Dual Panel1Sindruhunia lõ gunania na usuno ndra'o. Ba omasido gõi usunodo ba ngawalõ ni'oroma'õ Lowalangi khõgu ba wama'ele'õ ma ba gangilata.
2So ni'ilagu samõsa Niha Keriso me mewele'õfa fakhe si no numalõ, te yaw̃a ba nahia wondrege zalaw̃a ba zorugo. (Lõ u'ila hadia botonia sindruhundruhu tefazaw̃a, ba na ha angilata manõ, ha Lowalangi zangila.)
3Ba ufuli uw̃a'õ samuza tõ: No u'ila wa niha andrõ mufazaw̃a ba Waradaiso. (Ba lõ u'ila hadia botonia sindruhundruhu mufazaw̃a, ma ha angilata manõ -- Lowalangi manõ zangila). Ba da'õ irongo niha andrõ ngawalõ hadia ia zi tebai law̃a'õ niha, ba si lõ tola iw̃a'õ gõi, gofu haniha ia.
4(12:3)
5Niha da'õ zomasido usuno, tenga ya'o samõsa. Na sanandrõsa ba khõgu, ha ba ngawalõ zangoroma'õ wa lõ fa'abõlõgu zomasido usuno.
6Na edõnado sa usunodo, ba lõ omasido tobali niha solau faya; ha sindruhu zomasido uw̃a'õ. Ba hiza utaha dõdõgu, bõrõ me lõ omasido na so niha sanguma'õ ebua ndra'o moroi ba zi no i'ila nilaugu, ba ma ba zi no irongo fehedegu.
7Ba ena'õ bõi fayaw̃a ndra'o bõrõ wama'ele'õ sebua andrõ khõgu, ba no mube'e wõkhõ ba nõsigu, si no amaedola fakake Zatana. Fõkhõ da'õ tebe'e khõgu, ena'õ igukhugukhui ndra'o, fa bõi fayaw̃a ndra'o.
8No medõlu kali mangandrõ ndra'odo khõ Zo'aya ena'õ teheta khõgu wõkhõ andrõ.
9Ba Iw̃a'õ khõgu So'aya, "No U'ebua'õ dõdõ-Gu khõu ba abõnõ khõu da'õ; no fondrege wa'abõlõ-Gu andrõ na bakha ba wa'atebai so ndra'ugõ." Da'õ mbõrõ wa abõlõ omasido usuno wa'atebaigu, bõrõ me ba wa'atebaigu, ba ba ginõtõ da'õ urasoi wondrorogõ Keriso ya'o faoma fa'abõlõ-Nia.
10Andrõ omuso gõi dõdõgu ba wa'atebaigu andrõ. Omuso dõdõgu na lafakao ndra'o, na falukhado wa'afõkhõ, na lagohigohi ndra'o, na falukhado wa'atosasa bõrõ Keriso. Bõrõ me ba ginõtõ ambõ fa'abõlõgu, ba da'õ abõlõdo.
11Noa sa tobali niha sambõ era'era ndra'odo -- ba ya'ami mbõrõ wa si manõ ndra'odo. Sindruhunia ya'ami ena'õ zi lõ tõla lõ manuno ya'o. Hew̃a'ae lõ eluahania ndra'odo, ba lõ sa'atõ ide'ide ndra'o moroi ba "zinenge" andrõ sebua!
12Tandra ba ngawalõ zahõlihõli dõdõ awõ halõw̃õ segebua no mafalua ba khõmi, ba wangoroma'õ wa ya'odo gõi sinenge.
13Ba hadia nasa ni'ambõsimi, na mufaedogõ ba mbanua Niha Keriso bõ'õ ami? Awai maõ, ha ba da'e: lõ nibusigu tõdõmi ba wame'e soguna khõgu. Mibologõ dõdõmi khõgu ba zalagu andrõ.
14Iada'e ba zi medõlu no ufa'anõ ndra'o ba we'amõi khõmi. Ba lõ omasido ubusi dõdõmi, bõrõ me tenga haratomi zomasido, ha ya'ami. Bõrõ me tenga iraono sa zangalui soguna khõ zatuara, no satua andrõ zangalui soguna ba ndraono.
15Bõrõ da'õ, ba wa'ohauhau dõdõ utehegõ te'ala fefu hadia ia ba khõmi, botogu samõsa na'i gõi utehegõ te'ala ba khõmi. Na si manõ wa'omasigu ami, hadia atulõ na mi'ambõsi wangomasi'õ ya'o?
16Ba hiza fao dõdõmi wa lõ irai ubusi dõdõmi. Ba hew̃a'ae si manõ, so niha sanguma'õ wa ya'odo andre niha sonekhe; wa no abõlõ oya usõndra hare khõmi, bõrõ wa'onekhegu andrõ.
17Lõ wa tola da'õ! Hadia, bõrõ niha nifatengegu khõmi andrõ wa usõndra hare khõmi?
18No ufatenge Dito we'amõi mangondrasi ya'ami, ba no ufatenge awõnia dalifusõ Niha Keriso andrõ. Hadia ihalõ harenia Dito khõmi? Ya'ia ba ya'o faoma ha sara dõdõma wohalõw̃õ, ba faoma matara lahe nawõma!
19Tola manõ miw̃a'õ tõdõmi ba zi lalõ irugi da'e, wa sango'awõgõ ya'aga ndra'aga? Sindruhunia lõ'õ, ya'ami ni'omasi'õ! Lowalangi zangila wa fefu zi no maw̃a'õ andrõ no molo'õ somasi Keriso. Ba fefu zi no mafalua no ba wanga'azõkhi fa'aurimi.
20Mangiwa dõdõgu alai na ba ginõtõ wangondrasigu ya'ami dania, tenga somasi ndra'o nisõndragu khõmi, ba ya'ami gõi tenga somasi ami nisõndrami khõgu. Ma no awai so waguaguasa dania, ba ma fa'afõkhõ dõdõ ba ma fõnu, ba ma fasosota, ba ma famõbõgõ si lõ duhu, ba ma fangõngõngõngõsa, ma fayaw̃asa, ba fa'udusa.
21Ata'u ndra'o, ma Ihõndrõgõ ndra'o Lowalangigu fõnami, ba ginõtõ wangondrasigu ya'ami, ba se'e ndra'o dania bõrõ me ato ba gotaluami zi no mamazõkhi horõ fõna, lõ famalalini era'era ba lõ tofalali ira ba lõ labatobato wamalua amuata fohorõ, si ta'unõ ba si lõ enahõi.