Dual Panel1Kon wakutu intua ki Yohanes Mobobaptis namangoidon kom padang gurun Yudea, bo nopoyaput ing koyow nana'a,
2"Pogogaidon mogaid kon dosamu mita, sin diádon mo'onggot bo mamangoi ing ki Allah momarentah saḷaku Raja!"
3Ki Yohanesbí na'a inta pinopomakusudan singog i Nabi Yesaya nana'a: "Oyúon intau inta nobaḷú kom padang pasir: Sadiadon daḷan ko'i Tuhan, tulidon in daḷan ko'i-Nia."
4Ki Yohanes nogiḷambung jubah nongkon bubuḷ in unta. Ba'annya in nongkon kulit, ka'anonnya im pangkoḷá bo dilú ing kayuon.
5Naonda in nokodongog kon onu im pinoyaputnya tatua, noro-angoidon intau mita, inta nongkon Yerusalem, nongkon bayongan butá in Yudea, bo nongkon bayongan lipú inta kon diugmai Ongkag in Yordan.
6Mosia nongaku muna kon taḷá monia bodongka binaptis i Yohanes kon Ongkag in Yordan tatua.
7Tongá wakutu in sia noko'ontong kon nobayong doman intau im Parisi bo Saduki namangoi bo moki baptis ko'inia, siningognya nana'a mosia: "Hei intau mita inta mora'at. Ki ine in noguman kon mo'ikow nion kotaliban in hukuman i Allah inta kon singgai mo'iduduimai?
8Poponyatapa muna in oáid monimu kom mo'ikow aindon totu-totu'u nogogai mogaid kon dosamu mita.
9Bo na'aipa muna morai kon mo'ikow im mosaḷamatbí sim mo'ikow i moguman kom bonu ing gina kon ki Abraham ing ki amá nami, pogumankudon ko'i monimu, kom batu mita tana'a mota'aubí aidan i Allah adí mita i Abraham.
10Pokotorop! Boliung aindon inukat makow kon uakat ing kayu. Bo pomuḷoi pangkoi inta diá mopomungai im mopia yo pasti pupuḷonbí bo pogonag kon tuḷu.
11Aku'oi mopobaptis in tubig ko'i monimu, saḷaku bukti kom mo'ikow aindon mogogai mogaid kon inta diá mopia, ta'e Sia inta mamangoi mo'iduduimai ko'inakó na'a, kawasa-Nya mo'iliu totok ko'inakó, sedang tongá mobuka kon togot in sapatu-Nya yo diá patus in aku'oi. Sia im mopobaptis ko'i monimu in Roho i Allah bo tuḷu.
12Digu ain kokada-kadai-Nya makow. Tampat posipunan kong gandum toko daritan-Nyadon, gandum sipunon-Nya bo uaban, inta mopia tagu'onya kon tampatnya, ta'e bayongan pangkoinya in tubáan-Nya kon tuḷu inta diá mopio-piong."
13Nongkon Galilea ki Yesus namangoi ko'i Yohanes kon Ongkag in Yordan bo nokibaptis ko'inia.
14Ta'e ki Yohanes nongampag ko'i-Nia, kainia: "Aku'oibí na'a i musti baptison i Pak Guru, ta'e tana'a in noyoliudon, ki Pak Gurubí i mamangoi bo mokibaptis ko'inakó!"
15Ta'e ki Yesus notubag: "Pomayakdon makow, diábí nongonu, sin natuabí ing kita aka mogintompod kom bayongan inta kino ibog i Allah." Dá binaptis domandon i Yohanes in Sia.
16Naonda in nopaḷut binaptis, ki Yesus ḷagi nobatun nonaḷámai kon tubig tatua, bo kon dodai doman intua ḷangit nobukat bo inontong-Nya in Roho i Allah náonda bo ḷagapan paḷoma noponag ko'i-Nia.
17Bo kinodongogandon in singog nongkon soroga noguman: "Na'adon ki Adí-Ku inta kinotabi-Ku, Sia na'a inta kino ibog-Ku."