Dual Panel1Yesus majar tinai intu saran Danau Galilea. Are toto oloh mangarimpong Ie. Tagal te Ie haguet mondok huang arut je hunjun danum, tuntang oloh are te mendeng intu saran danau.
2Palus Yesus majar are hal akan ewen mahapan paribasa. Ie majar ewen kalotoh.
3"Hining toh! Aton ije biti oloh pamalan haguet manawor binyi.
4Katika ie kanjerae manawor, maka aton binyi te je manjato intu jalan. Maka burong dumah palus binyi te lepah kinae.
5Aton kea je manjato hong eka je are batue tuntang petake isut. Kare binyi te bajeleng haduring awie tapas petake,
6tapi metoh matanandau jari ambo, kare duringe te nampara balayu limbah te keang tuntang matei awi uhate dia sukup katimbee.
7Aton kea binyi je manjato intu parak rowut haduhi. Rowut haduhi te tumbo tuntang mangalambo kare during te sampai dia tau mamua.
8Tapi aton kea binyi je manjato intu petak je basiwoh. Binyi te haduring, balalu manjadi hai palus mamua, aton je telo puluh, aton je jahawen puluh, tuntang aton kea je saratus lipet karee."
9Limbah manyarita paribasa te Yesus hamauh, "Keton aton bara pinding keleh mahining!"
10Katika Yesus kabuate, kare oloh je jari mahining ajar Ayue te dumah manalih Ie haya-hayak dengan duewalas murid Ayue. Ewen balaku Ie manarang riman paribasa te.
11Maka Yesus hamauh dengan ewen, "Keton jari mandino panenga uka mangatawan taloh je basilim tahiu kilen ampie Hatalla marentah. Tapi kare oloh luar iajar mahapan paribasa,
12mangat 'Ewen kareh harajur manantuanie tapi dia katawan taloh je manjadi, ewen kareh harajur mahining, tapi dia haratie, jete manjadi uka ewen jaton mitee tuntang haratie tuntang jaton dumah manalih Hatalla uka ewen mandino ampun bara Hatalla.'"
13Limbah te Yesus hamauh dengan ewen, "Amon keton dia harati paribasa te, kilen ampie keton tau harati kare paribasa je beken?
14Panawor binyi te, jete oloh je mangabar barita bara Hatalla.
15Binyi je manjato intu jalan, jete tanding kare oloh je mahining barita tahiu kilen ampie Hatalla marentah. Sana ewen mahininge, setan dumah tuntang manduan taloh je jari inawor huang atei ewen.
16Binyi je manjato hong eka je are batue, jete tanding oloh je mahining barita te, tuntang balalu manarimae dengan sanang atei.
17Tapi barita te dia muhat huang ateie, sampai dia olih tahi. Sana ewen buah kasusah atawa buah kapehe awi oloh ganan kabar te, balalu ewen marisang.
18Binyi je manjato marak rowut duhi, jete tanding kare oloh je mahining barita te,
19tapi ewen gogop angate tahiu pambelom ewen tuntang mipen handak belom mangat. Kipen belai dengan sepsimpan ampin taloh, tame akan huang atei ewen. Tagal te barita bara Hatalla ingalambon huang atei ewen, sampai ewen dia tau mamua.
20Tuntang binyi je manjato intu petak je basiwoh te, jete tanding oloh je mahining barita te tuntang manarimae, ewen mamua are, aton je telo puluh, aton je jahawen puluh, tuntang aton je saratus lipet hasile."
21Limbah te tinai Yesus hamauh, "En puji oloh manotong sumbo palus manutupe hapan gantang, atawa mingkese hong penda eka batiroh? En dia ie mingkes sumbo te hunjun eka sumbo?
22Jaton taloh basilim je kareh dia gitan; tuntang jaton taloh basilim je kareh dia iungkar.
23Tagal te amon keton aton pinding, keleh mahining!"
24Balalu Yesus hamauh tinai, "Keleh manantuani taloh je ihining keton toh! Takar je ihapan keton akan oloh beken, akan ihapan Hatalla kea akan keton -- tuntang labih are haream tinai.
25Basa akan oloh je jari mandino, kareh inenga labih are tinai, tapi oloh je dia mandino, taloh je isut huang ie mahin kareh induan kea."
26Yesus manontong auh kotak Ayue, "Amon Hatalla marentah kilau Raja, jete ampie tau inanding kilau ije biti oloh je manawor binyi huang tanae.
27Hamalem ie batiroh; handau ie misik. Tuntang pandehan te kare binyi te miar haduring tuntang manjadi hai. Tapi oloh te dia katawan, kilen ampin carae kare binyi te haduring tuntang manjadi hai.
28Petak te kabuat je mampalembut hasil: solake patinge, limbah te bungehe, palus buae.
29Tuntang amon gandum te jari masak, maka oloh te manampara manggetem awi jari wayah getem."
30"Amon Hatalla marentah, hapan en itah tau manandinge?" koan Yesus misek tinai. "Sonto je kilen ampie je tau itah mahapae mangat manarange?
31Amon Hatalla marentah, jete ampie kilau paribasa toh: Ije bawak sawi induan awi ije biti oloh palus iimbule huang petak. Bawak sawi iete binyi je pangkakorike huang kalunen toh.
32Tapi amon jari haduring tuntang belom, ie manjadi je pangkahaie bara marak kare taloh imbul. Kare edae paham labat sampai kare burong tau dumah tuntang manampa sarangae hong tandipah ekae je kanjungen."
33Maka kalote Yesus majar oloh hapan are paribasa kilau te, sapire kaolih ewen haratie.
34Yesus harajur mahapan paribasa amon Ie majar kare oloh te. Tapi amon Ie kabuate dengan kare murid Ayue, Ie manarang taloh samandiai te akan ewen.
35Hong halemei te kea, Yesus hamauh dengan kare murid Ayue, "Has itah balayar dimpah danau akan saran silae."
36Maka kare murid Ayue lumpat akan huang arut -- Yesus jari helo aton huang arut te -- tuntang oloh are te ilihi ih hong saran danau. Palus Yesus tuntang kare murid Ayue haguet. Kare arut beken aton kea intu hete.
37Dia tahi limbah te dumah riwut paham. Riak nampara manampur arut tuntang maname akan huang sampai arut te bilak kontep awi danum.
38Intu kamburin arut te Yesus metohe batiroh sambil manyandehan takolok Ayue hunjun bantal. Kare murid Ayue mampisik Ie. Ewen hamauh, "Bapa Guru, en Bapa dia paduli itah toh calaka?"
39Yesus misik, palus malait riwut te manantekas, tuntang hamauh dengan danau, "Benyem, keleh tadoh!" Maka riwut te terai, tuntang danau manjadi tadoh toto.
40Palus Yesus hamauh dengan kare murid Ayue, "Mbuhen keton mikeh? Mbuhen keton dia percaya dengangku?"
41Maka ewen palus mikeh tuntang hamauh sama arepe, "Eweh kea sapunae Oloh toh, sampai riwut tuntang riak mahin mamenda auh Ayue."