Alkitab Mobile SABDA
[VER] : [NIAS]     [PL]  [PB] 
 <<  Lukas 11 >> 

1Samuza ma'õkhõ, Ilau mangandrõ Yesu ba zi sambua nahia. Me no aefa mangandrõ Ia, samõsa moroi ba gotalua ndra nifahaõ-Nia sanguma'õ, "He So'aya, fahaõ ndra'aga ba wangandrõ si mane Yohane Samayagõ Idanõ andrõ samahaõ ira nifahaõnia."

2Imane khõra Yesu, "Na mangandrõ ami, ba mimane, 'He Ama, ya tefosumange dõi-Mõ andrõ ni'amoni'õ; Ya'ugõ zamatõrõ ya'aga.

3Be'e khõma gõ soguna ero ma'õkhõ.

4Be'e aefa khõma horõma, si manõ gõi ndra'aga ma'efa'õ zala niha si so sala khõma. Ba bõi lulu ndra'aga ba wanandraigõ.'"

5Imane khõ ndra nifahaõ-Nia Yesu, "Na so ba gotaluami zi mõi ba nomo nawõnia ba zi talu mbongi, ba imane, 'He talifusõ, be'e nifalaligu tõlu ngawua roti,

6bõrõ me so nawõgu sikoli si mõi ba nomogu, ba lõ khõgu õnia!'

7Na imane awõu ni'ondrasimõ andrõ wanema li, moroi si bakha ba nomonia, 'Bõi busi dõdõgu! No mukusi mbawa ndruhõ ba ya'o awõ ndraonogu no mõrõ. Tebai maosodo wame'e khõu hadia ia.'"

8"Hewisa?" Imanõ wanohugõ fehede-Nia Yesu. "Uw̃a'õ khõmi, lau! Ba hew̃a'ae si fahuwu khõnia ndra'ugõ, ba lõ maoso ia ba ibe'e khõu hadia ia. Ba hiza, bõrõ me lõ aila ndra'ugõ ba lõ aetu'aetu õ'andrõ khõnia, ba maoso ia sa'atõ, ibe'e khõu hadia ia zoguna khõmõ andrõ.

9Ba Uw̃a'õ khõmi: Mi'angandrõ ba tebe'e khõmi, mi'angalui ba misõndra, mibõkõbõkõ ba tebokai khõmi mbawa ndruhõ.

10Dozi sangandrõ ba itema; sangalui ba isõndra ba samõkõmõkõ bawa ndruhõ, ba tebokai khõnia.

11Ba haniha ba gotaluami zatua same'e ulõ khõ nononia, na i'andrõ gi'a?

12Ba ma zui same'e tongo, na i'andrõ gadulo?

13Gofu hewisa wa'alõsõkhimi, ba mi'ila sa'atõ mibe'e zi sõkhi ba ndraonomi. Ba lõ mendrua manõ Namami andrõ si so ba zorugo. Ibe'e Geheha-Nia ba niha sangandrõ khõ-Nia!"

14Samuza ma'õkhõ Ifofanõ wa'abõlõ zi lõ sõkhi moroi ba niha si lõ hede Yesu. Me mõi baero wa'abõlõ zi lõ sõkhi, ba ibõrõtaigõ muhede niha andrõ. Oi ahõlihõli dõdõ niha sato,

15ba so õsa zanguma'õ, "Tola Ifofanõ wa'abõlõ zi lõ sõkhi me no ibe'e khõnia wa'abõlõ Belesebu, bohalima wa'abõlõ zi lõ sõkhi andrõ."

16So gõi niha bõ'õ sanandraigõ Yesu. La'andrõ khõ Yesu ena'õ Ilau dandra sahõlihõli dõdõ si tobali tandra wa no soroi khõ Lowalangi Ia.

17Ba I'ila Yesu gohitõ dõdõra. Andrõ Imane khõra, "Na aboto zi sambua soi tobali mongawangawawa ba fa'udu'udu, ba ha ba zadudu soi da'õ. Ba na arasa zi sambua ngambatõ ba mowa'udu'udu, ba ha ba zadudu gõi wongambatõ da'õ.

18Si manõ gõi ba gamatõrõw̃a Zatana; na so wa'udusa ba gotaluara, ba adudu dania gamatõrõw̃a andrõ. Ba miw̃a'õ, Ufofanõ wa'abõlõ zi lõ sõkhi bõrõ wa'abõlõ moroi ba Mbelesebu.

19Na si manõ, heza moroi wa'abõlõ na lafofanõ wa'abõlõ zi lõ sõkhi ira nifahaõmi? Nifahaõmi andrõ zangoroma wa lõ atulõ niw̃a'õmi!

20Ufofanõ wa'abõlõ zi lõ sõkhi bõrõ wa'abõlõ Lowalangi. Eluahania da'õ no Ibõrõtaigõ wamatõrõ-Nia Lowalangi ba gotaluami.

21Na so samõsa zabõlõ, si no mamake fangõna ba wanaro omonia, ba lõ te'ala zi so khõnia.

22Ba na so zi tõra abõlõ moroi khõnia sangalani ya'ia, ba da'õ zorabu fefu fangõna si no we'ewe'e dõdõ zokhõ omo andrõ, awõ wa ifaosafaosa fefu gamagama nirabunia.

23Niha si lõ fao awõ-Gu, ba no si fa'udu khõ-Gu, ba niha si lõ mangozara awõ-Gu, ba no niha samakiko halõw̃õ-Gu!"

24"Na no aheta wa'abõlõ zi lõ sõkhi moroi ba zi samõsa niha, ba mowaõwaõ wa'abõlõ zi lõ sõkhi andrõ ba danõ si no okõlikõli, wangalui nahia wolombase, ba lõ isõndra nahiania. Bõrõ da'õ, imane, 'Da mangawulido ba nomo si no urõi!'

25Ba me ifuli ia, ba i'ila nomo andrõ no muhaogõ ba tofõfõ.

26Ba mõi ia mukaoni dafitu tõ wa'abõlõ zi lõ sõkhi tanõ bõ'õ sabõlõ afaito moroi khõnia. Mõi ira bakha ba niha andrõ, ba torõi ira ba da'õ. Ba tobali tedou wa'alõsõkhi niha andrõ."

27Me no aefa Iw̃a'õ zi manõ Yesu, ba muhede samõsa ndra alawe khõ-Nia moroi ba gotalua niha sato, imane, "Sindruhundruhu ohahau dõdõ ndra alawe sangadonogõ ba samaenu Ya'ugõ!"

28Itema linia Yesu, "Ya'ia, ba abõlõ ohahau dõdõ nasa niha samondrongo Taroma li Lowalangi ba samalua ya'ia!"

29Me lahurufai Yesu niha sato, Itohugõ huhuo-Nia, Imane, "No fondrege wa lõ sõkhi niha ba ginõtõ da'õ. La'andrõ ena'õ lafaigi dandra sahõlihõli dõdõ. Ba ma'ifu lõ tandra sahõlihõli dõdõ nibe'e khõra, baero dandra andrõ khõ Yona sama'ele'õ.

30Si mane fa'atobali Yona andrõ tandra sahõli dõdõ ba mbanua Niniwe, si manõ gõi Nono Niha andrõ tobali tandra sahõlihõli dõdõ ba niha ba gõtõ da'e.

31Ba luo safuria, maoso dania Ratu moroi Raya fao awõ niha ba gõtõ da'e, ba la'angadugõ ira. Bõrõ me ha ba wamondrongo famahaõ Zalomo satuatua andrõ, itõrõ danõ sarõu moroi ba wondrege danõ Ratu andrõ. Ba no so ba da'e zabõlõ ebua moroi khõ Razo Salomo!

32Ba luo safuria, maoso dania zowanua ba Niniwe fao awõ niha ba gõtõ da'õ, ba la'angadugõ ira bõrõ me no lafalalini gera'erara banua Niniwe andrõ moroi ba horõra, me fahuhuo Yona khõra. Ba hiza so ba da'e zabõlõ ebua moroi khõ Yona!"

33"Lõ sanunu fandru ba samini'õ fandru andrõ awõ zamalugõ ya'ia faoma karaw̃a. Tatu ibe'e wandru andrõ ba nahania, ena'õ la'ila hagania niha si mõi yomo.

34Fandru mboto hõrõ. Na ohahau hõrõmi, ba mohaga fefu zi sageu botomi. Ba na hawuõ hõrõmi, ba ogõmigõmi zi sageu botomi.

35Bõrõ da'õ, mi'angenanõi, fabõi ogõmigõmi haga andrõ si so khõmi.

36Na mohaga mbotou ma'asambua, ba ma'ifu lõ sogõmigõmi, ba muhaga mbotou ma'asambua si mane nihagaini haga wandru."

37Me no aefa fahuhuo Yesu, ikaoni la samõsa Farizai'o, wemanga ba nomonia. Ba mõi Yesu wemanga ba da'õ.

38Ba ahõlihõli dõdõ Warizai'o andrõ me i'ila lõ mombanõ Yesu me manga Ia molo'õ amakhoita agama.

39Bõrõ da'õ Imane So'aya khõnia, "Si to'õlõnia ya'ami ira Farizai'o, misasai mako awõ wiga ha tanõ baero, ba bakha ba dõdõmi afõnu fa'abe'e dõdõ ba fa lõ sõkhi.

40Niha si lõ tõdõ ami! Hadia tenga Lowalangi zamazõkhi he tanõ baero ba he tanõ bakha andrõ?

41Si so yaw̃a ba mako awõ ba wigami andrõ, da'õ zi lõ tola lõ mibe'e ba niha si numana. Na milau zi manõ awena tola ehao fefu.

42Alai ami, Farizai'o! Bua wangahalõmi, nila ba fangoyo, awõ zinanõ faramasa bõ'õ, mibe'e zi sambua ni'ofulu khõ Lowalangi, ba fa'atulõ awõ wa'omasi khõ Lowalangi lõ ba dõdõmi. Sindruhunia da'õ zinangea milau, awõ wa lõ mi'olifugõ'õ ami danõ bõ'õ gõi.

43Alai ami, Farizai'o! Omasi ami nahia wedadao soadu ba gosali, ba omasi ami nifosumasumange misa ba fasa.

44Alai ami! Hulõ lewatõ si lõ tandratandra ami, nihundrahundra niha bõrõ me lõ la'ila!"

45Samõsa moroi ba gotalua ndra sangila amakhoita zanguma'õ khõ Yesu, "He Guru, ba wanguma'õ si manõ, no õ'o'aya ndra'aga."

46Itema linia Yesu, "Alai ami gõi ira sangila amakhoita! Mi'andrõ ngawalõ zabua famalua ba mibe'e gamakhoita sabua, ba ya'ami samõsa ma'ifu lõ omasi mitolo niha ba wamalua ya'ia.

47Alai ami! Mifazõkhi lewatõ si sõkhi khõ ndra sama'ele'õ, si no labunu ira tuami.

48Ba da'õ oroma wa fao dõdõmi ba nilau ndra tuami andrõ; duhu, ya'ira zamunu ira sama'ele'õ mege ba ya'ami zamazõkhi lewatõ nifogowe khõ ndra sama'ele'õ andrõ.

49Andrõ wa Imane fa'atuatua Lowalangi, 'Ufatenge ndra sama'ele'õ awõ dengetenge-Gu khõra; labunu õsa ba lafakao!'

50Ilau zi manõ Lowalangi ena'õ nihuku niha ba zi sagõtõ andre, bõrõ me no lafalua wamunu ira sama'ele'õ andrõ fefu i'otarai mbõrõta danõ,

51i'otarai wamunu Habeli irugi wamunu Zakharia, salua ba gotaluara naha wame'e sumange Nomo Zo'aya. Ya faduhu dõdõmi: Fefu niha ba gõtõ da'e lõ tola lõ nihuku dania bõrõ da'õ fefu.

52Alai ami, sangila amakhoita! Na la'irõ'õ khõmi nono kusi famokai mbawa ndruhõ wa'atuatua, ba lõ omasi ami we'amõi bakha wangalui fa'atuatua andrõ. Miba'agõ i niha somasi mõi bakha!"

53Me irõi nahia andrõ Yesu, ba abao sibai dõdõ ndra sangila amakhoita awõ ndra Farizai'o khõ-Nia. Ibõrõtaigõ ladõni li-Nia ena'õ oya I'ombakha'õ khõra hadia ia.

54Ba gotalua da'õ gõi lahaogõ wangosisi'õ Ya'ia ba wangalui hadi ia zi sala ba wehede-Nia.


  Share Facebook  |  Share Twitter

Download Audio MP3 (Lukas 11):
Mobile (Low Quality) - CD (High Quality)

 <<  Lukas 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran