Alkitab Mobile SABDA
[VER] : [MONGONDOW]     [PL]  [PB] 
 <<  Matius 27 >> 

1Naonda im modiugdon mobayag, bayongan imang itoi bo guhanga in lipú intau Yahudi noyosipun bo nonantúdon kom molimod ko'i Yesus.

2Sinogot monia in Sia bo dinia pinosarakan ko'i Pilatus, Gubernur kom butá tatua.

3Ko wakutu ing ki Yudas inta noposarakan ko'i Yesus noko'ontong kong ki Yesus in sinantúdon hukumon dapot matoi, nomanyasaḷ in sia. Bo binayaknya pinobui in doit perak toḷu nopulú tatua ko'i imang mita itoi bo guhanga mita in lipú.

4Bo noguman, "Binaradosadon in aku'oi sin noposarahkan in dugú intau inta diá kotaḷá!" Ta'e mosia notubag, "De'emanbí urusan nami intua, tua in urusanmubí tontaní!"

5Bo pinogarabnya in doit tatua kom bonu im Baḷoi Tuhan, bo minayak ginumantong.

6Imang mita itoi nogamá kon doit tatua bo nosingog, "Doit tana'a diábí mota'au posumbah ko'i Allah, sin doit tana'a bolibí in nyawa."

7Naonda im mosia noyosingog, nobalímai doit tatua pinotaḷuidon monia kom butá inta sinangoian. Butá im mogogaid kong kuyon sim balíon monia poḷoḷobongan kon intau mokokíangoi.

8Tuamai butá tatua dapot in singgai na'a sinangoian intau "Butá boli in dugú".

9Naonda intua nobalí, dá notompodon Pirman inta pinoyaput i Nabi Yeremia, "Mosia notarima kon doit perak toḷu nopuḷuh, boli inta ain sinantú kon sigad in intau Israel,inta pas poguboli ko'i-Nia.

10Bo doit tatua pinoguboli monia kom butá intau inta mogogaid kong koyon butá ná inta pinongoyow i Tuhan ko'inakó."

11Wakutu ing ki Yesus dinia kon tayowon i Gubernur. Ki Gubernur nolibó ko'i-Nia, "Degá Ikow Raja intau Yahudi?" Ki Yesus notubag, "Ikowdon tontaní in noguman kon tua."

12Ta'e wakutu imang mita itoi bo guhanga mita in lipú noponapud in tosingogon ko'i-Nia, diábí sinokotubagan-Nya.

13Dá ki Pilatus nolibó ko'i-Nia, "Degá diá dinongogmu im bayongan inta pinonapud in intau mita ko'ini-Mu?"

14Tongá diá inabatan-Nya totontagámai, sahingga in noherang totok ing ki Gubernur tatua.

15Aindon nobalí kabiasaan i Gubernur kon aka singgai moḷoben mopoḷuai in tobatú intau kom ponjara, ta'e pokipilí kon intau moántó.

16Ko wakutu intua kom ponjara oyúon tobatú intau inta totok im mora'at, tangoinya ki Yesus Barabas.

17Lantaran mosia aindon noyosipun kon tua, dá ki Pilatus nolibó ko'i monia, "Ki ine ing ko'ibog monimu poḷuaionku, ki Yesus Barabas andeka ki Yesus inta sinangoi ki Kristus?"

18Ki Pilatus nosingog natua sing kinotauannyadon kong ki Yesus dinia pinosarakan monia sim mosia mo'intoi koi-Nia.

19Wakutu ing ki Pilatus limitúpa makow kom baḷoi pongadilan, ki buḷoinya nongoyow ko'inia, "Dona'ai ikow dumugang kom porkara intau mopia tanion, sin lantaran Sia aku'oi sinumogo-indop kon diá mopia ing kogobi'i."

20Ta'e lantaran pinakisa saḷaḷu in imang mita itoi bo guhanga in lipú, dá intau mita kon tua nonantúdon kom mopo'igum simbá poḷuaiondon ing ki Barabas bo ki Yesus in hukumon matoi.

21Ki Gubernur nolibó bui ko'i monia, "Ki ine ing ko'ibog monimu poḷuaionku bo ogoi ko'i monimu?" Mosia nomaḷú, "Ki Barabas."

22Dá gunam Pilatus ko'i monia, "Aka natua, yo onuonku ing ki Yesus inta sinagoi ki Kristus?" Mosia nomaḷú komintan, "Sia musti popopakú kong kayu pinoyotalempang!"

23Sia bui nolibó, "Ta'e oáid mora'at náonda inta aindon inaidan-Nya?" Ta'e mosia ing kopiadon momaḷú moguman, "Popopakú in Sia kong kayu pinoyotalempang!"

24Naonda ing kinota'auan i Pilatus kon diádon sia mokobayow koi monia tua, malahan mulaidon mokacau totok, dá sia nogamá kon tubig bo nonomok kon tayowon intau moántó bo noguman, "Diábí in taḷáku kon dugú in intau tana'a, tua in urusanbí monimu tontaní!"

25Bayongan intau inta kon tua notubag, "Pomayakdon makow bain kami bo ki adí nami im motarima kon hukuman kong kopatoian-Nya!"

26Bo ki Barabas pinoḷuainyadon bo inogoi ko'i monia, ta'e ki Yesus in sinamboknyapa muna bodongka pinosarahkannya, sin pokipakúdon kong kayu pinoyotalempang.

27Onda intua tontara mita i gubernur nodia ko'i Yesus pinobayak im baḷoi pongadilan, bo inoiní in tontara mita noyosipun kon libumai i Yesus.

28Iḷongkut monia in ḷambung-Nya bo pinakéan monia in jubah nokasumba.

29Mosia noraot doman kong kawa dodugian, bo pinopobandow kon uḷu-Nya. Mosia nopokadai doman in aog kon lima-Nya koḷanan, onda intua sinumungkud im mosia kon tayowon-Nyamai bo mopoyagi-yagimai ko'i-Nia, kai monia, "Salam, hei Raja intau Yahudi!"

30Mosia nonduyá doman ko'i-Nia bo nogamá kon aog bo pinomobak kon uḷu-Nya.

31Nopaḷut makow nopoyagi-yagimai ko'i-Nia, iḷongkutdon bui monia in jubah inta pinopopaké monia ko'i-Nia, bo bui iḷambungan monia in ḷambung-Nya tontaní. No'iduduimai kon tua diniadon monia pinoḷuai in Sia bo pinopopakú kong kayu pinoyotalempang.

32Naonda i mosia kon ḷuai ing kotá, mosia noyodungkuḷ in tobatú intau inta nongkon Kirene ki Simon in tangoinya. Pinakisa monia in intau tatua pinokipota'anan ing kayu pinoyotalempang inta popopakúan ko'i Yesus.

33Bo nodapotdon mosia in tampat inta sinangoian Golgota, mangalenya, "Tampat in tengkorak."

34Kon tua Sia pino'inum monia in anggur inta bináukan in ompodu. Naonda ing kinonanaman-Nya, doídon Sia nonginum.

35Nopaḷut makow pinopopakú monia kong kayu pinoyotalempang, ḷambung-Nya sinila-silai makow monia. Mosia nosilai kon ḷambung-Nya tatua takin nomaké in lot.

36Onda intua mosia ilimitú kon tua noḷukad ko'i-Nia.

37Bo kon limonik in uḷu-Nya pinopopakuan monia in dopi pinaisan im pais inta binalí dodoyonan pinohukuman ko'i-Nia, "Na'adon ki Yesus Raja intau Yahudi."

38Kon tua oyúon doman in doyowa intau mononakow inta pinopopakú doman kong kayu pinoyotalempang noyotakin-Nya, tobatú kon dotá ing koḷanan bo tobatú kon dotá ing koḷoigi-Nya.

39Intau mita inta no'italib kon tua moningkule, bo momombiling ko'i Yesus.

40Mosia noguman, "Hei ikow inta mo'ibog mogumpag kom Baḷoi Tuhan bo bui moposindog kon daḷom i wakutu toḷu nosinggai, aka Ikow ki Adí i Allah, yo posaḷamatdon in awak-Mu tontaní bo poponagdon nongkon kayu pinoyotalempang tanion!"

41Natua doman imang mita itoi, mototundú mita kon agama bo guhanga mita in lipú moyotakin doman moningkule ko'i-Nia takin mosingog,

42"Sia moposaḷamat kon intau ibanea, ta'e awak-Nya tontaní diá koposaḷamatan-Nya! Sia Raja in Israel? Aka Sia moponag nongkon kayu pinoyotalempang tatua yo kami im mopirisaya ko'i-Nia.

43Sia moharap makow ko'i Allah mamangoi. Pomayak makow simbá ki Allah mamangoi bo moposaḷamat ko'i-Nia, aka ko'ibog i Allah in Sia! Sin Sia aindon nongaku kon Sia káin ki Adí i Allah."

44Intau mononakow inta pinopopakú doman kong kayu pinoyotalempang noyotakin-Nya noningkule doman ko'i-Nia.

45Mulai jam dua belas no'utu in singgai nodapot in jam tiga sinimindip in lipú tatua.

46Degá jam tigamai ki Yesus nomaḷú noropot, kai-Nia, "Eli, Eli, lama Sabaktani?" Mangalenya, "Allah-Ku, Allah-Ku nongonu sin sinaḷa'an-Mubí in Aku'oi?"

47Nokodongogmai kon tua intau mita inta sinimindog makow, noguman, "Sia noku'uk ko'i Elia!"

48Bo namangoi in tobatú nongkon i monia tua, bo nogamá kom bungang karang bo pinoḷodok kon anggur bo'il bo pinopoturak kon aog bo pinopodiug kom bibig i Yesus.

49Ta'e intau mita ibanea noguman, "Dona'ai, manikah bo indoian naton mongo ki Elia mamangoi moposaḷamat ko'i-Nia!"

50Ki Yesus nomaḷú bui noḷangon bodongka noposarahkan in nyawa-Nya.

51Bo indoiainmai, gorden im Baḷoi Allah nobisik nosilai doyowa nongkon limonikkannya nodapot in limonagannya bo dinandúan, bo buḷud mita im batu nongobotak.

52Bo kuburan mita nongobukat bo nobayong in intau mita inta mopia bo mopirisaya ko'i Allah inta aindon minatoi nobiag bui.

53Bo naonda ing ki Yesus nobiagdon bui, mosia iḷumuai nongkon kubur, bo sinumuot kong kotá in Yerusalem, bo noántó intau noko'ontong ko'i monia.

54Itoi in tontara takin prajurit-Nya inta noḷukad ko'i Yesus no'ondokdon totok naonda in noko'ontong kon linug bo onu inta aindon nobalí tatua, bo mosia nosingog, "Totu'ubí, kon Sia na'a ing ki Adíbí i Allah!"

55Bo kon tua nobayong doman im bobay inta no'indoi nongkon noyayuk, mosia tua im bobay mita inta dinumudui ko'i Yesus nongkon Galilea sim mobantung ko'i-Nia.

56Kon sigad monia tua, oyúon doman ing ki Maria Magdalena, bo ki Maria inta ki iná i Yakobus bo i Yusup, bo ki buḷoi i Zebedeus.

57Naonda in no'ungkoḷomdon, oyúon intau inta nobiag no'oyúon nongkon Arimatea, tangoinya ki Yusup, sia nobalídon murí i Yesus.

58Sia minayak kon tayowon i Pilatus bo no'igum kom mayat i Yesus. Bo ki Pilatus nomarentahdon ko'i monia mobogoi im mayat tatua ko'inia.

59Bo ki Yusup nodia kom mayat tatua, binakutnya in pusí noáḷus bo nodarit totok.

60Bodongka pinopo'ulidnya kom poḷoḷobongan nobagu, inta kinalinya kom bonu im buḷud batu. Nopaḷut makow ilingkopannya im batu moḷoben, bodongka minayak.

61Ta'e ki Maria Magdalena bo ki Maria ibanea kon tuapa limitú makow kon tayowon kubur tatua.

62Nopoikoḷomai kon singgai, singgai in Sabat, imang mita itoi bo intau mita im Parisi noyotakin minayak ko'i Pilatus,

63bo noguman, "Tuang, kinotoropan nami, intau mo'uboḷ tatua wakutu in nobiagpa, pernah noguman, 'Naonda in toḷu nosinggai Aku'oi im mobiag bui.'

64Manangka intua pokiḷukadon kom moḷoḷukad mita ing kubur tatua modapot in singgai intoḷunya; sin dika bo angoion im murí-Nya mita takowon im mayat-Nya, bo poguman monia kon Sia aindon nobiag bui kon sigad intau mita minatoi, sahingga uboḷ kon singgai tumi in lebe mora'at nongkon inta muna."

65Dá ki Pilatus noguman ko'i monia, "Na'a im moḷoḷukad mita, bayakbo ḷukadaidon kopira ing kubur tatua."

66Mosia minayak ing kubur tatua bo sinilotan monia bodongka iḷukadan.


  Share Facebook  |  Share Twitter

 <<  Matius 27 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran