Alkitab Mobile SABDA
[VER] : [NIAS]     [PL]  [PB] 
 <<  Lukas 14 >> 

1Samuza me luo Sabato, mõi manga Yesu ba nomo Warizai'o. Lahaogõ sibai wangosisi'õ Yesu ba da'õ niha sato.

2Ba tohare samõsa zofõkhõ sabao talu, ahe awõ dangania oi agabao.

3Isofu Yesu khõ ndra sangila amakhoita awõ ndra Farizai'o si so ba da'õ, "Molo'õ huku agama khõda, hadia tola ba ma zui lõ'õ mamadõhõ fõkhõ ba luo Sabato?"

4Ba lõ latema li-Nia ira sangila amakhoita awõ ndra Farizai'o. Lõ manõ hedehedera. Aefa da'õ Ikaoni niha andrõ Yesu Ifadõhõ, aefa da'õ mofanõ ia.

5Aefa da'õ Imane Yesu khõra, "Na so samõsa ba gotaluami zi so iraono ma zui si so sageu saw̃i, na aekhu ba mba'a ba luo Sabato, hadia lõ mi'aliokõ wanõbi yaw̃a ono andrõ ma zui saw̃i andrõ ba zi ma'õkhõ da'õ gõi?"

6Tebai latema li Yesu ira sangila amakhoita awõ ndra Farizai'o ba niw̃a'õnia andrõ.

7I'ila Yesu wa so dome samili nahia sabõlõ sõkhi. Bõrõ da'õ Ibe'e khõra fefu wamahaõ da'e.

8"Na lakaoni ami ba walõw̃a, ba bõi midadao ba dadaoma nifosumange. Bõrõ, ma so nikaoni niha andrõ sabõlõ nifosumange moroi khõmi.

9Bõrõ da'õ i'ondrasi ndra'ugõ sogaoni ya'ugõ andrõ ba iw̃a'õ khõu, 'Bologõ dõdõu, so dome sangiagõ naha andre.' Bõrõ da'õ si fao fa'aila mõi ami mudadao furi.

10Tobali, na lakaoni ami, abõlõ sõkhi na mudadao ami ba nahia tanõ furi; ena'õ na i'ila ndra'ugõ sokhõ omo andrõ ba imane, 'He talifusõ, aine, dadao ba nahia sabõlõ sõkhi andre.' Ba tefosumange ami fõna dome bõ'õ andrõ fefu.

11Bõrõ me fefu niha sangebua'õ ya'ia, da'õ ni'ide'ide'õ dania, ba niha sangidengide'õ ya'ia, da'õ ni'ebua'õ dania."

12Aefa da'õ Imane Yesu khõ zokhõ omo, "Na õkaoni niha wemanga ba zi laluo ba ma ba zi bongi, ba bõi kaoni ndra si fahuwu khõu ma ira talifusõu, ma si fahatõ omo khõu niha si kayo. Bõrõ me lakaoni gõi dania ndra'ugõ, ba no õtema zulõ.

13Na õlau gowuloa, ba kaoni niha si numana, niha sombuyumbuyu, niha sakelakela, niha sau'a,

14ba si gõna howuhowu dania ndra'ugõ. Bõrõ me tebai lasulõni dania khõu wa'asõkhi dõdõmõ andrõ. Lowalangi sa dania zanulõni khõu fa'asõkhi dõdõmõ andrõ ba ginõtõ tesusugi mangawuli moroi ba ngai zi mate niha si sõkhi andrõ."

15Me irongo wehede Yesu andrõ si samõsa awõra ba wemanga si so ba da'õ, imane khõ Yesu, "Moharazaki sibai niha si manga awõ Lowalangi dania na tohare Ia ba wa'arazo-Nia!"

16Imane Yesu ba niha andrõ, "Samuza ma'õkhõ so niha samalua owasa sebua, ba ato nikaoninia niha.

17Me no irugi inõtõ labõrõtaigõ gowasa, ifatenge ndra enoninia khõ ndra tome si no ikaoni ba wanguma'õ, 'Mi'aine, no awai fefu.'

18Ba ya'ira fefu, oi lazarazara wangandrõ fa'ebolo dõdõ. Imane si samõsa ba genoni andrõ, 'Awena u'õli khõgu kabu, ba omasi ndra'o mufaigi kabu andrõ. U'andrõ khõu bologõ dõdõu.'

19Imane gõi tanõ bõ'õ, 'Awena u'õli lima fasa zaw̃i, ba omasido utandraigõ ua zaw̃i andrõ. Bologõ dõdõu.'

20Imane zui tanõ bõ'õ, 'Awena mangowaludo, bõrõ da'õ tebai mõi ndra'o.'

21Ifuli ia enoni wangombakha fefu da'õ khõ zokhõ ya'ia. Mofõnu sibai zokhõ ya'ia andrõ. Imane khõ genoninia, 'Mi'alio'õ, mi'ae'e ba waerua lala awõ ba newali mbanua misa. Mi'ohe ba da'e zi numana, sombuyumbuyu, ba sagau'a awõ zakelakela.'

22Imane enoni andrõ, 'He Tuha, no ma'o'õ niw̃a'õu, ba oya nasa nahia si lõ so'õsi.'

23Imane khõ zawuyunia, 'Mi'ae'e ba lala sebua awõ ba gotalua mbanua misa ba ba fasa, mikaoni niha ena'õ afõnu nomogu.

24Mitõngõni! Samõsa lõ ba gotalua dome andrõ nikaonigu zorasoi fa'ami gõ ba gowasagu andre!'"

25Ba ato niha si faofao khõ Yesu. Ifaigi ira Yesu ba Imane khõra,

26"Na so niha si mõi khõ-Gu, ba na lõ irõi namania awõ ninania, fo'omonia, awõ ndraononia, talifusõnia ira matua, ba talifusõnia ira alawe, ba tebai tobali nifahaõ-Gu ia.

27Niha si lõ omasi molu'i rõfania ba wolo'õ Ya'o, tebai tobali nifahaõ-Gu.

28Na so ba gotaluami zomasi mamazõkhi malige, tatu ilau ua dumadao wangerai ha'uga zoguna, ena'õ aboto ba dõdõnia hadia tobõnõ gefenia wangasiwai malige andrõ ba ma lõ'õ.

29Bõrõ na tebai i'asiwai, hew̃a'ae no ifazõkhi danedane, ba na la'ila dania niha fefu halõw̃õ andrõ ba la'iki'õ ia.

30Lamane dania, 'E, faigi atõ, ilau wotomo niha andre, ba hiza tebai i'asiwai!'

31Na so samõsa razo sokhõ fulu ribu zaradadu ba wanuwõ razo bõ'õ sokhõ dua wulu ribu zaradadu, ba tatu ihaogõ ua wangerangera hadia abõlõ ia wolaw̃a udunia andrõ.

32Na aboto ba dõdõnia wa no ambõ fa'abõlõnia, tatu fatua so ba zarõu nudunia andrõ, ifatenge zinengenia wangandrõ ena'õ te'atulõ'õ ira."

33Ba gafuriata Imane Yesu, "Si manõ gõi ami. Samõsa lõ solo'õ Ya'o na lõ Itehegõ fefu hadia ia."

34"Si sõkhi nasio andrõ. Ba na taya wa'asi'asinia, ba hadia so lala wangasini ya'ia mangawuli?

35Lõ hadõi gunania sa'ae, he ba nowi ba he ba wangatabõ sinanõ. Nitibo'õ sa'ae nasio andrõ. Na so dalingami, ba mihaogõ wamondrondrongo!"


  Share Facebook  |  Share Twitter

Download Audio MP3 (Lukas 14):
Mobile (Low Quality) - CD (High Quality)

 <<  Lukas 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran