Alkitab Mobile SABDA
[VER] : [NIAS]     [PL]  [PB] 
 <<  1 Tesalonika 4 >> 

1Ba gafuriatania, ya'ami ira talifusõ, no mabe'e khõmi dumaduma hewisa zinangea fa'aurimi ba zomasi Lowalangi. Iada'e no si mane da'õ wa'aurimi. Ba wa'abõlõ Zo'aya Yesu, ma'andrõ sibai khõmi ba maforege, ena'õ tedou nasa ami wanõrõ somasi Lowalangi.

2Noa sa mi'ila wanuturu lala andrõ si no mabe'e khõmi ba wa'abõlõ Zo'aya Yesu.

3Da'e zomasi Lowalangi khõmi: Ena'õ ha khõ-Nia wa'aurimi, te'amoni'õ ami, ba lõ amuata wohorõ.

4Dozi ndra matua ba gotaluami, ya'aboto ba dõdõnia hewisa wango'aurifagõnia fa'auri si sõkhi ba wefao khõ wo'omonia ira alawe, fa'auri sangomusoi'õ tõdõ Lowalangi awõ niha.

5Bõi ha modanedane ba wangisõ nõsi niha wa'omasi ira wo'omora ira alawe, si mane nilau niha baero andrõ, si lõ mangila Lowalangi.

6Bakha ba zi manõ, bõi manõ so zamalua si lõ atulõ khõ dalifusõnia, ba ma solimo talifusõnia. No mabe'e khõmi mbõrõta wanegu sabe'e, wa Ihuku So'aya niha solau asalaõ si mane da'õ.

7No Ikaoni ita Lowalangi tenga ba wamalua fohorõ, no ba wangohauhau'õ tõdõ-Nia.

8Bõrõ da'õ, niha sangositengagõ famahaõ da'e, tenga niha ni'ositengagõnia, no Lowalangi same'e Eheha ni'amoni'õ andrõ khõmi.

9Lõ sa'ae moguna masura khõmi zanandrõsa ba wangomasi'õ talifusõ samati andrõ khõ Zo'aya Yesu. No Ifahaõ ami Lowalangi, ena'õ faoma mi'omasi'õ nawõmi.

10Ba no milau da'e ba dalifusõ Niha Keriso fefu ba Makedonia ma'asagõrõ. Ba ma'andrõ sibai khõmi ya'ami ira talifusõ, ena'õ tedou nasa wa'asõkhi gamuatami.

11Mi'alui wa'ahono dõdõ ba bõi mifaruka ami ba gamatunõw̃a niha bõ'õ. Ba mi'ohalõw̃õ ba wangalui soguna khõmi, si mane si no maw̃a'õ khõmi fõna.

12Na milau zi manõ, ba lõ manõtõna ami ba niha bõ'õ; ba si lõ mamati khõ Keriso ba lafosumange dania ami.

13Ya'ami ira talifusõ, omasiga ena'õ aboto ba dõdõmi zindruhunia zanandrõsa ba niha si no mate; fa bõi abu dõdõmi, si mane niha bõ'õ, si lõ fanõtõna.

14Mamati ita wa no mate Yesu ba no ifuli auri. Andrõ wa mamati gõi ita, wa Lowalangi dania zangorifi niha si no mate fefu samati khõ Yesu, ena'õ si fao khõ Lowalangi ira.

15Sanandrõsa ba da'õ, ya'e wamahaõ Yesu, somasi ndra'aga mafa'ema khõmi: Ba ginõtõ we'aso Zo'aya Yesu, ya'ita sauri andre nasa lõ talalõi dania niha si no ofõna mate andrõ.

16Na mõi mitou dania Zo'aya Yesu moroi ba zorugo, ba mu'ao dania mala'ika sebua andrõ, ebua linia, ba tefoli dorofe Lowalangi si tobali tandratandra. Si no mate fefu, samati khõ Yesu, ba ofõna maoso dania.

17Aefa da'õ, awena dania tefazaw̃a ita, ya'ita niha sauri ba ginõtõ da'õ, fao ita awõra ba lawuo, ba wamaondragõ So'aya Yesu ba dalu mbanua. Ba tobali awõ Zo'aya ita dania si lõ mamalõmalõ.

18Bõrõ da'õ ya faoma mi'abe'e'õ wamati nawõmi faoma taroma li andre.


  Share Facebook  |  Share Twitter

Download Audio MP3 (1 Tesalonika 4):
Mobile (Low Quality) - CD (High Quality)

 <<  1 Tesalonika 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel