Alkitab Mobile SABDA
[VER] : [MONGONDOW]     [PL]  [PB] 
 <<  Yohanes 13 >> 

1Tosinggaipa in Singgai Moḷoben Paskah, koyongandon kinota'auan i Yesus kon wakutunyadon Sia monaḷaímai kon dunia na'a sin mobuidon ko'i Amaí-Nya. Sia motabi kon intau mita inta nobalií kapunya'an-Nya kon dunia na'a, bo tantuí-Nyabií doman kotabi uma'ai ing kopaḷutan dunia na'a.

2Ko wakutu ing ki Yesus bo murií-Nya mita yogot monga'an, Ibilis nopogonuídon in niat mora'at kom bonu ing gina i Yudas Iskariot ki adií i Simon simbaí sia momangkangdon ko'i Yesus.

3Kinota'auan bidon i Yesus kong ki Amaí noposarakandon ing kakuasa'an-Nya komintan ko'i-Nia. Kinota'auan-Nyabií doman kon Sia in namangoi nongkon i Allah bo mobui doman ko'i Allah.

4Tuamai Sia sinimindog bo noḷongkut kon jubah-Nya bo nogibintoḷ in handuk.

5Onda intua Sia nogalin kon tubig kom bonu im baskom, bo mulaidon nondarit kon si'oḷ im murií-Nya mita poḷat iradatan-Nya in handuk inta pinogibintoḷ-Nya tatua.

6Bo nodapotdon in Sia ko'i Simon Petrus. Ki Simon Petrus na'a noguman, "Tuhan, umpakah daí ki Tuhanbií im mondarit kon si'oḷ-Ku?"

7Ki Yesus notubag, "Diaípabií kinomangaleanmu onu im pomiaan-Ku na'a, ta'e bain komangaleanmu."

8Daí kai Petrus doman, "Dona'ai Tuhan, dona'aibií Tuhan mondarit kon si'oḷku!" Ta'e ki Yesus noguman, "Aka diaí daritan-Ku ikow, yo ikow diaíbií moko'ulií kon tonsilai nongkon i-Nakoí."

9Daí ki Simon Petrus noguman, "Aka natua Tuhan, dona'aidon tongaí si'oḷku, takindon doman lima bo uḷuku na'a!"

10Tubag i Yesus ko'inia, "Intau inta ain noingguí, aim bidon nodarit komintan, tuamai in diaí bidon paraḷu daritan komintan kolikud bidon si'oḷnya. Mo'ikow nion in nodarit bidon tongaí diaípa komintan."

11(Kinota'auan bidon i Yesus intau inta moposarakan ko'i-Nia, tuamai Sia noguman, "Mo'ikow nion nodarit bidon, ta'e diaípa komintan.")

12Nopaḷut makow ing ki Yesus nondarit kon si'oḷ monia, bui-Nyadon iḷutud in jubah-Nya bo ilimituí bui, bo noliboí ko'i monia, "Komangalean degaí monimu onu inta bagu-Ku inaidan ko'i monimu?

13Mo'ikow mogoinií ko'i-Nakoí Guru bo Tuhan. Bo No'itutuibií intua, sin memang Aku'oi ing Gurubií bo Tuhan.

14Daí aka Aku'oi inta Guru bo Tuhanmu nondaritdon kon si'oḷ monimu, yo mo'ikow im mustibií doman mosidaritan kon si'oḷ.

15Aku'oi ain nobogoi in toḷadan ko'i monimu, simbaí aidan domandon monimu onu inta ain inaidan-Ku ko'i monimu.

16Totu'ubií im poguman-Ku na'a: 'Tobatuí ata diaíbií mo'iliu ko'i tuangnya, bo totabaí diaíbií mo'iliu kon inta nopotabaí ko'inia.

17Aka kinota'auandon monimu komintan in na'a, yo mosanang bidon i mo'ikow aka pomiaan monimu.

18Onu im pinoguman-Ku na'a de'emanbií soaáḷ mo'ikow komintan. Kota'auan-Kubií ki ine inta aim pinilií-Ku, ta'e baí mobaliídon onu inta pinais kom bonu im Buk Mosuci nana'a, 'Intau inta ain nongaan noyotakin-Ku, im moḷawangbií ko'i-Nakoí.'

19Soaáḷ tana'a muna-Kudon poguman ko'i monimu kon dodai in diaípa mobalií, simbaí aka mobaliídon in soaáḷ tatua yo pirisaya'andon monimu kon Aku'oibií in Sia inta sinumangoi 'AKU'OI OYÚON.'

20Na'a im poguman-Ku ko'i monimu: Ki ine im motarima kon intau inta pinotabaí-Ku, sia notarima ko'i-Nakoí. Bo ki ine i motarima ko'i-Nakoí, yo Sia tua in notarimadon ko'i-Nia inta nopotabaí ko'i-Nakoí."

21Naonda in noguman makow natua ing ki Yesus, totokdon inangoian ajar ing gina in Sia. Bo Sia noguman, "Aku'oi mogumandon ko'i monimu: Tobatuí nongkon sigad monimu nion momangkangbií ko'i-Nakoí."

22Murií-Nya mita nosi-indoian takin noherang sin diaíbií kinota'auan monia mongo ki ine imakusud-Nya tua.

23Murií inta totok kinotabi Yesus ilimituí kon diugmai i Yesus

24Daí ki Simon Petrus nonuḷadaí ko'inia, si mokiliboí mongo ki ine imakusud-Nya tatua.

25Daí murií-Nya tatua dinimiugdon ko'i Yesus, bo noliboí, "Ki ine in sia, Tuhan?"

26Ki Yesus notubag, "Intau inta ogoian-Ku in roti inta aim pinolodok-Ku kom bonu im palo, sia tuata in intaunya." Daí ki Yesus nogamaí kon roti topongkoí bo pinolodok-Nya kom palo, bodongka inogoi-Nya ko'i Yudas ki adií i Simon Iskariot.

27Naonda ing ki Yudas notarima kon roti tatua, ginanya kino-gonuíandon in Ibilis. Bo ki Yesus noguman ko'inia, "Aidaidon kolikat onu ing ko'ibogmu pomia'an."

28Diaíbií tobatuímai ing kon sigad monia inta ilimituí nonga'an takin-Nya tua in nonota'au kon singog i Yesus tatua ko'i Yudas.

29Oyuíon in nosangka kong ki Yesus nopotabaí ko'i Yudas minayak notaḷui kon tobatuí kaparaḷuan pakeíon kom pesta, andeka mobogoi in doit topilik kon intau bogaí, sing ki Yudas tua mokokadai kon doit ing kas monia.

30Naonda ing ki Yudas notarima makow kon roti tatua, sia baḷuí iḷumuai. Nodoḷomdon dodai intua.

31Naonda ing ki Yudas minayak, ki Yesus noguman, "Tana'a Adií Intau pomulia'andon, bo ki Allah pomuliaan pongin i-Nia.

32Aka ki Allah pomuliaan pongin i-Nia, daí Sia pomulia'anbií doman i Allah pongin awak-Nya tontanií. Bo ḷagi bidon pomulia'an i Allah.

33Adií-Ku mita, Aku'oi diaí bidon mo'onggot im moyotakin monimu. Tayakonbií monimu in Aku'oi, ta'e naí inta aim pinoguman-Ku kon itoi mita in Yahudi bo inta pinoguman-Ku doman ko'i monimu, tampat inta bayaían-Ku diaíbií kodapotan monimu.

34Aku'oi mobogoi im parentah mobagu ko'i monimu: Mo'ikow mustibií mositabian tobatuí bo tobatuí. Naí Aku'oi motabi ko'i monimu, daí mo'ikow musti mositabian doman natua.

35Aka mo'ikow bo mositabian, yo kota'auandon in intau kom mo'ikow nion im murií-Kubií mita."

36Ki Petrus noliboí ko'i Yesus: "Tuhan, kon onda im bayaían i Tuhan?" Ki Yesus notubag, "Kon onda im bayaían-Ku, diaípabií ikow mota'au dumudui tana'a makow. ikow im bambií dumudui kon singgai mo'iduduimai."

37Daí kai Petrus doman, "Tuhan nongonu sin diaíbií mota'au aku'oi dumudui in tana'a makow? Morelabií in aku'oi matoi sing kopontingan i Tuhan!"

38Ki Yesus notubag, "Totu'u ikow morela i matoi sing kopontingan-Ku? Pokota'audon Petrus! Diaípa i manuk mokukuk, ikow koyongandon kotoḷu moguman, kon diaíbií nokanalmu in Aku'oi!"


  Share Facebook  |  Share Twitter

 <<  Yohanes 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel