Alkitab Mobile SABDA
[VER] : [MONGONDOW]     [PL]  [PB] 
 <<  Yohanes 19 >> 

1Onda intua ki Pilatus sinumu'ot bo nopotabaí in intau nosambok ko'i Yesus.

2Tontara mita nomia kom mahkota nongkon tanga mita inta dodugian, bo pinobandow monia kon uḷu i Yesus. Onda intua iḷambungan monia in jubah nopars,

3bo mopobui-buimai mamangoi ko'i Yesus bo moguman, "Mobiag raja intau Yahudi!" Onda intua mosia monokap kom pogot-Nya.

4Nopaḷut makow ki Pilatus iḷumuai bui bo noguman kon intau moaíntoí kon tua, "Indoiai! Diniakudon in Sia ko'inimu, simbaí kota'auan monimu kon diaíbií in Sia kino'uliaínku kon tobatuímai in taḷaíNya."

5Bo ki Yesus iḷumuai takin nogijubah nopars. Ki Pilatus noguman ko'i monia, "Indoiaikah Intau tatua."

6Naonda imang mita itoi bo pongawal mita tatua noko'ontong ko'i Yesus, mosia nomaḷuí, "Popopakuídon Sia kong kayu pinoyotalempang! Popopakuídon Sia kong kayu pinoyotalempang!" Daí ki Pilatus noguman ko'i monia, "Gamaídon in Sia, bo popopakuídon monimu tontanií kong kayu pinoyotalempang, sin aku'oi in diaíbií noko'ulií kon tobatuímai in taḷaí ko'i-Nia."

7Intau mita in Yahudi tatua noguman, "Podudui in hukum nami, Sia musti hukumon matoi sin Sia nongaku ki Adií i Allah."

8Naonda ing ki Pilatus nokodongog kon singog monia natua, nodugangdon bui in ondoknya.

9Daí sia sinumu'ot bui kon istana bo naonda ing ki Yesus dinia pinotu'ot, ki Pilatus noliboí ko'i-Nia, "Nongkon ondabií Ikow nion?" Ta'e diaí sinubagan i Yesus.

10Daí ki Pilatus noliboí bui, "Ikow doiídon mongonguman takin-Ku? Ba' kota'auan-Mu, oyuíon ing kawasaku mopobebas ko'i-Nimu, bo kawasaku mopopakuí kong kayu pinoyotalempang ko'i-Nimu!"

11Ki Yesus notubag, "Aka ki Allah diaí mobogoi ing kawasa tatua ko'inimu, yo beresibií diaí ing kawasamu ko'i-Nakoí. Tuamai intaubií inta noposarahkan ko'i-Nakoí ko'inimu in moḷobe-ḷoben in dosanya nongkon inimu."

12Nokodongogmai kon natua ing ki Pilatus, totokdon ramijionnya pobebason ing ki Yesus. Ta'e intau mita i Yahudi totokdon momaḷuí im moguman, "Aka ki Tuang mopobebas ko'i Nia, yo ki Tuang de'eman yobayat i Kaisar!"

13Nokodongogmai kon natua, pinokidiadon i Pilatus iḷumuai ing ki Yesus, bo minayakdon in sia ilimituí kon kadera pongadilan inta sinangoian Taḷog Batu (Litostrotos). (Kom bonu im bahasa Ibrani sinangoian Gabata.)

14Wakutu intua singgaidon pinobasadiaan kom poramean paskah, degaí jam duablasmaidon. Ki Pilatus nogumandon kon intau mita tatua, "Na'a in rajamu!"

15Mosia nomaḷuí, "limodon in Sia! limodon in Sia! Popopakuídon Sia kong kayu pinoyotalempang!" Ki Pilatus nolibo, "Musti degaí aku'oi im mopopakuí kon kayu pinoyotalempang kon i rajamu?" Imang mita itoi notubag, "Tongaíbií ki Kaisar in raja nami!"

16Daí pinosarakandon i Pilatus ing ki Yesus sim bayaíandon popopakuí kong kayu pinoyotalempang. Baí ginamaídon monia ing ki Yesus bo dinia.

17Ki Yesus iḷumuai takin kopota-pota'an ing kayu pinoyotalempang popopakuían ko'i-Nia bo nopobayak in tampat inta sinangoian "Tampat in Tengkorak". (Kom bonu im bahasa Ibrani sinangoian Golgota.)

18Kon tua Sia pinopopakuídon kong kayu pinoyotalempang. Oyuíon doman intau doyowa im pinopopakuí kong kayu pinoyotalempang takin i Yesus singgai tua. Tobatuí kon dotaí ing koḷoigi, tobatuí kon dotaí ing koḷanan, bo ki Yesus kon yuaí-yuaík monia.

19Kon dotaí omonikan kayu inta pinopopakuían ko'i Yesus pinoki popakuían doman i Pilatus ing kayu topongkoí inta pinaisan, "Ki Yesus Intau Nazaret, Raja Yahudi."

20Nobayong intau Yahudi nokobaca kom pais tatua, sin tampat inta pinopopakuían ko'i Yesus kong kayu pinoyotalempang nodiug kong kotaí. Tua pinais doman kom bahasa Ibrani, Latin, bo Yunani.

21Daí imang mita itoi noguman ko'i Pilatus, "Dona'ai paison Raja Intau Yahudi", ta'e paisbií nana'a, "Intau tana'a noguman, Aku'oi Raja Intau Yahudi."

22Ta'e ki Pilatus notubag, "Onu inta aim pinaisku, diaí bidon mota'au baḷuian."

23Naonda in tontara mita tatua nopopakuí makow ko'i Yesus kong kayu pinoyotalempang, mosia nogamaí kom pakeang i Yesus bo sinilai monia opat, tumongo silai ko'i monia. Ginamaí doman monia in jubah-Nya. Jubah tatua diaíbií in tanda pinodaguman -- sinuji nongkon limonik nodapot kon omonagannya.

24Daí tontara mita tatua noyosingog, "Dona'aidon poyopongkoíon in jubah tana'a. Koligai baí morabut kon lot ing kita, tayakon mongo ki ine im moko'ulií." Soaáḷ tatua nobalií simbaí motompodon onu inta aim pinais kom bonu im Buk Mosuci, nana'a: "Mosia mosilai kom pakeang-Ku, bo norabut kon lot sim motayak kon jubah-Ku." Bo totu'u natuabií im pinomia in tontara mita tatua.

25Kon diug ing kayu inta pinopopakuían ko'i Yesus, sinimindog kon tua ki inaí i Yesus, ki utat bobay i inaí-Nya, ki Maria ki buḷoi Klopas, bo ki Maria Magdalena.

26Naonda ing ki Yesus noko'ontong ko'i inaí-Nya bo murií inta kinotabi-Nya sinimindog makow kon tua, Sia noguman ko'i inaí-Nya, "Inaí, tua ing ki adií i Inaí."

27Noguman makow natua ing ki Yesus ko'i inaí-Nya, Sia noguman doman kon murií-Nya tatua, "Tua ing ki inaímu." Bo kon dodaipa doman tatua dinia im murií tatua ing ki inaí i Yesus nogutun tobaḷoiannya.

28Kinota'auan bidon i Yesus kon tana'a bayongan yagi-yagi ain noḷapat, bo baí onu inta aim pinais kom bonu im Buk Mosuci mobaliídon, daí Sia noguman, "Aku'oi moyogang."

29Kon tua oyuíon im palo inta nopuling in anggur boil. Daí mosia nogamaí kong gabus bo pinoḷodok kom bonu in anggur boil tatua, bodongka pinopoturak kom buḷuí topongkoí bo pinopodiug kom bibig i Yesus.

30Ki Yesus nonginsip kon anggur boil tatua bo noguman, "Ain nopaḷut!" Bo kinumuyungdon Sia poḷat minatoi.

31Itoi mita in Yahudi doiíbií aka mayat in intau mita inta pinopopakuí kong kayu pinoyotalempang umuran mo'igantong makow kon tua uma'ai Singgai in Sabat, apa doman Sabat dodai intua Singgai Moḷoben. Sin singgai inta pinopopakuían ko'i Yesus tua no'iḷabuí kon singgai inta mopo'ikoḷomai Sabatdon tatua. Daí itoi mita i Yahudi minayakdon ko'i Pilatus bo nopoigum simbaí si'oḷ in intau mita inta pinopopakuí kong kayu pinoyotalempang tatua tokoputoḷandon bodongka popoponag i mayat monia nongkon kayu pinoyotalempang tatua.

32Daí tontara mita tatua minayak bo nomutoḷ muna kon si'oḷ in intau doyowa inta pinopopakuí noyotakin i Yesus.

33Naonda i mosia no'ibayakdon ko'i Yesus, indoianmai monia yo minatoi bidon, daí si'oḷ-Nya diaídon pinutoḷan monia.

34Ta'e sian i Yesus sinakuḷ in tobatuí tontara ing ginubat; daí iḷumuaidon in duguí bo tubig.

35Intaubií inta ain noko'ontong tontanií kon onu inta ain nobalií tatua in nopota'au kon soaáḷ tatua, simbaí mo'ikow mopirisaya doman. Bo onu inta pinota'aunya tatua in totu'ubií, bo kinota'auannya kon totu'ubií intua.

36Tua in nobalií simbaí mobaliídon onu inta pinais kom bonu im Buk Mosuci, "Diaíbií tobatuímai in tuḷannya putoḷon."

37Kom bonu in Alkitab pinais doman nana'a: "Mosia mo'indoibií ko'i-Nia inta ain sinakuḷ monia."

38No'iduduimai kon tua, ki Yusup inta nongkon Arimatea nopo'igum ko'i Pilatus mogamaí kom mayat i Yesus. (Ki Yusup na'a dumodudui Yesus, ta'e tongaí umado-adop sim mo'ondok kon intau mita Yahudi.) Inogoi i Pilatus onu inta pino'igumnya tatua, daí binayaknyadon pinopoponag im mayat i Yesus tatua.

39Ki Nikodemus inta pernah namangoi ko'i Yesus doḷom, minayak doman noyotakin i Yusup. Ki Nikodemus nodia doman kon ramuan taḷong mobondu bo gaharu degaí toḷumai nopuḷuh nokilo ing kobayongea.

40Binayak ginamaí nayadua im mayat i Yesus bo binakut im pusi pinoyobakut in ramuan mobondu tatua pinodudui kong kabiasa'an pongogubur in intau Yahudi

41Kon diug in tampat inta pinopopakuían ko'i Yesus kong kayu pinoyotalempang oyuíon tobatuí taman. Kom bonu in taman tatua oyuíon ing kuburan mobagu inta diaípa dodai onda pinonguburan kon intau.

42Lantaran kuburan tatua nodiug, apa doman singgai in Sabat motoyongdon pangkoion, daí kinuburdon monia kon tua ing ki Yesus.


  Share Facebook  |  Share Twitter

 <<  Yohanes 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran