Dual Panel1No ahatõ ginõtõ Gowasa Roti si Lõ Mu'aisõni laru nifotõi Fasa.
2La'alui lala ira ere sebua awõ guruguru agama niha Yehuda ba wamunu Yesu; ba hiza ata'u ira niha sato.
3Mõi Gafõkha khõ Yuda nifotõi banua Gariota, samõsa moroi ba gotalua nifahaõ Yesu si felendrua.
4Mõi Yuda ba mamagõlõ ia khõ ndra ere sebua awõ hõgõ zanaro Nomo Zo'aya hewisa lala wame'e Yesu ba dangara.
5Omuso sibai dõdõra ba lafabu'u wame'e kefe khõnia.
6Fao gõi dõdõ Yuda ba ibõrõtaigõ i'alui ginõtõ si sõkhi wame'e Yesu ba dangara, ba zi lõ la'ila niha.
7Irugi ngaluo Gowasa Roti si Lõ Mu'aisõni laru, ba wanaba biribiri õ Wasa.
8Andrõ Ifatenge Wetero ba Yohane Yesu. Imane khõra, "Mi'ae'e mifa'anõ gõ ba Wasa khõda."
9Lasofu lamane, "Heza omasi'õ mafa'anõ, Ama?"
10Imane Yesu, "Mitõngõni, na mirugi fasa, falukha ami ba da'õ samõsa zolohe rumbi so'õsi idanõ. Mi'o'õ ia numalõ ba nomo si mõi ia,
11ba mimane ba zokhõ omo andrõ: Imane Guru, 'Heza nahia U'a Wasa si fao ira nifahaõ-Gu?'
12Ituturu khõmi dania sokhõ omo andrõ sambua lote sebua, si no so fefu gamagama. Mifa'anõ fefu hadia ia ba da'õ."
13Mõi Wetero ba Yohane ba lasõndra fefu faudu si mane ni'ombakha'õ Yesu. Aefa da'õ lafa'anõ gõ ba Wasa.
14Me irugi inõtõ wemanga gõ ba Wasa, mõi mudadao Yesu awõ nifahaõ-Nia.
15Imane khõra, "Omasi sibai Ndra'odo U'a Wasa andre si fao ya'ami fatua lõ tefakao Ndra'o!
16Bõrõ, ya faduhu dõdõmi: Lõ'õ sa'ae dania U'a gõ andre irege Ifalua geluaha walulusa manga andre Lowalangi na inõtõ Ifasindro wamatõrõ-Nia."
17Aefa da'õ Ifazaw̃a mako nagu Yesu, I'aohasi gõlõ Lowalangi, ba Imane, "Mitema ba mibagibagi;
18Uw̃a'õ khõmi, i'otarai da'e lõ'õ sa'ae Ubadu nagu irege Ibõrõtaigõ wamatõrõ-Nia Lowalangi."
19Aefa da'õ Ihalõ roti Yesu. Ba me aefa I'aohasi gõlõ Lowalangi, Iboboto roti andrõ; ba Ibe'e khõra, Imane: "Boto-Gu da'e [nibe'e khõmi. Milau zi mane ba wanõrõ tõdõ Ya'odo."]
20[Si manõ gõi me no aefa manga, Ibe'e mako nagu andrõ khõra, Imane, "Mako nagu andre amabu'ula li Lowalangi si bohou, ni'a'aro'õ faoma do-Gu -- do saduwa soguna khõmi."]
21"Ba hiza, mifaigi! So zi manga mbõligu ba meza andre!
22Mate dania Nono Niha si mane si no Ihonogõi Lowalangi; ba alai niha si manga mbõli-Nia!"
23Ibõrõtaigõ faoma lasofu khõ nawõra, haniha ba gotaluara zamalua da'õ.
24Ba gotalua ndra nifahaõ Yesu alua wasosota sangalui haniha zabõlõ ebua ba gotaluara.
25Imane khõra Yesu, "Lafatõrõ nono mbanuara razo si lõ aboto ba dõdõ Lowalangi ba gulidanõ andre si fao famakao, ba samatõrõ andrõ lafotõi 'Sobelegõ Ono Mbanua'.
26Ba ya'ami tebai si manõ. Haniha zabõlõ ebua ba gotaluami akha tobali sabõlõ ide'ide, ba si tobali sondrõnia'õ, akha tobali sawuyu.
27Haniha zabõlõ ebua: Niha si dadao wemanga ba meza, ma zui si mõi enoninia? Tatu si dadao andrõ. Ba hiza tobali Ndra'o sawuyu ba gotaluami.
28Bakha ba wamakao-Gu, lõ aetu so ami awõ-Gu.
29Si mane fame'e nama khõ-Gu famatõrõ, si manõ gõi wame'e-Gu khõmi.
30Fao ami awõ-Gu ba wa'omuso dõdõ na no tobali Razo Ndra'odo. Ba tebe'e khõmi dadaoma ba wamatõrõ fanguhuku ba zi felendrua mado soi Gizera'eli."
31"He Simoni, he Simoni, fondrondrongo! No tetehõgõ khõ Gafõkha wanandraigõ ya'ami fefu, hulõ zohalõw̃õ ba danõ sangeheta bõra moroi ba guliho.
32Ba hiza no mangandrõ-Do salahiu, Simoni, ena'õ lõ taya wamatiu. Ba na no mangawuli ndra'ugõ khõ-Gu, õfofa'abõlõ ndra talilfusõu."
33Itema li Fetero, "He So'aya, utehegõ mõido ba gurunga ba matedo awõ Zo'aya!"
34Imane Yesu, "Ya faduhu dõdõu, Fetero, fatua lõ miwo manu bongi andre, no medõlu õ'osilõ'õgõ Ndra'o."
35Aefa da'õ Imane Yesu, "Luo no me Ufatenge ami me lõ Utehegõ mi'ohe kofekofe, kandrekandre ba badagahe, hadia no ambõ ami hadia ia?" Lamane, "Ma'ifu lõ'õ."
36Imane Yesu, "Ba iada'e sokhõ kofekofe awõ kandrekandre akha i'ohe; ba si lõ fõda, akha ifamawa mbarunia sebua ba wowõli fõda.
37Bõrõ, ya faduhu dõdõmi! Lõ tola lõ alua khõ-Gu zi no musura ba ayati Mbuku Ni'amoni'õ, 'Law̃a'õ niha si lõ sõkhi Ia.' Bõrõ me hadia nisura ba Mbuku Ni'amoni'õ sanandrõsa khõ-Gu alua iada'e."
38Lamane ira nifahaõ Yesu, "He So'aya, faigi so ba da'e dua rozi wõda." Imane Yesu, "No tobõnõ!"
39Irõi mbanua sebua andrõ Yesu ba numalõ Ia ba Hili Zaitu si mane si to'õlõ, ba fao gõi khõ-Nia nifahaõ-Nia.
40Me larugi da'õ, Imane khõra, "Mi'angandrõ ena'õ bõi gõna ami fanandraigõ."
41Aefa da'õ I'arõu'õ Ia ma'ifu moroi khõra, mato dua wulu mete,
42Ibalõduhini danõ ba mangandrõ Ia, Imane, "He Ama, na tola, Õ'arõu'õ moroi khõ-Gu wamakao andre. Ba bõi ya'itõrõ zomasi-Do, ya'alua ba zomasi'Õ, Ama!"
43[Tohare samõsa mala'ika sangabõlõ'õ Ya'ia.]
44[Ata'u sibai Yesu, andrõ I'osindruhugõ wangandrõ. Abõbõi Ia hulõ ndro, sangele tou ba danõ.]
45Me no awai mangandrõ, mangawuli Yesu khõ ndra nifahaõ-Nia. Isõndra no momõrõ, bõrõ wa'abu dõdõ.
46Andrõ Imane khõra, "Hana wa mõrõ ami? Mifaoso ba mi'angandrõ fa bõi gõna ami fanandraigõ."
47Me fahuhuo na Yesu, tohare ngawawa niha nidõnia'õ Yuda, nifahaõ Yesu. Mõi Yuda khõ Yesu ba aefa da'õ i'uma Yesu.
48Ba Imane khõnia Yesu, "He Yuda, hadia faoma fa'umasa õ'a mbõli Nono Niha?"
49Me la'ila zalua andrõ ira nifahaõ Yesu si so ba da'õ, lamane, "He So'aya, hadia malau khõra wõda andre?"
50Samõsa ba gotaluara zamõzi sawuyu gere sebua faoma fõda irege aetu dalinga kambõlõ zawuyu andrõ.
51Imane Yesu, "Noa da'õ!" Aefa da'õ Ibabaya dalinga zawuyu andrõ ba wamadõhõ ya'ia.
52Imane Yesu khõ ndra ere sebua ba ba zaradadu sanaro ba Nomo Zo'aya, awõ ndra salaw̃a niha Yahudi si tohare ba da'õ wondra'u Ya'ia, "Hana wa tohare ami faoma fõda awõ wagado wondra'u Ya'o, hulõ na samarukhu Ndra'odo andre?
53Ero ma'õkhõ so Ndra'odo ba Nomo Zo'aya, ba lõ mira'u Ndra'o. Ba da'e ginõtõ khõmi mihalõ halõw̃õmi, inõtõ ifatõrõ ami fa'abõlõ zogõmigõmi."
54Lara'u Yesu ba la'ohe ba nomo gere sebua. I'o'õ Fetero moroi ba zarõu.
55Ba dalu golayama so galitõ nibahogõ si holahola ba mõi Wetero ba zinga galitõ andrõ awõ niha sato si dadao ba da'õ.
56Samõsa ba gotalua zawuyu ira alawe sangila me dumadao Wetero ba zinga galitõ; ihaogõ wamaigi Fetero ira alawe andrõ, aefa da'õ imane, "Fao gõi khõ Yesu niha andre!"
57Itimbagõ Fetero. Imane, "Ma'ifu lõ u'ila Niha andrõ!"
58Lõ ara aefa da'õ, samõsa tõ zangila Fetero sanguma'õ, "Samõsa gõi ndra'ugõ ba gotaluara!" Ba itema li Fetero, imane, "Tenga, tenga ya'o!"
59Mato sambua za aefa da'õ, samõsa zanguma'õ, ebua linia, "Sindruhu nifahaõ Yesu niha andre, bõrõ me niha Galilea ia gõi!"
60Itema li Fetero, "Hadia niw̃a'õmõ, lõ aboto ba dõdõgu!" Faudu ba ginõtõ andrõ, fatua muhedehede Wetero, miwo manu.
61Ifakhõlõ Ia Yesu ba I'ila Wetero. Itõrõ tõdõ Wetero niw̃a'õ Zo'aya khõnia, "Fatua lõ miwo manu bongi andre, no tõlu kali õ'osilõ'õgõ Ndra'o."
62Numalõ baero Wetero ba me'e ia adõ'udõ'u.
63La'omai'õ ba labõbõzi Yesu ira niha sanaro Ya'ia.
64Laduhõ hõrõ-Nia ba lasofu khõ-Nia, "Tandraigõ tahõ haniha zamõzi Ya'ugõ?"
65Ba oya nasa wehede fango'aya niw̃a'õra khõ-Nia.
66Me ahulõ wongi, la'ohe Yesu ba naha wanguhuku agama, me no aefa mamagõlõ ira.
67Lamane khõ-Nia, "Ombakha'õ khõma, hadia Razo Sangorifi Ndra'ugõ andre nifabu'u Lowalangi?" Itema li Yesu, "Na U'ombakha'õ khõmi, lõ'õ sa'atõ faduhu dõdõmi.
68Ba na manofu Ndra'odo khõmi, ba lõ sa'atõ mitema li.
69Ba hiza i'otarai da'e, dumadao Nono Niha ba gambõlõ Lowalangi Ama si lõ ambõ fa'abõlõ."
70Lamane fefu, "Na si manõ, hadia Ya'ugõ andre Nono Lowalangi?" Itema li Yesu, "Si manõ wanguma'õmi."
71Lamane, "Lõ moguna sa'ae sasi! No tarongo samõsa moroi ba mbawa-Nia."