Alkitab Mobile SABDA
[VER] : [MONGONDOW]     [PL]  [PB] 
 <<  Markus 5 >> 

1No'iduduimai kon tua ki Yesus bo murií-Nya mita no'iyaputdon kon ḷoḷan in Danow Galilea, kom butaí ing Gerasa.

2Natua im ponang i Yesus kon uangga, Sia inangoian in tobatuí ḷoḷaki inta nongkon goa mita pongonguburan.

3Intau tatua kinawasa in dimukud mora'at bodongka tantuí mogutun kong kuburan mita. Sia diaídon kotogotan, umpakahbií rante uatoi.

4Sim mokakitdon tokigonmai rante, ta'e tantuínya bo bontowon rante inta potogot tatua, bo uatoi inta pino'umantungan ko'inia putoḷonnya. Moropot totok in sia sahingga in diaí tobatuímai intau mokodomok ko'inia.

5Doḷom singgai sia modondaḷoi kong kuburan bo kom buḷu-buḷudanea sindaḷan kumarak bo monongkekeb kon awaknya tontanií momakeí im batu.

6Naonda in inontongea ing ki Yesus nongkon moyayuk, noribatuk in sia namangoi bo sinumungkud kon tayowon i Yesus.

7Bo nomaḷuí noropot, "Yesus, Adií i Allah inta Totok im Moḷantud, onuon-Mu in aku'oi na'? Podoyon kon tangoi i Allah, aku'oi mopo'igum ko'ini-Mu, dona'ai rorigaan in aku'oi!"

8(Intau tatua noguman natua sing ki Yesus noguman ko'inia, "Hei dimukud mora'at, ḷuaidon ikow nongkon intau tana'a!")

9Ki Yesus noliboí ko'inia, "Ki ine in tangoimu?" Tubangnya, "Tangoiku 'ki Legion' sim mobarong totok ing kami!"

10Sia umuran mopo'igum simbaí diaí potabaí i Yesus in sia ḷumuai nongkon butaí tatua.

11Dodai intua, kon oyukmai im buḷud kon tua nobayong bokeí inta koyogot motayakmai kong ka'anonnya.

12Dimukud mita mora'at tatua nopo'igum ko'i Yesus, "Poki'tuotaidon ing kami kom bokeí mita tatua."

13Bo ino'oan i Yesus. Daí dimukud mora'at mita tatua iḷumuai kon intau tatua bo minayak sinumu'ot kom bokeí mita tatua. Bo kawangan bokeí -- inta degaí doyowamai noribu ing kobayongea tua, komintan iḷumanduk kom pompang danow tatua bo noḷomot.

14Moḷoḷukad mita kom bokeí tatua, noḷagui bo minayak nopota'au in habar tatua kong kotaí bo kon lipuí mita inta kon diugeamai. Daí intau mita iḷumuai sim mo'indoi kon onu inta nobalií.

15Mosia namangoi ko'i Yesus, bo inontongdon monia intau inta ko'ina kinotoḷangan in dimukud mora'at tatua, ilimituídon makow kon tua, ain nogiḷambung bo noratakdon in raiannya. Daí mosia komintan no'ondok.

16Intau mita inta ain noko'ontong tontanií kom bayongan inta nobalií kon intau tatua bo kom bokeí mita, nongonguman kon inta ain nobalií mita.

17Bo intau mita kom butaí tatua nopo'igum ko'i Yesus simbaí monaḷaímaidon kon tampat tatua.

18Wakutu ing ki Yesus tumakoidon kon uangga, intau inta ko'ina kinotoḷangan in dimukud mora'at, nopo'igum ko'i Yesus simbaí ogoi doman dumudui in sia.

19Ta'e ki Yesus noguman ko'inia, "Pobuidon bo pota'audon ko'i utatmu mita bo kong ginaḷummu mita im bayongan inta inaidan i Tuhan ko'inimu, bo ki Tuhan mopia totok ko'inimu!"

20Da' minayak domandon intau tatua, bo nomangkoidon nopota'au kon daerah mita inta sinangoi, "Kotaí Mopuḷuh." Sia nopota'au kon onu inta aim pinomia i Yesus ko'inia. Bayongan intau nongoherang nokodongog ko'inia.

21Ki Yesus minayak bui kon ḷoḷan danow. Kom bingkií in danow tatua nobarong totok intau namangoi noyolipung kon libumai Yesus.

22Kom bingkiípa in danow tatua ing ki Yesus, indoianmai yo namangoidon tobatuí intau, ki Yairus in tangoinya. Ki Yairus na'a tobatuí itoi kom baḷoi pososambayangan kong kotaí tatua. Naonda noyodungkuḷ i Yesus sinumungkud in sia kon tayowon-Nya,

23bo kopia nopo'igum nana'a ko'i Yesus, "Pak Guru, ki adiíku bobay notakit moyoyiga. Po'igumonku ki Pak Guru mamangoipa moliai ko'inia simbaí mopia bo diaípa matoi!"

24Daí minayak ing ki Yesus noyotakin i Yairus. Mobarong totok intau in sinumakin ko'i-Nia, oyuíon kon tumi, kom muna, kong koigi, kong koḷanan moyo-moyogundud.

25Kon sigad monia tua oyuíon doman tobatuí bobay inta aim mopuḷuh bodoyowaí notaong notakit toḷoganmai in duguí aka angoionnya.

26Bayongan kapunya'annya no'itaḷuidon komintan sim poki'undaman ko'i dokter, ta'e diaí im mokopia, sedang bo tongaíbií modugang moyoyiga.

27Bobay tatua mokakitdon im mokodongog kon o'uman soaáḷ ki Yesus. Daí kon yuaí-yuaík intau moaíntoí tatua, sia moramiji dimiug ko'i Yesus nongkon tumi,

28sin na'a ing koraiannya, "Asaḷ bo koliaiankudon in jubah-Nya, yo mopiabií in aku'oi!"

29Sia noliai kon jubah i Yesus, bo dodaipa doman tua nogogai in duguí bo kinorasa'annya kon nopiadon in sia.

30Ta'e kon dodai doman tatuata kinorasa'an i Yesus kon oyuíon in ropot iḷumuai nongkon i-Nia. Daí Sia nobobui kon intau mobarong tatua bo noliboí, "Ki ine in noliai kon jubah-Ku?"

31Daí murií-Nya mita noguman, "Inontongbií i Pak Guru ing koaíntoí intau mita tanion. Yo libo'onpa doman i Pak Guru mongo ki ine in noliai ko'i Pak Guru?"

32Ta'e ki Yesus umuranpa doman nobobui magií-makow motayak kon intau inta noliai ko'i-Nia.

33Bobay tatua inta nokota'audon kon onu in nobalií ko'inia tua, takin gugur makow sin ondok, sia namangoi sinumungkud kon tayowon i Yesus bo nongaku kon tua komintan.

34Daí ki Yesus noguman kom bobay tatua, "Adií-Ku, lantaran ikow bo mopirisaya ko'i-Nakoí daí nopia ikow! Bayakdon takin saḷamat, ikow totu-totu'udon nopia!"

35Koyogotpa ing ki Yesus nongonguman, indoianmai namangoidon tongonumai intau totabaí nongkon baḷoi i Yairus. Mosia noguman ko'i Yairus. "Ki adií bobay i tuang minatoidon, daí dona'aidon ki tuang mokiposusahmai ko'i Pak Guru."

36Ta'e diaíbií i hiraumai i Yesus onu im pinoguman i intau mita tatua. Ki Yesus noguman ko'i Yairus, "Dika mo'ondok, asaḷ bo popirisaya!"

37Bo minayak turus in Sia, ta'e diaídon tobatuímai inogoi-Nya dinumudui ko'i-Nia kolikud ing ki Petrus, ki Yakobus bo ki Yohanes inta ki utat i Yakobus.

38Naonda i mosia no'iyaputdon kom baḷoi i Yairus, bo inontongnya in intau mita modowawak makow bo dinongog-Nya doman in ombaḷ bo amui inta moropot.

39Daí ki Yesus sinumu'ot bo noguman, "Nongonu sim mo'ikow im modowawakbií bo mongombaḷ? Adií tatua in diaíbií minatoi; tongaíbií in sia nosiug!"

40Ta'e kinosingan monia ing ki Yesus, daí pinokiḷuaian-Nya i mosia komintan. Onda intua dinia i Yesus ing ki inaí bo ki amaí in adií tatua takin murií-Nya taya toḷu bo sinumu'ot kong gopot in adií tatua.

41Kinadaian i Yesus lima in adií tatua poḷat noguman kon adií tatua, "Talita kum," mangalenya, "Adií bobay, poguman-Ku ko'inimu: pobangondon!"

42Adií bobay tatua baḷuí nobangon, bo minayak. (Umurnya mopuḷuhdon bodoyowaí notaong.) Bayongan intau inta noko'ontong kon onu inta nobalií tatua totok noherang bo no'ingin?

43Ta'e ilarang totok i Yesus mosia im mopota'au kon soaáḷ tatua ko'i inekadon. Sia noguman, "Ogoiai ing ka'anon adií tanion."


  Share Facebook  |  Share Twitter

 <<  Markus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran