Dual Panel1Ya'ami ira talifusõ, sindruhunia, tebai fahuhuo ndra'o khõmi hulõ na ba niha si so Eheha Lowalangi. Awai tola fahuhuodo khõmi, si mane na fahuhuodo ba niha solo'õ somasi fa'a'ulidanõ; hulõ nono sawuyu ba wamati khõ Keriso.
2Ba mbõrõta ha õ ndraono sawuyu ube'e khõmi, tenga õ zi no ebuabua; bõrõ me ambõ fa'abõlõmi ba da'õ nasa. Ba hiza iada'e nasa, ba no ambõ fa'abõlõmi ba da'õ,
3bõrõ me fa'aurimi ba no solo'õ amuata wa'aniha. Na so nasa wa'afõkhõ dõdõ khõmi ba fabagosa khõ nawõmi, hadia tenga da'õ zangoroma wa fa'aurimi ba no solo'õ amuata wa'aniha nasa, si mane niha si lõ fa'aboto ba dõdõ Lowalangi?
4Na imane si samõsa, "Si fao khõ Waulo ndra'odo," ba imane si samõsa, "Si fao khõ Afolo ndra'odo," hadia tenga fangoroma da'õ wa hulõ gamuata niha gulidanõ gamuatami?
5Haniha Afolo andrõ? Ba haniha Waulo? Ha enoni Lowalangi ndra'aga, si no molohe ya'ami ba wa'afaduhu dõdõ khõ Keriso. Ha sombambaya halõw̃õ nibe'e Zo'aya khõma zamõsana ndra'aga.
6Ya'odo zananõ ba Afolo zowuwui idanõ ba hiza, Lowalangi samõsa zamatumbu'õ sinanõ andrõ.
7Tobali, Lowalangi zabõlõ moguna, me Ya'ia zamatumbu'õ. Lõ moguna zananõ ba sowuwui;
8no falaw̃alaw̃a zi darua andrõ. Latema luora molo'õ halõw̃õra.
9No fagõlõ sohalõw̃õ ndra'aga khõ Lowalangi; ba hulõ nowi Lowalangi ami. Hulõ domosa khõ Lowalangi ami gõi.
10Ba wa'onekhe nibe'e Lowalangi khõgu, no utou'õ danedane domosa andre hulõ duka domosa, ba niha bõ'õ zangotomosi yaw̃a ba danedane da'õ. Dozi niha moguna ihaogõ wanehesi hewisa wangehao tomosa yaw̃a ba danedane andrõ.
11Bõrõ me no Ihonogõi Lowalangi wa ha Yesu Keriso manõ danedane ba domosa andrõ, lõ danedane bõ'õ baero-Nia.
12So zangotomosi yaw̃a ba danedane andrõ faoma ana'a, so zangoguna'õ firõ, ba so zamake feremata, ba so gõi zamake eu, du'u sokõli ba ma tõla wakhe sokõli.
13Oroma dania halõw̃õ dozi niha na inõtõ mangawuli Keriso. Ba ngaluo da'õ iforoma'õ alitõ halõw̃õ zamõsana. Alitõ andrõ zanandraigõ ba sangahonogõi fa'asõkhi halõw̃õ andrõ.
14Na lõ akhozi ba galitõ domosa ni'otomosi yaw̃a ba danedane andrõ, ba itema dania luonia niha andrõ.
15Ba na akhozi ba galitõ halõw̃õnia, te'ala ia dania; te'orifi sa ia dania, ba hulõ niha nifatõrõ ba galitõ.
16Hadia aboto ba dõdõmi wa Omo Lowalangi ami? Ba wa no nahia Geheha Lowalangi ami?
17Na so niha samakiko Omo Lowalangi, ba Ifakiko gõi dania niha andrõ Lowalangi. Bõrõ me ha khõ Lowalangi Nomo Lowalangi andrõ, ba ya'ami nomo andrõ.
18Bõi so zolimo ya'ia samõsa. Na so zanguma'õ tõdõnia atuatua ia molo'õ ulidanõ andre, lõ tola lõ tobali bodo niha andrõ, ena'õ sindruhundruhu tobali atuatua ia.
19Bõrõ me satuatua molo'õ ulidanõ andre, no si bodo fõna Lowalangi. No tesura ba Mbuku Ni'amoni'õ, "Itandraw̃aisi Lowalangi niha satuatua faoma fa'onekhe niha andrõ ya'i."
20No tesura gõi si mane, "Aboto ba dõdõ Lowalangi wa era'era dõdõ niha satuatua no era'era dõdõ si lõ guna."
21Bõrõ da'õ, bõi so zanunonuno niha, bõrõ me gofu hadia ia ba no mube'e okhõtami:
22He Faulo, Afolo, Fetero, ulidanõ andre, fa'auri ba fa'amate, iada'e ba inõtõ dania, no okhõtami fefu da'õ.
23Ba okhõta Keriso ami, ba okhõta Lowalangi Keriso.