Dual Panel1Me luo da'õ so zanutunõ khõ Yesu niha nibubunu Wilato ba Galilea, me labe'e zumange khõ Lowalangi.
2Itema lira Yesu ba nidunõdunõ khõ-Nia andrõ, Imane, "Ba niha nibubunu si manõ, hadia miw̃a'õ tõdõmi wa da'õ dandra wa'abõlõ ebua horõra moroi ba niha Galilea tanõ bõ'õ?
3Tenga! Mitõngõni, na lõ mifalalini gera'erami, ba si mate gõi ami dania, si mane ya'ira.
4Hewisa gõi niha si felew̃alu si mate ba Ziloa, me ilangõ ira malige? Miwalinga da'õ dandra wa abõlõ ebua horõra moroi ba niha sato si so ba Yeruzalema?
5Tenga! Ba mitõngõni, na lõ mifalalini gera'erami, ba si mate gõi dania ami si mane ya'ira."
6Aefa da'õ Itutunõ khõra Yesu gamaedola andre, "So samõsa zokhõ ara ba kabunia. Mõi ia wangalui bua ara andrõ ba ma'ifu lõ isõndra.
7Andrõ imane ba zohalõw̃õ ba kabunia, 'Faigi, no tõlu fakhe mõimõido ba da'e wangalui bua ara andrõ, ba sambua ngawua lõ nisõndragu. Obõ dõla geu andrõ. Hadia guna so ia ba da'õ, alimagõ danõ khõnia!'
8Imane sohalõw̃õ ba kabu andrõ, 'He Tuha, akha auri dõfi tõ geu andrõ. Da ufasui wogao tanõ ba ulõlõ mbõrõnia.
9Ma atõ dania mowua ia ba ndrõfia. Ba na lõ'õ sa'ae ba hana na õfa'obõ'õ ia.'"
10Samuza luo Sabato, mamahaõ Yesu ba gosali.
11So ba da'õ ndra alawe si no felew̃alu fakhe mofõkhõ, meno ira'u ia fa'abõlõ zi lõ sõkhi si ra'iõ. No akõi mbotonia, tebai adõlõ.
12Ikaoni ndra alawe andrõ Yesu, me I'ila ia, Imane, "He Ina, dõhõ ndra'ugõ iada'e!"
13Itufa tanga-Nia ndra alawe andrõ, ba i'anema'õ adõlõ mbotonia, isuno Lowalangi.
14Mofõnu zatua gosali andrõ, me mamadõhõ fõkhõ Yesu ba luo Sabato. Imane ba niha si so ba da'õ, "Õnõ ngaluo mohalõw̃õ ita; mi'ae'e ba ngaluo da'õ ena'õ tefadõhõ ami, bõi ba luo Sabato!"
15Itema li zatua nomo wangandrõ andrõ Yesu, Imane, "Niha samini tõdõ ami! Ba luo Sabato sa ba mi'efa'õ zaw̃imi ba kalidemi moroi ba kandra, ba mi'ohe ira baero ba wamadu idanõ.
16Ba da'e so ndra alawe nga'õtõ Gaberahamo, si no felew̃alu fakhe wa'ara nibõbõ Gafõkha. Hadia tebai te'efa'õ mbõbõnia andrõ ba luo Sabato?"
17Te'ailasi fefu nudu Yesu ba wanema'õ-Nia li andrõ, ba niha sato tanõ bõ'õ sa oi omuso dõdõra ba wamaigi tandra sahõlihõli dõdõ nilau Yesu.
18Isofu Yesu, "Na mamatõrõ Lowalangi andrõ, hewisa wo'amaedolagõ ya'ia?
19Fo'amaedolagõ ya'ia hulõ danõmõ zaw̃i nihalõ zi samõsa niha itanõ ba nowinia. Tumbu danõmõ andrõ tobali tõla geu ba lafazõkhi gazunira fofo ba ndrahania."
20Samuza tõ Isofu Yesu, "Na mamatõrõ Lowalangi andrõ, hadia Ube'e famaedonia?
21Famatõrõ Lowalangi andrõ hulõ laru nihalõ ndra alawe, nifarukania ba zi tõlu lite hamo, irege kamba ma'afefu."
22Ba wofanõ Yesu numalõ ba Yeruzalema, Itõrõ mbanua sebua awõ mbanua side'ide, mamahaõ Ia ba da'õ.
23So niha sanofu khõ-Nia, "He Ama, hadia ha ma'ifu dania ni'orifi ba mbanua furi?" Itema li Yesu,
24"Miforege wangalui lala wanõrõ bawa ndruhõ side'ide andrõ. Bõrõ da'õ mitõngõni! Ato niha somasi manõrõ da'õ ba tebai ira.
25Samuza inõtõ dania maoso zokhõ omo andrõ ba iduhõ mbawa ndruhõnia. Ba so ami baero ba mibõrõgõ mibõkõbõkõ mbawa ndruhõ, mimane, 'He Tuha, bokai khõma mbawa ndruhõ!' Itema li sokhõ omo andrõ, 'Lõ u'ila he moroi ami!'
26Mitema li dania, 'No manga ba mamadu ndra'ugõ awõma. Ba no mamahaõ ndra'ugõ ba mbanuama!'
27Ba ifuli imane sokhõ omo andrõ, 'Lõ u'ila he moroi ami, mi'ofanõ moroi ba da'e, solau si lõ atulõ ami fefu!'
28Na mi'ila dania ndra Aberahamo, Iza'aki ba Yakobo awõ ndra sama'ele'õ fefu no somuso tõdõ ba Mbanua si Bohou khõ Lowalangi andrõ, ba me'e dania ami ba wanaõgõ fa'afõkhõ me nifofanõ ami baero!
29Ba tohare dania niha moroi ba gatumbukha ba moroi ba gaekhula, moroi yõu ba moroi raya, oi owuawua dõdõ ba Mbanua si Bohou khõ Lowalangi andrõ.
30Niha safuria iada'e tobali si fõfõna dania. Ba si fõfõna iada'e tobali safuria dania."
31Me inõtõ da'õ gõi, ba tohare ndra Farizai'o khõ Yesu lamane, "Bõi Iagõ da'e! Ae'e ba nahia tanõ bõ'õ, me omasi ibunu Ndra'ugõ Herode."
32Itema lira Yesu, "Ae'e ombakha'õ khõ niha si lõ guna andrõ, 'Ufofanõ wa'abõlõ zi lõ sõkhi ba Ufadõhõ zofõkhõ mahemolu, ba ba ngaluo si tõlu, U'asiwaisi fefu halõw̃õ-Gu.'
33Ba hew̃a'ae si manõ lõ tola lõ Utohugõ wofanõ-Gu ma'õkhõ, mahemolu ba ba zi dua wongi, bõrõ me lõ sõkhi na labunu zama'ele'õ baero Yeruzalema.
34He Yeruzalema, he Yeruzalema! Samunu ira sama'ele'õ ndra'ugõ! Ba sanebu kara dengetenge Lowalangi ndra'ugõ irege mate! No hame'uga kali omasi Ndra'o U'owuloi fefu zowanua khõu hulõ zifagelo sangowuloi ononia barõ gafinia, ba lõ omasi ami!
35Bõrõ da'õ lõ sa'ae I'o'awõgõ ami Lowalangi. Ya'aboto ba dõdõmi, i'otarai iada'e lõ õ'ila Ndra'o sa'ae, irugi inõtõ õw̃a'õ, 'Ya'ahowu zi so andrõ ba dõi Zo'aya.'"