Alkitab Mobile SABDA
[VER] : [NIAS]     [PL]  [PB] 
 <<  Filipi 4 >> 

1Andrõ bõrõ da'õ, ya'ami ira talifusõgu ni'omasi'õ, ya simanõ wehulu dõdõmi ba wamati khõ Zo'aya. No humulu sibai dõdõgu khõmi! Ya'ami wuawua dõdõ khõgu, irege omuso dõdõgu.

2Talifusõ Gowedia ba Zitikhe! U'andrõ sibai khõmi ena'õ ha sambua dõdõmi si mane niha samati khõ Keriso.

3Ba u'andrõ gõi khõra awõgu si lõ farõi, ena'õ mitolo ndra alawe si darua andre. No la'oigõ dõdõra wohalõw̃õ awõgu ba wangombakha Turia Somuso Dõdõ soroi Lowalangi; si mane Kelemeno awõ danõ bõ'õ fefu aw̃õgu wohalõw̃õ. Tõitõira no so bakha ba Mbuku Niha Ni'orifi.

4Ya lõ mamalõ wa'omuso dõdõmi bõrõ me no ha sambua ami Zo'aya, ufuli uw̃a'õ: mi'omusoi'õ dõdõmi!

5Ya'aboto ba dõdõ niha fefu wa'asõkhi dõdõmi andrõ. No ahatõ we'aso Zo'aya.

6Ba bõi mibusi tõdõ hadia ia. Ba ngawalõ hadia ia, mi'angandrõ ba miw̃a'õ ba wangandrõ ni'andrõmi andrõ khõ Lowalangi. Hadia zoguna khõmi, ba mi'ombakha'õ manõ khõ Lowalangi, si fao fangandrõ saohagõlõ.

7Ba hiza, fa'ohahau dõdõ khõ Lowalangi si lõ ikhamõ fa'abõlõ gera'era niha, zondrorogõ tõdõmi ba era'erami si no ha sambua ba khõ Keriso andrõ.

8Aefa da'õ, ba mifo'õsi wangerangerami ngawalõ zi sõkhi ba sinangea nisuno: ya'ia ngawalõ zindruhu, soadu, satulõ, sadõlõ, sami ba dõdõ niha, ba buabua si sõkhi.

9Ba mifalua gofu hadia zi no mitema ba wamahaõ moroi khõgu; he moroi ba wehedegu ba ma moroi ba mbuabuagu. Ya faofao khõmi Lowalangi, sokhõ fa'ohahau dõdõ.

10Ba lala wa'aurigu si no ha sambua ba khõ Zo'aya andrõ, urasoi sibai wa'omuso dõdõ, ba zi lalõ ba awena iada'e so ginõtõ khõmi wo'angeragõ ya'odo. Tenga da'õ zedõna uw̃a'õ wa no mi'olifugõ ndra'o; noa sa mifatoutou tõdõmi ndra'odo, ba hiza lõ inõtõ khõmi wangoroma'õ fa'omasimi andrõ.

11Uw̃a'õ da'e, tenga me mo'ambõ'ambõta ndra'o, noa sa to'õlõ ndra'o ba wamõnõkhi ya'o ba ngawalõ zi so.

12No utõrõ wo'ambõ'ambõta, ba he gõi fa'afalawu. Ba no aboto ba dõdõgu lala ba wamaondragõ gofu hadia ia gõi; he fa'amokhõ, ba he fa'anumana, he fa'afahõna ba he fo'ambõta.

13Utõrõ da'õ fefu, si fao fa'abõlõ si no Ibe'e khõgu Keriso.

14Ba no mitolo ndra'odo bakha ba wa'abu dõdõgu; ba fefu nilaumi andrõ ba no si sõkhi.

15Ya'ami ira talifusõ si so ba Wilifi! Mi'ila samõsa, me urõi Makedonia mbõrõta, me awena sibai te'ombakha'õ Duria Somuso Dõdõ andrõ, ha ya'ami zi lõ aefa'aefa manolo ya'o; ha ya'ami zi fao awõgu ba wanaõgõ hare ba fa'ate'ala.

16Me so ndra'o ba Desalonika, ba udõnadõna sibai wanolo, no tõra samuza mifa'ohe'õ wanolo khõgu.

17Ba tenga da'õ geluaha wa ha somasi manema buala ndra'odo. Somasi ndra'o ena'õ u'ila mbua same'e hare khõmi.

18Noa sa ahori utema fefu -- ma tõra na'i moroi ba zabõnõ khõgu! Fefu mbuala si no mifa'ohe'õ khõgu andrõ, no utema moroi khõ Gefaforodito. Iada'e no a'oi so zoguna khõgu. Buala si otarai ami andrõ no sumange samohua si sõkhi sibai, nibe'e khõ Lowalangi, ba nitema Lowalangi si fao fa'omuso dõdõ.

19Lowalangi nifosumangegu andrõ, si fahõna fokhõ ba khõ Yesu Keriso, zame'e fahõna dania zoguna khõmi.

20Nisuno Lowalangi Amada, gõtõgõtõ wa'ara! Yaduhu.

21Mifa'ema wangowaigu ba mbanua Niha Keriso si ha sambua ba khõ Keriso. La'owai gõi ami fefu ira talifusõda si fao awõgu ba da'e.

22Ba la'owai ami fefu banua Niha Keriso si so ba da'e, ba si ofõna sibai moroi ba zi so yomo ba gõdo Kaisaro andrõ.

23Ba ya So'aya ya'ita, Yesu Keriso zamahowu'õ ya'ami fefu.


  Share Facebook  |  Share Twitter

Download Audio MP3 (Filipi 4):
Mobile (Low Quality) - CD (High Quality)

 <<  Filipi 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran