Dual Panel1No'iduduimai kon tua, tongonumai degá intau im Parisi bo mototundú mita kon agama, mosia nongkon Yerusalem namangoi bo nolibó ko'i Yesus,
2"Nongonu sim murí-Mu mita diábí dinumudui kon adat im mogoguyang naton? Mosia diábí nonomokmuna ko wakutu in diápa nonga'an."
3Ta'e ki Yesus notubag ko'i monia, "Nongonu sim mo'ikow in diábí doman dumudui kom parentah i Allah, tongá lantaran adat im mogoguyang?
4Ki Allah aindon noguman, 'Hormatdon ing ki amá bo ki inámu,' bo 'Ki ine im mogodi-godimai ko'i amánya bo ko'i inánya yo musti hukumon matoi.'
5Ta'e mo'ikow moguman nana'a, ki ine inta moguman ko'i amánya andeka ko'i inánya: 'Onu inta musti ogoiku pobantung ko'i amá bo ko'i iná, aindon inogoiku pinosumbah ko'i Allah,'
6yo intau tatua in diá bidon patus mohormat ko'i amánya andeka ko'i inánya. Aka oáid monimu bo natua, yo inanggap monimu im Pirman i Allah in diádon baraguna sin lantaran adatmu tontaní im mobara-baraguna.
7Hei intau inta mongomunapik! Totu'udon onu im pinoguman muna i Nabi Yesaya soáḷ mo'ikow,
8'Nana'a ing kai Allah: Intau mita tana'a moduí ko'i-Nakó ta'e tongá kom bibig monia, sing gina monia moyayuk ko'i-Nakó.
9Diábí im mangalenya posumba'an monia ko'i-Nakó, sin onu in sinundú monia tua, atorangbí in intau.'"
10Bo ki Yesus nogoiní kon intau moántó tatua bo noguman ko'i monia, "Indongogai bo popotonop kom bonu ing gina!
11De'emanbí inta kina'an in haram; ta'e inta siningogbí, tuatabí inta mokonajis kon intau."
12Bo murí-Nya mita nomangkoidon nolibó ko'i-Nia, kai monia: "Kinota'auan degá i Pak Guru kon singog i Pak Guru tanion totokbí im mokonanali kong gina intau mita im Parisi?"
13Tubag i Yesus, "Pomuḷoi im pinomuḷa inta de'eman ki Amá-Ku in nomuḷa, yo musti rabuton takin uakatnya mita.
14Pomayakdon makow intau mita natua. Sim mosia tua in intau bilog inta motundú kon daḷan kon intau doman bilog. Sin aka intau bilog bo mokapit kon intau doman bilog, yo tumpaḷabí in taya dua moḷabú kom bubú."
15Dá ki Petrus noguman ko'i-Nia, "Pak guru, tomangaleaikah ko'inami im porumpama'an tanion!"
16Ta'e ki Yesus notubag, "Umpakah yo diápa doman komangalean monimu?
17Diá kota'au degá monimu kon onu inta kina'an monimu komintanbí mo'idapot in sian bodongka po'intaḷú bui?
18Ta'e onu in siningog monimu tua ing komintanbí nongkon bonu ing gina; bo tuatabí inta mokonajis kon intau.
19Sin nongkon bonu ing gina momuká im bayongan raian inta mora'at, poḷolimod, pononualing, pogogaid kon inta moromú pononakow, ibot inta diá totu'u bo rebeg.
20Tua komintan inta mokokotor kon intau. Ta'e aka monga'an diá monomok munatua in diábí mokokotor kon intau."
21Nobuatmai nongkon tua ing ki Yesus, Sia minayak kon lipú in Tirus bo Sidon.
22Kon tua noíangoi in tobatú bobay intau ing Kanaan inta nongkon lipú kon tua, bo nomaḷú, "Kotabipa aku'oi na'a, Tuhan, Adí i Daud, sing ki adíku bobay kinotoḷangan in dimukud mora'at bo moyoyiga totok in sia."
23Tongá ki Yesus diá notubag ko'inia, bo murí-Nya mita namangoi bo noguman ko'i-Nia, "Pokibayáaidon makow in sia, sin sia in umuran doman makow dumudui ko'i naton bo momaḷú."
24Ta'e ki Yesus notubag, "Aku'oi pinotabá mamangoi sim motayak kon intau mita in Israel inta nongobuli."
25Bobay tatua dinimiug bo nosumbah ko'i-Nia bo noguman bui, "Tuhan tuḷungaipa in aku'oi."
26Ki Yesus notubag, "Diá mota'au im mogamá kon ka'anon inta aindon sinadia kon adí mita bo ogoi kon ungku."
27Bobay tatua notubag, "Totu'ubí intua Tuhan, ta'e ungkú tatua in noka'an doman kom muyo-muyok ing ka'anon inta noḷabú kom meja i tuangnya."
28Bo ki Yesus notubag takin noguman ko'i-Nia, "Ule iná moḷoben totok im pirisayamu, manangka intua yo mobalídon ko'i nimu, ná inta kino'ibogmu." Bo dodaipa doman in tuata nopia ing ki adínya.
29Ki Yesus nonaḷámai kon tampat tatua, bo minayak nongin bingkí im pintad in Danow Galilea bodongka notakod kom buḷud bo ilimitú kon tua.
30Bo intau mita nodia mangoi ko'i-Nia kon intau mita inta pelong, inta lempeng, inta bilog, inta bobó bo takit mita ibanea. Inangoi monia inukat kon tayowonmai i Yesus bo komintan inundaman-Nya im mosia sahingga in nodait nopia.
31Intau mita nongoherang noko'ontong kon onu inta inaidan-Nya tatua, sin intau bobó nokosingog, intau pelong nopia, intau lempeng mokobayakdon, intau bilog moko'indoi, dá mosia nodayow ko'i Allah Israel.
32Ki Yesus nogoiní kom murí-Nya mita bo noguman, "Aku'oi motabi totok moko'ontong kon intau mita tanion. Mosia aindon toḷu nosinggai dinumudui ko'i-Nakó bo mosia diá nodia kon ka'anon. Akuoi in doíbí mopobui ko'i monia ko wakutu im mosia gogoyon, sin dikabo mo'umpag kon daḷan."
33Murí-Nya mita noguman ko'i-Nia: "Kon ondabí ing ko'ulían naton kong ka'anon inta tugat ka'anon in intau mita tanion, apapa doman kita na'a noyayuk kon lipú."
34Ki Yesus nolibo ko'i monia, "Tongonu in roti nion ko'i monimu?" "Pitu", tubag monia, bo "Oyúon doman tongonumai in toyak inta mongointok."
35Bo pinoki litúan mita i Yesus kom butá im mosia.
36Onda intua ginamá-Nya in roti bo toyak mita tatua, bo nopoyaput in sukur bodongka nomonsi-monsig kon roti tatua bo inogoi kom murí-Nya pinokisilai, dá sinilai domandon im murí-Nya mita kon intau mobayong tatua.
37Mosia nongaan komintan dapot in nobotug. Nopaḷut makow, sinipun im murí-Nya mita ki agat in roti tatua. Nosipun magí pitupa nokompé in nopuling.
38Kobayong in intau inta nonga'an noyotakin dodai intua opat noribu in ḷoḷaki, diápa pinoyo'iap im bobay bo mongoádí mita.
39Nopaḷut makow nonga'an ki Yesus nopotabádon ko'i monia nobui, bo Sia minayak sinumakoi kon uangga bo iḷumeag nopobayak in lipú im Magadan.