Alkitab Mobile SABDA
[VER] : [MONGONDOW]     [PL]  [PB] 
 <<  Matius 14 >> 

1Kon wakutu intua nodapotdon in habar mita ko'i Herodes, raja ing Galilea soáḷ bayongan inta inaidan i Yesus.

2Dá sia noguman kom pogawainya mita, "Na'adon ki Yohanes mobobaptis, sia aindon nobiag bui kon sigad in intau inta aim minatoi, manangka intua kawasa mita oyúondon ko'i-Nia."

3Sing ki Yohanes aim pinokidomok bo pinokitokig i Herodes bo binonunya kom panjara. Soáḷ tatua noyotogot im persoalan i Herodias, ki buḷoi i Pilipus ki utatnya.

4Pernah ing ki Yohanes nonogur ko'i Herodes, kai nia: "Diábí mopia aka ikow motonibuḷoi i Herodias!"

5Sabanarnya ki Herodes mo'ibog molimod ko'i Yohanes, ta'e sia mo'ondok kon intau moántó inta nonganggap kong ki Yohanes tua in tobatúbí nabi.

6Tongá kon dodai ing kinótompodan umur i Herodes, adí bobay i Herodias nomanari kon yuá-yuák in tamu bo noposanang kong gina i Herodes,

7sahingga ki Herodes nongibot kom mobogoi in onukabí igumonnya.

8Lantaran pinakisa i inánya, dá adí bobay tatua noguman, "Tududon uḷu i Yohanes mobobaptis kom baki bo ogoidon ko'inakó kon na'a."

9Nokodongogmai kon inta inigum in adí tatua, noájardon totok ing gina i Herodes. Ta'e lantaran sia nongibotdon muna kon tayowon tamunya mita, dá pinotabányadon simbá duduian onu im pino'igum in adí tatua.

10Binayányadon pinoki pongko uḷu i Yohanes inta kom ponjara.

11Uḷu tatua sinudu monia kom baki bo dinia inogoi kon adí tatua bodongka inogoi in adí tatua ko'i inánya.

12Onda intua murí mita i Yohanes Mobobaptis namangoi nogamá kon awaknya bo binayak iḷobong. Nopaḷut makow noḷobong, mosia minayak nopota'au in soáḷ tatua ko'i Yesus.

13Naonda ing ki Yesus nokodongog kon habar tatua, Sia nonaḷámaidon kon tampat tatua bo iyumayuk. Sia sinumakoi kon uangga bo minayak in tampat inta noáman. Ta'e naonda ing kinodonongogan in intau moántó mosia nomatuk, ta'e nongin toba nongkon lipú mita monia.

14Naonda mosia sinumubu, ki Yesus noko'ontong kon intau nobarong totok, dá noliai ing gina-Nya lantaran tabi-Nya ko'i monia bo inundaman-Nya mosia inta notakit.

15Naonda in singgai noungkoḷomdon, murí-Nya mita namangoi ko'i-Nia, bo noguman, "Tampat tana'a no'itontaní bo singgai no'ungkoḷomdon, dá pokipobuiaidon in intau mita tanion simbá mosia mayak motaḷui kong ka'anon kon lipú mita."

16Ta'e ki Yesus noguman ko'i monia, "Diáka bidon mosia mayak, mo'ikowbí musti mopoka'an ko'i monia."

17Tubag monia, "Kami tongá nodia kon roti lima bo toyak doyowa."

18Ki Yesus noguman, "Diadon mangoi ko'i-Nakó."

19Bo pinokilitúan-Nya in intau moántó tatua kon tudu im bonok. Bo naonda ing ginamá-Nya in roti lima bo toyak doyowa tatua, iḷumangag in Sia kon ḷangit bo nomarakat, bodongka nomonsi-monsig kon roti tatua bo inogoi kom murí-Nya mita pinoki silai koi monia. Murí-Nya mita nosilai magí makow kon intau moántó tua.

20Mosia komintan nongaan dapot in nobotug. Onda intua sinipun mita intau ing ki agat in roti tatua, nosipun magí mopuḷúpa bodoyowá nokompé in nopuling.

21Intau nongaan noyotakin dodai intua degá limamai noribu in ḷoḷaki, diápa pinoyoiap im bobay bo mongoadí mita.

22Onda intua ki Yesus ḷagi nopotabá kom murí-Nya mita sinumakoi kon uangga, bo umuna ko'i-Nia mayak in ḷoḷan, wakutu intua pinokipobuian-Nya domandon in intau moántó tatua.

23Bo naonda intau mita tatua nobui, ki Yesus notakod kom buḷud bo nosambayang tontaní. Bo naonda in singgai nodoḷomdon dongkadon Sia tontaní ing kon tua.

24Uangga inta sinakoian im murí-Nya mita ain noyayuk kom pintad bo totok dumpakon im bokoḷ, sin tompot moyodumpak.

25Degá jam tigamai modiug mobayag namangoidon ki Yesus ko'i monia takin minaya-mayak kon tudu in tubig.

26Naonda im murí-Nya mita noko'ontong ko'i-Nia minaya-mayak kon tudu in tubig, mosia no'italikokog bo poḷat nomaḷú, "Dimbuḷó intua!", mosia kopia kumarak sim mo'ondok.

27Ta'e ki Yesus ḷagi noguman ko'i monia, "Pokopo'onow, sin Aku'oibí in na'a, dika mo'ondok!"

28Bo ki Petrus noguman, "Aka Ikow bo totu'u kon ki Yesus, yo oiníka in aku'oi mamangoi ko'ini-Mu mongin tudu in tubig."

29Ki Yesus notubag, "Angoidon!" Dá ki Petrus noponag kon uangga bo minayak ko'i Yesus nongin tudu in tubig.

30Ta'e naonda in nokorasamai kon tompot nogirup, no'ondok in sia dá sia mulaidon tumaḷom bo sia kinumarak,

31"Tuhan, tuḷungaipa in aku'oi!" Dá siningkap i Yesus in lima-Nya, bo poḷat noguman ko'i Petrus nana'a, "Hei intau inta diá totok mopirisaya, nongonu sim molia-liawbí ing ginamu?"

32Onda intua sinumakoi kon uangga im mosia bo tompot nogogaidon.

33Intau mita inta kom bonu in uangga nosumbah ko'i-Nia, kai monia, "Totu-totu'u kon Ikow na'a ki Adíbí i Allah."

34Naonda in no'iyaputmaidon kon ḷoḷan mosia sinumubu kon lipú ing Genesaret.

35Bo naonda intau mita kon tua nokota'aumai kon inta namangoi tua ing ki Yesus dá pinota'a-ta'au makow monia kon lipú mita inta noyodiugmai kon tua. Bo komintan intau inta nongotakit dinia ko'i-Nia.

36Mosia nopo'igum simbá ogoi-Nya i mosia moliai kon ubung in jubah-Nya. Komintan intau inta noroliai ko'i-Nia, nongopia.


  Share Facebook  |  Share Twitter

 <<  Matius 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel