Alkitab Mobile SABDA
[VER] : [NIAS]     [PL]  [PB] 
 <<  Lukas 17 >> 

1Imane Yesu khõ ndra nifahaõ-Nia, "So dania zanandraw̃aisi niha wamazõkhi horõ. Ba alai niha samobõrõ da'õ!

2Abõlõ sõkhi na lataw̃i ba mbaginia gara wondrekha, ba latibo'õ ia bakha ba nasi. Abõlõ sõkhi zi manõ moroi na lalau horõ niha side'ide andre bõrõ ia.

3Mi'angelama! Na ilau horõ talifusõu, tegu ia. Na mangesa dõdõnia, efa'õ horõnia.

4Na ilau khõu horõ fitu kali ba zi ma'õkhõ, ba ero'ero ilau da'õ, ba mõi ia khõu imane, 'U'andrõ wa'ebolo dõdõ,' ba efa'õ khõnia."

5Lamane ira sinenge khõ Zo'aya Yesu, "He So'aya, a'aro'õ wamatima."

6Itema li So'aya, "Na so wamatimi si zai tanõmõ zaw̃i, tola miw̃a'õ ba dõla geu andre, 'Ya'adõni ndra'ugõ ba tetanõ'õ ba nasi!' ba lõ tola lõ i'o'õ wehedemi tõla geu andrõ."

7"Na so zawuyumi samaku ba laza ma zui sokubaloi biribiri, ba na mangawuli ia moroi ba nowi, hadia õw̃a'õ khõnia, 'Aine lau manga?'

8Tatu tenga! Õmane na'i khõnia, 'Fa'anõ gõgu. Onukha si sõkhi ba base'õ fatua manga ba mamadudo; awena dania õlau manga.'

9Lõ moguna tesuno zawuyu andrõ na no i'o'õ niw̃a'õ zokhõ ya'ia, lõ?

10Si manõ gõi ami. Na no mi'o'õ fefu zi no law̃a'õ khõmi, mimane wanguma'õ, 'Sawuyu si lõ guna ndra'aga, hadia zinangea halõw̃õma da'õ nihalõma.'"

11Me Itohugõ wofanõ-Nia Yesu numalõ ba Yeruzalema, Itõrõ nola danõ Zamaria awõ danõ Galilea.

12Me Itõrõ zi sambua banua, la'ondrasi Ia dafulu zofõkhõ bou auri. Lalau muzizio ba zarõu,

13ba mu'ao ira lamane, "He Yesu! He Ama, Guru! Hakhõsi tõdõ ndra'aga!"

14Me Ifaigi ira Yesu, Imane khõra, "Mi'ae'e khõ gere, ena'õ lafareso mbotomi." Ba dalu lala, dõhõ zobou auri andrõ fefu.

15Me i'ila si samõsa ba gotaluara no dõhõ ia, mangawuli ia isuno Lowalangi ba wa'omuso dõdõ.

16Mangalulu ia fõna Yesu ba i'andrõ saohagõlõ khõ-Nia. Niha Zamaria niha andrõ.

17Imane Yesu khõnia, "Hadia tenga dafulu ami zi dõhõ? Heza zi dasiw̃a niha tõ?

18Hana wa ha niha baero andre zangawuli ba wangandrõ saohagõlõ khõ Lowalangi?"

19Aefa da'õ Imane Yesu ba niha andrõ, "Faoso, ba ofanõ. Famatimõ zamadõhõ ya'ugõ."

20So õsa ndra Farizai'o sanofu khõ Yesu ha wa'ara dania tohare wamatõrõ Lowalangi. Itema li Yesu, "Famatõrõ Lowalangi ba lõ Ibõrõgõ faoma tandratandra ni'ila hõrõ niha,

21irege law̃a'õ niha, 'Aine faigi, ya'e ia!' ma zui, 'Hiza ia ba da'õ!' Bõrõ me no Ibõrõtaigõ wamatõrõ-Nia khõmi."

22Aefa da'õ Imane Yesu khõ ndra nifahaõ-Nia, "So ginõtõ dania omasi sibai ami wamaigi ngaluo Nono Niha andrõ ba hiza tebai mi'ila.

23Lamane dania khõmi niha, 'Faigi atõ ba da'õ!' ma zui, 'Faigi atõ ba da'e!' Bõi mi'ae'e baero wangalui ya'ia.

24Si mane gari mbanua si haga i'otarai zi fõfõ numalõ ba mbalõ si fõfõ, si manõ wa'atohare Nono Niha ba ginõtõnia.

25Ba si fõfõna sibai, tefakao Ia ba lõ latema Ia niha ba gõtõ andre.

26Si mane me inõtõ Noakhi luo no, si manõ gõi dania ginõtõ na lafaduhu'õ Nono Niha.

27Lalau manga ba mamadu niha, ba mangowalu; si manõmanõ zalua irege mõi Noakhi bakha ba nowo ba tohare molõ samunu niha andrõ fefu.

28Si manõ gõi me inõtõ Loti. Manga ba mamadu niha, mamawa ba mowõli, mananõ sinanõ ba mamazõkhi omo.

29Ba hiza, me irõi Zodoma Loti, tohare galitõ ba balera moroi ba mbanua samunu ya'ira fefu.

30Si manõ gõi dania zalua na luo te'oroma'õ Nono Niha.

31Ba ngaluo andrõ, bõi mõi tou niha si no so ba dete zagõ ba wanga'i gamagamania. Si manõ gõi niha si so ba nowi, bõi ya mangawuli ba nomo.

32Mitõrõ tõdõmi hadia zi no alua khõ wo'omo Loti!

33Niha sobelegõ fa'aurinia, da'õ zi lõ manõndra fa'auri sindruhundruhu. Ba hiza niha si taya fa'auri da'õ zanõndra fangorifi.

34Ya faduhu dõdõmi: ba mbongi andrõ, ba gotalua zi darua si mõrõ ba naha wemõrõ, samõsa ni'ohe ba samõsa nirõi.

35Moroi ba gotalua zi darua ira alawe sanutu fakhe, samõsa ni'ohe ba samõsa tõ nirõi.

36[Moroi ba gotalua ndra matua si so ba nowi, samõsa ni'ohe dania, ba samõsa tõ nirõi.]"

37Lasofu ira nifahaõ Yesu, "Heza alua da'õ So'aya?" Itema li Yesu, "Ba nahia si so amatela, ba da'õ owulo wofo si manga amatela."


  Share Facebook  |  Share Twitter

Download Audio MP3 (Lukas 17):
Mobile (Low Quality) - CD (High Quality)

 <<  Lukas 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel