Alkitab Mobile SABDA
[VER] : [NIAS]     [PL]  [PB] 
 <<  Lukas 1 >> 

1Teofilo ni'omasi'õ, No ato niha sanandraigõ manura ba mamõfõ'õ waõwaõ si no alua ba khõda.

2Lasura molo'õ fanutunõ niha si no mangila samõsa waõwaõ salua andrõ i'otarai mbõrõta, ba aefa da'õ lafazaewe duria andrõ.

3Ba iada'e, ya'ugõ talifusõ nifosumange, bõrõ me no uhaogõ wamareso ba uzofuzofu i'otarai mbõrõta, andrõ uw̃a'õ tõdõgu, sõkhi na usura sambua wamoturia si tofõfõ khõu.

4Ulau zi manõ, ena'õ aboto ba dõdõu fefu zindruhu si no mufahaõ ya'ugõ.

5Me no tobali Razo Herode ba danõ Yudea, so samõsa gere sotõi Zakharia. Si fao ba ngenoli gere Abia ia. Fo'omonia sotõi Elisabe, nga'õtõ gere gõi.

6Fa'auri zi darua andrõ no sangomusoi'õ tõdõ Lowalangi. La'o'õ fefu goroisa awõ huku Lowalangi.

7Lõ hadõi khõra ono bõrõ me lõ tola motanõmõ niha khõ Gelizabe, mendrua manõ me no atua ira.

8Samuza ma'õkhõ, me tefaudu ginõtõ wohalõw̃õ ba ngenoli gere ma'uwu Gabia, ihalõ halõw̃õ fa'a'ere Zakharia fõna Lowalangi.

9Si mane si to'õlõ nilau ndra ere, lalau fadahõdahõ ba wangahonogõi da'õ. Ba aekhu khõ Zakharia wanga'i halõw̃õ fe'amõi ba Nomo Zo'aya, awõ wanunu kumõyõ ba da'õ.

10Mangandrõ niha sato, lalau muzizio gasagasa ginõtõ wanunu kumõyõ andrõ.

11Ba ginõtõ da'õ so samõsa mala'ika sangoroma'õ ya'ia khõ Zakharia. No muzizio mala'ika andrõ ba gambõlõ meza nahia wanunu kumõyõ.

12Me i'ila mala'ika andrõ Zakharia, tokea ia ba ata'u.

13Imane mala'ika andrõ khõnia, "Bõi ata'ufi, Zakharia! No Itema wangandrõu Lowalangi. Mo'ono wo'omou Elizabe, samõsa nono matua. Lõ tola lõ'õ Yohane be'e tõinia.

14Somuso tõdõ ndra'ugõ, ba ato niha somuso tõdõ na no tumbu nono andrõ dania!

15Tobali sebua ia wamaigi Lowalangi. Tebai ibadu nagu awõ duo. No nifatõrõ Geheha Lowalangi ia i'otarai wa'atumbunia.

16Ato niha Gizera'eli ni'ohenia mangawuli khõ Lowalangi, So'aya ya'ira.

17Tobali ia nifatenge Zo'aya sabõlõ ba si so kuaso si mane Elia. I'atulõ'õ nama khõ nononia, ba niha si lõ molo'õ idõnia'õ mangawuli ba lala satulõ. Ba zi manõ no ihõnagõ sambua mbanua si no muhaogõ khõ Zo'aya."

18Isofu Zakharia khõ mala'ika andrõ, "Hewisa u'ila wa alua zi manõ? No atua ndra'o awõ wo'omogu."

19Itema li mala'ika andrõ, "Gaberieli ndra'odo. Enoni Lowalangi ndra'o ba Ya'ia zamatenge ya'o ba wangombakha turia somuso dõdõ andrõ khõu.

20Fefu niw̃a'õgu lõ tola lõ'õ alua ba ginõtõ si no Ihonogõi Lowalangi. Ba hiza, bõrõ me lõ faduhu dõdõu, tebai humedehede dania ndra'ugõ; tobali ndra'ugõ si lõ hede irugi ginõtõ alua fefu zi no uw̃a'õ andre."

21Gasagasa da'õ, labazebaze'õ Zakharia niha sato. Ahõlihõli dõdõra hana wa'ara sibai ia ba Nomo Zo'aya.

22Me mõi ia baero, tebai fahuhuo ia khõra. Lõ aetu ibe'e dandra faoma tangania, bõrõ me tobali si lõ hede ia. Ba aboto ba dõdõ niha sato wa no i'ila gangilata bakha ba Nomo Zo'aya.

23Me no awai halõw̃õnia ba Nomo Zo'aya, mangawuli Zakharia ba nomo.

24Lõ ara aefa da'õ, manabina Gelizabe fo'omonia, i'iagõ nomo lima waw̃a wa'ara.

25Imane, "Ba gafuriata Itolo ndra'o So'aya ba Iheta wa'ailagu."

26Me no õnõ waw̃a dabina Gelizabe, Ifatenge Lowalangi mala'ika Gaberieli ba mbanua Nazareta, ba danõ Galilea.

27Tefatenge Gaberieli ba da'õ, ba wolohe turia khõ nono alawe, sotõi Maria. No fatunanga nono alawe andrõ khõ nono matua, sotõi Yosefo, nga'õtõ Razo Dawido.

28Ba mõi mala'ika andrõ khõ Maria imane, "Ya'ahowu ndra'ugõ nifahowu'õ Zo'aya! Ya mutolo'õ So'aya!"

29Tokea Maria wamondrongo niw̃a'õ mala'ika andrõ, ba manofunofu dõdõnia, hadia geluaha wangowai andrõ.

30Imane mala'ika andrõ khõnia, "Bõi ata'ufi Maria, bõrõ me no ni'omasi'õ Lowalangi ndra'ugõ.

31Manabina dania ndra'ugõ, ba mo'ono ono matua, ba lõ tola lõ'õ õbe'e tõi-Nia Yesu.

32Tobali dania Salaw̃a Ia ba lafotõi Ia Ono Lowalangi Fondrege Zalaw̃a. Ba So'aya Lowalangi dania zame'e khõ-Nia dadaoma si mane tua-Nia Razo Dawido.

33Samatõrõ ma'uwu Yakobo dania Ia ba wa'arazo-Nia irugi zi lõ aetu. Ba si lõ tebulõbulõ wa'arazo-Nia."

34Imane Maria khõ mala'ika, "Hewisa wa tola alua zi manõ? Ono alawe na ndra'odo."

35Itema linia mala'ika andrõ, "So dania Geheha Lowalangi khõu, ba Ilumõ'õ ndra'ugõ fa'abõlõ Lowalangi. Da'õ mbõrõ wa labe'e tõi nono andrõ Ni'amoni'õ, Ono Lowalangi.

36Ba tõngõni da'e: No õnõ waw̃a manabina gõi Gelizabe andrõ si tenga bõ'õmi, hew̃a'ae lamane niha si lõ ono ia awõ wa no atua ia.

37Lõ si tebai khõ Lowalangi."

38Aefa da'õ imane Maria, "Enoni Zo'aya ndra'odo andre; ya'alua khõgu fefu zi mane niw̃a'õu." Aefa da'õ irõi Maria mala'ika andrõ.

39Lõ ara aefa da'õ numalõ Maria ba zi sambua banua ba Yudea tanõ ba hili.

40Mõi ia ba nomo Zakharia. Me mõi ia ba nomo andrõ i'owai Gelizabe.

41Ba me irongo Elizabe wangowai Maria, maliw̃a nono si so ba dabina Gelizabe. Ba Ihawui Gelizabe andrõ Eheha Lowalangi.

42Mu'ao ia imane, "Nifahowu'õ ndra'ugõ moroi ba gotalua ndra alawe bõ'õ fefu! Nifahowu'õ nono ni'adonogõu dania!

43No nifahowu'õ Zo'aya ndra'o me mõi khõgu nina Zo'aya ya'o.

44Me urongo wangowaimõ, ba maliw̃a nono andre ba dabinagu bõrõ wa'omuso dõdõ.

45Ya'ahowu ndra'ugõ, me faduhu dõdõu wa alua niw̃a'õ Zo'aya andrõ khõu!"

46Imane Maria, "Isuno Zo'aya tõdõgu,

47ba owuawua dõdõgu me Lowalangi Zangorifi ya'o.

48Bõrõ me Itõrõ tõdõ-Nia ndra'o, sawuyu-Nia si numana! I'otarai da'e, fefu niha law̃a'õ somuso tõdõ ndra'o.

49Bõrõ me Lowalangi Fondrege Zabõlõ zamalua sahõlihõli dõdõ khõgu. Ni'amoni'õ dõi-Nia.

50Ihakhõsi tõdõ dozi niha sangata'ufi Ya'ia, gõtõgõtõ wa'ara.

51Faoma tanga-Nia Sabõlõ Ifazaewe niha si fayaw̃a, Ibali'õ zayazaya gõlõ fefu ni'era'era dõdõra.

52Iheta razo moroi ba dadaomara ba I'alaw̃a'õ niha side'ide.

53I'abusoi'õ zolofo faoma si sõkhi fefu ba Ifofanõ niha si kayo lõ zaozao.

54Ibe'e watolosa ba niha Gizera'eli, enoni-Nia, molo'õ fawu'usa li-Nia khõ ndra tuada.

55Lõ olifu Zo'aya wawu'usa li-Nia fa'akhõ dõdõ khõ Gaberahamo awõ ma'uwunia irugi zi lõ aetu."

56Torõi Maria khõ Gelizabe mato tõlu waw̃a wa'ara, awena mangawuli ia ba nomonia.

57Irugi baw̃a Gelizabe wo'ono. Madono ia ono matua.

58Me larongo ira si falazi omo awõ ndra talifusõnia wa'ebua dõdõ Zo'aya khõ Gelizabe, fao ira gõi wa'omuso dõdõ awõnia.

59Me irugi w̃alu bongi wa'ebua nono, mõi ira ba wamoto ya'ia. Omasi ira labe'e tõi nono andrõ Zakharia si mane tõi namania,

60ba imane ina nono andrõ, "Lõ'õ! Lõ tola lõ'õ Yohane labe'e tõinia."

61Lamane khõnia, "Lõ hadõi ba gotalua ndra talifusõu zotõi si manõ."

62Faoma kode, lasofu khõ Zakharia hadia dõi somasi ia ibe'e khõ nononia andrõ.

63I'andrõ gara wanura Zakharia ba isura, "Yohane dõinia." Oi ahõlihõli dõdõra fefu.

64Ba i'anema'õ tola muhede Zakharia ba isuno Lowalangi.

65Oi ata'u zi falazi omo khõnia, ba tehõngõ duria andrõ fefu ba danõ hili Yudea.

66Fefu niha samondrongo da'õ ba oi manofunofu bakha dõdõra, "Hadia tobali nono andrõ dania?" Noa sa Itolo ia So'aya.

67No Ifatõrõ Eheha Lowalangi Zakharia, ama nono andrõ, andrõ wa ifa'ema goroisa Lowalangi. Imane,

68"Tasuno Zo'aya Lowalangi soi Gizera'eli. No tohare Ia ba wangorifi banua-Nia ba ba wangefa'õ ya'ira.

69Ibe'e khõda zangorifi si fahõna fa'abõlõ, nga'õtõ Dawido enoni-Nia.

70Me fõna ba zama'ele'õ nifili-Nia, no Ibe'e wawu'usa li-Nia So'aya.

71Wa I'efa'õ ita moroi ba nemalida, ba moroi ba wa'abõlõ niha si fatiu tõdõ khõda.

72Ba zi manõ I'oroma'õ wa'ahakhõ dõdõ-Nia ndra tuada, ba Ifatõrõ gamabu'ula li-Nia ni'amoni'õ.

73No fahõlu Ia khõ duada Aberahamo, ba Ifabu'u wangefa'õ ya'ita moroi ba danga nemalida, ena'õ lõ ata'u ita we'amõi enoni-Nia.

74(1:73)

75Itehe khõda wolulu fa'aurida fõna-Nia awõ wangomusoi'õ tõdõ-Nia ba zi sandrohu fa'aurida.

76Ya'ugõ, onogu, nifotõi dania Sama'ele'õ khõ Lowalangi Fondrege Zalaw̃a. Ofõna Ifatenge ndra'ugõ So'aya ba wamokai lala khõ-Nia.

77Awõ wangoroma'õ ba mbanua-Nia wa te'orifi ira dania, na no I'efa'õ horõra Lowalangi.

78Sahakhõ tõdõ Zo'aya ya'ita ba solomasi; mõi Ia ba wangorifi ya'ita. Hulõ haga luo si tumbu ba zahulõ wongi,

79si manõ Ia, Ibe'e haga-Nia ba niha fefu si so ba zogõmigõmi awõ zi so ba wa'ata'u. Ifasao ita ba lala saekhu ba wa'ohahau dõdõ."

80Itugu ebua ba itugu abõlõ Geheha nono Zakharia. Torõi ia ba danõ si mate, irege irugi inõtõ iforoma'õ ia ba soi Gizera'eli.


  Share Facebook  |  Share Twitter

Download Audio MP3 (Lukas 1):
Mobile (Low Quality) - CD (High Quality)

 <<  Lukas 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel