Alkitab Mobile SABDA
[VER] : [NGAJU]     [PL]  [PB] 
 <<  Lukas 1 >> 

1Teopilus je bahalap budi basarae, Jari are oloh je manyurat rinti-rinting tahiu kare taloh je jari manjadi hong marak itah.

2Ewen manyurat tumon kare taloh je inyarita akan itah awi kare oloh je mitee kabuat kare taloh je manjadi te bara tamparae, tuntang limbah te manyiar barita te.

3Limbah aku jari manaliti toto-toto taloh samandiai te bara tamparae, maka aku mangkeme buah kea manyurat ije karinting laporan akan Tuan.

4Aku mawie kalote mangat Tuan katawan taloh je iajar akan Tuan te toto bujur.

5Katika Herodes manjadi raja hong tanah Yuda, aton ije biti imam bagare Sakaria, ie te bara baris kare imam Abia. Kabalie bagare Elisabet, mahin baris imam kea.

6Pambelom due biti oloh ije kabali te puna mampahanjak atei Hatalla. Ewen due te puna mamenda kakare parentah tuntang hukum ain Tuhan hapan sakalepah huange.

7Ewen te jaton anak awi Elisabet te tamanang tuntang ewen due te kea uras jari bakas.

8Hong sinde andau, metoh oloh bara baris Abia mandino gilir malalus gawi huang Human Tuhan, maka Sakaria malalus gawin imam hai te intu taharep Hatalla.

9Tumon bahut, limbah kare imam te batenong, maka Sakaria inunjok uka tame akan huang Human Tuhan tuntang mamapui garo.

10Pandehan upacara mapui garo te ilalus, oloh are balakudoa intu luar.

11Hong katika te malekat Tuhan mamparahan arepe akan Sakaria. Malekat te mendeng hila gantaun meja eka mapui garo te.

12Katika Sakaria mite malekat te, ie gogop hayak mikeh.

13Tapi malekat te hamauh, "Ela mikeh, Sakaria! Hatalla jari mahining lakudoam. Kabalim Elisabet kareh manak hatue. Ikau musti manampa arae Yohanes.

14Ikau kareh akan paham hanjak tuntang are oloh kareh hanja-hanjak amon anak te kareh inakan!

15Ie kareh manjadi oloh hai hong tampayah Tuhan, tuntang ie dia handak mihop anggor atawa taloh ihop je tau mambusau. Bara katikae inakan ie inguasa awi Roh Hatalla.

16Are oloh Israel kareh ingagalan awie haluli talih Hatalla, Tuhan ewen.

17Ie kareh manjadi sarohan Tuhan je abas tuntang kuasa sama kilau Elia. Ie kareh mandamai bapa dengan anake, tuntang oloh je baketep kareh ingagalae haluli talih jalan tirok atei je bujur. Kalote ie manatap ije ungkup je jari tatap akan Tuhan."

18"Kilen ampie aku katawan je hal toh akan manjadi?" koan Sakaria misek malekat te. "Aku jari bakas, tuntang kabalingku mahin bakas kea."

19Malekat te tombah, "Aku toh Gabriel. Aku rewar ain Hatalla tuntang Ie kea je manyoho aku manyampai barita bahalap toh akam.

20Taloh je insanangku, kareh manjadi hong katikae. Tapi awi ikau dia percaya, ikau kareh dia tau hakotak; ikau kareh bisu sampai taloh je insanangku te manjadi."

21Pandehan te, kare oloh mentai Sakaria. Ewen hengan, mbuhen ie kalote katahie huang Human Tuhan.

22Tuntang metoh ie balua, ie dia tau hakotak dengan ewen. Ie tarus manenga tanda hapan lengee ih, tuntang tetep bisu. Maka kare oloh mahin katawan je ie te jari mite taloh en-en huang Human Tuhan.

23Limbah lepah kare gawie huang Human Tuhan, Sakaria palus buli akan huma.

24Dia pire katahie limbah te, kabalie Elisabet te batihi, palus mangurong arepe huang huma lime bulan katatahie.

25Ie hamauh, "Kajariae, Tuhan mandohop aku tuntang mampuas kare kapapangku."

26Katika Elisabet jari batihi jahawen bulan, Hatalla manyoho malekat Gabriel haguet akan Nasaret, ije lewu hong daerah Galilea.

27Gabriel inyoho manalih ije biti oloh bawi bujang je arae Maria. Bawi bujang te jari batunangan dengan oloh je arae Yosep, turonan raja Dawid.

28Malekat dumah manalih Maria tuntang hamauh, "Salamat, ikau je imberkat Tuhan! Tuhan mampahayak ikau!"

29Awi mahining auh malekat te, Maria tarewen sampai ie ise-isek huang ateie en riman auh tabe te.

30Maka malekat te hamauh dengae, "Ela mikeh Maria, basa Hatalla mangilak ikau huang ateie.

31Ikau kareh akan batihi tuntang manak ije biti anak je musti ikau manampa arae Yesus.

32Ie kareh manjadi hai tuntang akan inyewut Anak Hatalla Bara Ngambo. Tuhan Hatalla kareh manjadian Ie Raja sama kilau Raja Dawid, tato hiange.

33Tuntang Ie kareh marentah kilau Raja hunjun turonan Yakob sampai katatahie. Karajaan Ayue te dia tau lepah."

34"Tapi aku magon bujang," koan Maria dengan malekat te, "kilen ampie hal te tau manjadi?"

35Malekat te tombah, "Roh Hatalla kareh dumah manalih ikau, tuntang kuasan Hatalla kareh handak mangalambo ikau. Tagal te maka anak je akan inakan te kareh inyewut Barasih, Anak Hatalla.

36Ingat: Elisabet paharim te jari batihi jahawen bulan, aloh ie jari bakas tuntang inyewut oloh ie tamanang.

37Basa akan Hatalla jaton taloh je mastahel."

38Palus Maria hamauh, "Aku toh rewar Tuhan; keleh kare taloh te manjadi tumon je jari insanam nah." Palus malekat te haguet malihi Maria.

39Bajeleng limbah te, Maria haguet akan ije lewu hong Yuda intu eka je habukit.

40Ie haguet akan human Sakaria, tuntang metoh ie tame, ie manabe Elisabet.

41Tuntang sana Elisabet mahining taben Maria, anak je huang kanain Elisabet te hagerek. Maka Elisabet inguasa awi Roh Hatalla,

42palus hamauh hai auhe, "Ikau je paham imberkat bara marak kare oloh bawi! Imberkat kea anak je inakan awim te!

43Eweh kea aku toh sampai indu Tuhan dumah manalih aku?

44Sana aku mahining auh tabem, anak je huang kanaingku, hagerek tagal kahanjake.

45Salamat ikau awi ikau percaya taloh je insanan Tuhan akam te kareh manjadi!"

46Maria hamauh, "Ateiku manara Tuhan,

47tuntang hambaruangku paham hanjak basa Hatalla Panyalamatku.

48Ie mingat aku, rewar Ayue je randah! Nampara bara toh kare bangsa manyewut salamat akangku.

49Karana Hatalla je paham kuasan Aie malalus kare taloh hai akangku. Barasih aran Ayue.

50Turon-manuron Tuhan mina asin Aie akan oloh je mikeh Dengae.

51Hapan lengen Aie je kuasa toto Ie mamisah-darai oloh balecak, tuntang mangacau kare rencana ewen.

52Kare raja inipas bara padadusae tuntang oloh randah inggatang Awie.

53Oloh balau imbesoh Awie hapan kare kahalap, oloh tatau iharak Awie buli buang.

54Ie mandohop Israel rewar Ayue te, manumon janji je inampa Awie dengan tato hiang itah.

55Tuhan dia kalapean janjin Ayue, Atei Ayue paham tau dengan Abraham tuntang kare turonan ayue sampai katatahie."

56Kurang labih telo bulan katatahie Maria melai dengan Elisabet, harue ie buli akan humae.

57Maka katikae sampai akan Elisabet uka luas. Ie manak ije biti anak hatue.

58Kare oloh hasansila humae tuntang kare tundah paharie mahining auh kapaham kataun Tuhan dengan Elisabet, tuntang ewen mahin omba hanjak dengae.

59Metoh awau te umure hanya andau, ewen dumah manyunat ie. Ewen handak manampa aran awau te Sakaria manumon aran bapae,

60tapi indue hamauh, "Ela! Ie musti inampa arae Yohanes."

61"Jaton ije biti kare tundah paharim je kalote arae," koan ewen dengae.

62Balalu ewen mahapan tanda, misek dengan Sakaria eweh aran je handak inenga akan anake te.

63Sakaria balaku ije batu tulis palus manyurat, "arae Yohanes." Ewen uras hengan.

64Hong katika te Sakaria tau hakotak tinai tuntang manara Hatalla.

65Kare oloh hasansila humae uras mikeh, tuntang barita te tayap akan hapus daerah Yuda je habukit.

66Uras oloh je mahining hal te, misek huang ateie, "Jadi en kah anak te kareh?" Basa Tuhan mampahayak ie.

67Sakaria, bapa anak te inguasa awi Roh Hatalla sampai ie mansanan peteh bara Tuhan. Ie hamauh,

68"Keleh itah manara Tuhan, Hatallan bangsa Israel! Ie jari dumah mandohop ungkup Ayue tuntang maliwus ewen.

69Ie manenga akan itah panyalamat je paham kaabase turonan Dawid, rewar Ayue te.

70Jaman horan mahalau kare nabi je iintih Awie, Tuhan jari manenga janjin Aie

71uka manyalamat itah bara musoh itah tuntang bara kuasan kare oloh je manyingi itah.

72Hapae mamparahan kataun atei Aie dengan tato hiang itah, janjin Aie je barasih te ilalus Awie.

73Ie hamauh dengan Abraham bapa itah, tuntang hajanji uka manyalamat itah bara musoh itah, mangat itah lapas bara kikeh manempo Ie

74(1:73)

75harajur manempo Ie tuntang manyanang atei Aie hapus umur itah.

76Ikau o, anakku, akan inyewut nabi ain Hatalla je huang ngambo. Ikau inyoho helo hila baun Tuhan uka marintis jalan Akae,

77uka mambarita akan ungkup Ayue je ewen inyalamat, awi Hatalla jari mampun kare dosan ewen.

78Tuhan itah bahalap atei hayak panyayang; awi Ie manyalamat itah Ie dumah. Sama kilau matanandau lembut hong andau sawah,

79kalote kea Ie manenga kalawae akan kakare oloh je belom huang kakaput tuntang huang kikeh. Ie mangagalan itah huang jalan je manintu akan kasanang."

80Anak Sakaria te sasar hai tuntang sasar abas huang roh. Ie melai hong padang pasir, sampai dumah katikae ie mangarinah arepe akan bangsa Israel.


  Share Facebook  |  Share Twitter

 <<  Lukas 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel