Alkitab Mobile SABDA
[VER] : [NIAS]     [PL]  [PB] 
 <<  Filipi 3 >> 

1Baero da'õ, ya'ami ira talifusõ, mi'omusoi'õ dõdõmi bõrõ me no ha sambua ami Zo'aya. Lõ sa abua gõlõgu ba wamuli manura khõmi hadia zi no usura khõmi; bõrõ me soguna ba wangorifi ya'ami.

2Mi'angelama ba 'nasu' andrõ, ya'ia niha samalua si lõ atulõ, samorege ba niha wamoto andrõ.

3Ba sindruhunia ya'ita sa zi no manema famoto si lõ tebulõ andrõ, tenga ya'ira. Tafosumange Lowalangi si fao fondrõnia'õ Geheha Lowalangi samõsa, ba ta'andrõ saohagõlõ bõrõ me no ha sambua ita Yesu Keriso. Ba lõ faduhu dõdõda ba ngawalõ wamalua halõw̃õ si ha soroma baero.

4Sindruhunia tola manõ faduhu dõdõgu ba wamalua halõw̃õhalõw̃õ da'õ. Bõrõ na so zanguma'õ tõdõnia wa so danedanenia saro ba wamaduhusi tõdõ halõw̃õ si ha soroma ba hõrõ andrõ, ba no mendrua manõ ndra'o.

5No laboto ndra'o me irugi w̃alu bongi ndrõfigu. Niha Gizera'eli ndra'odo, mado Mbeniami; niha Heberai'o sindruhu ndra'odo. Ba ngawalõ wolo'õ huku agama Yahudi, ba Farizai'o ndra'odo.

6Abõlõ sibai na'i muhi'a dõdõgu ba wamakao banua Niha Keriso. Na lafaigi dali huku agama niha Yahudi, ba no ya'o zabõlõ atulõ, lõ sinegu khõgu.

7Tobali bõrõ Keriso, wa fefu niw̃a'õ dõdõgu fõna haregu, no tobali te'alagu iada'e.

8Ba tenga sibai ha da'õ; fefu hadia ia, ba no tobali fa'ate'alagu, uw̃a'õ tõdõgu. Ba hadia ia zi so khõgu iada'e ba no sebua bõli: ya'ia wa'aboto ba dõdõgu Yesu Keriso, So'aya ya'o. Bõrõ Keriso, wa no utayaigõ fefu hadia ia. Ba uw̃a'õ tõdõgu sasao da'õ fefu, ena'õ tola usõndra Keriso,

9awõ wa sindruhundruhu ha sambua ndra'o khõ-Nia. Amakhaita si sõkhi khõ Lowalangi lõ sa'ae u'alui si fao folo'õ huku agama. Iada'e, no si sõkhi gamakhaitagu khõ Lowalangi, me faduhu dõdõgu khõ Keriso. Amakhaita si sõkhi andrõ moroi khõ Lowalangi so, sodanedane ba wamati khõ Keriso.

10Ha sambalõ wondrege zomasido sibai ya'ia ena'õ aboto ba dõdõgu Keriso, ba falukhado wa'abõlõ sanusugi Ya'ia moroi ba ngai zi mate. Omasido fao ba wamakao andrõ khõ-Nia, ba fagõlõgõlõ ndra'o khõ-Nia ba wa'amate-Nia.

11Ba udõnadõna wa tesusugi ndra'o dania moroi ba ngai zi mate, ba wa'auri andrõ.

12Lõ uw̃a'õ wa no ukhamõ, ba ma no mo'ahonoa ndra'odo. Ba utohugõ i wolohi ba wanõndra buala andrõ si no Ihõnagõ Yesu Keriso. Ba da'õ no Ira'u ndra'odo, ena'õ tobali ndra'odo tana khõ-Nia.

13Tatu manõ, he ya'ami ira talifusõ, lõ uw̃a'õ tõdõgu wa no usõndra mbuala andrõ. Ba ha sambalõ nilaugu, ya'ia da'õ u'olifuagõ zi no numalõ ba ugohi zi so fõnagu.

14Da'õ mbõrõ wa fagohi manõ ndra'o ba wogamõ saw̃atõ afuriata andrõ, ba wanõndra femõna, ya'ia wa'auri ba zorugo; ba da'õ Ikaoni ita Lowalangi ba khõ Yesu Keriso.

15Ba fefu ita si no mo'ahonoa dali wa'auri ba wa'alowalangi, lõ tola lõ si manõ ita. Ba na so ba gotaluami zo'era'era bõ'õ, ba Lowalangi dania zamotokhi ba dõdõmi.

16Hew̃a'ae si manõ, ba mitõngõni da'e: Lõ tola lõ ta'o'õ dumaduma si no tatema irugi ginõtõ da'e.

17He ya'ami ira talifusõ fefu! Mi'ohia'õ wangodumadumagõ ya'odo. No mabe'e dumaduma sindruhu, bõrõ da'õ mihaogõ wanõngõni niha sangodumadumagõ ya'aga.

18No asese u'ombakha'õ khõmi, ba ufuli uw̃a'õ nasa si fao fe'e, wa ato niha si fatiu tõdõ khõ Keriso, niforõfa andrõ.

19Amozua wa'auri niha si manõ ba fa'atekiko, bõrõ me somasi nõsira ni'olowalangigõra. Ba solohe ya'ira ba wa'aila da'õ ni'omusoi'õra tõdõ; ha so'amakhaita ba ngawalõ hadia ia zi so ba gulidanõ ni'era'erara.

20Ba ya'ita, no ono mbanua zorugo. Moroi ba da'õ dania gõi tohare Razo Sangorifi ya'ita, So'aya Yesu Keriso. Ya'ia nidõnadõnada si fao fehulu dõdõ.

21Botoda si lõ mofa'abõlõ andre ba si tola tekiko, da'õ nibali'õ Keriso dania tobali si mane boto-Nia andrõ solakhõmi. Tola Ifalua da'õ fefu, bõrõ me so khõ-Nia wa'abõlõ ba wame'e barõ mbawa-Nia fefu hadia ia.


  Share Facebook  |  Share Twitter

Download Audio MP3 (Filipi 3):
Mobile (Low Quality) - CD (High Quality)

 <<  Filipi 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran