Alkitab Mobile SABDA
[VER] : [NIAS]     [PL]  [PB] 
 <<  Galatia 3 >> 

1He ya'ami talifusõ banua Galatia! Si lõ tõdõtõdõ ami! Lõ ta'ila haniha zi no mamaelungu ya'ami? No ubotokhi sibai ba dõdõmi geluaha wa'amate Keriso andrõ ba rõfa!

2Mi'ombakha'õ we khõgu: Hadia moroi ba wolo'õ oroisa wa no mitema mege Geheha Lowalangi, ba ma bõrõ wa no mirongo Duria Somuso Dõdõ andrõ si otarai Lowalangi ba mamati khõ Keriso?

3Hana ami wa lõ tõdõtõdõ! No ba Geheha Lowalangi mibõrõtaigõ wa'aurimi si bohou andrõ, ba hana iada'e wa mi'alui wamo'ahonoa moroi ba wa'abõlõmi samõsa?

4Hadia zayazaya gõlõ fefu zi no mitõrõ andrõ? Lõ wa tola zayazaya gõlõ!

5Ibe'e Geheha-Nia khõmi Lowalangi, ba wanga'asogõ fa'abõlõ sahõlihõli dõdõ ba khõmi. Hadia, Ifalua Lowalangi da'õ, bõrõ wolo'õmi huku agama, ba ma bõrõ wa no mirongo Duria Somuso Dõdõ andrõ ba wamati khõ Keriso?

6No si mane nisura bakha ba Mbuku Ni'amoni'õ sanandrõsa khõ Gaberahamo, "Mamati Gaberahamo khõ Lowalangi, ba bõrõ wamatinia andrõ, Itema ia Lowalangi si mane niha samalua somasi Lowalangi."

7Ba ya'aboto sa'ae ba dõdõmi, wa niha sindruhu ma'uwu Gaberahamo, ya'ia niha samati khõ Lowalangi.

8No ofõna i'ila Buku Ni'amoni'õ, wa Lowalangi zamali'õ niha si tenga niha Yahudi atulõ khõ Lowalangi na mamati ira khõ-Nia. No ofõna mu'ombakha'õ khõ Gaberahamo Duria Somuso Dõdõ andrõ ba wawu'usa li da'e, "Moroi ba khõu, Ifahowu'õ dania Lowalangi fefu soi niha ba gulidanõ."

9Mamati Gaberahamo, ba tefahowu'õ ia. Si manõ gõi niha samati fefu, tefahowu'õ ira awõ Gaberahamo.

10Niha solo'õ huku agama, no so barõ wangelifi. Noa sa so ba Mbuku Ni'amoni'õ, "Dozi niha si lõ molo'õ fefu Huku Agama si no so bakha ba zura, niha da'õ ni'elifi Lowalangi!"

11Samõsa lõ gõi niha satulõ khõ Lowalangi, bõrõ wolo'õ huku agama. Da'õ no mu'oroma'õ bakha ba Mbuku Ni'amoni'õ, "Ha niha si faduhu tõdõ khõ Lowalangi, irege sõkhi mangawuli gamakhaitania khõ Lowalangi, da'õ zauri!"

12Ba tenga moroi ba wamati modanedane huku agama andrõ. Bakha ba Mbuku Ni'amoni'õ no musura, wa haniha zolo'õ huku agama, da'õ zauri ba huku agama andrõ.

13No I'efa'õ ita Keriso moroi ba wangelifi huku agama andrõ. Ifalua da'õ ba wanehegõ Ya'ia ni'elifi salahida. Bõrõ no musura ba Mbuku Ni'amoni'õ, "Ni'elifi dozi niha si mate nitaw̃i ba dõla geu."

14Ifalua zi manõ, ena'õ howuhowu si no Ifabu'u Lowalangi khõ Gaberahamo, tebe'e gõi ba niha baero. Ba zi manõ, ya'ita gõi samati khõ Lowalangi, tatema Geheha andrõ si no Ifabu'u Lowalangi.

15He ya'ami ira talifusõ! Da ube'e dumaduma moroi ba lala wa'auri sero ma'õkhõ. Na lalau fawu'u li niha, ba fawu'usa li da'õ no mu'aro'õ, ba samõsa gõi lõ niha si tola mowu'ai fawu'usa li andrõ, ba ma sonõnõ hadia ia gõi khõnia.

16Fawu'usa li Lowalangi, ba no Iw̃a'õ khõ Gaberahamo ba ba ma'uwunia. Lõ musura ba Mbuku Ni'amoni'õ "ba khõ ndra ma'uwu Gaberahamo", eluahania niha sato. Nisura ba da'õ ya'ia "ba khõ ma'uwumõ", eluahania ha samõsa niha, ya'ia Keriso andrõ.

17Sedõna uw̃a'õ, ya'ia da'e: No fawu'u li Lowalangi, ba no ofõna mu'a'aro'õ. Huku agama nibe'e ba zi õfa ngaotu a tõlu ngafulu fakhe aefa da'õ, tebai iwu'ai zi no mu'a'aro'õ andrõ awõ wa itayaigõ wawu'usa li Lowalangi andrõ.

18Na buala Lowalangi andrõ modanedane ba huku agama, ba tenga buala amabu'ula li da'õ. Ba hiza, bõrõ me no Lowalangi zi no fawu'u li khõ Gaberahamo, andrõ wa I'amualagõ Lowalangi da'õ khõnia.

19Na si manõ, hadia guna wa tebe'e huku agama andrõ? Fanema li ya'ia da'õ, wa tenõnõ wame'e huku andrõ ba wangoroma'õ olalõw̃a niha gulidanõ. Fa'amoguna huku agama andrõ ba ha irugi we'aso ma'uwu Gaberahamo andrõ, si no mutõtõi ba gamabu'ula li Lowalangi khõ Gaberahamo. Mala'ika zama'ema huku agama andrõ, nifa'ema zi samõsa niha.

20Na si manõ, lõ tola lõ dombua fetaro zi so, awena moguna samõsa zama'ema. Ba hiza, lõ moguna khõ Lowalangi zama'ema, bõrõ me Ya'ia samõsa zangohalõw̃õgõigõ.

21Hadia, da'õ geluahania wa si fa'udu huku agama faoma amabu'ula li Lowalangi andrõ? Tenga si manõ! Na tebe'e huku agama ena'õ falukha niha wa'auri, ba no satulõ niha khõ Lowalangi, bõrõ huku agama andrõ.

22Ba hiza, si mane niw̃a'õ ba Mbuku Ni'amoni'õ, no tefa'u'u manõ fefu niha barõ mbawa horõ. Da'õ mbõrõ wa amabu'ula li andrõ sodanedane ba wamati khõ Yesu Keriso, tebe'e ba niha samati khõ-Nia.

23Fatua lõ irugi inõtõ ba wa'afaduhu dõdõ khõ Yesu Keriso, no itarogõ manõ ita huku agama; hulõ nikuru ita irege te'oroma'õ wamati andrõ.

24Andrõ bõrõ da'õ, tobali samamaha ya'ita huku agama andrõ irugi we'aso Keriso, ena'õ moroi ba wamati khõ Keriso atulõ ita khõ Lowalangi.

25Iada'e me no inõtõnia mamati niha khõ Keriso, ba tenga sa'ae samamaha huku agama andrõ.

26Bõrõ me mamati ami khõ Yesu Keriso, ba no sambua ami ba khõ-Nia; bõrõ da'õ tobali ami ono Lowalangi.

27Ba no mubayagõ idanõ ami ba dõi Keriso, bõrõ da'õ no mitema mbuabua Keriso ba wa'aurimi.

28Ba lõ sa'ae amaehuta ba gotaluara niha Yahudi faoma si tenga niha Yahudi, sawuyu ba si tenga sawuyu, ira matua ba ira alawe. Ya'ami fefu ha sambua ba khõ Keriso Yesu.

29Na khõ Keriso ami ba no ma'uwu Gaberahamo ami. Bõrõ da'õ ya'ami zanema hadia ia gondrõita si no Ifabu'u Lowalangi.


  Share Facebook  |  Share Twitter

Download Audio MP3 (Galatia 3):
Mobile (Low Quality) - CD (High Quality)

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel