Alkitab Mobile SABDA
[VER] : [MONGONDOW]     [PL]  [PB] 
 <<  Markus 14 >> 

1Singgai moḷoben Paskah bo Poramean kon Singgai in Roti Diaí Koragi dongkadon doyowa nosinggai. Imang mita itoi bo mototunduí mita kon agama umurandon motayak kon daya pododomok ko'i Yesus bo limodon, ta'e umuni-uni.

2Ta'e mosia noguman, "Dikabií in roncana naton na'a aidan pododai kon singgai poramean sim momukaí in huru-hara."

3Naonda ing ki Yesus kom Betaniadon kom baḷoi i Simon inta kolipod pinanyaki kusta, indoianmai namangoidon tobatuí bobay kodia-dia im botoḷ ḷana narwastu inta momahaḷ totok inta inaidan nongkon uakat mobondu. Wakutu ing ki Yesus yogot monga'an, iḷosidon bobay tatua botoḷ in ḷana nobondu tatua bo pinogingguínya kon uḷu i Yesus im bonunya.

4Ta'e oyuíon intau tongonumai ing kon tua sinumoruí poḷat nosingog, "Onubií im mangale pinomoguya'atannya kon ḷana mobondu tatua?

5ḷana tatua mota'aubií potaḷui mo'iliu kon toḷu nogatut nodinar, bo doit tatua mota'au ogoi kon intau mobogaí!" Daí sinoruían monia im bobay tatua.

6Ta'e ki Yesus noguman, "Pomayakdon makow pogaidannya natua! Nongonu sim moposusahbiímai kong ginanya i mo'ikow? Sia nogaidon kon soaáḷ inta mopia ko'i-Nakoí bo patus dayowon.

7Sin aka intau mita inta nobogaí umuranbií oyuíon ing kon sigad monimu. Aka mo'ibog motuḷung i mo'ikow ko'i monia, yo pomuḷoi makow mota'aubií. Ta'e Aku'oi in diaíbií pomuḷoi makow moyotakin monimu.

8Bobay tana'a ain nogaid kon onu in mota'aunya aidan. ḷananya tatua pinosadianya kom ponguburan ko'i-Nakoí kowakutu in Aku'oi diaípa minatoi.

9Pirisayadon singog-Ku! Kon dunia na'a, kon ondakabií im popohabaran in Habar Mopia nongkon i Allah, yo aid im bobay tana'a umuranbií domandon o'umanon sim monorop ko'inia."

10Bo ki Yudas Iskariot, tobatuí murií i Yesus nongkon sigad inaya mopuḷuh bodoyowaí, minayak kon imang mita itoi takin moroncana moposarahkan ko'i Yesus ko'i monia.

11Nokodongogmai kon singog i Yudas natua, totok nopia ing gina monia, daí dinandi monia kon ogoian doit ing ki Yudas. Daí mulaidon notayak kong kasampatan ing ki Yudas moposarahkan ko'i Yesus.

12Kon singgai dungkuḷ poraya'an Roti Diaí Koragi -- wakutu in intau morata'don kon domba Paskah -- murií-Nya mita noliboí ko'i Yesus, "Kon onda ing ko'ibog i Pak Guru posadia'an nami kong ka'anon Paskah ponga'anan i Pak Guru?"

13Daí ki Yesus nopotaba' i murií-Nya doyowa takin koyow, "Bayakdon ing kotaí, kon tua oyuíon ḷoḷaki inta kodia-dia ing kendi inta kobonu-bonu in tubig. Sia moyodungkuḷ monimu. Duduidon ko'inia

14tumu'ot kom baḷoi inta tu'otannya bo pogumandon ko'i togi baḷoi tatua, 'Ki Pak Guru nokiliboí, mongo kon onda in tampat ponga'anan i Pak Guru takin murií-Nya mita kon ka'anon Paskah.'

15Bo tundu'onbií i intau tatua ko'inimu in tobatuí ruangan moḷoben inta kolimonik. Ruangan tatua ain notompia bo nolongkapdon im pakakasnya. Sadiadon kon tua in yagi-yaginya ponga'anan naton."

16Daí minayak domandon im murií-Nya taya dua kong kotaí. No'idapotmai ing kotaí tatua, onu inta pinoguman i Yesus natua doman in no'ulií monia. Bo noposadiadon i mosia kong ka'anon Paskah.

17Naonda in nodoḷomdon, namangoidon ki Yesus takin murií-Nya mopuḷuh bodoyowaí tatua.

18Bo wakutu i mosia ilimituídon nonga'an, ki Yesus noguman, "Aku'oi moguman ko'i monimu, kon tobatuí nongkon sigad monimu nion inta nonga'an noyotakin-Ku tana'a, moposarahkan ko'i-Nakoí."

19Nokodongogmai kon singog i Yesus natua, noaíjar totok ing gina i murií-Nya mita. Bo mulaidon nongkon batuíannea noguman ko'i Yesus, "Pak Guru, de'emanbií aku'oi toh inta imakusud i Pak Guru?"

20Tubag i Yesus, "Sia tua in tobatuí murií kon sigad monimu mopuḷuh bodoyowaí na'a, inta monga'an topindanan-Ku.

21Totu'ubií kong ki Adií Intau im matoibií naí inta aim pinais kom bonu im Buk Mosuci. Ta'e moboditodon totok intau inta moposarahkan ko'i Adií Intau tatua! Manikah bo diaí noko'imotanmai pinononggadií in sia!"

22Wakutu i mosia yogot monga'an, ki Yesus nogamaí kon roti bo nosambayang nopoyaput in sukur ko'i Allah. Onda intua binonsi-bonsig-Nya in roti tatua bo inogoi komurií-Nya mita poḷat noguman, "Gamaí bo ka'andon! Awak-Ku in na'a."

23Nopaḷut makow kon tua Sia nogamaí kom palo inta pinobonuan kon anggur. Ki Yesus nosambayang, nopoyaput in sukur ko'i Allah, bodongka nobogoi im palo tatua komurií-Nya mita. Onda intua mosia komintan nonginum kon anggur tatua.

24Bo ki Yesus noguman, "Na'adon in duguí-Ku inta mopototu'u kon dodandian i Allah, duguí inta pinobutak sing kopontingan intau mobarong.

25Popirisayabií: Aku'oi in diaí bidon monginum bui kon anggur tana'a modapot kowakutu aku'oi monginum kon anggur mobagu moyotakin monimu kon dunia mobagu i Amaí-Ku."

26No'iduduimai kon tua mosia nopomanyanyi in tobatuí manyanyi dodayow. Nopaḷut makow kon tua mosia minayakdon im Buḷud Zaitun.

27No'iduduimai kon tua, ki Yesus noguman ko'i monia, "Mo'ikow komintan na'a im moḷaguibií monaḷaímai ko'i-Nakoí. Sing kom bonu im Buk Mosuci aim pinais, 'limodon i Allah ing gombalanya bo kawangan domba mo'irangkap in moḷagui.'

28Ta'e naonda im mobiagdon bui in Aku'oi, umuna in Aku'oi ko'i monimu mayak ing Galilea."

29Daí ki Petrus nosingog, "Diaí ah, biarbií taḷa'anmai monia ing ki Amaí, ta'e aku'oi in doiíbií monaḷaímai."

30"Pokotorop Petrus," guman i Yesus, "doḷom doman na'aia, wakutu im manuk diaípa mokukuk kodua, yo koyongandon kotoḷu ikow moguman kon de'emanbií murií-Ku ikow."

31Ki Petrus nosingog noropot, "Biarbií aku'oi matoi moyotakin i Amaí, ta'e diaíbií moko'imontanmai aku'oi moguman kon diaí nokanalku ing ki Amaí!" Bo murií-Nya mita ibanea noguman doman natua.

32Mosia no'iyaputdon in tobatuí tampat inta sinangoian Getsemani, kon tua ki Yesus noguman kon murií-Nya mita, "lituípa kon na'a sin Aku'oi mayakpa mosambayang!"

33Onda intua ki Yesus nonongganut ko'i Petrus, ko'i Yakobus bo ko'i Yohanes noyotakin-Nya minayak. Bo mulaidon sia angoian ajar ing gina bo hawatir.

34Ki Yesus noguman ko'i monia, "Moaíjar totok ing gina-Ku, naíonda bo matoi ing korasa'an-Ku. Kon na'apa i mo'ikow moyotakin-Ku bo umuran kiḷuka-ḷukadmai!"

