Dual Panel1Ya'ami banua Lowalangi si so ba Kolose si lõ farõi ba si ha sambua ba khõ Keriso! Ya'odo, Faulo, sinenge Yesu Keriso, -- si no Ituyu Lowalangi -- awõ dalifusõ andrõ Timoteo, madõnadõna wa falukha ami wa'ebua dõdõ ba fa'ohauhau dõdõ khõ Namada Lowalangi.
2(1:1)
3No marongo wamatimi khõ Yesu Keriso ba fa'omasimi mbanua Lowalangi fefu. Da'õ mbõrõ na inõtõ mangandrõ ndra'aga salahimi, lõ mamalõmalõ ma'andrõ saohagõlõ khõ Lowalangi, Ama Zo'aya ya'ita Yesu Keriso.
4(1:3)
5Mamati ami ba so khõmi wa'omasi, bõrõ me mitõtõna hadia zi no Ihõnagõ Lowalangi ba zorugo khõmi. No mirongo zanandrõsa ba da'õ, me te'ombakha'õ khõmi Duria Somuso Dõdõ sindruhu andrõ soroi Lowalangi.
6Turia Somuso Dõdõ andrõ soroi Lowalangi teboloso ba gulidanõ ma'asagõrõ, ba no tefahowu'õ wa'auri niha bõrõ Duria Somuso Dõdõ andrõ, si mane si no alua ba wa'aurimi. I'otarai ba mbõrõta me mirongo duria wa'omasi Lowalangi andrõ, ba no fatõfa ba dõdõmi, ba da'õ no tefahowu'õ wa'aurimi.
7Da'õ ni'ombakha'õ Gefafera khõmi, awõma ni'omasi'õ andrõ. Enoni Keriso ia si lõ farõi ba halõw̃õ soguna khõda.
8Moroi khõnia marongo wa'omasimi andrõ soroi ba Geheha Lowalangi, irege mi'omasi'õ mbanua Lowalangi.
9Da'õ mbõrõ wa lõ mabato wangandrõ salahimi, i'otarai me marongo duriami. Ma'andrõ khõ Lowalangi ena'õ I'amualagõ khõmi wa'atuatua ba fa'aboto ba dõdõ Eheha Lowalangi, irege mi'ila hadia zomasi Lowalangi.
10Bõrõ da'õ mifaudugõ ba zomasi Lowalangi gamuatami, ba bõi mifamalõmalõ wangomusoi'õ tõdõ-Nia, irege ba ngawalõ hadia ia fefu mi'owua mbuabua si sõkhi. Ba ena'õ monõnõ gõi wa'aboto ba dõdõmi Lowalangi.
11Ena'õ ba wa'abõlõ soroi Lowalangi andrõ solakhõmi te'abõlõ'õ ami, ba wanaha ngawalõ wamakao, si fao fa'ebolo dõdõ ba fa'omuso dõdõ
12awõ wangandrõ saohagõlõ khõ Nama. Bõrõ me Ama andrõ zama'anõ ya'ami wanema hadia ia zi no Ihõnagõ Lowalangi ba mbanua-Nia ba gamatõrõw̃a-Nia si no muhaga.
13No I'efa'õ ita Lowalangi ba wa'abõlõ zogõmigõmi, I'ohe ita ba wa'abõlõ wamatõrõ Nono ni'omasi-Nia andrõ.
14Ba Ono-Nia andrõ zangefa'õ ya'ita; eluahania no te'efa'õ fefu horõda.
15Lowalangi ba lõ oroma, ba hiza Yesu Keriso zi no famaedo Lowalangi si tola oroma ba niha. Me lõ mu'a'asogõ fefu hadia ia, ba no so Keriso si no sia'a ba nifazõkhi fefu.
16Ba khõ-Nia sa Ifazõkhi fefu hadia ia Lowalangi, he si so ba zorugo awõ zi so ba gulidanõ, soroma ba si lõ oroma, fao gõi geheha sabõlõ ba samatõrõ. Fefu hadia ia ba no bõrõ Keriso wa tefazõkhi, ba oi ba khõ Keriso.
17Me lõ si so fefu hadia ia, ba no ofõna so Keriso. Ba bõrõ Ia gõi wa so ba nahiania fefu hadia ia.
18Ya'ia hõgõ mboto-Nia andrõ, ya'ia mbanua Niha Keriso, bõrõ me Ya'ia zame'e fa'auri ba mbanua Niha Keriso andrõ. Ya'ia nono sia'a, si ofõna ni'orifi moroi ba ngai zi mate, ena'õ ha Ya'ia manõ ni'ofõnai'õ moroi ba danõ bõ'õ fefu.
19Lowalangi samõsa zomasi, ena'õ fefu hadia ia zi so khõ Lowalangi, tesõndra gõi ba fahõna khõ Nono-Nia.
20Ba khõ Nono andrõ gõi, I'atulõ'õ Lowalangi fefu hadia ia mangawuli ba khõ-Nia -- he si so ba gulidanõ, ba he gõi si so ba zorugo. Lowalangi zamalua da'õ fefu ba wa'amate Nono-Nia ba rõfa.
21Mefõna ba no arõu ami khõ Lowalangi. Mi'uduni Ia, bõrõ gamuatami ba era'erami si lõ sõkhi.
22Iada'e, ba wa'amate Nono-Nia, no I'atulõ'õ ami Lowalangi ba khõ-Nia, irege sõkhi mangawuli. Ba zi manõ tola mu'ohe ami fõna Lowalangi, me no te'amoni'õ ami, safusi, ba si lõ sinegu.
23Bõrõ da'õ ena'õ lõ farõi ami ba wamati ba aro ba danedane wamati andrõ. Bõi tebulõ ami ba wanõtõna si no mube'e khõmi me luo mitema Duria Somuso Dõdõ andrõ soroi Lowalangi. Turia Somuso Dõdõ andrõ te'ombakha'õ ba niha fefu ba gulidanõ ma'asagõrõ. Ba da'õ gõi tobali enoni ndra'odo, ya'odo andre Faulo.
24Iada'e omuso dõdõgu ba wanaha famakao andre soguna khõmi. Me famakao andre si no so ba mbotogu, no ba wobõnõkhi hadia nasa zambõ ba wamakao Keriso andrõ salahi mboto-Nia, ya'ia mbanua Niha Keriso.
25No Ifatenge ndra'o Lowalangi tobali enoni ba mbanua-Nia ba soguna khõmi. Lõ tola lõ u'ombakha'õ Duria andrõ si otarai Lowalangi, ma'afefu;
26ya'ia duria si no tobini andrõ si lõ oroma ba niha fefu gõtõgõtõ wa'ara ba zi lalõ, iada'e ba no te'ombakha'õ ba mbanua-Nia.
27Ba mbanua-Nia I'ombakha'õ Lowalangi ha wa'asõkhi ba ha wa'amolakhõmi zi no tobini andrõ khõ-Nia ba soi niha ma'afefu. Si tobini andrõ ya'ia: Ba wa'aurimi so Keriso, ba da'õ tola fao ami wanandra lakhõmi Lowalangi.
28Keriso da'õ ni'ombakha'õma misa dozi niha. Mafarou dõdõra ba mafahaõ ira fefu, faoma fa'atuatua si so khõma. Ohitõ dõdõma ya'ia ena'õ dozi niha tola te'ohe fõna Lowalangi, si mane niha si no mo'ahonoa ba ngawalõ wa'alowalangi, me no ha sambua ba khõ Keriso.
29Ba wanõndra da'õ u'abõlõ'õ ndra'o wohalõw̃õ. Uforege wangohalõw̃õgõi si fao ma'afefu wa'abõlõgu nibe'e Keriso khõgu, si no mohalõw̃õ ba wa'aurigu.