Dual Panel1Bo aku'oi noko'ontong kon ḷangit mobagu bo butaí mobagu. ḷangit bo butaí inta muna diaídon, takin dagat no'inggamaí domandon.
2Daí aku'oi noko'ontong kong kotaí mosuci tatua, tuata in Yerusalem inta mobagu, noponag nongkon soroga i Allah. Kotaí tatua pinosadia naonda bo nonika'an bobay inta pinakeangan sim moki-podungkuḷdon kon nonika'an ḷoḷaki.
3Bo aku'oi nokodongog kom baḷuí moropot nongkon tampat pomomarenta'an tatua, noguman: "Indoiai! Tana'a makow tampat pogogutunan i Allah kon yuaí-yuaíkdon in intau! Sia mobiagdon takin monia, bo mosia mobaliídon umat-Nya. Bo ki Allah im mogutundon kon sigad monia bo mobaliídon ki Allah monia.
4Palitandon i Allah im bayongan ḷuaí kom mata monia. Diaí bidon im popatoi. Diaí bidon im mokoaíjar kong gina. Amui ande ombaḷ onu inta mokonakitpa kong gina in diaí bidon. Soaáḷ mita inta nokoyongandon ain no'inggamaí."
5Bo Sia inta ilimituí kon tampat pomomarenta'an tatua noguman, "Tana'a komintandon binalií-Ku mobagu!" Sia noguman doman ko'inakoí, "Paisdon in na'a, sin singog mita tana'a in totu'ubií bo mota'aubií pirisaya'an."
6Bo Sia noguman, "Komintandon nobalií! Aku'oi na'a ing ki Alpa bo ki Omega, ki Inta muna-munamai bo ki Inta tumi-tumimai, Aku'oibií na'a ing ki Tuhan nongkon pinomangkoian nodapot im pangabisan. Intau inta moyogang po'inumon-Ku, bo tongaíbií ogoi pomorosen nongkon bokakak inta mobogoi ing kobiagan.
7Intau mita inta mo'untung, moko'ulií kon soaáḷ mita natua nongkon i-Nakoí, bo Aku'oi im mobalií ki Allahnya, bo sia im mobalií ki adií-Ku.
8Ta'e intau mita inta ondokon, mosia inta diaí mosatia, intau moromuí, moḷolimod, intau mokotor, intau mongonggaing, mososumbah kom berhala bo komintan intau mo'uboḷ, toko pogambat kom bonu in dagat tuḷu bo balerang inta kodoko-dokot, tuata im popatoi inta induanya."
9No'iduduimai kon tua no'iangoidon tobatuí malaekat inta nongkon sigad im malaekat taya pitu inta nokadai kom palo mita inta nopuling in roriga pangabisan tatua. Sia noguman ko'inakoí, "Igai! Po'ontong-Ku ko'inimu Nonika'an, tuata ing ki buḷoi Adií in Domba."
10Daí Roho i Allah nongawasa ko'inakoí, bo malaekat tatua nodia ko'inakoí minayak kon tudu im buḷud inta moḷantud totok. Bo sinunduínya ko'inakoí in Yerusalem, kotaí inta mokudus tatua, kotaí inta noponag nongkon soroga inta nongkon i Allah.
11Kotaí tatua nopuling ing kamulia'an i Allah bo sindarnya naonda bo permata inta totok mogagah, naonda bo batu permata inta mobaḷu-baḷui im batangannya (permata baiduri) notarang naonda bo kristal.
12Dindingea moḷoben bo moḷantud, ngaranya mopuḷuh bodoyowaí, bo iḷukadan im malaekat mopuḷuh doman bodoyowaí. Kong ngara mita tatua pinaisan in tangoi mita im mopuḷuh bodoyowaí suku Israel.
13Toto-toḷu ing ngara tumayow kon tobatuí noaírah; toḷu kon dotaí im pomuka'an, toḷu kon dotaí in toḷatan, toḷu kon dotaí in utara, bo toḷu doman kon dotaí in toyopan.
14Dinding kotaí tatua pinosindog kon tudu im batu mopuḷuh bodoyowa. Bo batu mita tatua sinoko paisan tangoi in rasul mopuḷuh bodoyowaí. Mosia tua in rasul mita i Adií in Domba tatua.
15Kom Malaekat inta noyosingogku tatua oyuíon in tungkud pogogukur inta pinomia nongkon buḷawan sim pogogukur kong kotaí, kong ngaranya mita bo kon dindingea.
16Kotaí tatua notonggopat, ḷanggoí bo ḷobennya notongkai. Malaekat tatua nogukur kong kotaí tatua takin tungkud pogogukurnya tatua. Inukur monik daí doyowa noribu bo opat nogatut nokilometer. Koḷoben bo koḷantudnya notongkai in koḷanggoínya.
17Naonda im malaekat tatua nogukur kon dindingea, daí onom nopuḷuh nometer ing koḷantudnya. Ukuran inta pinakeí im malaekat tatua in ukuran inta pinakeí in intau.
18Dinding kotaí tatua pinomia nongkon batu permata inta norupa-rupamai im batangannya, aka kotaínya yo pinomia nongkon buḷawan totokea, nosilang naonda bo kaca.
19Pondasi ing kotaí tatua ihiasan in noyagi-yagimai im batu permata. Batu im pondasi inta muna inaidan nongkon batu permata baiduri pandan, inta induanya nongkon batu nilam, intoḷunya nongkon batu yakut, inggopatea nongkon batu zamrud,
20Ilimanya nongkon batu baiduri sepah, inggonomnya nongkon batu delima, impitunya nongkon batu ratna cempaka, iwaḷunya nongkon batu pirus, insiowea nongkon batu topas, impuḷuhnya nongkon batu krisopras, impuḷuh bomitaínea nongkon batu lazuardi, bo impuḷuh bodoyowaínya nongkon batu kecubung.
21Ngara mopuḷuh bodoyowaí tatua im mutiarabií inta mopuḷuh bodoyowaí doman. Pomuḷoi ing ngara pinomia nongkon mutiara tobatuí doman. Daḷan kong kotaí tatua pinomia nongkon buḷawan totokea, nosilang naonda bo kaca inta mopo'uli-ulinag.
22Diaíbií inontongku im Baḷoi Allah kom bonu ing kotaí tatua, sim Baḷoi Allah ing ki Tuhanbií tontanií, ki Allah inta totok mokawasa, bo Adií in Domba tatua.
23Kotaí tatua diaí bidon paraḷu simbayagan mata in singgai ande buḷan, sing kamulia'an i Allah aindon nokosimbayag kon tua, bo ki Adií in Domba in nobalií togaínya.
24Bangusa mita kon dunia na'a mayakbií mongin bayagnya tatua, bo rajapa mita im modiabií kong kapunya'an mita monia pobayak ing kotaí tatua.
25Tumongo singgai ngara mita tatua diaíbií lingko-lingkopan, sin diaí bidon doḷom kon tua.
26Kakaya'an bo kahormatan bangusa mita in diaanbií kom bonu ing kotaí tatua.
27Ta'e intau mita inta nogaid kon soaáḷ mita inta mokorongoí, ande intau mita inta mongouboḷ, singog makow mopoḷok, mosia inta nogaid kom mokotor, diaíbií mo'ituot kon tua. Inta mota'au tumu'ot in tongaíbií intau inta tangoinya pinais kom bonu im Buk Intau Nobiag, buk Adií in Domba tatua.