Alkitab Mobile SABDA
[VER] : [NIAS]     [PL]  [PB] 
 <<  1 Petrus 2 >> 

1Bõrõ da'õ, mitibo'õ fefu zi lõ sõkhi, bõi sa'ae falimo, ba bõi mamini tõdõ. Bõi afõkhõ dõdõ ba bõi mi'obousi dõi niha bõ'õ.

2Ya si mane iraono si bohou tumbu ami, si lõ aefa omasi susu si sõkhi soroi ba geheha, irege moroi ba da'õ tedou ami ba te'orifi.

3Ba Mbuku Ni'amoni'õ no tesura, "No mitandra wa'asõkhi dõdõ Zo'aya."

4Bõrõ da'õ, mi'ondrasi Zo'aya. Gowe sauri Ia, gowe nitibo'õ niha me lõ guna law̃a'õ, ba nituyu Lowalangi tobali gowe sebua bõli.

5Gowe sauri ami. Bõrõ da'õ, mitehegõ ni'oguna'õ ami ba wangotomosi Omo Lowalangi ba geheha, irege moroi ba da'õ tobali ere ami sauri ba khõ Lowalangi, ba wame'e sumange khõ Lowalangi wasõmbata ba geheha somasi Lowalangi.

6Ba Mbuku Ni'amoni'õ no tesura si mane, "No Utuyu sambua gowe sebua bõli, nibe'e ba Ziona, tobali toyo ba watalinga; niha samati khõ-Nia, tebai aila."

7Sebua bõli gowe andrõ khõmi ya'ami samati. Ba ba niha si lõ mamati, alua niw̃a'õ ba Mbuku Ni'amoni'õ andre, "Gowe si lõ la'oguna'õ sotomo andrõ, no tobali toyo ba watalinga,"

8ba "Da'õ gowe nitendre, gowe kara bõrõ wa'ate'ala." Manendre ira ba lõ mamati ira ba daroma li Lowalangi. Si manõ zi no Ihonogõi Lowalangi khõra.

9Ya'ami, ba no mado nituyu, ere sohalõw̃õ khõ razo, soi ni'amoni'õ khõ Lowalangi, banua tana khõ Lowalangi. No Ituyu ba no Ikaoni ami Lowalangi moroi ba zogõmigõmi ba we'amõi ba haga andrõ sahõlihõli dõdõ, ena'õ mufazaewe duria wolau-Nia andrõ si lõ irai alua.

10Tenga banua Lowalangi ami fõna, ba iada'e no banua Lowalangi, si lõ Ihakhõsi tõdõ ami Lowalangi me fõna, ba sanema fa'ahakhõ dõdõ-Nia ami iada'e.

11Ya'ami ira talifusõ ni'omasi'õ! Ya'ami ba no niha si fatewu ba sikoli ba gulidanõ andre. Andrõ u'andrõ sibai khõmi, ena'õ bõi mi'o'õ wangisõ, si lõ aetu fa'emali ba noso.

12Si lõ tola lõ mihaogõ mbuabuami ba gotalua niha si lõ mangila So'aya, irege na la'afõkhõi tõdõ ami si mane niha si lõ sõkhi, ba lõ zi lõ lafaduhu'õ mbuabuami si sõkhi, irege lasuno Lowalangi ba mbaw̃a we'aso-Nia.

13Ba dõi Zo'aya, mi'o'õ fefu dozi samatõrõ niha: he khõ Kaisaro, samatõrõ fondrege zebua,

14ba he gubernur, nifataro Kaisaro ba wanguhuku niha samazõkhi si lõ sõkhi, ba ba wamosumange niha solau si sõkhi.

15Omasi Lowalangi ena'õ moroi ba gamuatami si sõkhi, mifa'afu mbawa niha solau huhuo fa'ambõ tõdõ.

16Ena'õ auri ami si mane niha si no manõndra fangefa, ba bõi mi'oguna'õ wangefami andrõ tobali balubalu zi lõ sõkhi, ena'õ auri ami tobali enoni Lowalangi.

17Mifosumange dozi niha, mi'omasi'õ dalifusõmi Niha Keriso. Mi'ata'ufi Lowalangi ba mifosumange Kaisaro.

18Ya'ami ira talifusõ enoni, mi'o'õ li zokhõ ya'ami, mifosumange sibai, tenga ha khõra ya'ira si sõkhi tõdõ ba si fahuwu, ba ba niha safaito gõi.

19Ifahowu'õ ami Lowalangi, na bõrõ wa'aboto ba dõdõmi zomasi Lowalangi, ebolo dõdõmi wanaõgõ famakao nifalua ba wa lõ atulõ.

20Hadia zi tohude na mibologõ dõdõmi ba wanaõgõ huku si lõ tola lõ tefatõrõ khõmi bõrõ zalami? Ba na'ebolo dõdõmi wanaõgõ famakao sanõrõ ya'ami me milau zi sõkhi, ba Ifahowu'õ ami Lowalangi.

21Ba da'õ Ikaoni ami Lowalangi, me no Itaõgõ wamakao Keriso bõrõ ami, ba moroi ba da'õ Ibe'e dumaduma khõmi ena'õ mitara lahe-Nia.

22Lõ irai Ifazõkhi horõ, ba lõ irai so samõsa zamondrongo wa falimo Ia.

23Me lahedehede'õ Ia ba lõ Ilau mbalõ. Me lafakao Ia ba lõ Ifangaha wolau balõ. Itou'õ manõ hadia ia khõ-Nia ba danga Lowalangi sangatulõ'õ fanguhuku.

24No Ilu'i horõda Keriso ba mboto-Nia yaw̃a ba dõla rõfa, ena'õ aefa ita barõ wa'abõlõ horõ, ba auri ita ba wolo'õ somasi Lowalangi, sokho Keriso zamadõhõ ya'ami.

25Me fõna, no hulõ mbiribiri selungu ami, ba hiza iada'e no tefuli ami ba wolo'õ Kubalo ba Sondrorogõ tõdõmi.


  Share Facebook  |  Share Twitter

Download Audio MP3 (1 Petrus 2):
Mobile (Low Quality) - CD (High Quality)

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel