Dual Panel1Aefa da'õ irõi Atena Faulo numalõ ia ba Gorindro.
2Falukha ia ba da'õ samõsa niha Yahudi sotõi Akila, si otarai danõ Wondro. Awena so Akila moroi ba Gitalia, si fao fo'omonia Firisikila. Bõrõ me ifofanõ Kaizaro Kalaudio fefu niha Yahudi moroi ba Roma, wa tohare ira ba Gorindro. Mõi Waulo wamalukhaisi ya'ira,
3torõi ia ba da'õ, falulu halõw̃õ ira, bõrõ me fagõlõ lala wangaluira Waulo, wamazõkhi oloso soguna ba nose.
4Ba ero luo Sabato, mõi Waulo fahuhuo ba gosali ena'õ faduhu dõdõ niha Yahudi awõ niha Yunani khõ Yesu.
5Me larugi Makedonia ira Sila ba Timoteo, i'oguna'õ ginõtõnia fefu Faulo ba wangombakha Turia soroi Lowalangi ba niha Yahudi, wa Yesu andrõ no Razo Sangorifi nifabu'u Lowalangi.
6Ba bõrõ me lõ aetu lalaw̃a ba la'o'aya ia, andrõ wa'i'anotogõ gawugawu ba nukhania Faulo si tobali tandra wamangelama ya'ira ba zala andrõ. Imane, "Na mosikho ami, salami samõsa! I'otarai da'e numalõ ndra'o ba soi bõ'õ si tenga niha Yahudi."
7Irõi ira Faulo ba torõi ia ba nomo ba zinga gosali andrõ. Niha soi bõ'õ si tenga niha Yahudi zokhõ omo andrõ, ba sangomasi'õ Lowalangi ia. Tito Yuso dõi niha andrõ.
8Kerifo, satua gosali awõ nõsi nomonia fefu no si faduhu tõdõ khõ Yesu So'aya. Ba ato nasa niha ba Gorindro tanõ bõ'õ samondrondrongo turia andrõ zi faduhu tõdõ khõ Yesu ba lafabayagõ'õ idanõ ira.
9Samuza me bongi, Imane So'aya khõ Waulo ba gangilata, "Bõi ata'ufi! Hede manõ, bõi bato.
10Fao Ndra'odo khõu. Tebai lalau khõu hadia ia, bõrõ me ato niha khõ-Gu ba mbanua andre."
11Bõrõ da'õ torõi Waulo ba Gorindro dõfi a matonga, ba mamahaõ taroma li Lowalangi ia ba niha.
12Me tobali gubernur ba Nakhaya Galio andrõ, ha sara dõdõ niha Yahudi wolaw̃a Faulo ba wolohe ya'ia ba gõdo wanguhuku.
13Lamane wangadu, "Ifawe'e zato niha andre ena'õ lafosumange Lowalangi, molo'õ oroisa si faehu moroi ba huku Moze!"
14Me itema li ena'õ Faulo, i'anema'õ imane Galio ba niha Yahudi, "He niha Yahudi! Na fangadu andre folaw̃a ba ma si lõ atulõ, ebolo dõdõgu wamondrongo fangadumi.
15Ba hiza, da'e no fasosota sanandrõsa ba wehede, tõitõi ba ba hukuhukumi samõsa! Bõrõ da'õ mibato sa'ae. Lõ fao dõdõgu wamatunõ si mane da'e!"
16Ba ifofanõ ira baero Galio.
17Lara'u Zotene, satua gosali andrõ, labõzi ia fõna meza wanguhuku. Ba lõ ba dõdõ Galio fefu da'õ.
18Aefa da'õ ara nasa torõi Waulo ba Gorindro. Aefa da'õ i'angonaisi niha samati ba da'õ, moloyo ia si fao Firisikila ba Akila numalõ ba Ziria. Ba Kengekirea, itõwõ mbunia Faulo, nifotuwunia bõrõ wawu'usa linia khõ Zo'aya.
19Me larugi Nefeso, irõi Wirisikila ba Akila Faulo, mõi ia bakha ba gosali ba fahuhuo ia ba niha Yahudi si so ba da'õ.
20La'andrõ khõnia ena'õ torõi ia khõra nasa, ba hiza lõ omasi ia.
21Ba hew̃a'ae si manõ, me mofanõ ia, imane, "Na Itehegõ Lowalangi, mangawuli ndra'o zui ba da'e." Me no aefa iw̃a'õ da'õ, moloyo ia numalõ ba Nefeso.
22Me mõi ia tou ba Kaizarea, numalõ ia ba Yeruzalema ba wangowai banua Niha Keriso ba da'õ, aefa da'õ idõlõ ia numalõ ba Gandriokhia.
23Me no torõi ia ba zi hawa'ara ba da'õ, mofanõ ia ba we'amõi ba mbanua Galatia ba Ferigia ba wanga'aro'õ tõdõ niha samati ba da'õ.
24Gasagasa da'õ, tohare ba Nefeso samõsa niha Yahudi si tumbu ba Alesandria, sotõi Afolo. Sonekhe wahuhuosa ia ba satuatua ba nõsi Mbuku Ni'amoni'õ,
25ba no tefahaõ ba wa'aboto ba dõdõ ba wamahaõ sanandrõsa khõ Yesu. I'oigõ dõdõnia ba ihaogõ wamahaõ sanandrõsa khõ Yesu, hew̃a'ae famayagõ idanõ khõ Yohane zaboto ba dõdõnia.
26Fahuhuo Afolo ba gosali si fao fa'abarani. Ba me larongo wamahaõnia ira Firisikila ba Akila, la'ohe ia ba nomora. Lahaogõ wangombakha khõnia zabõlõ atulõ sanandrõsa ba nifakhoi Lowalangi ba wangorifi niha khõ Yesu.
27Aefa da'õ omasi mõi Afolo ba Nakhaya. Ba labe'e zura samati khõ Yesu moroi ba Nefeso, lafa'ohe'õ khõ ndra talifusõ ba Nakhaya ena'õ latema'õ Afolo faoma fa'omuso dõdõ. Ba me irugi Nakhaya Afolo, oroma wa moguna watolosania ba niha sato si faduhu tõdõ khõ Yesu bõrõ wa'ahakhõ dõdõ Lowalangi.
28Ba wa'atuatuania, ikalaisi Afolo ndra niha Yahudi ba wahuhuosa. I'oroma'õ moroi ba Mbuku Ni'amoni'õ wa Yesu andrõ no Razo Sangorifi si no mufabu'u.