Alkitab Mobile SABDA
[VER] : [MONGONDOW]     [PL]  [PB] 
 <<  Markus 10 >> 

1Nongkon tua, ki Yesus nobuat minayak im butaí Yudea bo kon daerah inta kon ḷoḷan Ongkag in Yordan. Intau nobayong doman namangoi noyosipun kon diugmai Yesus. Bo naí biasamai ki Yesus mobogoi in totunduí ko'i monia.

2Kon tua, oyuíon doman in tongonumai intau im Parisi. Mosia namangoi doman sim motayak kon taḷaí i Yesus. Daí mosia noliboí, "Podudui in agama naton, mota'au degaí intau mongga'at ko'i buḷoinya?"

3Ta'e bui iliboí i Yesus ko'i monia, "Onu im parentah i Musa ko'i monimu?"

4Daí kai monia doman, "Ki Musa nobogoi ing kasampatan kon intau mongga'at ko'i buḷoinya, ta'e musti oyuíon in surat talak."

5Ta'e ki Yesus noguman ko'i monia, "Ki Musa nomais kom parentah tatua lantaranbií togat ing gina monimu.

6Padahaḷ nongkon pinomangkoianmai, wakutu ing ki Allah nomia kon intau, noguman Sia nana'a, 'Ki Allah nomia ko'i monia ḷoḷaki bo bobay.

7Manangka intua ḷoḷaki monaḷaímai ko'i inaí bo ko'i amaínya bo motobatuídon i buḷoinya,

8daí taya dua in nobalií bidon tobatuí.' Taya dua in de'eman bidon doyowa ta'e tobatuí bidon.

9Tuamai onu inta sinobatuí i Allah diaí mota'au poyoga'aton in intau!"

10Naonda i mosia sinumu'otdon kom baḷoi, iliboí bui im murií mita i Yesus ko'i-Nia in soaáḷ tatua.

11Daí ki Yesus noguman nana'a ko'i monia, "Ki ine im mongga'at ko'i buḷoinya bo mobuḷoi bui takin bobay ibanea, yo nonualing in sia ko'i buḷoinya inta muna.

12Naí doman tua, aka bobay mongga'at ko'i buḷoinya ḷoḷaki bo motonibuḷoi bui takin ḷoḷaki ibanea, yo nonuaḷing doman in sia."

13No'idudui kon tua, intau mita nodia ko mongoaídií mita ko'i Yesus simbaí barakatan-Nya i mosia. Ta'e sinoruían im murií-Nya mita intau mita tatua.

14Noko'ontongmai kon aid i murií-Nya mita natua, sinumoruí ing ki Yesus bo noguman ko'i monia, "Pomayakdon makow mongoaídií mita tanion mamangoi ko'i-Nakoí! Dika ḷamboian im mosia, sin intaubií mita naí mosia na'a im mobalií anggota umat i Allah.

15Torop in na'a! Ki ine im mayak tumayow ko'i Allah bo diaí naí mongoaídií mita tana'a, yo sia in diaíbií mobalií umat i Allah."

16Nosingog makow kon tua, ki Yesus nokoyot kom mongoaídií mita tatua, onda intua pino'ukat-Nya in limanya ko'i monia bo nomarakat.

17Wakutu ing ki Yesus nongingguput kom bobaya'an bui, oyuíon tobatuí intau noribatuk nopoaíngoi ko'i-Nia. Intau tatua sinumungkud kon tayowon i Yesus bo noliboí, "Guru inta mopia, onu im musti aidanku simbaí aku'oi motarima kong kobiagan inta mopia bo mononoi?"

18Daí ki Yesus noliboí ko'inia, "Nongonu sin ikow im mogumanbií kon Aku'oi im mopia? Diaíbií im mopia, kolikudbií ing ki Allah tontanií.

19Tantuí kinota'auanmu bidon im parentah i Allah tana'a, 'Dika molimod, dika monualing ande mokitualing, dika monakow, dika mosingog kon inta uboḷ bo dika monguboḷ, hormatbií ing ki amaí bo ki inaímu.'"

20"Pak Guru," kain intau tatua, "Bayongan parentah tatua aindon dinuduianku nongkon nogu'odpamai aku'oi."

21Daí ki Yesus inimindoi kon intau tatua takin tabi bo noguman nana'a, "Dongkadon tobatuí im paraḷumu aidan. Bayakdon potaḷui im bayongan kapunya'anmu; bo ogoi kon intau nobogaí im bolinya tatua, daí moko'uliídon ikow kong kapunya'an kon soroga. Onda intua angoidon dudui ko'i-Nakoí."

22Nokodongogmai kon singog i Yesus natua, nokecewa totok intau tatua, bo nonaḷaímai kon tampat tatua takin ajar ing gina sin nobiag no'oyuíon totok in sia.

23Daí nobobui ing ki Yesus ko murií-Nya mita bo noguman ko'i monia, "Moyoyiga totok intau no'oyuíon tumu'ot mobalií umat i Allah!"

24Noherang totok i murií-Nya mita nokodongog kon singog i Yesus tatua. Ta'e ki Yesus noguman doman ko'i monia, "Adií-Ku mita, totu'ubií kon moyoyigabií im mobalií anggota umat i Allah!

25Mogampa-gampangbií kon tobatuí unta tumu'ot kom bubuí in dodagum daripada tobatuí intau no'oyuíon tumu'ot kon dunia nobagu i Allah."

26Tosingogon i Yesus tatua nokobingo ko murií-Nya mita, sahingga mosia nosiliboían tobatuí bo tobatuí, kai monia, "Aka natua yo ki ine im mota'au posaḷamaton?"

27Ki Yesus inimindoi ko'i monia bo noguman, "Aka kon intau, tua in diaíbií kuma'an kon akaḷ, ta'e aka ko'i Allah, komintanbií kumaan kon akaḷ; diaíbií in diaí mota'au-Nya aidan."

28Bo ki Petrus noguman, "Pak Guru, indoiaikah kami aindon nonaḷaímai kom bayongan yagi-yagi sin dinumudui ko'i Pak Guru."

29Daí kai Yesus doman, "Popirisayabií: intau inta ain nonaḷaímai kon tombonu im baḷoinya, ande ko'i utatnya ḷoḷaki, ande ko'i utatnya bobay, ande ko'i inaínya, ande ko'i amaínya, ande ko'i adiínya mita, ande kong gobaínya lantaran Aku'oi bo lantaran Habar Mopia nongkon i Allah.

30Yo intau tatua i motarimabií kon lebe moaíntoí nongkon inta oyuíon masa inta na'a. Sia bui moko'ulií kon kogatut noguntuḷ ing kobayong baḷoi, utat ḷoḷaki, utat bobay, inaí, adií mita, gobaí, bo umpakahbií koaíntugan doman in roriga pomogutuían. Ta'e kon singgai mo'iduduimai intau tatua motarima kong kobiagan mopia bo mononoi.

31Ta'e mobayong intau inta tana'a makow no'i'una, mobalií mo'itontumi, bo mobayong intau inta masa in na'a no'i tontumi mobaliíbií mo'iuna."

32Ki Yesus takin murií-Nya mita nopobayak in Yerusalem. Ki Yesus ing kom muna bo murií-Nya mita dumuduianmai ko'i-Nia takin gina mohawatir. Naí doman tua intau mita inta dumuduianmai ko'i monia mongo'ondok doman. No'iduduimai kon tua inoinií i Yesus im murií-Nya mita bo pinopota'auan in soaáḷ inta mo'iaíntug ko'i-Nia.

33Ki Yesus noguman, "Indongogai in na'aia, tana'a kita mopobayakdon in Yerusalem. Kon tua Adií Intau posarahkandon kon imang mita itoi bo kom mototunduí mita kon agama. Sia hukumon matoi, onda intua posarahkan kon intau mita de'eman Yahudi.

34Poyambaían monia in Sia, duyaían, yoyiga'an bo popopakuí monia kong kayu pinoyotalempang. Ta'e kon singgai intoḷunya bui mobiag in Sia."

35Ki Yakobus bo ki Yohanes inta ki adií mita i Zebedeus namangoi dinimiug ko'i Yesus bo noguman, "Pak Guru, oyuíon im po'igumon nami aidan i Amaí ko'inami."

36Iliboí i Yesus, "Onu ing ko'ibog monimu aidan-Ku?"

37Tubag monia, "Kami mo'ibog limituí kon dotaí ing koḷanan bo koḷoigi i Amaí, aka ki Amaí mamangoidon momarentah takin kamulia'an."

38Ta'e guman i Yesus ko'i monia, "Ule diaíbií kinota'auan monimu onu im pino'igum monimu nion. Degaí mokosanggup im mo'ikow monginum nongkon palo in roriga inta bain inumon-Ku bo roriga inta bain mo'iaíntug ko'i-Nakoí?"

39Daí kai nayadua doman, "Mokosanggup". Daí ki Yesus noguman bui ko'i monia, "Memang mo'ikow i monginumbií nongkon palo in roriga inta inumon-Ku, bo tumu'otbií doman kon roriga inta mo'iaíntug ko'i-Nakoí.

40Ta'e aka soaáḷ ki ine in limituí kon dota ing koḷanan ande kon dotaí ing koḷoigi-Ku, tua diaíbií in hak-Ku monantuí.Ki Allahbií i monantuí mongo ki ine in limituí kon tampat mita tatua."

41Naonda in dinongog im murií mita i Yesus taya mopuḷuh ibanea in soaáḷ tatua, mosia sinumoruí ko'i Yakobus bo ko'i Yohanes.

42Daí inoinií i Yesus im mosia komintan bo sinonggina'an, "Ule kinota'auanbií monimu kon itoi mita im bangusa mita inta diaí monota'au ko'i Allah mondorot kon rayatnya. Bo intau mita moḷoben moritak ko'i monia.

43Ta'e mo'ikow in diaíbií mota'au momia natua! Ta'e aidai in na'a, intau inta mo'ibog mobalií moḷoben kon sigad monimu, sia musti mobalií bobantungmu.

44Bo intau inta mo'ibog mobalií mo'iuna totok kon sigad monimu, musti in sia mobalií ata ko'i monimu komintan.

45Sing ki Adií Intau de'emanbií namangoi simbaí bantungan, ta'e mamangoibií sim mobantung bo moposarahkan ing kobiagan-Nya sim mopobebas kon intau mobayong."

46Bo no'idapotdon mosia in Yerikho. Wakutu ing ki Yesus bo murií-Nya mita takin intau moaíntoí inta dinumudui ko'i-Nia, nonaḷaímaidon kong kotaí tatua oyuíon tobatuí intau bilog inta limituí makow kon daḷan sim mo'igum kon totabi in intau inta mo'o-italibmai. Ki Bartimeus tangoi intau bilog tatua, sia ki adií i Timeus.

47Naonda ing kinodongogannya kon inta mo'italib tua ing ki Yesus intau Nazaret daí nomaḷuí in sia, "Yesus, Adií i Daud! Kotabipa in aku'oi na'a!"

48Ta'e sinoruían i intau moaíntoí in sia bo ilarang im momaḷuí. Ta'e diaíbií ihiraunyamai, tangaíbií nokodugang kon ropotnya nomaḷuí, "Adií i Daud, kotabipa in aku'oi!"

49Daí sinumogon ki Yesus bo noguman, "Oinií mangoi in sia." Daí inoinií doman monia intau bilog tatua. Bo mosia noguman kon intau bilog tatua, "Koroton ing ginamu! Sim pinoki'oinií i Yesus ikow, pobuatdon!"

50Pinogarab i intau bilog tatua in jubahnya bo ilimikat sinimindog minayak ko'i Yesus.

51Iliboí i Yesus ko'inia, "Onu ing ko'ibogmu aidan-Ku ko'inimu?" Intau bilog tatua noguman, "Pak Guru, aku'oi mo'ibog moko'ontong."

52Guman i Yesus ko'inia, "Bayakdon, sin ikow mopirisaya ko'i-Nakoí daí nopiadon in ikow." Bo kon dodaipa doman tatua, noko'ontongdon intau bilog tatua. Bo dinumudui in sia ko'i Yesus kom binaya'an.


  Share Facebook  |  Share Twitter

 <<  Markus 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran