Dual Panel1Wakutu im mosia nodiugdon kon Yerusalem, mosia no'iyaputdon ing kotaí Betpage bo Betania, kon oyuk im buḷud Zaitun. Kon tua ki Yesus nopotabaí im murií-Nya doyowa,
2takin koyow, "Bayakdon kon lipuí inta kon tayowonmai tatua. Naonda im mo'ikow tumu'ot kon lipuí tatua, mo'ikow moko'ontong kon tobatuí ki adií ing keledai inta kotogo-togot. Keledai tatua diaípa dodai onda sinakoian intau. Bukaídon tali ing keledai tatua bo dia mangoi.
3Bo aka oyuíon intau moliboí mongo nongonu sim bukaanbií monimu ing keledai tatua? da' poguman, 'Ki Tuhan moparaḷu, bo ḷagion-Nyabií pobuion.'"
4Daí minayak im murií-Nya taya dua tua bo nokodungkuḷ kon ki adií ing keledai inta sinogot kon tayowon baḷoi kom bingkií in daḷan. Daí binukaídon monia ing keledai tatua.
5Bo intau inta sinimindog makow kon tua noliboí ko'i monia, "Hei! Mongonu i mo'ikow? Nongonu sim bukaanbií monimu ing keledai tanion?"
6Bo sinubagan monia naí singog inta pinoguman i Yesus ko'i monia. Daí pinomayakdon makow in intau mita tatua im pinodiaan monia kong keledai tatua.
7Wakutu in no'iyaputdon ko'i Yesus ing keledai tatua, inaipandon monia in jubah in likudea bo sinumakoidon ki Yesus kon keledai tatua.
8Mobayong intau mopo'ompat in jubah monia kon daḷan, oyuíon doman moporarit in tanga mita mongointok kon daḷan, tanga inta ginamaí monia nongkon gobaí.
9Mosia inta kom muna bo inta dumuduianmai nongkon tumi Yesus komintan mopobaḷuí, "Dinayo-dayowdon ki Allah! Binarakatandon Sia inta namangoi kom bonu in tangoi Tuhan!
10Mobiagdon im pomarenta'an-Nya kon singgai mo'iduduimai -- pinomarentaan i Daud mogoguyang naton! Dinayo-dayowdon ki Allah Inta Totok Moḷantud!"
11No'iyaputmai kon Yerusalem sinumu'ot ing ki Yesus kom Baḷoi i Allah. Kon tua Sia nonarukira kom bayongan yagi-yagi. Ta'e lantaran no'ungkoḷomdon daí sia takin murií-Nya mopuḷuh bodoyowaí minayakdon im Betania.
12Nopo'ikoḷomai kon singgai, naonda in ḷumuaidon mosia kom Betania inangoian gogoy ing ki Yesus.
13Nongkon moyayukpa inontong-Nyadon pangkoi in ara inta nobambar. Daí nongandupa in Sia notayak kon ḷabuí im bungainya. Ta'e diaíbií tobatuímai no'ulií-Nya, kolikud in da'unnya mita, sin wakutu intua de'emanpabií doman pomomungai in ara.
14Bo ki Yesus noguman kom pangkoi in ara tatua, "Mulai tana'a makow diaí bidon tobatuímai intau im moka'anpa bui kom bungaimu!" Dinongog im murií-Nya mita in singog-Nya tatua.
15Onda intua mosia no'iyaputdon kon Yerusalem, bo ki Yesus minayak bui im Baḷoi Tuhan. Kon tua Sia noguntun kon intau mita inta morodagang kom palas im Baḷoi Tuhan tatua. Binalintuang-Nya im meja mita monia inta pononoliuan doit, bo bangko mita i intau mopopotaḷui im paḷoma.
16Bo diaí tobatuímai intau ogoi-Nya modia kon onukadon in tumalib mongim palas im Baḷoi Tuhan tatua.
17No'iduduimai kon tua ki Yesus notunduí kon intau mita kon tua. Sia noguman, "Kom bonu im Buk Mosuci aim pinais: Ki Allah noguman, 'Baḷoi-Ku in tangoionbií Baḷoi Pososambayangan im bayongan bangusa.' Ta'e tana'a im binalií bidon monimu pugad im mogogagow!"
18Singog-Nya tatua dinongog in imang mita itoi bo mototunduí mita kon agama Yahudi. Daí nomangkoidon mosia motayak kon daya molimod ko'i Yesus. Mosia mo'ondok ko'i-Nia sim bayongan intau mopia ing gina mokodongog kon totunduí-Nya.
19Naonda in no'ungkoḷomdon, ki Yesus bo murií-Nya mita iḷumuaidon kong kotaí tatua.
20Doḷo-doḷom nobangon monik, wakutu i mosia no'italib kom pangkoi in ara tatua, inontong monia minatoidon pangkoi in ara tatua nodapot in uakatnya mita.
21Bo kinotoropan bui i Petrus onu inta nobalií koḷabung. Daí ki Petrus noguman ko'i Yesus, "Pak Guru, indoyaikah! Pangkoi in ara inta inodi-odian i Pak Guru tua aindon minatoi!"
22Kai Yesus, "Popirisayadon ko'i Allah.
23Daí totu'u kom mo'ikow i mota'aubií moguman kom buḷud tana'a, 'Pobuatdon bo ḷabuídon kom bonu in dagat!' bo mobaliíbií doman intua ko'i monimu; asaḷ bo diaí molia-liau ing gina monimu, bo mopirisaya i mo'ikow kon onu inta siningog monimu tua in totu-totu'ubií mobalií.
24Manangka intua yo torop in na'a: Aka mo'ikow mosambayang bo oyuíon in igumon, yo popirisayabií kon inogoibií i Allah ko'inimu onu inigum monimu tua, daí tarimaanbií monimu intua.
25Bo aka mo'ikow mosambayang, ta'e oyuíonpa intau diaí kinosanang ing ginamu, yo ampungaipa muna in intau tatua, simbaí ampungan doman i Amaímu inta kon soroga im bayongan dosamu.
26[Aka diaí ampunganmu intau ibanea, yo diaí doman ampungan i Amaímu kon soroga im bayongan dosamu.]"
27Mosia namangoi bui kon Yerusalem. Bo wakutu ing ki Yesus minayak nolibu kom bonu im Baḷoi Tuhan, imang mita itoi, mototunduí mita kon agama bo itoi mita intau in Yahudi namangoi ko'i-Nia.
28Mosia noliboí, "Onu in dodoyonanmu mogaid kon na'a komintan? Ki ine nobogoi in hak tatua ko'ini-Mu?"
29Ki Yesus noguman, "Aku'oi moliboí doman ko'i monimu. Bo musti tubagan monimu simbaí poguman-Ku doman ko'i monimu mongo hak i ine im pinakeí-Ku nogaid kon soaáḷ mita tana'a.
30Ki ine in nobogoi in hak ko'i Yohanes Mobobaptis, ki Allah andeka intau?"
31Daí mulaidon noyosingog in imang mita itoi bo itoi mita intau Yahudi. Mosia noguman, "Aka kai naton, 'Nongkon i Allah,' Yo liboíon-Nya bui, 'Aka natua yo nongonu sim mo'ikow in diaíbií mopirisaya ko'i Yohanes?'
32Ta'e moyoyigabií doman aka poguman naton, 'Hak nongkon intau.'" Sim mosia mo'ondok kon intau mobarong, sin intau mobarong tatua nonganggapdon kong ki Yohanes tua in nabibií.
33Daí tuamai mosia notubag, "Diaí kota'auan nami." Ki Yesus noguman ko'i monia, "Aka natua, diaíbií doman poguman-Ku ko'i monimu, mongo hak i ine im pinakeí-Ku nomia kon tua komintan."