35Ki Yesus inumuna topilik, nolin yayuí ko'i monia bo sinumungkud bo nosambayang. Sia nopo'igum aka mota'au yo dika poaíntug ko'i-Nia in roriga tatua.

36kai-Nia, "Amaí, oh Amaí, diaíbií in diaí mota'au aidan i Amaí. Poyayuídon in roriga tana'a ko'i-Nakoí. Ta'e de'emanbií ibog-Ku in duduian, aidaibií onu ing ko'ibog i Amaí."

37Nosambayang makow ing ki Yesus namangoi bui in Sia kom murií-Nya mita, bo kinobaya'an-Nyamai nongosiug im mosia. Sia noguman ko'i Petrus, "Simon, nosiug degaí ikow? Tongaí to jam yo diaí moko'oḷat in ikow?"

38Sia noguman doman ko'i monia, "Umuran poḷukad bo posambayang simbaí diaí kosoba'an i mo'ikow. Totu'ubií kon rohomu i mo'ibogbií mogaid kon inta mobanar, ta'e diaí mokosanggup i mo'ikow sin tabiat in tapuí na'a moyangkoí."

39Komintanpa doman ki Yesus minayak nosambayang. Sia nosambayang naí doman inta muna pino'igum-Nya.

40Nopaḷut makow nosambayang, bui namangoi kom murií-Nya mita in Sia, kinobaya'an-Nyamai nosiugpa doman makow i mosia sin sinomposiugdon totok. Daí diaídon kota'auan monia mongo onupa im poguman ko'i Yesus.

41Naonda ing ko'intoḷunyadon ki Yesus namangoi ko'i monia, Sia nolibo', "Umpakah yo mosiug bo mogogaipa doman makow i mo'ikow? Mota'audon! Aindon wakutunya ki Adií Intau posarahkan kon lima in intau mita baradosa.

42Pobangondon, koligai mayakdon ing kita. Indoiai! Intau inta moposarahkan ko'i-Nakoí niondon!"

43Koyogotpa ing ki Yesus noyosingmai, no'iangoidon ki Yudas tobatuí murií i Yesus inta kon sigad naya mopuḷuh bodoyowaí tua. Sia noyotakin intau mobayong inta kodia-dia im pitow bo bobobak. Mosia tua pinotabaí in imang mita itoi, mototunduí mita kon agama Yahudi bo in itoi mita intau Yahudi.

44Intau inta moposarahkan ko'i Yesus nobogoidon ing kode ko'i monia, nana'a, "Intau inta ayokanku, Sia tua intaunya." Domok in Sia bo ḷukadai kopia."

45Kowakutu ing ki Yudas no'idapotdon, baḷuí in sia namangoi ko'i Yesus bo noguman, "Pak Guru!" Onda intua inayokannya ing ki Yesus.

46Bo intau mita inta namangoi noyotakin i Yudas nodomokdon ko'i Yesus poḷat sinogot monia kon lima-Nya.

47Ta'e tobatuí intau nongkon sigad monia tua norabut kom pitow bo nonotad kom bongoḷan in tobatuí ata i imang moḷoben, sahingga in notampil.

48Bo ki Yesus noguman ko'i monia, "Degaí kai monimukamai Aku'oi na'a intaubií mora'at sahingga mo'ikow mamangoi kodia-dia im pitow bo bobobak sim modomok ko'i-Nakoí?

49Pomuḷoi in singgai Aku'oi kom Baḷoi Tuhan bo motunduímai kon tayowon monimu, ta'e diaíbií domokon monimu. Ta'e memang mustibií natua im mobalií, simbaí mobalií domandon onu inta pinais kom bonu im Buk Mosuci."

50Murií-Nya mita noroḷagui nonaḷaímai ko'i-Nia.

51Tobatuí tayamobiag inta tongaí nogibintoḷ in daing dinumudui ko'i Yesus. Domokon doman intau mita,

52ta'e binukaínya im bintoḷnya tatua, bo noḷagui diaí koḷambu-ḷambung.

53Ki Yesus dinia kom baḷoi i imang moḷoben. Kon tua, noyosipundon magií im bayongan imang itoi, itoi mita intau Yahudi bo mototunduí mita kon agama Yahudi.

54Ki Petrus dinumudui ko'i Yesus ta'e nongkon noyayuk bo no'idapot im palas baḷoi i imang moḷoben. Kon tua sia dinimiug kon tuḷu bo nonayang noyotakin in tontara mita inta noḷukad.

55Imang mita itoi bo mahkamah mita agama totok moramiji motayak kom bukti mita inta mota'au popotaḷaían ko'i Yesus simbaí mota'au ḷabuían in hukuman matoi. Ta'e diaí tobatuímai no'ulií monia im bukti.

56Totu'u mobayong in saksi inoinií sim mobogoi ing katarangan uboḷ soaáḷ ki Yesus, ta'e noyo-noyoposi ing katarangan monia tua.

57Bo sinimindog doman in tongonumai intau inta mobogoi ing katarangan uboḷ soaáḷ ki Yesus, guman monia,

58"Dinongog nami intau tana'a noguman, 'Umpagon-Ku im Baḷoi Tuhan inta inaidan i intau, bo naonda in toḷu nosinggai bui posindogon-Ku ibanea inta de'eman intau in nogaid.'"

59Ta'e katarangan tatua noyo-noyo posi doman.

60Daí sinimindogdon imang moḷoben kon tayowon monia komintan bo noliboí ko'i Yesus, "Eta diaí tubagan-Mu onu im pinonapud in intau mita tana'a ko'i-Nimu?"

61Ta'e tongaí kibio-bioímai ing ki Yesus. Beresi doií notubag in Sia. Bo buipa doman imang moḷoben tatua noliboí ko'i-Nia, "Degaí ikow nion Raja Mopoposaḷamat, ki Adií i Allah inta Totok i Mokudus?"

62Tubag i Yesus, "Aku'oi in Sia tua, bo mo'ikow komintan i moko'ontongbií ko'i Adií Intau limituí kon dotaí ing koḷanan i Allah inta Totok Mokawasa bo mamangoi mongin goḷom kon ḷangit!"

63Daí nomera-merakdon kon ḷangbungnya in imang moḷoben tatua bo noguman, "Diaí bidon paraḷu motayak kon saksi ibanea ing kita!

64Sin dinongogdon monimu tontanií in hojatan-Nya ko'i Allah. Yo onu ing kaputusan monimu in tana'a?" Pinutusdon monia kong kotaḷaí ing ki Yesus bo patus hukumon matoi.

65Bo tongonumai intau nomangkoidon nonduyaí ko'i Yesus. Pinomponan monia i mata-Nya bo binongkug, nopaḷut makow bo moliboí, "Pogumankah! ki ine in nomongkug ko'i-Nimu?" Tontara mita moḷoḷukad nonokap doman ko'i-Nia.

66Wakutu ing ki Petrus kom palaspa, tobatuí ata bobay i imang moḷoben minayak intua.

67Naonda in noko'ontong ko'i Petrus nonayang makow kon diug in tuḷu, sinarukiranya totok pogot i Petrus bodongka noguman, "Ikow doman intau inta moyotakinmai i Yesus intau in Nazaret tatua?"

68Ta'e binayowan i Petrus. Kainia, "Diaíbií kota'auanku bo diaíbií komangaleanku onu i makusudmu!" Tua in tubag i Petrus kon ata bobay tatua. Onda intua ki Petrus minayak ing ngara noḷoben im baḷoi imang moḷoben tatua. [Dodai intua nokukuk i manuk.]

69Bo bui doman inontong in ata bobay tatua ing ki Petrus, daí kaiín gumannya doman kon intau mita kon tua, "Totu'u sia na'a tobatuíbií doman intau monia!"

70Ta'e bui doman nomayow ing ki Petrus. Diaí no'onggot intau mita noguman doman ko'i Petrus, "Dia' mota'au momayow, ikow nion tobatuí doman takin monia tua, sin ikow nongkon Galilea!"

71Bo nomangkoidon nongibot ing ki Petrus. Kainia, "Totu'u, diaíbií kota'auanku intau inta imakusud monimu tua!"

72Kon dodaipa doman tuata manuk nokukuk induanya. Bo kinotoropandon i Petrus kom munadon pinoguman i Yesus ko'inia, "Kon diaípa mokukuk im manuk kon induanya, koyongandon kotoḷu in sia nomayow de'eman murií." Bo nongombaḷ mopo'ina-inak ing ki Petrus.


  Share Facebook  |  Share Twitter

 <<  Markus 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran