im Paskah, naí biasamai.

43Naonda in nopaḷutdon pinorayaan tatua, mosia nobuidon, ta'e ki Yesus ing kon Yerusalempabií bo diaí kinota'auan i inaí bo i amaí-Nya.

44Kai monia kamai Sia in no'itakinbií kon yuaí-yuaík in intau mita inta topobayáan monia tua. Bambií tosinggaidon kom binayáan monia bo mulaidon sinayak monia in Sia kon sigad ing ginaḷum mita monia bo kom bayongan intau inta nogoginta'auan monia.

45Ta'e diaí noyodungkuḷ monia, daí mosia nobui kon Yerusalem bo notayak ko'i-Nia.

46Naonda in toḷudon nosinggai pinotayakkan monia, indoianmai monia yo kom bonubií im Baḷoi Tuhan in Sia. Sia limituí makow kon yuaí-yuaík im mototunduí mita kon agama bo mongindongog makow kom potunduían monia bo poḷat doman in Sia mopoliboí-liboí ko'i monia.

47Komintan intau inta mokodongog mongoherang sin totok mopandoi in Sia motubag kon onu in liboíon.

48Natua doman ing guyanga-Nya. Totok doman noherang noko'ontong ko'i-Nia. Daí ki inaí-Nya noguman nana'a ko'i-Nia, "Ule, nongonu inaidan-Mubií in nana'a ko'inami? Nolia-liaudon totok ing gina naminda i amaí-Mu in notayak ko'i-Nimu!"

49Ta'e ki Yesus notubag, "Nongonu sing ki amaí bo ki inaí motayakbií ko'i-Nakoí? Eta degaí diaíbií kinota'auan i amaí bo i inaí kon Aku'oi im mustibií oyuíon kom bonu im Baḷoi i Amaí-Ku?"

50Ta'e diaí kinomangalean monia in singog i Yesus tatua.

51Onda intua ki Yesus nobuidon kon Nazaret noyotakin monia bo umuran dinumudui kom parentah ing guyanga-Nya. Bayongan inta ain nobalií umuran sinaguí i Maria kom bonu ing ginanya.

52Kodugang-kodugangdon ing koḷoben bo kopandoi i Yesus, bo Sia umuran kinotabi i Allah bo kino'ibog im bayongan intau.


  Share Facebook  |  Share Twitter

 <<  Lukas 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran