Dual Panel1Tebai mataha sa'ae wehulu dõdõma. Andrõ mangerangera ndra'aga wa abõlõ sõkhi na ya'aga zi torõi ba Atena,
2ba mafatenge khõmi dalifusõda Timoteo. No enoni Lowalangi ia sohalõw̃õ awõma ba wangombakha Turia Somuso Dõdõ andrõ sanandrõsa khõ Keriso. Mafatenge Dimoteo khõmi ba wangabe'e tõdõmi ba ba wamarou tõdõmi ba wamati khõ Keriso,
3ena'õ samõsa lõ ba gotaluami zawuwu furi, bõrõ ngawalõ wamakao andrõ. Ya'aboto ba dõdõmi wa famakao andrõ no gõi nilau dõdõ Lowalangi khõda da'õ.
4Me so ndra'aga nasa khõmi, ba no mahõnagõ ma'ombakha'õ khõmi wa gõna dania ita famakao. Ba duhu no alua itõrõ; no mi'ila samõsa.
5Da'õ mbõrõ wa ufatenge Dimoteo, ena'õ aboto ba dõdõgu hewisa wamatimi andrõ, bõrõ me no humulu sibai dõdõgu ba khõmi. Mangiwa dõdõgu ma no itandraigõ ami Afõkha, irege fefu wa'erege dõdõma ba khõmi no tobali zayazaya gõlõ.
6Iada'e no mangawuli Dimoteo ba no ifa'ema khõma duria si sõkhi sanandrõsa ba wamatimi ba fa'omasimi andrõ. No gõi i'ombakha'õ khõma wa lõ manõ olifu ami ndra'aga. Awõ wa omasi ami falukha khõma, si mane ya'aga gõi omasi falukha khõmi.
7Da'õ mbõrõ, ira talifusõ, wa ba ngawalõ wa'abu dõdõ ba famakao andrõ khõma, terara dõdõma ba duriami. Omuso dõdõma ba wamatimi andrõ,
8irege marasoi no auri ndra'aga iada'e, asala lõ farõi ami ba wamati khõ Zo'aya.
9Ambõ lima ba wanguma'õ ha wa'abõlõ wangandrõma saohagõlõ khõ Lowalangi ba wa'omuso dõdõ andrõ fefu, nirasoima fõna Lowalangi, bõrõ ami.
10Bongi ma'õkhõ ma'oigõ dõdõma ba wangandrõ khõ-Nia, ena'õ tola fa'ila bawa ita, ba wamõnõkhi hadia zambõ ba wamatimi andrõ khõ Keriso fatola mo'ahonoa ami.
11Ba ya mufolala ndra'aga Lowalangi Amada, ba So'aya ya'ita Yesu we'amõi falukha khõmi!
12Ba ya mudou'õ So'aya Yesu wa'omasimi nawõmi ba fa'omasimi niha fefu, ena'õ fahõna wa'omasimi andrõ, si mane fa'omasima khõmi gõi.
13Ba zi manõ i'a'aro'õ dõdõmi So'aya, irege te'amoni'õ ami ba lõ sinegu fõna Lowalangi Amada, ba ginõtõ we'aso Zo'aya ya'ita Yesu, awõ niha si no tana khõ-Nia fefu.