Dual Panel1Hana wa so ba gotaluami zi barani we'amõi khõ zanguhuku si lõ faduhu tõdõ khõ Zo'aya, ba wangadugõ talifusõnia si faoma faduhu tõdõ khõ Zo'aya, na so gamadõniw̃ania khõ dalifusõnia andrõ? Hana wa lõ i'andrõ ba mbanua Lowalangi ba wangasiwai amadõniw̃a da'õ?
2Hadia lõ mi'ila wa banua Lowalangi zangetu'õ huku gulidanõ andre dania? Tobali, na sindruhu sangetu'õ huku gulidanõ ami dania, ba hadia tebai ami wangasiwaligõ amadõniw̃a si lõ boto andrõ?
3Hadia lõ mi'ila wa ya'ita andre zamalua fanguhuku khõndra mala'ika? Mendrua manõ horõ gera'era ba wa'auri sero ma'õkhõ!
4Na so gamatunõw̃a warakaro si manõ, hadia omasi mibe'e dania ba niha, si lõ taroma bakha ba gotalua niha samati?
5Fondrege wangaila! Tatu so ba gotaluami zatuatua ba wangasiwai fatõtõisa andrõ ba gotalua ndra talifusõ si fagõlõ Niha Keriso!
6Ba hiza, salua i, mõi Niha Keriso khõ zi tenga Niha Keriso ba wangadugõ farakaronia khõ dalifusõnia Niha Keriso gõi.
7Bõi mi'ae mifaduhusi gamatunõw̃a khõmi ba zi tenga Niha Keriso; no sambua fa'ate'ala khõmi na'i na so wa'udusa ba gotaluami. Abõlõ sõkhi lalau zi fahole khõmi, ba ma la'alaini ami.
8Ba hiza, ya'ami samõsa ya'i zolau ba niha bõ'õ zi lõ atulõ. Ya'ami gõi zame'e te'ala niha bõ'õ. Ba milau da'õ ba dalifusõ si faoma Niha Keriso!
9Hadia aboto ba dõdõmi wa niha si lõ molo'õ somasi Lowalangi, lõ tola tobali ndrotondroto mbanua Lowalangi? Bõi telimo ami. Tebai tobali banua Lowalangi fefu niha sohorõhorõ, samosumange adu, sohorõni si tenga dongania, sohorõni si fagõlõ nga'eu khõnia,
10sanagõnagõ, solu'alu'a ba si mabumabu, sangobousi niha bõ'õ, ba sorabu niha bõ'õ. Dozi niha solau si manõ, tebai tobali ono wabanuasa Lowalangi.
11So õsa ba gotaluami zi manõ amuata mbõrõta. Ba hiza iada'e no tesasai ami moroi ba horõ. No tobali okhõta ni'oniagõ ami khõ Lowalangi. No sõkhi ba gotaluami Lowalangi iada'e, me faduhu dõdõmi khõ Zo'aya Yesu Keriso ba bõrõ wa'abõlõ Geheha moroi khõ Lowalangida.
12So zanguma'õ wa tola manõ ifalua gofu hadia ia. Ba hiza molo'õ ya'o lõ fefu oi moguna. Hew̃a'ae tola ulau fefu hadia ia, ba hiza lõ utehegõ ifatõrõ ndra'o hadia ia.
13So gõi zanguma'õ wa õ no soguna ba dalu, ba wa so dalu bõrõ gõ. Ba hiza Iheta fefu da'õ Lowalangi. Tebai la'oguna'õ mboto niha ba wohorõhorõ, hiza i ba wangai halõw̃õ Zo'aya. Ba So'aya zondrorogõ boto andrõ.
14No I'orifi Lowalangi Zo'aya Yesu moroi ba wa'amate, si manõ gõi wa I'orifi ita dania faoma fa'abõlõ-Nia.
15Aboto ba dõdõmi wa ndrotondroto ba mboto Keriso mbotomi. Tobali, hadia tola uhalõ ndrotondroto mboto Keriso andrõ ba ubali'õ ia ndrotondroto zohorõhorõ? Ma'ifu lõ'õ.
16Ba te lõ saboto ba dõdõmi wa sorudu ba zohorõhorõ ba no tobali ha sambua ia ba zohorõhorõ andrõ! Si mane si no tesura ba Mbuku Ni'amoni'õ, "Tobali ha sambua zi darua andrõ."
17Ba hiza niha sangosambua'õ ya'ia khõ Zo'aya, tobali ha sambua geheha niha andrõ ba Geheha Lowalangi.
18Mi'arõu'õ ami ba wolau fohorõhorõ. Bõrõ me fefu horõ bõ'õ nilau niha, baero mboto niha alua da'õ. Ba hiza solau fohorõ, ba no ifalua horõ ba mbotania samõsa!
19Lõ tola lõ aboto ba dõdõmi wa nahia Geheha Lowalangi mbotomi! Ba khõmi I'iagõ Eheha andrõ. Ba Lowalangi zame'e Eheha andrõ khõmi. Tenga okhõtami mbotomi, no okhõta Lowalangi da'õ.
20No Ibu'a fefu mbõlimi Lowalangi. Bõrõ da'õ, mi'oguna'õ mbotomi andrõ irege molakhõmi Lowalangi.